Filemoŋ 1 - JAA TƏMARWAŊ

Mirkiŋ

¹ Jeere kefter toŋ haa kəya ten Pol, ten bə minti yə doonon a daŋgaya gud kel də Yeesu Kristuŋ. Are bə jiiru daana seenə áŋ Timote. Are jeere kefter toŋ a nəənəm Filemoŋ, tam bə minti daarə areŋ, daana tam kumsə are bə joŋreŋ.

² Are bə jeere kefter toŋa kəya gəm ha'aŋ a nawrə áŋ Afiyaŋ, a Arsipi kumsə áŋ bə minti bə duuri gud Barkaŋaŋ, daana a kaa kə Tapiŋ gə minti tapte ciiri gerdemaŋ keɗe.

³ Pisiŋ, də kəkaɓiŋ kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa.

Bele kə Filemoŋ də de nuutuŋ.

⁴ Bədoona ana, saksaki bə minti ten ɗəlaŋ ne bə toose Pepeŋaŋ, cəərən ɗiki a nəənəma daana ten jəw suuse a nuunu gud kel dəma.

⁵ Gud maa mo, ten əskəŋ sam bele nəmti bə minti tam bə jəwa sar kaa kə Pepeŋaŋ, daana sam de nəmti bə gud Yeesu Kristuŋ.

⁶ Ten bə toose Pepeŋa minti tepe nəmti a de bə gud Yeesu Kristuŋa də kaa kaayaŋ jəə la də səɓaki, daana wə kəyam la bə əski gud kel pəsaŋ gə minti áŋ fələy a tepe náŋa gud Kristuŋ.

⁷ Siinu, bele nəmtiŋ aynan waale ablaw daana wə teŋnen dərən ablaw gəm, gud maa mo tam arsaŋ tarmə kaa kə Pepeŋ.

Pol mante kəkəy kasi Filemoŋ cəərə Onesima.

⁸ Gud teŋa ta, gud tepe nina də Kristuŋ, ten nuutu də kəkəy cəərəna kir minti ten kam kəkəy də joŋre nəmtiŋ,

⁹ də teŋ keɗe ten bele haa ɗaw minti ten mante karman kaasəma də kamkam gud beleŋa. Damdi ten Pol ana, ten hulum pəərəŋki bə minti hebkəna a daŋgaya gud kel də Kristuŋ,

¹⁰ ten bele jəm kamkam cəərə kormon Onesima. Wə koloŋ kormon a ko bə minti ten wəra kəna a daŋgayaŋ.

¹¹ A dayday ha'aŋ, wə a paapa bə kəyama ba. Səma bə hebkənaŋ ha'aŋ, wə koloŋ ne hulum bə keye áŋ dəərəm.

¹² Hebkəna ha'aŋ, ten bə haram dəm na səram na, wə haa karmə giidən.

¹³ Ten a də caadə minti wə sə a jəə la kəm kəna sarəna a ko bə minti ten a daŋgaya gud *Kel pəsaŋ kəmarwaŋ kə Pepeŋaŋ, kir minti wə sə a jən digi la a koɗoma.

¹⁴ Səma, ten bəlaŋ minti ten ji karman bə minti giidən bəluŋ bay waatam ba. Ten paapa bə balə-bele minti ten ham guudum minti tam jən la pisi ba, ten bele haa minti tam jəw la haa gud giidima.

¹⁵ Kumundu ba, kel gə minti wə a haŋ giidu wəra sarəma sawəwa ciiriŋ haa minti tam bə harə la máŋ dəmaŋ bə fəlu haa bə faɗnə-faɗna,

¹⁶ paapa bə kafkam ana təwa pəda, wə dəŋaŋ kafkam, wə koloŋ máŋ seenə áŋ bə minti giidə áŋ bəlu ablaw. Wə ha'aŋ, giidən bəlu ablaw, tam ha'aŋ, tam bə bəlu máŋ dəŋaŋ teŋ ɗaw gud maa mo wə haa hulum kisirki gəm, daana wə seenem gud Barkaŋa pa.

¹⁷ Jəəne minti tam bə aŋkəna bə gom dəm ana a de náŋ bə gud Pepeŋaŋ, daw irku du la damdi tam sə a don irku dən gerdəma bədoona ana gəm.

¹⁸ Jəəne minti wə a jəənəm kel kə bayməlaŋ ne sarəmaŋ, kumundu ba wə haanam karman nəmti ne nuutu ɗawmay, əŋku la máŋ hebkəna cəərəna.

¹⁹ Ten jeerem kel teŋ day ta'i kəna ten Pol də kaasən minti: ten bə werkem yaŋ wəra. Tam də kusrum gəm, cəərəm a ge wəra bə gəm minti dədərgə də bay teweŋ ha'aŋ, tam əskənə kel də haa kunaŋ.

²⁰ Bədoona gəəzi seenənti, ten jəm kamkam gud Barkaŋa, doo haa də kel teŋ la; gud bele kə Kristuŋa, arsan ku tarman la.

²¹ A ko bə minti ten bə jeerem kefter toŋa kəyaŋ, də dərən nuutu wəra minti tam don kun yaŋ nuutu, də dərən ɗaw minti tam bə ji máŋ haa dəŋaŋ teŋ pə ɗaw.

²² Bədoona ana gəm, ɗampan ko bə isi la gəm gud minti ten bə ɗiki minti, Pepeŋ əskəŋ toose nəətiŋ yaŋ, daana wə ayan kəkəy yaŋ bə hare səraŋ na.

Mirki bə tewe cəərə kel

²³ Epafrasi bə minti are a daŋgaya də kumsi gud kel də Yeesu Kristuŋ bə mirkim na pis-pisi.

²⁴ Anə Markə daana Aristarkə, Demasi, də Liki gə minti are a joŋreŋa də kumsiŋ bə mirkim na gəm.

²⁵ Pisi kə Barkaŋ Yeesu Kristu jəə la dəərəŋ.