GALATIŊ 4 - JAA TƏMARWAŊ

¹ Bə gaŋ gud ɗiki dən wəra pisiŋ, aŋ gosə gole la kəm cəərə huluma də kurmuyuŋ. Kurmuyu toŋ haa bə minti ɗe yaŋ hõy a hame begeŋ faɗi gəm. Də bə minti wə kəm caw konceŋ tə bə moŋ, jəəne nuutu minti kar keɗe haa nuutu ɗawmay, wə kəm də caaca haa bə hulum bə joŋre ana gəm, wə saksaki kəm kir kasi buru.

² Kaŋ kəm bə jəw gud kar nuutuŋa, bə jəw guudu gəm, hãã bə minti buru ɗeŋ a ase hi bə nakə-neke bə əyu begeŋ a nuunuŋ.

³ Áŋ gə Ziwifiŋ ha'aŋ, áŋ a jəŋ ajew haa bə kəmar koncoŋ ana gəm, áŋ a paapa wəra cəərə kusrə áŋa ba. Áŋ a jəŋ haa kafkam kas to'osi də cəərə seŋka də minti áŋ a suŋ warda dəərə siŋ.

⁴ Səma, hi bə minti Pepeŋ a ŋəmnuŋ nəkaŋ wəra kəyaŋ, wə gaŋ kurmuyu da faɗi. Wəənu wəra cəərə seŋkaŋa haa həlgə. Wə humuŋ kosoŋ cəərə *ku gili kə kaanə Ziwifiŋa,

⁵ kir minti wə məɗə kaa gə minti a jəŋ wəra kafkam kas ku gili toŋaŋ la wəra daana minti wə kolə áŋ la wəra karmə Pepeŋ.

⁶ Aŋ haa kərmuyu gə gəəzə-gəəzi, gud maa mo wə ayaŋ Tiiru Cetcetaŋ kə kurmuyuŋ ku tarmə áŋa keɗe. Tiiru Cetcetaŋ taŋ ge áŋ bə waate wəra koloŋ minti: «Aba, barən!».

⁷ Bədoona ta, mindi mindi mo adəwaldəŋa paapa kafkam pəda, aŋ haa karmə Pepeŋ ɗaw. Aŋ karmə Pepeŋ tə bə moŋ, kar gə minti Pepeŋ əyəy keɗe a kərmuyuŋ, aŋ bə fələy gəm.

Pol laawe gud kaa kə doo-de gə Galatiŋa

⁸ Aŋ kaanə Galatiŋ, aŋ a dayday ha'aŋ, Pepeŋ a paapa də dərəŋ ba. Aŋ a jəŋ haa kafkam kə kar gə minti aŋ məntəy minti anə pepe kəman, doloy ha'aŋ, yə paapa Pep bə gəəziŋ ba.

⁹ Ana hebkəna bə minti aŋ asaŋ Pepeŋ wəraŋ, ten sə a waate haa kəna minti Pepeŋ asnaŋ wəraŋ ɗaw, bə jəŋ naanaanə minti aŋ haraŋ dərəŋ gud to'osi tá də boobo də minti paapa də nakə-neke karman baŋ, bə maa pə mo? Aŋ bele minti aŋ harə la kafkam kə to'osiŋ taŋ haa səm pə mo?

¹⁰ Cəərəŋ anə jeri a kəɗwəy gə minti yaŋ bə jəəti dər hitiŋa, kitira, ko kəmana ta'-ta'i bə dər leŋaŋ, dər sərdə laate kəmanaŋ, haa səm mo?

¹¹ Ana joŋre bə minti ten a jəənəŋ dəŋ tewe wəra haa boobo bədoona anəkay mo? Walka əsəŋ bə jəna wəra hasi guudəŋa.

