FILIPIŊ 2 - JAA TƏMARWAŊ

Tepe bə kuŋ daana hare bə cəərəm adoroŋ

¹ Jəəne doloy bədoona ana, minti tepe bə gud Kristuŋ ayaŋ səɓaki, minti beleŋ ayaŋ teŋe bə dər, minti Tiiru Cetcetaŋ koloŋ tapi də kumsəŋ, minti aŋ bə bele daana bə ase caadə kumsəŋaŋ,

² aŋ don ku waale katən la wəra də kel haa kənaŋ: aŋ jəə la də kumsəŋ məna, bele bə ku tarməyaŋ jəə la məna, ɗiki dəŋ jəə la məna, daana aŋ goldə la haa tepe bə kuŋ.

³ Aŋ a ji karman də ɗiki minti aŋ daŋdə kumsəŋ la ba, aŋ a ji karman bə he cəərə kusrəŋ apəya bə gəm. Səma, aŋ harə cəərə kusrəŋ la adoro, kaa kaayaŋ golə la dərəŋa kəmtəŋ daŋnaŋ ɗaw.

⁴ Doŋ kir minti mindi mindi mo adəwaldəŋa a golde agal pəsaŋ a kusru təwa ba, wə goldə agal kə kaa kaayaŋ la gəm.

⁵ Aŋ jəə kusrəŋ la adəwaldə kumsəŋa bədoona, gud bə minti kaa gə minti gə tapə-tepe də Yeesu Kristuŋ kir ji haa karman toŋ faɗi.

⁶ Tó də kusru, wə a jəŋ haa bə Pepeŋ ana dege'-dege'i faɗi, wə jəŋ wəra anə keɗe-keɗe minti tó raawə la gəga'-gəga'i də Pepeŋ anə palpal ba.

⁷ Wə pəŋ kusru wəra kəfaŋ haa tó də kusru, wə koloŋ kusru wəra bə kafkam kə Pepeŋ ana ɗaw. Wə koloŋ kusru bə kaa kəsarkaŋ ana dege'-dege'i gəm; kaŋ əsnu ha'aŋ, wə hulum kisirki gəəzi.

⁸ Wə haraŋ kusru wəra adoro, wə doŋ ku Pepeŋ hãã bə minti wə ayaŋ kusru wəra bə me a kəbaŋ gə largaŋa; koo a me bə baymele tó bə cəərə kəbaŋ gə largaŋaŋ.

⁹ Gud teŋa ta, Pepeŋ həənu warna apəy na, wə əynu boblo bə minti kumsu pa pədaŋ kəəsu, daana wə əynu sam bə minti wəra bə daŋə-deŋe kumsuŋ keɗe,

¹⁰ kir minti maa toŋ maa toŋ mo caw apəya, cəərə seŋkaŋa, koo gud koŋa adawra, əskəŋ sam Yeesu neŋ, yə vaa la keɗe də gigiiri tiinu.

¹¹ Mindi mindi mo waate yaŋ wəra də ku anə pəɗaki bə tokɗe Pep Abaŋa minti: «Yeesu Kristu haa Barkaŋ cəərə kara keɗe!»

Joŋre kə kaa kə doo-deŋ

¹² Bədoona ana aŋ gədaarən gə minti giidən bəlaŋ, bə minti ten a səraŋ daŋ, aŋ a bə humi kosoŋa saksaki cəərə Pepeŋa. Də ko bə minti ten paapa hebkəna səraŋ na pədaŋ, aŋ humə kosoŋ la cuuru maŋ pisi humə ɗaw. Pepeŋ seereneŋ wəra tə gəm, aŋ jəə la haa joŋre bə minti tepe də seere toŋ. Aŋ jəə la də walka də jəw gud kese də Pepeŋa.

¹³ Gud maa mo, Pepeŋ bə ji joŋreŋa ku tarməyaŋa minti aŋ balə kar gə minti giidə tó bələy la, daana minti aŋ jəy laŋ, haa tó.

