GALATIŊ 5 - JAA TƏMARWAŊ

Aŋ a hare kusrəŋ dər kafkama pəda

¹ Kristu bədəŋ áŋ wəra ku *ku gili kə kaanə Ziwifiŋa minti áŋ a ji kafkam kə karman pəda anə hasi. Bədoona ta, aŋ əsə la wəra ŋəŋ cəərə kusrəŋa, aŋ a yaake kusrəŋ bə hare kafkam pəda.

² Aŋ jeɓrə la wəra pisi. Waataŋ kel haa ten Pol minti: jəəne minti aŋ yaakaŋ kusrəŋ ne minti yə *cəmaŋ tantəraŋ la kəm me'i paŋ, kel teŋ ge dər haa minti joŋre bə minti Kristu juunu wəra cəərəŋaŋ nəkaŋ karman ba.

³ Ten hare bə dogoŋa pa minti: hulum bə minti yaakaŋ kusru ne minti yə jamə tantar tó la kəm paŋ, wə kir de ku giliŋ wəra a kuɗuŋa anə ceme keɗe faɗi.

⁴ Aŋ kaa gə minti bə ɗiki minti aŋ kole yaŋ ɗeker dər Pepeŋa gud de bə ku giliŋ kə Moyisiŋa wəra a kuɗuŋa, aŋ teŋ jəmaŋ adəwaldəŋ wəra də Kristu haa jeme faɗi daana aŋ neke bə fele pisi kə Pepeŋ bə minti wə jəw cəərəŋa pəda gəm.

⁵ Kə are kaa kə Kristuŋ, are wəra gə malə-mele ɗiki də are minti Pepeŋ bə kole are yaŋ wəra ɗeker duru. Wə bə kole are haa gud səɓaki kə Tiiru Cetcetaŋa gud bə minti are doŋ gud joŋre kə Kristu.

⁶ Bədoona taŋ, kə áŋ kaayaŋ gə minti wəra gə tapə-tepe də Yeesu Kristuŋ, tantar áŋ jəəne nuutu wəra də camə-ceme, ɗalba a bay ceme, kel paapa ada ba. Kel kəmtəŋ haa minti áŋ jəə la gə doo-de guudu, kəya áŋ neke yaŋ bə bele kaa kaayaŋa.

⁷ A jəŋ ajew, aŋ a bə ɗe də Kel kə Pepeŋ pisi faɗi. Bə haanaŋ ku wəra hebkəna bə bay ɗe gud gəəziŋa haa mindi mo?

⁸ Pep bə minti mantənaŋ bə ɗe guuduŋ, paapa a kəsar də kel té gə minti haanaŋ kuŋ wəraŋ ba.

⁹ Ku kumti kəman yaŋ bə waate wəra minti: «Siipəŋ anə weseka fe kunti bə halɓə-halɓeŋ faɗi.»

¹⁰ Katən ha'aŋ, Barkaŋ malnan ɗiki dən pisi cəərəŋa. Gud maa mo wə gaanan dərən wəra kaŋkaŋ minti ɗiki dəŋ tapi məna'i də katən. Səma hulum bə minti bə hoyoŋ ɗiki dəŋa cawaŋ, wə jəə la nuutu hulum bə samsam ɗaw, paapa ɗaw, Pepeŋ bə jəw daŋgay du wəra pəraki.

¹¹ Kəsaananti, katən ha'aŋ, kaŋ bə ɗiki haa minti ten bə waate minti kaŋ kir ceme təntəri wəra bə kole kusri ɗeker dər Pepeŋa. Sə a jəə la kəna bədoonaŋ, kaanə Ziwifiŋ sə a ləsan ba. Kel gə minti Pepeŋ kole kaŋ wəra diiri ɗeker gud me kə Yeesuŋa wəra a kəbaŋ gə largaŋa, yə sə a gay warna bə gəm.

¹² Kaa té gə minti lam bə hoyoŋa də kel teŋ cəərə ceme bə tantəraŋaŋ, yə ɗee la a pi kiliini wəra gəm!

¹³ Nəətiŋ ha'aŋ kəsaananti, Pepeŋ mantənaŋ warda haa minti aŋ a ji kafkam kə ku giliŋ pəda. Səma, aŋ a ɗiki minti aŋ paapa kafkam pəda, haa bə ɗe a ji kar anə hayam-hayam damdi kusrə áŋ bə hatə-hate də baymeleŋ bele ana'iŋ, aŋ a ɗiki bədoona ba. Daŋgeŋ ana ɗaw ha'aŋ, aŋ balə kumsəŋ la adəwaldə kumsəŋa daana aŋ kayə kumsəŋ la.