¹² Kəsaananti, bə minti ten a jəŋ dəərəŋ daŋ, ten a koloŋ haa damdi aŋ gə minti paapa gə Ziwifi baŋ ana gəm. Bədoona ta, ten bə jəŋ kamkama minti aŋ kolə la akas tena ana gəm. Bə minti ten a jəŋ aduubə dəŋ daŋ, aŋ jəənən baymele ba.

¹³ Bə minti ten ɗeŋ gerdeŋ ajew faɗi, cəərəŋ kəm bay ge. Ten jəŋ ateŋa aduubə dəŋa haa kasi ɗemeŋ. Ten waatənaŋ *Kel pəsaŋ kəmarwaŋ wəra, haa də ko toŋ faɗi gəm.

¹⁴ Kusrən bə minti a bə ɗamnaŋ a koloŋ karman bə minti humuŋ kuŋ ablaw faɗi, səma də teŋ keɗeŋ, aŋ lasnan ba, aŋ haŋ giidiŋ wəra sarəna bə gəm. Aŋ doonon irku dən damdi aŋ sə a de haa irku də *hulum bə digi kə Pep kəman ana, ɗawba də Yeesu Kristu də kusru ana faɗi ɗaw.

¹⁵ Dər ko toŋ da ha'aŋ, aŋ a jəŋ wəra anə fənay-fənay, maa bə jəənəŋ hebkəna minti waale pa pədaŋ mo? Wəra də dərən minti ten a mantə la nuutu kaasəŋa maa ɗaw, aŋ sə a jən dən, koo nuutu dərəŋ, aŋ a wəra maŋ bə pən dən.

¹⁶ Bə hebkənaŋ, ten koloŋ hulum bə acukur nəəti haa gud bə minti ten bə waataŋ gəəziŋaŋ mo?

¹⁷ Kaa té gə minti bə kunti kuurə Kel pəsaŋ kəmarwaŋa lamaŋ, bə ji wəra anə keɗe-keɗe damdi kel dəŋ bə ɗəməya ana. Səma, ɗiki neeteŋ paapa pisi ba. Yə golde ɓarse haa adəwaldə áŋ dəərəŋ kir minti aŋ kolə la wəra gud té faɗi.

¹⁸ A nuutu haa karman pisi bə minti kel də kumsəŋ ɗəmaŋ, səma jəə la haa gud kel pəsaŋa. Bə minti áŋ a jəŋ də kumsə áŋ, kel dən ɗamnaŋ ablaw. Bə hebkənaŋ, ten bele haa minti aŋ raawə la bədoona, jəəne nuutu minti ten paapa saraŋ na pədaŋ.

¹⁹ Gəəzi karmanti, ten haraŋ bə se lasi kəm kampa məna guudəŋa pa. Lasi taŋ kəyaŋ, haa damdi kə həlgə də doo-de weŋ ana'i. Ten ji yaŋ dərə saksaki hãã bə minti aŋ haŋ sar kel kə Kristu ne wəra kəm dege'-dege'i gəm.

²⁰ Giidən bə ɗamna wəra ablaw hasi faɗi minti ten sə a jəə la hebkəna haa saraŋ na, bə ɗe a waataŋ kel də hel daalaŋ faɗi. Gud maa mo, koŋ paapa bə dona gud kel dəŋa ba.

Pol ŋere kel kə Agar daana Sara də jaa ɓasa də minti Pepeŋ topna də kaŋ

²¹ Aŋ kaa gə minti golde minti aŋ ɗe nəətiŋ gud *ku giliŋaŋ, aŋ gosə waatan la kəm mo, gud kel gə minti ku giliŋ wəətəy paapa də dərəŋ bə mo?

²² Áŋ goloŋ neŋ, Kefter kə Pepeŋ wəra bə jeerə-jeere minti *Abraham waŋ kəmar kaŋkar ɓasi. Məna, wə waŋ toŋ də tər kəman kafkam, sam minti Agar. Wə waŋ naayaw toŋ də muru də minti taŋ paapa kafkam baŋ, sam tá minti Sara.

