GALATIŊ 3 - JAA TƏMARWAŊ

Ku giliŋ daana deŋ

¹ Haaya! Aŋ kaanə Galatiŋ, aŋ kaa teŋ bay kəkəl gə cəərəŋ ta! Hulum kəman jəənəŋ wəra ada ji mo? Anaaŋa, ten topnoŋ bəlam də me kə Yeesu Kristu a kəbaŋ kə largaŋa wəra anə celel, maa bə jəənəŋ haa mo?

² Ten bele minti aŋ haran kel la məna faɗi: aŋ apaŋ Tiiru Cetcetaŋ haa gud bə minti aŋ bə ɗe gud *ku giliŋa ɓet-ɓetiŋ mo? Paapa anə ceki. Pepeŋ aynaŋ Tiiru Cetcetaŋ haa gud bə minti aŋ əskəŋ *Kel pəsaŋ kəmarwaŋ daana aŋ doŋ guudiŋ.

³ Aŋ bə jəŋ wəra kəna kaa kə bay kəkəl gə cəərəŋ bədoona day, naanaanə mo? Aŋ məlaŋ gud joŋre də səɓaki kə Tiiru Cetcetaŋ ɗaw pəta, aŋ golde máŋ hebkəna minti aŋ ɗe a gaw cuuru də səɓaki dəŋ naanaanə pə mo?

⁴ Ana kel gə minti a jəətəŋ sarəŋa lama keɗeŋ, yə kaynaŋ a ko kəmana anə weseka bə hasi faɗi mo? Yə a bese wəra boobo bədoona anəkay faɗi ba.

⁵ Pepeŋ ayaŋ Tiiru Cetcetaŋ daana wə ji miɗiŋ adəwaldəŋa, haa gud bə minti aŋ bə ɗe gud ku giliŋa ɓet-ɓetiŋ mo? Paapa anə ceki faɗi. Wə ji bədoona ha'aŋ, gud bə minti aŋ əskəŋ Kel pəsaŋ kəmarwaŋ daana aŋ doŋ guudiŋ.

⁶ Áŋ ɗəkə la cəərə *Abrahama. Kefter kə Pepeŋ waate wəra cuuru minti: «Abraham doŋ gud Pepeŋa, gud teŋa ta Pepeŋ əŋkunu hulum ɗekeri.»

⁷ Aŋ asə la wəra kaŋkaŋ minti, kaasaw də Abraham gə gəəzə-gəəziŋ, haa kaa gə minti doŋ gud Pepeŋaŋ.

⁸ Ana ha'aŋ, Kefter kə Pepeŋ a wəra bə jeerə-jeere ajewa hãã minti, kaa gə minti paapa gə Ziwifi baŋ, Pepeŋ bə kuluy yaŋ wəra duru ɗekeri haa gud de neete bə guuduŋa. Gud teŋa ta, Abraham a əskəŋ Kel pəsaŋ kəmarwaŋ teŋ wəra ajewa bə minti Pepeŋ wəətunu du minti: «Ten ge pisiŋ yaŋ cəərə kaasaw də kaa gə cəərə seŋkaŋa keɗe haa guuduma.»

⁹ Abraham doŋ gud Pepeŋa, kəya Pepeŋ gəənu pisiŋ cuuru. Bədoona ana taŋ, Pepeŋ ge pisiŋ yaŋ cəərə kaa gə minti doŋ guuduŋ damdi Abraham a doŋ guuduŋ ha'aŋ, ana gəm.

¹⁰ Səma kə kaa gə minti bə ɗiki minti ku giliŋ kole té yaŋ wəra ɗeker dər Pepeŋaŋ, kəəti kə Pepeŋ duuniy ne wəra ɗaw. Gud maa mo, Kefter kə Pepeŋ wəra bə jeerə-jeere minti: «Hulum bə minti paapa bə ji joŋre də kel gə giidə kefter bə ku gili kə Moyisiŋa wəra saksaki keɗe baŋ, kəəti kə Pepeŋ daw la.»

