HEBEREŊ 1 - JAA TƏMARWAŊ

Pepeŋ waataŋ kel a kaŋ ku Kurmuyuŋa

¹ A jəŋ dayday, Pepeŋ waataŋ kel wəra a kəmoomo də áŋ ku *kaa kə jogte ku mini nuutuŋa kampa ablaw daana də hel daalaŋ-daalaŋ ablaw gəm.

² Səma dər ko bə adoroŋa hebkənaŋ, wə waataŋ kel wəra a áŋ haa ku Kurmuyuŋa. Wə jəŋ kar keɗe haa duuru, wə ŋəmnu minti wə əsə la ciiri keɗe gəm.

³ Aŋke boblo bə sar Pepeŋ keɗe wəra bə gaa-ge guudu suru, kar gə minti aŋ fələy sar tó Pepeŋaŋ, wəra suru dege'-dege'i gəm. Kar kəm lam keɗe haa kir kasi kel gə waatə-waate gə ku gə səɓak-səɓakiŋ. Adordə minti wə pəŋ baymele kə kaŋ wəraŋ, wə ɗeŋ a isi warna apəy na a kasi kemer kə Pep bə minti səɓakiŋ kəəsu keɗeŋ.

Yeesu dəŋaŋ kaa kə digi kə Pepeŋ wəra keɗe

⁴ Bədoona ana, Pepeŋ jəŋ minti Yeesu jəə la bə daŋə-deŋe *kaa kə digi kə tó wəra keɗe, haa damdi sam bə minti wə əynu du dəŋnəy simiy wəra keɗeŋ ana gəm.

⁵ Gud maa mo, kel gə minti Pepeŋ wəətənəy minti: «Tam haa kormon faɗi, ten koloŋ dayna haa bəram faɗi gəm», wə waataŋ teŋ kəya hõy a hulum gud kaa kə digi nuutuŋa ba. Wə waataŋ hõy cəərə hulum bə digi nuutu bə haa kənaŋ ana bə pa minti: «Ten bə ji yaŋ buru, wə bə ji yaŋ kormon.»

⁶ Səma də ko bə minti Pepeŋ haraŋ Kurmuyu bə daŋə-deŋe kar keɗe apəy naŋ, wə minti: «Kaa kə digi katən keɗe kaw awalna la.»

⁷ Kel gə minti Pepeŋ wəətənəy cəərə kaa kə digi nuutuŋa haa kənaŋ, minti: «Yə haa kaa kə joŋre katən; yə damdi kaŋkaw ana daana yə damdi kəsəlɗə cəwa ana.»

⁸ Səma cəərə Kurmuyuŋaŋ, wə minti: «Tam haa Pepeŋ, tam bə isi yaŋ cəərə jaaŋa də kumnaŋa bə faɗnə-faɗna. *Kumna bə minti tam həmuŋ, haa kumna ɗekeriŋ.

⁹ Tam bele haa kel ɗekeriŋ, səma tam wəra bə malə-mele dər baymeleŋ. Gud teŋa ta Pepeŋ, Pep nəmtiŋ gaanam son cəərəma bə əsəm kumna. A ko toŋa ta, wə aynam waaleŋ bə minti wə aŋkənam dəŋaŋ gəlaaram kaayaŋ keɗeŋ.»

¹⁰ Wə waataŋ pa minti: «Barkaŋ, ajew də minti karman kəm paapa bə jəə-ji anə məna baŋ, tam haa hulum bə minti məlaŋ gud ji bə seŋkaŋ, tam də kusrum, tam jəŋ ko bə apəyaŋ də kaasam gəm.

¹¹ Kar teŋ keɗe bə tewe wəra, səma tam toŋ ha'aŋ, tam bə ji yaŋ saksaki. Yə bə tewe kəpaaraŋkaw yaŋ wəra damdi dəməəməŋ tawte wəraŋ ana.

¹² Tam bə həyɗəy yaŋ wəra damdi yə hayɗete dəməəməŋ bə ve warnaŋ ana, tam kole gaalaŋ yaŋ damdi yə kolte dəməəməŋ ana gəm. Səma tam, tam saksaki haa bə məna, laate nəmtiŋ saksaki ajew na gəm.»

¹³ Kel gə minti Pepeŋ wəətənəy minti: «Əsə la cin a kaasən kemera hãã bə minti ten kolə kaa kə acukur nəmtiŋ la wəra kəm kar gə minti tam təytəy wəra kuuriŋ», wə waataŋ teŋ kəya hõy a hulum anə məna gud kaa kə digi nuutuŋa ba.

¹⁴ Kaa kə digiŋ haa kaa kə joŋre kə Pepeŋ təwa, yə a tiiruŋa, daana wə vəənəy bə keye kaa gə minti wə əyəy seere nuutuŋ yaŋ.