GALATIŊ 1 - JAA TƏMARWAŊ

Pol mirki kaanə Galatiŋ

^1-2 Jeereŋ kefter toŋ haa ten Pol. Ten *hulum bə gaa-ge kə Yeesu ha'aŋ, ŋaɓnan paapa hulum ba daana gaanan paapa hulum bə gəm. Gaanan haa Yeesu Kristu faɗi, də Pep Abaŋ bə minti hərnu wəra dədərgə adordə meŋaŋ. Ten jeereŋ haa a aŋ kaa kə Tapi gə giidə seŋka də Galatiŋ. Ten, də kaa kə doo-de gə minti sarəna kəna a ko toŋa keɗe'iŋ, are bə mirkiŋ na.

³ Pisiŋ, də kəkaɓiŋ kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa.

⁴ Kristu yaakaŋ kusru bə me gud áŋa bə seere áŋ wəra ku baymele náŋa, kir minti baymele bə cəərə seŋkaŋ a isi kumna cəərə áŋa pəda. Bədoona ana, wə doŋ ku kel gə minti giidə Pep Bar áŋ a bəlnəy wəra.

⁵ Tokɗeŋ jəə la kə Pepeŋ bə faɗnə-faɗna. *Amen.

Kel pəsaŋ kəmarwaŋ kə Pepeŋ yə haa məna faɗi

⁶ Haaya! Karman bə minti aŋ juunuŋ ŋəlnən ablaw. Pepeŋ mantənaŋ haa gud pisi bə minti aŋ fəlu gud Kristuŋ. Bə jəŋ naanaanə minti aŋ koloŋ kerkeŋ ne anə cəlamma a kel nuutuŋ, bə ɗe máŋ gud *Kel pəsaŋ kəmarwaŋ gaalaŋaŋ ɗaw mo?

⁷ A gəəziŋa ha'aŋ, Kel pəsaŋ kəmarwaŋ gaalaŋ pa pəda. Səma sərdə kaa yaŋ bə ɓalkaŋ ɗiki dəŋa daana yə golde haa minti té kole Kel pəsaŋ kəmarwaŋ gə minti bə waate sam Kristuŋ, karman baalaŋ.

⁸ Ten waataŋ, jəəne minti hulum kəman bəŋ ne a waataŋ Kel pəsaŋ kəmarwaŋ dəra'i də kaayaŋ gə minti are a waatənaŋ dəŋ wəraŋ, kəəti kə Pepeŋ daw la. Jəəne nuutu kəna hulum gud are toki, kumundu ba *hulum bə digi kə Pepeŋ ɗaw, kəəti toŋ daw la gəm.

⁹ Ten a waatənaŋ ne wəra ajewa, hebkəna ten hare bə dogoŋ dəŋa pa minti: hulum bə minti bəŋ ne a waataŋ Kel pəsaŋ kəmarwaŋ gaalaŋ dəra də kaayaŋ gə minti aŋ a iskiniy ku areŋ, kəəti kə Pepeŋ daw la.

¹⁰ Ten waataŋ bədoona ha'aŋ, minti kaa tokɗon la mo? Paapa! Ten golde haa tokɗe bə kasi Pepeŋ. Ten waataŋ bədoona ha'aŋ, minti ten doo dər kaa la mo? Paapa! A jəə la kəna minti ten ji kəm hebkəna haa karman bə minti doo dər kaa kəsarkaŋ la paŋ, ten sə a ji paapa hulum bə joŋre kə Kristu ba.

Pol koloŋ hulum bə gaa-ge kə Yeesu haa naanaanə kole mo?

¹¹ Kəsaananti, ten waataŋ minti: Kel pəsaŋ kəmarwaŋ gə minti ten waatənaŋ diŋ, hulum jəmnəy paapa də cuuru jeme ba.

¹² Ten fəlnəy paapa ku huluma fele bə gəm, hulum hatnan dən hate bə gəm. Vaɗnan dən wəra keɗe haa Yeesu Kristu də kusru faɗi.

¹³ Ana, ten a jəŋ dayday bə ɗe naanaanə mo də ko bə minti ten a kəm bə ayə-aye kusrən a to'osi kə kaanə Ziwifiŋaŋ, aŋ wəra gə əskə-əski kel teŋ. Ten a bə lese kaa kə Tapi kə Pepeŋa də səɓaki ablaw daana ten jəŋ wəra anə keɗe-keɗe minti ten bəsəy wəra gəm.

¹⁴ Ten a dəŋaŋ gəlaarən gə Ziwifiŋ ablaw a ji bə to'osi naareŋa ɗaw. Ten a jəŋ bə ayə-aye kusrən də cəwa bə ɗe gud to'osi kə kəmoomə də areŋa gəm.

¹⁵ Ana doloy ha'aŋ, Pepeŋ gud pisi nuutuŋa tə bə moŋ, wə ŋamnan warda hãã ajew də we dən da, daana wə mantənan warda haa minti ten jəə joŋre la a tó.

¹⁶ Bədoona ana, bə minti kel teŋ duunu duru, wə vaɗnan Kurmuyuŋ dərəna minti ten waatə Kel pəsaŋ kəmarwaŋ gə minti waate cuuruŋ la wəra a kaa gə minti teŋ paapa gə Ziwifiŋ baŋ. Də ko toŋ kəya, ten ɗeŋ a golde hel kasi huluma ba,

¹⁷ ten ɗeŋ sar *kaa kaayaŋ gə vaa-ve gə ajew dən Zeruzalem bə gəm. Ten kooroŋ nin cəlam ɗaw ha'aŋ, giidə seŋka də Arabiŋ. Adoro, ten haraŋ giidə vil də Damasiŋ da.

¹⁸ Bə jəŋ kəya taŋ, laate jəŋ wəra kəm soope bə minti ten kooroŋ Zeruzalem bə ɗe a ŋefe də Piyer. Ten hətəŋ suru da hor cuuru wiiɗiw faɗi.

¹⁹ Dər ko toŋa kəyaŋ, ten ŋəfaŋ də hulum baalaŋ gud kaa kə vaa-veŋa ba. Ten ŋəfaŋ haa də Zaki seenə Barkaŋ Yeesuŋ təwa.

²⁰ Ten waataŋ wəra haa anə kaŋkaŋ tiinə Pepeŋa minti, kel gə minti ten bə jeereŋ dəŋa hebkəna, yə haa kel kə gəəzi, ten ŋeŋ kel ba.

²¹ Adordə ŋefe naareŋa də Piyer, ten bə kooroŋ kəya giidə seŋka də Siriŋ daana naaya tá də Silisiŋ faɗi.

²² Də ko toŋ gila keɗeŋ, hulum anə məna gud kaa kə Tapi gə giidə seŋka də Zudeŋa, a asnan kəm də duru bə gəm.

²³ Yə əskəŋ haa kel gə minti kaŋ bə wəətiya cəərəna minti ba: «Aŋ asaŋ ne, hulum bə minti a dayday bə lese áŋaŋ, bə minti a jəŋ anə keɗe-keɗe bə awe Kel pəsaŋ kəmarwaŋ wəraŋ, máŋ hebkəna bə wəətiya a kaŋ haa tó ɗaw.»

²⁴ Bə minti yə əskəŋ bədoona kəyaŋ, yə tokɗoŋ Pepeŋ gud kel dəna.