FILIPIŊ 3 - JAA TƏMARWAŊ

Kəkəy bə minti aŋ kole ɗeker dər Pepeŋa duuruŋ

¹ Hebkənaŋ aŋ kəsaanan gə doo-deŋ, aŋ waalə la gud tepe nəətiŋa də Barkaŋ. Səma kel gə minti ten a jeertəneŋ di, gəəli bə dogoŋ dəŋ na jeereŋ paapa bə jəna ba, gud bə minti yə kəyaŋ yaŋ kir minti karman bə baymele a jəŋ ba.

² Aŋ amə kusrəŋ la pisi ku kaa gə minti ji kel neeteŋ damdi káayaŋ ana'i, gə minti ji joŋre bə baymeleŋ, gə minti waate minti bə kole hulum kə Pepeŋ, hulum jamə tənturu la wəra me'iŋ.

³ Kaa gə camə-ceme tantaŋ gəəziŋ haa áŋ, gud bə minti áŋ ke awalnaŋ a Pepeŋ haa də Tiiru faɗi daana cəərə áŋ gə haa-he apəya haa gud tepe náŋa də Yeesu Kristuŋ. Áŋ paapa gə malə-mele ɗiki də áŋ cəərə to'osi kə kaa kəsarkaŋa bə gəm.

⁴ A jəə la minti to'osi kə kaa kəsarkaŋ haa karman bobloŋ, ten a bə nakə-neke bə mele ɗiki dən cəərə gəm. Hulum ɗəkəŋ ne minti haa pisi bə minti tó malə ɗiki də tó la cəərəŋ, ten a bə nakə-neke dəŋu ɗaw.

⁵ Gud maa mo, yə jamnan tantarən wəra ha'aŋ, ten bə waa-we hiti azəgən. Ten bə *Israyel a tanta də Beŋjameŋ, ten bə Hebere, kamnan gə Hebere gəm. Cəərə *ku gili kə kaanə Ziwifiŋa, ten a haa aduubə də kaanə *Farisiyeŋa faɗi.

⁶ Ten a jəŋ hulum bə kəsəŋ-kəsəŋ bə humi kosoŋa cəərə ku gili kə kaanə Ziwifiŋa hãã bə minti ten ɗeŋ a kole bə lese kaa kə Tapiŋa. A jəə la minti ku giliŋ kole hulum wəra ɗeker tiinə Pepeŋaŋ, ten a wəra bə kolə-kole ɗeker.

⁷ Səma, kar té gə minti ten a jəŋ bə guluya damdi yə gə nakə-neke bə kəyan anaŋ, yə wəra dərəna hebkəna kar kə boobo gud Kristu.

⁸ Gəəzi, ten gole kar keɗe haa bə kar kə boobo ana gud karman pisi məna bə minti dəŋaŋ kumsuŋ wəra keɗeŋ: karman toŋ haa minti Yeesu Kristu Barkaŋ nin kolə la wəra də dərən kaŋkaŋ. Gud kel du ta, ten bəyaŋ kar teŋ wəra keɗe, yə máŋ dərəna haa bə kar gə ve warna cəərə dibidi na anəkay faɗi, kir minti kətan jəə la máŋ haa Kristu,

⁹ ten jəə la bə tapə-tepe wəra duuru kaŋkaŋ gəm. Ten paapa bə ɗiki minti ten ɗeker dər Pepeŋa ha'aŋ gud ɗe bə gud ku giliŋaŋ ba. Ten ɗeker duru haa gud bə minti ten doŋ gud Kristuŋ. Kolon ɗeker haa Pepeŋ gud bə minti ten doŋ gud Kristuŋ.

