GALATIŊ 6 - JAA TƏMARWAŊ

Aŋ kayə kumsəŋ la dər gəəliŋa

¹ Kəsaananti, aŋ fəlaŋ hulum ne guudəŋa bə ji kel kə bayməlaŋaŋ, aŋ kaayaŋ gə minti yaake Tiiru Cetcetaŋ bə ɗe dəərəŋ, aŋ həru la a kəkəy pisiŋa. Səma aŋ həru la də talma sããyaŋ. Tam bə minti hare kumsum a kəkəy pisiŋa ha'aŋ, golə kusrum la pisi kir minti tam a awe dər baymeleŋa bə gəm.

² Aŋ kayə kumsuŋ la adəwaldə kumsəŋa bə hale gəəliŋa. Aŋ jəŋ ne bə ji bədoonaŋ, aŋ doŋ haa *ku gili kə Kristuŋ faɗi.

³ Jəəne minti hulum kəman yaŋ bə ɗiki minti tó paapa boomə-boome baŋ, anaaŋa wə paapa karman toŋ ada ta'i bə paŋ, wə leŋe kusru boobo.

⁴ Pisi duŋ ana ɗaw ha'aŋ, mindi mindi mo golə dər ɗe du la tó də kusru. Wə duunu duru ne pisiŋ, wə waalə la gud joŋre nuutu bə minti wə a juunu, paapa gud bə minti tó dəŋaŋ hulum kəman ŋaanaanə moŋ, ba.

⁵ Mindi mindi mo kir ji haa joŋre bə minti Pepeŋ əynu du tó də kusruŋ.

⁶ Hulum bə minti yə bə hətu a kel kə Pepeŋa, wə ɓarsə kar gə kəəsuŋ la də hulum bə hətuŋ.

⁷ Aŋ asə la wəra cəərəŋa kaŋkaŋ minti: hulum neke bə ji tiniini də Pepeŋ ba. Hulum ɗe a ceme haa karman bə minti wə a ju'unuŋ.

⁸ Jəəne minti hulum toŋ a bə jəəti haa kar gə daw duruŋ gud kusrə áŋ bə hatə-hate də baymeleŋ, karman bə minti wə ɗe a fəluŋ, haa meŋ. Səma wə jəəne bə jəəti haa kar gə minti Tiiru Cetcetaŋ bələy, a bə əyu haa dədərgə də bay teweŋ gəm.

⁹ Bədoona ta, áŋ a geye kas ji bə pisiŋ ba, gud maa mo, áŋ gə minti gəyaŋ baŋ, áŋ bə fele kar pəsaŋ yaŋ bə minti ko bə werke nəkaŋ də neŋ.

¹⁰ Gud teŋa kəya ta, bə minti dər áŋ kəm də falə-feleŋ, áŋ jəə pisi la wəra sar kaŋa keɗe. Áŋ jəw la daŋgeŋ haa sar kəsaanə áŋ gə doo-de gə gud Yeesuŋa faɗi.

Kel gə tewe cəərə kel

¹¹ Aŋ golə jeere toŋ la, wə kəmtəŋ anə ɓətkəw-ɓətkəw. Ten jiirunu haa də kaasən faɗi.

¹² Kaa gə minti bə jəŋ doole dəŋa minti aŋ *camə tantəraŋ la wəra me'iŋ, haa kaa té gə minti golde aŋke kə kaŋ. Yə ji bədoona haa minti té a se gəəli ba. Yə sə a jəə la kəna bə waate kela wəra a kaŋ cəərə me də Kristu a kəbaŋ gə largaŋaŋ, kaŋ sə a ləsəy gəm.

¹³ Kaa té gə minti wəra gə camə-ceme təntəriŋ, paapa bə ɗe gud ku gili kə Moyisiŋa kəm ba anə gadi ɗaw. Yə bele minti aŋ camə tantəraŋ la wəra me'i haa minti té hage sam kusrə té dəərəŋ.

¹⁴ Ten toŋ ha'aŋ, ten hage haa sam me də Barkaŋ náŋ Yeesu Kristu wəra a kəbaŋ gə largaŋa təwa, ten hage sam karman baalaŋ ba. Gud me kə Yeesuŋa tə bə moŋ, kar gə minti bə gole dər kaŋa pəsaŋ cəərə seŋkaŋaŋ, yə paapa bə gole dərəna karman pəda hasi, yə paapa gə əsə-isi kumna cəərəna pəda gəm.

¹⁵ Hulum jəə la nuutu wəra bə jamə-jeme tənturuŋ ɗaw, wə jəə laŋa bay jama ɗaw, teŋ keɗe kəm paapa kel ba. Kel kəmtəŋ haa minti aŋ koloŋ ne máŋ kaa kəmarwaŋ.

¹⁶ Bədoona ta, kaa gə minti əsəŋ ne cəərə kəmtəŋ də kela ta'i kənaŋ, yə haa kaa kə Pep gə gəəzə-gəəziŋ. Doŋ kir minti wə əyəy kəkaɓiŋ la, wə jəə giidu pəsaŋ la siri.

¹⁷ Hõy ajew naŋ, hulum a bi a hoyon pəda, gud maa mo, tarwa də minti ta'-ta'i sarənaŋ, ge dər kaŋ haa minti ten wəra kə Yeesu faɗi.

¹⁸ Kəsaananti, pisi kə Barkaŋ náŋ Yeesu Kristu jəə la dəərəŋ məna-məna keɗe'i. *Amen.