¹¹ Pepeŋ kole hulum anə məna wəra duru ɗeker kas minti wə bə ɗe gud ku giliŋa anə ɓet-ɓetiŋ ba. Teŋ wəra anə pəɗaki, gud maa mo Kefter kə Pepeŋ wəra bə jeerə-jeere minti: «Hulum bə minti dər Pepeŋa ɗeker ji yaŋ caw gud de nuutu bə guudəna.»

¹² Kel teŋ wəra gə jeerə-jeere pa minti: «Hulum bə minti doŋ ku ku giliŋ ne wəra keɗeŋ, wə fele dədərgə də gəəzə-gəəziŋ guudu gəm.» Bədoona ta, ɗe bə gud ku giliŋ kə Moyisi daana de bə gud kel kə Pepeŋ, haa paapa kel kə məna ba.

¹³ Kəəti kə Pepeŋ a humuŋ áŋ gud bə minti áŋ paapa bə ɗe gud ku giliŋa wəra ɓet-ɓeti keɗe ba. Bə hebkəna, Kristu bəŋ a kole kusru wəra a koɗ áŋa minti kəəti toŋ doo la máŋ haa tó. Bədoona ta, wə ɓətəŋ áŋ wəra ku. Gud maa mo Kefter kə Pepeŋ wəra bə jeerə-jeere minti: «Hulum bə minti kaŋ ɓəlnu ne wəra a kəbaŋaŋ, kəəti kə Pepeŋ duunu ne wəra ɗaw.»

¹⁴ Yeesu Kristu jəŋ teŋ bədoona haa minti, pisi bə minti Pepeŋ a wəətunu səmu wəraŋ minti tó jəw sar Abrahamaŋ, wə jəw la sar kaa gə minti paapa gə Ziwifi baŋ gəm. Wə jəŋ teŋ haa kir minti áŋ falə Tiiru də minti Pepeŋ a waatəna sama wəraŋ la, gud de náŋ bə guuduŋa.

Karman bə minti Pepeŋ a wəətunu səmu wəra a Abraham

¹⁵ Kəsaananti, bə kaŋ gud kel wəraŋ, ten he karman bə minti áŋ bə ase toŋa bə jəəti sar áŋa kəna saksakiŋ: bə minti kaa kəman ɓasi doŋ jaa ne wəra də kumsiŋ, yə jeerəna kel dəŋ a keftera daana yə maltaŋ kəəsi ne wəra adaŋ, hulum neke bə ge kel cəərə neeteŋa ada pəda daana wə neke bə ɓalka pəda gəm.

¹⁶ Pepeŋ jəŋ haa bədoona gəm. Áŋ fele giidə kefter nuutuŋa minti wə waataŋ sam pisi bə minti tó bə ɗe a jəw cəərə *Abrahama daana cəərə kaasaw duŋ. Wə waate paapa sam kaa kə ablaw gə minti a kaasaw du keɗe'iŋ ba. Wə waate sam hulum məna, haa Kristu.

¹⁷ Karman bə minti ten wəətuŋ, guuduŋ haa minti: bə minti Pepeŋ doŋ *jaŋ də Abraham, wə waataŋ wəra minti a jəə la saksaki ajew na. Pepeŋ bə ɗeŋ a aye *ku giliŋ kəm haa adoro, laate wəra bə jəə-ji kəs-kəsi waaɗe də hor-hor soope. Bədoona ta, ku giliŋ neke bə ɓalke jaa də minti Pepeŋ a doonaŋ wəra ba, daana karman bə minti wə a wəətunu səmuŋ wəra bə gəm.

¹⁸ Ana haa paŋ, Pepeŋ sə a jəə la bə aye karman toŋa a kaŋ kəna gud bə minti yə bə ɗe də ku giliŋ, kel gə minti Pepeŋ a wəətənəy wəraŋ minti tó bə əyu yaŋ, kel teŋ koloŋ wəra ko bə boobo. Səma, yə paapa bədoona ba. Pepeŋ jəŋ pisi nuutuŋ sar Abrahama ha'aŋ, gud karman bə minti wə a wəətunu səmu warda ajew daŋ təwa faɗi.

