GALATIŊ 2 - JAA TƏMARWAŊ

Pol də kaa kə vaa-ve kaayaŋ

¹ Laate jəŋ wəra hor cuuru waaɗe bə minti ten a yaakaŋ vil də Zeruzalem. Adoro are haraŋ ada na də Barnabasi, ten doŋ Titi guudəna ada na gəm.

² Ten ɗeŋ ha'aŋ, gud bə minti Pepeŋ vaɗnan gəryi toŋ wəra minti ten ɗee la ada na. Bə minti are tuluŋ warna ada naŋ, are təpaŋ wəra kəm də kaa kəmtəŋ gə tiinə kaa kə Tapiŋ bay cəərə are. Kəya ten tupnuy bəlam də *Kel pəsaŋ kəmarwaŋ gə minti ten a bə wəətiya wəra a kaa gə minti teŋ paapa gə Ziwifi baŋ. Ten jəŋ bədoona haa minti, joŋre bə minti ten a juunu daana bə minti ten bə jəwa hebkənaŋ, yə a sərtu minti wə basə la wəra boobo ba. Bədoona ta, yə doŋ kel nin.

³ Titi, hulum bə guudən, a nuutu hulum bə Gereki ŋaanaanə moŋ, hulum həənu guudu bə *jeme tənturu wəra anə me'i minti wə kolə la hulum bə Ziwifi ba.

⁴ Də teŋ keɗe kaa kəman yaŋ ada, jəŋ kusri damdi té kaa kə doo-de ana, anaaŋa paapa anə ceki. Yə a goldoŋ haa minti Titi jamə tənturu la wəra me'i. Yə vaŋ aduubə də are da dəgaaya-dəgaaya, bə bi a ase hel də kel gə minti Yeesu Kristu bədəŋ are wəra ku *ku gili kə *Moyisiŋa gud tepe naareŋa duuruŋ. Yə a goldoŋ doloy ha'aŋ minti té hare are kafkam kə ku gili toŋ pa.

⁵ Səma are yaakaŋ kusrə are bə reeme a ko kəmana anə weseka a niini ba. Are jəŋ teŋ haa minti yə a ɓalke gəəzi də Kel pəsaŋ kəmarwaŋ wəra ba, kir minti aŋ ɗee la a iskiy a kuɗiŋa.

⁶ Áŋ harə la kəm bə waate cəərə kaa kəmtəŋ gə tiinə kaŋaŋ. (Yə jəŋ ne nuutu kəmtəŋ, kumundu ba paapa, kel nin ada mo, gud bə minti kaŋ dər Pepeŋa haa kaa kə məna'i.) Kaa kəmtəŋ teŋ, bə minti ten tupnuy bəlam də Kel pəsaŋ kəmarwaŋ wəra topiŋ, yə waataŋ kel gaalaŋ ciiri ada ba.

⁷ Ana ɗaw ha'aŋ, yə asaŋ faɗi minti Pepeŋ aynan joŋre bə waate Kel pəsaŋ kəmarwaŋ wəra a kaa gə minti teŋ paapa gə Ziwifi baŋ, damdi wə əynu a Piyer bə ɗe a wəətəy wəra a kaanə Ziwifiŋ ana gəm.

⁸ Gud maa mo Pepeŋ də səɓaki nuutuŋ, wə kolnon *hulum bə gaa-ge bə ɗe a waate kel wəra a gidiirə kaa gə minti teŋ paapa gə Ziwifi baŋ, damdi wə koloŋ Piyer hulum bə gaa-ge a kaanə Ziwifiŋ ana gəm.

⁹ Anə Zaki də Piyer daana Zaŋ, gə minti kaŋ a humnuy tiini kəmtəŋ neeteŋ, yə asaŋ wəra gəm minti Pepeŋ aynan joŋre nin bə jiŋ haa toŋ kəya. Bə ge dər minti ku are máŋ bə tapə-tepe diiri tə bə moŋ, yə topoŋ kasi are də Barnabasi faɗi. Bədoona kəya, are gaŋ ku are wəra məna minti are teŋ ɗee la a ji joŋreŋ adəwaldə kaa gə minti teŋ paapa gə Ziwifiŋ baŋ, té kaayaŋ ɗee la a ji joŋre adəwaldə kaanə Ziwifiŋa gəm.

¹⁰ Səma karman bə minti yə məntunu kasi areŋ təwa haa minti cəərə are jəə la jeri cəərə kaa kə Tapi gə caaca gə giidə vil də Zeruzalema. Haa karman bə minti ten bə ayə-aye ɗiki dən bə jəwa gəəzi də səɓakiŋ gəm.

Pol ji gəbaŋ a Piyer

¹¹ Ɗeŋ a ɗeye hõy, Piyer tuluŋ giidə vil də Antiyosiŋa. Wə jeŋ karman bə minti paapa akəsa ba, kəya ten juunu gəbaŋ wəra anə pəɗaki tiinə kaŋa.