¹⁴ Gud maa mo, ku gili neŋneŋ keɗe wəra bə gaa-ge cuuru giidə ku gili tó məna'iŋa, bə minti waate minti: «Tam balə kumsum la damdi kusrum ana faɗi.»

¹⁵ Aŋ jəəne bə waate kela anə dus-dusi cəərə kumsəŋaŋ, aŋ haa bə bege bə waraŋ ana, gə minti hiti kumsi daana bə palwe kumsi wəra ana gəm. Aŋ ɗəkə la pisi, aŋ raawaŋ ne də kel teŋ bədoonaŋ, aŋ asə la wəra minti aŋ bə ɓalke kumsəŋa wəra haa ɓalke faɗi.

Tiiru Cetcetaŋ daana kusrə áŋ bə hatə-hate də baymeleŋ

¹⁶ Ten bele waataŋ haa minti: aŋ yaakə Tiiru Cetcetaŋa la bə ɗe dəərəŋ. Bədoona kəyaŋ, aŋ bə ɗe a kəkəy bə minti kusrə áŋ bə hatə-hate də baymeleŋ bəluŋ pəda.

¹⁷ Gud maa mo, kel gə minti kusrə aŋ bə hatə-hate də baymeleŋ bələy, yə tepe də té gə minti Tiiru Cetcetaŋ bələy ba. Kel gə minti Tiiru Cetcetaŋ bələy, yə tepe də kusrə náŋ bə gəm. Yə tepe də kumsi anə weseka bə tə gəm, karman bə minti aŋ bele jəw, aŋ neke bə jəw ba.

¹⁸ Səma, jəəne minti aŋ máŋ bə yaake Tiiru Cetcetaŋ bə ɗe dəərəŋ, *ku giliŋ neke bə ape səɓaki cəərəŋa pəda.

¹⁹ Kusrə áŋ bə hatə-hate də baymeleŋ bə minti bə jəətiŋ, wəra də dər áŋ anə pəɗaki. Haa anə ji bə booboŋ daana kel kə zeɓə-zeɓeŋ, anə jəəti bə kel kə jeeɗem-jeeɗem adəwaldə kumsiŋ,

²⁰ anə ke bə awalnaŋ a kar gə minti kaŋ guluy pepe neeteŋ, anə jəəti bə zogoy, anə malte bə dər kumsi wəraŋ, anə kolte bə gəbaŋ də kumsi, anə giidiŋ gə hataŋ gə cəərə kumsəŋ, anə waŋ. Mindi mindi mo golde haa a kusru gəm, yə teke wəra a diri ta'-ta'iŋ, mindi mindi mo ɗe haa gud hulum bə minti kuy də kumsiŋ,

²¹ yə kaa kə həryəm-həryəm, yə kaa kə markete bə anə lam, yə tapte bə jəəti waale bə jəəti hayam-hayama də kumsiŋ, yə jəəti gidiirə baymele baalaŋ-baalaŋ bə teke sar toŋ kəya faɗi. Ten a gaanaŋ kosnoŋ ne wəra ajewa, hebkəna ten hare bə gaŋ kosnoŋa pa minti, kaa gə minti jəəti kumsə kel teŋ kəyaŋ, yə ɗe a ve a *Kumna kə Pepeŋa ba.

²² Səma kar gə minti Tiiru Cetcetaŋ jəy giidə hulumaŋ, yə haa kəna: kaŋ kole wəra bə bele kumsi, yə wəra də waale, yə isi kəkaɓiŋ aduubə di, yə ase mi bə kusri bə ku kel, yə ɗiki də kumsi pisi, yə ji pisi sar kumsi, yə kaa gə minti yə ɗeketi,

²³ yə kaa gə minti sar kumsi sããya, yə kaa gə nakə-neke bə ame kusri. Bə minti kaŋ jəəne bə ji bədoonaŋ, ku gili kəman bə hay kuya wəra cəərə kel teŋa pa pəda.

²⁴ Kaa gə minti teŋ wəra kə Yeesu Kristuŋ, yə ŋoryoŋ kusri bə hatə-hate də baymeleŋ warna haa ŋorye faɗi. Yə ŋoryoŋ wəra haa kar gə bayməlaŋ gə minti yə a bə bələya ablaw gəm. Yə ɓəlnəy wəra apəya də Yeesu a kəbaŋ gə largaŋa.

²⁵ Tiiru Cetcetaŋ ayaŋ dədərgəŋ a áŋ haa tá, haa pisi minti áŋ yaakə la bə ɗe də áŋ.

²⁶ Adəwaldə kumsə áŋa, áŋ a teke cəərə kusrə áŋ apəya ba, áŋ a waate kel kə supi talma a kumsə áŋ ba, áŋ a jəəti sərkə cəərə kumsə áŋa bə gəm.