FILIPIŊ 4 - JAA TƏMARWAŊ

¹ Bədoona ana ta, aŋ kəsaanan gə minti giidən bəlaŋ ablaw, aŋ əsə la ŋəŋ a ɗe nəəti bə gud Barkaŋa. Tolka də minti ten harə la bə asaŋa doonon wəra hasi. Aŋ haa kaa gə minti bə jən waale ku tarməna, aŋ haa karman bə minti bə ge dəra wəra minti joŋre katən pisiŋ.

Ge bə kosoŋ

² Kel gə minti ten bə wəətəy na a anə Evodi daana Sentisi, haa minti: ten jiiniy kamkam, yə jəə la sar kumsi pisi gud tepe neeteŋa də Barkaŋ.

³ Ten bə waatəma gəm, tam seenən bə minti jəŋ joŋreŋ dəərən anə ɓet-ɓetiŋ, kayə kəram té ɓasiŋ la bə tepe kuya, gud bə minti are kuuruŋ bə waate *Kel pəsaŋ kəmarwaŋa wəra a kaŋ haa də kumsə are keɗe. Kelemaŋ də kaa gə minti are jəŋ joŋreŋ diiri keɗe, gə minti Pepeŋ jiiriniy səməy giidə kefter kə kaa gə minti fəlaŋ dədərgə də bay teweŋ, jəŋ joŋreŋ də are gəm.

⁴ Aŋ waalə la saksaki gud tepe nəətiŋa də Barkaŋ. Ten dogoŋ pa, aŋ waalə la!

⁵ Doŋ kir minti kaŋ keɗe asə la minti aŋ sããya. Cəərəŋ jəə la ɗəki minti bi kə Barkaŋ wəra maŋ.

⁶ Aŋ a hoye ɗiki dəŋ gud karman kəmana ba, səma də ko muntu muntu mo, aŋ waatə Pepeŋ la dər tooseŋa cəərə karman bə minti aŋ də caaduŋ, aŋ jəw suuse la də talma pəsaŋ gəm.

⁷ Bədoona ta, kəkaɓi nuutu də minti kel dəŋ dəŋaŋ ɗiki də áŋ wəraŋ, amaŋ ku tarməyaŋ daana ɗiki dəŋ yaŋ, gud bə minti aŋ haa kasi Yeesu Kristuŋ.

⁸ Aŋ kəsaanan gə doo-deŋ, ten ge cəərə kel katən minti aŋ malə ɗiki dəŋ la cəərə kar teŋa haa kənaŋ: kar gə minti gəəziŋ keɗe, gə minti kir aŋkeŋ, gə minti ɗekeriŋ, gə minti *cetcetiŋ, gə minti kir de dər kaŋ, gə minti səməy kir hageŋ, gə minti baymele paapa ada baŋ, gə minti kaŋ kir tukɗuy.

⁹ Kel gə minti aŋ hətnəy daana aŋ fəlnəy kaasənaŋ, gə minti aŋ iskiniy kuna daana aŋ asnan bə jiyaŋ, aŋ jəə la haa teŋ. Kəya Pep bə kəkaɓiŋ ji yaŋ dəərəŋ.

Pol ji suuse gud kar gə minti yə a əynu duŋ

¹⁰ Ten ji suuse a Barkaŋ daana ten də waale ablaw gəm, gud bə minti bele nəətiŋ haraŋ bə pi duru wəra dayna sarənaŋ. Ten waataŋ paapa minti cəərəŋ a gaanan wəra haa ge ba, səma aŋ fəlaŋ dərəŋ ba haa fele bagŋ.

¹¹ Ten waate bədoona haa paapa kas caadə minti sarənaŋ ba. Gud maa mo, ten wəra bə hatə-hate kusrən bə ji holoŋ-holoŋ dər ko muntu muntu mo keɗe.

¹² Ten wəra bə hatə-hate də caacaŋ, kumundu ba dər ko bə minti kar kaasəna ablaw gəm. Dər kel məntə məntəŋa mo, koo kotnə-kotnə mo, də bə minti ten bə seepə-seepeŋ, də bə minti ten də tay, də bə minti ten də kar kaasəna ablaw, kumundu ba yə gə kerpə-kerpe kaasənaŋ, ten wəra bə hatə-hate bə ji holoŋ-holoŋ faɗi.

¹³ Ten bə nakə-neke bə ji bədoona cəərə kara keɗe haa gud səɓaki də minti Kristu bə ayan dənaŋ.

¹⁴ Də teŋ keɗe, aŋ jəŋ haa pisi bə minti aŋ humnən sərdə gəəli katən cəərəŋaŋ.

¹⁵ Aŋ kaanə Filipiŋ, aŋ wəra gə asə-ase minti, bə minti ten məlaŋ gud waate bə *Kel pəsaŋ kəmarwaŋ warda a nəənəŋ daana minti ten yaakaŋ seŋka də Masedəwan, kaynan haa aŋ təwa. Kaa kə Tapi gaalaŋ kəman gə minti ten fəlaŋ karman neete, té fəlaŋ karman kətan, jəŋ pəda.

¹⁶ Bə minti ten ateŋa kəm Tesaloniki giidə seŋka də Masedəwanaŋ, aŋ dogtoŋ aytan kar gə minti ten dər caadiŋ kampa ɓasi moŋ, bədoona ɗaw.

¹⁷ Ten waataŋ kel teŋ haa kənaŋ paapa gud bə minti ten bə golde karman bə kaasəŋaŋ ba, ten golde haa ɗaw minti Pepeŋ gaŋ pisiŋ la cəərəŋa pisi gaa gud kar nəəti gə ayə-ayeŋa.

¹⁸ Kar gə minti aŋ aynan dən daŋ, ten fəlnəy wəra keɗe, yə dəŋaŋ cəərə kar gə minti ten a jeŋ də caadiŋ ɗaw. Bə minti Epafroditi bəənən də keye nəəti toŋ kəyaŋ, caadə karman yaakaŋ sarəna pəda anə hasi faɗi. Keye toŋ kəya wə damdi keere bə minti siisi Pepeŋ warna fərəy-fərəy ana, bə minti daw duru gəm.

¹⁹ Kar gə kasi Pep bə minti ten bə kaw awalnaŋ, gədəəgi di paapa. Bədoona ana, gud tepe nəətiŋa də Yeesu Kristuŋ, wə ayaŋ kar gə minti aŋ də caadiŋ yaŋ keɗe gəm.

²⁰ Tokɗeŋ jəə la kə Bar áŋ Pepeŋ bə faɗnə-faɗna. Amen.

Mirki bə tewe cəərə kefter

²¹ Aŋ mirkə kaa gə doo-de gə gud Yeesu Kristu gə ko toŋ la saraŋ na məna-məna keɗe. Kəsaanə áŋ gə doo-de gə minti kanna sarən naŋ bə mirkiŋ na gəm.

²² Kaa kə doo-de gə minti kənaŋ neŋneŋ keɗe bə mirkiŋ na, daŋgeŋ haa kaayaŋ gə ger kumna boblo Sezar.

²³ Pisi kə Barkaŋ Yeesu Kristu jəə la dəərəŋ keɗe'i.