¹⁰ Karman bə minti hebkəna bə ɗeelə-ɗeele kaasənaŋ, haa minti tó Kristu daana səɓaki də minti hərnu wəra dədərgə adordə meŋa kolə la wəra də dərən kaŋkaŋ. Ten bele minti ten saa lasiŋ la damdi wə a saanaŋ ana, daana minti ten jəə la bə mee-me wəra tiinə baymeleŋa damdi wə a meŋ bə pəw wəraŋ ana gəm,

¹¹ kir minti, jəəne nuutu naanaanə ɗawmay, ten harə la wəra dədərgə adordə meŋa.

¹² Ten waataŋ paapa minti kar teŋ haa kandaŋ, ten fəlnəy ne wəra ba, ten waataŋ paapa minti ten máŋ bay kel kə bayməlaŋ sarəna ŋaanaanə mo bə gəm. Ten kəm haa bə fi taraŋa fi saksaki minti ten ɗee la a doy wəra kəm a kusrən, gud maa mo Kristu doonon haa de a kusru gəm.

¹³ Kəsaananti, karman bə minti ten bə fi taraŋa guuduŋ, ten paapa bə ɗiki minti ten duunuŋ ne wəra ba. Karman bə minti ten jəw hebkəna anə ɗaaməna ha'aŋ, haa minti ten gole dərən cəərə karman bə minti tiinin na ta'i ajew naŋ, paapa cəərə kaayaŋ gə minti ten a jəŋ teŋ wardaŋ pəda.

¹⁴ Bədoona ta, ten kəm haa a tara bə ɗe a tuli wəra cəərə karman bə minti ten a məlaŋ dərən warna cuuru naŋ, kir minti ten daw la. Pepeŋ bə mantan da apəy da minti ten ɗee la a daw gud tapi nina də Yeesu Kristuŋ.

¹⁵ Áŋ kaa gə minti wəra gə jeŋə-jeŋe a kel kə Pepeŋaŋ, áŋ ɗəkə la haa bədoona. Jəəne minti ɗiki dəŋ yaŋ a ko kəmana dəra'i də naayaw tó bə minti ten vəɗnu haa kənaŋ, Pepeŋ bə gaŋ dərəŋ yaŋ cəərə ɗiki bə minti aŋ a sə a ɗiki toŋ.

¹⁶ Kəmtəŋ də kel haa minti: áŋ raawə la bə ɗe a kəkəy kə Pepeŋa damdi áŋ bə ɗe hãã hebkəna ana.

Aŋ jəə la haa bə Pol ana

¹⁷ Kəsaananti, aŋ keɗe, aŋ jəə la damdi ten ana. Aŋ malə dərəŋ la bə gole haa kaa gə minti ɗe di damdi naare bə minti aŋ bə əsuŋ ana.

¹⁸ Ten a waatətənaŋ ne nuutu wəra kampa ablaw, hebkəna ten bə dogoŋ dəŋa máŋ haa bə hage də kan kə dərən, gud maa mo ɗe də kaa kə ablaw wəra bə ge dəra minti yə acukur də kel gə minti Kristu jiiniy a kəbaŋ gə largaŋaŋ.

¹⁹ Kaa teŋ gə sokə-soke haa bə ɗe a beseŋ, gud bə minti Pep neeteŋ haa kar gə minti giidi bele jəy. Kel gə minti yə sə a ji kese guudiŋ, yə hare bə he cəərə kusri apəya haa diiri ɗaw, ɗiki di wəra bə malə-mele anə ŋel məna haa cəərə kar kə adawraŋa.

²⁰ Səma kə áŋ kaayaŋ ha'aŋ, kuli náŋ bə gəəzə-gəəziŋ haa apəy na. Bədoona ana, áŋ bə mi minti Hulum bə seere áŋ, Barkaŋ náŋ Yeesu Kristu, bə bi haa də ada.

²¹ Bə minti wə bəŋ ne ateŋa, də səɓaki nuutu də minti wə kole kar wəra keɗe dəərə bə humi kosoŋa cuuruŋ, wə kole kusrə áŋ bə nalnal yaŋ wəra damdi nuutu bə səɓaki bə welɗə-welɗeŋ ana.