FILIPIŊ 1 - JAA TƏMARWAŊ

Mirkiŋ

¹ Jeere kefter toŋ haa are anə Pol də Timote, are kaa kə joŋre kə Yeesu Kristuŋ. Are jiiru haa a kaa kə Pepeŋ gud tapi neeteŋa də Yeesu Kristuŋ, gə minti giidə seŋka də Filipiŋaŋ, a kaa kəmtəŋ gə tiinə kaŋ daana a kaa kə joŋre neeteŋ gə giidə kuli kə Pepeŋ.

² Pisiŋ, də kəkaɓiŋ kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa.

³ Saksaki bə minti cəərən ɗəkəŋ ne a nəənəŋa tə bə moŋ, ten ji suuse a Pep katən faɗi.

⁴ Də ko muntu muntu mo bə minti ten toose Pepeŋ cəərəŋaŋ, ten tuusu saksaki haa də waaleŋ

⁵ gud bə minti də hi bə ajew da faɗi hãã daynaŋ, aŋ gə tapə-tepe dəərən bə duusi *Kel pəsaŋ kəmarwaŋa wəraŋ.

⁶ Ten wəra bə asə-ase kaŋkaŋ minti: Pep bə minti a məlaŋ gud joŋre pisiŋ giidiŋaŋ, wə raawe yaŋ duuru saksaki bə ɗe a gaw cuuru wəra ateŋa də hi bə bi kə Yeesu Kristuŋ.

⁷ Haa pisi bə minti ɗiki dən cəərəŋa bədoona ana'iŋ, gud bə minti aŋ wəra gə kalə-kele ku tarməna anə haɗak-haɗaki. Gud maa mo, aŋ gə falə-fele pisi kə Pepeŋ dəərən kir minti aŋ kəyan la də ko bə minti ten hebkəna a daŋgaya daana bə minti ten bə kuuri də kəəti gud Kel pəsaŋ kəmarwaŋ kə Pepeŋa, bə yəəkəy wəra kaŋkaŋ də səɓakiŋ.

⁸ Gəəzi, Pepeŋ bə asə-ase minti ten bə bəlaŋa keɗe haa də bele kə Yeesu Kristuŋ.

⁹ Ten bə waate Pepeŋa dər toose nina minti, bele bə ku tarməyaŋ zee guudu la ajewa pisi ze a ase bə gəəzə-gəəziŋa daana a zuuri bə kela,

¹⁰ kir minti aŋ jəə la gə nakə-neke bə ŋamte kar pəsaŋ gə deŋe kumsiŋ. Bədoona ana, dər hi bə minti Kristu hare daŋ, aŋ ji yaŋ *cetceti, bay kel kə malə-mele sarəŋa gəm.

¹¹ Kəya ɗe dəŋ ji yaŋ saksaki ɗeker gud səɓaki kə Yeesu Kristuŋa, kir minti kaŋ haa cəərə Pepeŋ la apəya, yə tukɗu la gud teŋa gəm.

Kristu deŋe kar keɗe

¹² Kəsaananti, ten bele minti aŋ asə la wəra minti, kel gə minti falnan ha'aŋ, yə zeŋ gud *Kel pəsaŋ kəmarwaŋ ajewa pisi zee ɗaw.

¹³ Gud maa mo kəsooto gə ame cəərə kumnaŋ daana kaa kaayaŋ keɗe wəra gə asə-ase hebkəna minti yə doonon a daŋgaya haa gud kel də Kristu.

¹⁴ Ana paŋ, bə minti kaa kə doo-deŋ asaŋ minti ten a daŋgayaŋ, daŋge diŋ fəlaŋ teŋe bə dər bə mele ɗiki di hebkəna máŋ pisi malə cəərə Barkaŋa. Bədoona ana ta, yə əntəŋ giidi bə waate kel kə Pepeŋa wəra pisi waata bay walka.

¹⁵ Sirdi yaŋ aduubə di gəəziŋ, teŋ waate sam Kristu wəra ha'aŋ, gud bə minti giidi bə hətəya cəərəna də ɗikiŋ minti té gan la wəra adordə té. Səma sirdi kaayaŋ, teŋ waate sam Kristu wəra haa də ɗiki pisiŋ.

¹⁶ Teŋ ji bədoona haa kas bele bə ku tərməyiŋ, gud minti yə wəra gə asə-ase minti ten haa kənaŋ bə kuuri də kəəti gud Kel pəsaŋ kəmarwaŋa.