¹⁴ Aŋ jəə joŋreŋ la keɗe bay ŋorme ku, bay awəy ada gəm

¹⁵ kir minti aŋ jəə la kaa gə minti hulum neke bə məlaŋ kel sarəŋa ba daana gə minti bay kel kə zeɓə-zeɓe sarəŋa gəm. Aŋ jəə la haa karmə Pep gə minti wəra zugi bay baymele sarəŋa adəwaldə kaa gə cəərə seŋka gə minti ji tiniini də kaŋ daana gə minti ji baymeleŋ də diri re'iŋ. Ɗe neeteŋ bə kə kaa gə dər tilməŋ ana, səma ɗe dəŋ jəə la adəwaldi bə kə kaa gə dər pəɗakiŋ ana

¹⁶ a waate bə kel kə aye dədərgəŋa a kaŋ. Aŋ jəəne bə ji bədoonaŋ, dər hi bə hare kə Kristuŋ daŋ, cəərən ji yaŋ ateŋa də haa-he apəya gud kel dəŋa, gud bə minti joŋre bə gəəli-gəəli bə minti ten juunu guudəŋaŋ bəsaŋ wəra sarəna boobo ba.

¹⁷ Jəəne nuutu minti yə awan wəraŋa awe, ten də waale. Gud maa mo, kor dən bə gaa-ge wəraŋ bə ji haa karman bə ayə-aye bə minti tepe də keere bə minti aŋ juunu a Pepeŋ; keere toŋ haa de nəəti bə guuduŋ. Bədoona kəya ten ji waale dəərəŋ keɗe.

¹⁸ Aŋ gəm ha'aŋ, aŋ jəə la də waale, aŋ waalə la dəərən gəm.

Anə Timote də Epafroditi

¹⁹ Barkaŋ Yeesu doŋ haa neŋ, ɗiki dən wəra bə malə-mele minti ten sə a gaŋ Timote yaŋ səraŋ na ga'i minti, wə haraŋ da ne də kel dəŋ, dərən bəə la a teŋe ada gəm.

²⁰ Hulum baalaŋ bə minti kel dəŋ bə ɗəmu damdi ten ana pa pəda, haa tó məna faɗi.

²¹ Kaa kaayaŋ keɗe, ɗiki haa kar neeteŋ anə kepi məna, yə paapa bə ɗiki agal kə Yeesu Kristuŋa ba.

²² Aŋ wəra gə asə-ase minti Timote ha'aŋ, wə hulum kaŋkaŋi. Wə jəŋ kusru sarəna haa bə beebe kəman də buru ana: wə ayaŋ kusru, are təpaŋ duuru a waate bə *Kel pəsaŋ kəmarwaŋa wəra a kaŋ.

²³ Gud teŋa ta, ten bə ásáŋ kel gə cəərən ne wəra pəɗakiŋ, ten bə ɗiki minti ten bə ge na a nəənəŋ haa tó.

²⁴ Barkaŋ malnan ɗiki dən wəra minti, ten də kusrən, ten bə hare yaŋ kanna ga'i bə ɗe a helɗeŋ gəm.

²⁵ Aŋ gaŋ Epafroditi da minti, kar gə minti ten də caadiŋ, wə kəyan la ciiri. Wə haa seenən bə doo-deŋ, are jəŋ joŋreŋ daana are jəŋ duuriŋ cəərə Kel pəsaŋ kəmarwaŋa haa duuru keɗe. Bə hebkənaŋ, ɗiki dən məlaŋ haa minti ten haraŋ na máŋ kəm haa tó.

²⁶ Gud maa mo, tolka də minti tó harə la a ŋefe dəərəŋ keɗe jəŋ wəra suru hasi faɗi. Koŋ paapa bə dawa pəda gəm gud bə minti aŋ gə əskə-əski minti ɗemeŋ juunu.

²⁷ Gəəzi ɗemeŋ juunu ha'aŋ, kəmpuru wəra ku tələŋkəŋa laki. Səma Pepeŋ jəŋ giidu pəsaŋ suru, wə jəŋ paapa giidu pəsaŋ suru təwa ba, wə jəŋ giidu pəsaŋ haa sarəna minti laawe boblo toŋ kəya a ve ku kumsuŋa cəərəna ada pəda.

²⁸ Bədoona ta, ten harnaŋ dəŋ na cəlam haa minti, aŋ ɗeŋ ne a əsuŋ, aŋ harə la də waale daana laawe bə səran harə ku la adoro ɗəwa gəm.

²⁹ Bədoona ana, aŋ daw irku du la pis-pisi də waale ku tarməyaŋa ablaw gud bə minti wə haa seeneŋ bə doo-de gud Barkaŋa. Kumsə kaa kə Kristuŋ damdi tó ana ha'aŋ, aŋ təkəy ciiri la apəya.

³⁰ Gud maa mo, wə a daya bə me wəra haa gud joŋre kə Kristuŋa. Gəəzi wə yaakaŋ kusru wəra bədoona ha'aŋ bə kəyan a joŋre bə minti aŋ sə a jəə la sarənaŋ, aŋ sə a kəyan duuruŋ.