²³ Ismayel kormə kafkam waŋ wəra ha'aŋ, damdi kaa kəsarkaŋ waate minti té waŋ beebe kə teŋ anaŋ faɗi. Səma Izaki, kormə mar Abraham də gəəzə-gəəzi, waŋ haa gud bə minti Pepeŋ a wəətunu səmu wəra ajewa a Abraham.

²⁴ Kel teŋ haa kənaŋ ge dər áŋ cəərə karmana: kəram té ɓasi gə ŋarə-ŋere haa də *jaa ɓasa də minti Pepeŋ topna də kaŋ. Agar, həlgə kafkam, haa damdi jaa də minti Pepeŋ doona də *Moyisi cəərə pərki bə minti yə məntu minti Sinay ana. Sara haa damdi jaa də minti Pepeŋ doona də Abraham ana gəm. Agar we karməyaŋ, yə kafkam tə bə moŋ, kaa gə minti bə ɗe gud ku gili kə Moyisiŋaŋ, yə haa akas kafkama ana gəm.

²⁵ Áŋ a asaŋ hebkəna da ha'aŋ, minti Agar haa damdi jaa də minti Pepeŋ doona də Moyisi cəərə pərki bə Sinay bə minti giidə seŋka də Arabiŋaŋ ana. A ɗikiŋaŋ, kel də Agar ŋəraŋ haa də kel də vil də Zeruzalem ana'i. Kaa gə giidə vil də Zeruzalem də hebkənaŋ ha'aŋ, yə haa akas kafkama ana gud bə minti yə ɗe haa gud ku giliŋ kə Moyisiŋa.

²⁶ Səma Sara taŋ a paapa kafkam ba, kel də ŋəraŋ haa də Zeruzalem də minti apəy naŋ ana gəm, vil də gəəzə-gəəzi kə Pepeŋ. Kaa gə minti giidə vil taŋaŋ, paapa kafkam kə hulum ba. Bədoona ta, Sara koloŋ máŋ haa bə nər áŋ ana'i.

²⁷ Gud maa mo kel wəra gə jeerə-jeere giidə Kefter kə Pepeŋa cəərə həlgə də gedə-gedeŋa minti: «Te həlgə də gedə-gedeŋ, te də minti waŋ hõy ba; waalə la! Te də minti asaŋ gəəli də we baŋ, naakte kuy la kas waaleŋ; gud maa mo, həlgə də minti gedraŋ ŋorya wəraŋ, bə kole nər kəmar koncoŋ gə ablaw gə daŋə-deŋe kə naaya ta də koŋkor haa tá ɗaw.»

²⁸ Bədoona ana ta kəsaananti, aŋ koloŋ wəra karmə Pep gə gəəzə-gəəziŋ haa gud bə minti wə a waataŋ wəra bədoona ana'i. Haa damdi wə a waataŋ Abraham wəra minti Sara bə ɗe yaŋ a we Izakiŋ ana gəm.

²⁹ Də ko toŋ ha'aŋ, kormə Agar waŋ haa damdi kaŋ waate minti té waŋ beebe kə teŋ ana faɗiŋ, wə ləsaŋ kormə Sara bə minti waŋ gud ɗiki kə Tiiru Cetcetaŋa. Dər ko bə hebkənaŋaŋ, kel teŋ bə ji haa bədoona gəm. Kaa gə minti ɗe gud ku giliŋa lese kaa kə doo-de gə gud Kristuŋ.

³⁰ Pepeŋ waataŋ Abraham giidə kefter nuutuŋa minti harmə mo? Wə minti: «Sarmə həlgə tá kafkam la warna də korməyaŋ, gud maa mo kormə tər kafkam paapa kir hame bege kə buruŋ ba. Hame begeŋ haa kormə dər muruŋ faɗi.»

³¹ Bədoona ana ta kəsaananti, áŋ paapa damdi kormə tər kafkam ana ba. Áŋ teŋ haa damdi kormə həlgə də minti taŋ a paapa kafkam baŋ ana'i.