¹² Gud maa mo bə minti wə a tuluŋ Antiyosi, wə hamtaŋ soŋ də kaa kə doo-de gə minti paapa gə Ziwifi baŋ. Səma hiti jəŋ wəra laki, bə minti kaanə Ziwifi gaalaŋ gə minti Zaki vəənəy da tuluŋ anəkay, Piyer haŋ giidu wəra sar kaa gə minti paapa gə Ziwifi baŋa faɗi, wə yaakaŋ hamte bə soŋ diiri faɗi gəm. Wə jəŋ teŋ bədoona ha'aŋ, kas walka də kaanə Ziwifiŋ.

¹³ Kaa kə doo-de kaayaŋ gə Ziwifiŋ pəŋ wəra ɓəlwəti bə ji damdi Piyer ana gəm. Barnabasi də kusru doŋ gud kel neete gə minti yə wəətəy kəna də kuy təwaŋ faɗi gəm.

¹⁴ Bə minti ten ɗeŋ a ase kay minti yə paapa bə ɗe ɗeker a kəkəy bə gəəzi bə *Kel pəsaŋ kəmarwaŋ kə Pepeŋa baŋ, ten waataŋ Piyer wəra anə pəɗaki tiinə kaŋa faɗi minti: «Tam də kusrum, tam hulum bə Ziwifi, səma tam paapa bə ji kusruma bə hulum bə Ziwifi ana pəda tə kəm, tam bə he gud kaa gə minti teŋ paapa gə Ziwifi baŋ bə ji kusri bə kaanə Ziwifiŋ ana bə maa mo?»

Kaŋ keɗe fele seereŋ haa gud de bə gud Yeesuŋa

¹⁵ Ten waate haa áŋ gə Ziwifiŋ. Áŋ haa kaanə Ziwifi gəəzi gud bə minti kamnə áŋ haa gə Ziwifiŋ faɗi. Áŋ paapa kaasaw də kaa kaayaŋ té gə minti *ku gili kə Pepeŋ paapa də diri baŋ ba.

¹⁶ Səma, áŋ gə Ziwifi də dər kusrə áŋ, wəra də dər áŋ gəm minti Pepeŋ kole hulum duru ɗeker haa bə minti wə doŋ haa ne də joŋre bə minti Yeesu Kristu juunu təwa faɗi, paapa gud bə minti wə doŋ ku giliŋ kə *Moyisiŋ wəra keɗe a kuɗuŋa ba. Áŋ gəm tá, áŋ doŋ gud Yeesu Kristu kir minti áŋ kolə la dər Pepeŋa ɗeker haa gud joŋre bə minti Kristu juunu, paapa gud bə minti áŋ ɗeŋ gud ku giliŋa a kuɗuŋa ba. Gud maa mo, hulum kole dər Pepeŋa anə məna ɗeker gud ɗe nuutu bə gud ku giliŋa ba.

¹⁷ Áŋ gə Ziwifiŋ, áŋ golde haa minti Pepeŋ kolə áŋ la kaa ɗekeri gud de náŋ bə gud Kristuŋa. Bə minti áŋ bə golde bədoonaŋ, kaŋ waate yaŋ cəərə áŋ minti áŋ haa kaa kə ji baymele gəm gud bə minti áŋ paapa bə ɗe a ku gili kə Moyisiŋa pədaŋ. Ana gud kel teŋ haa minti Kristu məlaŋ áŋ bə ji baymeleŋa mo? Paapa anə ceki!

¹⁸ Gud maa mo, hulum bə minti a yaakaŋ humi bə kosoŋ bə cəərə ku giliŋ ne wəra, wə waataŋ wəra cuuru minti wə paapa bə nakə-neke bə seere hulum baŋ. Wə bə haraŋ ne bə ɗe guudu toki faɗi paŋ, wə gaŋ kusru bə ji baymele haa tó də kusru faɗi.

¹⁹ Katən ha'aŋ, ku giliŋ waatan haa minti ten wəra bə mee-me. Bə minti ten máŋ wəra akas hulum bə mee-meŋ anaŋ, ku giliŋ neke bə fəlan bə jəw joŋre pəda. Bədoona ta, ten máŋ wəra dədərgə agal kə Pepeŋa bə jəw joŋreŋ. Bə minti yə ɓəlaŋ Kristu wəraŋ, ten meŋ wəra duuru gəm.

²⁰ Səma, bə hebkənaŋ, ten kəm caw dədərgə. Bədoona ta, ten paapa cəərə kusrəna ten pəda, Kristu máŋ cəərəna haa tó. Karman bə minti ten jəw dər caw dəna hebkəna, haa bə de gud kormə Pepeŋ bə minti balnan daana bə minti ayaŋ kusru wəra a meŋ a koɗonaŋ.

²¹ Ten ge pisi kə Pepeŋ warna bə hasi. Gud maa mo, a jəə la kəna minti Pepeŋ kole hulum ɗeker duru haa gud ku giliŋaŋ, Kristu meŋ máŋ wəra haa boobo.