¹⁷ Kaayaŋ gə minti səməy a waataŋ kandaŋ, teŋ ji neeteŋ haa də ɗiki bə gan wəra adoro di. Yə ji joŋre toŋ haa də hel daalaŋ guudu ada, də ɗikiŋ ku tərməyi minti té zenə gud gəəliŋ la sarəna a daŋgaya ada pisi ze.

¹⁸ Də teŋ keɗe kel teŋ ɗəman ba! Jəəne nuutu minti ɗiki neeteŋ də meti guudu na ada naŋ, kumundu ba yə wəətu haa kəya sukɗuŋ, kəmtəŋ də kel haa minti sam Kristu wəra bə waate a kaŋ. Bədoona ta, ten də waale gud kel teŋa daana ten bə ji yaŋ kəm də waale saksaki ajew na guudi na pə ɗaw!

¹⁹ Gud maa mo, ten wəra bə asə-ase minti, kel teŋ gila keɗe ɗe a awe ciiri haa bə seeren, gud bə minti aŋ bə toose cəərəna daana Tiiru kə Yeesu Kristu bə kəyana ada gəm.

²⁰ Bədoona ana, karman bə minti ten bə məwa hebkənaŋ daana bə minti ten bə malə-mele ɗiki dən wəra cuuru anə kaŋkaŋ, haa minti ten bə ji dər kese də karman bə minti ten a juunu kəmana ba. Kətan ana ɗaw ha'aŋ, də ko bə hebkənaŋ koo də ko bə ajew naŋ, ten jəəne nuutu caw, ten jəəne nuutu wəra bə mee-me, ten bə ge gud boblo kə Kristuŋa wəra bay walka gud kel gə minti ten bə jiyaŋ keɗe.

²¹ Gud maa mo nin ha'aŋ, karman bə minti ten caw cuuruŋ, haa bə he cəərə Kristu apəya təwa faɗi. Ten meŋ neŋ, haa pis-pisi pə ɗaw!

²² Səma, jəəne minti ten kəm caw dədərgəŋ, ten fele kəkəy yaŋ bə ji haa joŋre bə minti keye kaŋ pa. Bə jəəne bədoona kəyaŋ, ten ŋamə agal məntə la mo, paapa də dərən pəda.

²³ Ten wəra bə hoyə-hoye anə hoy-hoy dər ŋeme tó ɓasiŋa laka: caadə meŋ doonon wəra minti ten ɗee la a ji warna də Kristu. Haa karman bə minti dərəna bə daŋə-deŋeŋ.

²⁴ Səma, karman pisi bə deŋe kumsu bə minti ten jəw la gud kel dəŋaŋ, haa minti ten jəə la kəm caw cəərə seŋkaŋa kəna.

²⁵ Gud kel teŋ máŋ wəra kaŋkaŋ də dərən tə bə moŋ, ten bə asə-ase minti ten bə ji máŋ hebkəna haa caw dədərgə daana ten bə ji yaŋ sarəŋa gəm bə kəyaŋ bə si pisi suu dər de nəətiŋa də waale guudu ada,

²⁶ kir minti ten haraŋ ne ateŋa səraŋ naŋ, aŋke bə minti aŋ fəlnu gud tepe nəətiŋa də Yeesu Kristuŋ, zee guudu la ada pisi zee gud kel dəna.

Ɗe bə minti tepe də Kel pəsaŋ kəmarwaŋ kə Pepeŋ

²⁷ Səma, ɗe dəŋ jəə la bə tapə-tepe haa də *Kel pəsaŋ kəmarwaŋ kə Kristuŋ. Bədoona ta, jəəne minti ten bə ɗe yaŋ na a goloŋ, kumundu ten ɗe na baŋ, ten əskəŋ səmaŋ la haa minti aŋ yaŋ gə əsə-isi saksaki ŋəŋ də ɗiki dəŋ məna'i, daana aŋ bə duuri haa də ku tarməyaŋ tapi gud de bə minti fəlaŋ kəsar du a Kel pəsaŋ kəmarwaŋ daŋ.

²⁸ Aŋ a ji walka kas kaa kə acukur nəətiŋ a ko kəmana anə weseka bə hasi. Bədoona kəya, yə ase yaŋ minti té wəra gə basə-bese daana aŋ teŋ wəra gə seerə-seere gəm. Pepeŋ bə ji kel teŋ haa tó.

²⁹ Gud maa mo, cəərə kel də Kristu ha'aŋ, Pepeŋ aynaŋ kəkəy paapa minti aŋ doo la guudu təwa ba, səma minti aŋ lasə la guudu gəm.

³⁰ Hebkəna ha'aŋ, aŋ bə duuri kumsə duuri bə minti aŋ a astənan bə duuru dayday. Wəra də dərəŋ minti hãã dayna ten kəm bə duuru gəm.