¹⁹ Ãhãã, a jəəne doloy bədoona tə kəm, pisi bə ku giliŋ bə jəŋ haa maa mo? Pepeŋ a əynu a are haa bə ke dər are cəərə kel kə bayməlaŋ gə minti are a bə jiyaŋ. Wə a əynu kəm haa kaadəəməy kir minti kaasaw də Abraham tó bə minti Pepeŋ a wəətunu səmu wəraŋ, bəə la wəra kəm. Pepeŋ ayaŋ ku gili da a *kaa kə digi nuutuŋ minti yə ɗee la a jugu wəra a kaa kəsarkaŋ. A ko toŋa kəya, yə doŋ hulum aduubə də kaŋa də Pepeŋ bə harte də kel.

²⁰ Sar jaa taŋ kəyaŋ də caadə hulum aduubə də kaŋa də Pepeŋ. Səma bə minti Pepeŋ waataŋ sam karman a Abraham ha'aŋ, wə jəŋ də caadə hulum adəwaldi ba, wə jəŋ kel nuutuŋ tó də kusru faɗi.

Ku giliŋ jəə laŋ, haa bə maa mo?

²¹ Anaaŋa *ku gili kə *Moyisiŋ haa karman bə minti ɓalke kel gə minti Pepeŋ a wəətənəy wəra a Abraham mo? Paapa anə ceki faɗi. A jəə la minti ku gili kəman a yaŋ anə məna'i bə aye dədərgəŋ a kaŋ, kaŋ sə a neke bə kole wəra ɗeker dər Pepeŋa gud ɗe neete ɓet-ɓeti bə gud ku gili toŋa. Səma ku giliŋ kole hulum ɗeker dər Pepeŋa ba.

²² Kefter kə Pepeŋ waataŋ wəra minti baymeleŋ pəŋ bulum wəra cəərə kaŋa keɗe, kir minti kaa gə minti doŋ gud pisi bə minti Yeesu Kristu juunuŋ, yə falə karman bə minti Pepeŋ a wəətunu səmu wəraŋ la ɗaw.

^23-24 Də ko bə minti Pepeŋ a kəm bay veɗe kəkəy bə minti kaŋ de gud Kristu wəraŋ, ku giliŋ naareŋ a bə gole cəərə are haa damdi kaa kə gole ku daŋgay ana. Ku giliŋ jəŋ bədoona hãã bə minti Kristu bəŋ wəra kəm, kir minti Pepeŋ kolə are la duru ɗeker gud de naare bə gud joŋre nuutuŋaŋ.

²⁵ Hebkəna haa ko bə minti are de gud Kristuŋ, bədoona ta ku giliŋ paapa akas hulum bə gole cəərə are ana pəda.

²⁶ Aŋ keɗe, aŋ koloŋ wəra karmə Pepeŋ haa gud bə minti aŋ doŋ gud Yeesu Kristuŋ. Kəya aŋ máŋ wəra tapi duuru.

²⁷ Aŋ wəra haa gə tapə-tepe duuru bə minti yə jəənəŋ batem. Kəya aŋ he wəra haa sar kel kə Kristu faɗi.

²⁸ Bədoona ta, hulum bə Ziwifiŋ paapa hal də hulum bə minti paapa bə Ziwifi baŋ ba. Kafkam paapa hal də hulum bə minti paapa kafkam baŋ ba. Hulum koŋkor paapa hal də həlgəŋ bə gəm. Gud maa mo aŋ təpaŋ wəra də Yeesu Kristu, kəya aŋ koloŋ wəra hulum məna'i.

²⁹ Gud tepe nəətiŋa də Kristu tə bə moŋ, aŋ koloŋ máŋ haa kaasaw də *Abrahamaŋ. Bədoona kəya, kar gə minti Pepeŋ a waataŋ wəra minti tó bə əyəy yaŋ a Abraham, aŋ bə fələy yaŋ gəm.