EFESIŊ 6 - JAA TƏMARWAŊ

Kəmar koncoŋ də kəmniŋ

¹ Aŋ kəmar koncoŋ, aŋ doo ku kamnaŋ la gud Barkaŋa, gud bə minti haa karman ɗekeri bə minti kir ji.

² «Haa cəərə bəram la apəya də nərəm», haa ku gili bə ajew bə minti Pepeŋ waataŋ wəra cuuru minti tam toŋ ɗeŋ ne guuduŋ, tam fele pisiŋ guudu gəm.

³ Pisi toŋ haa minti: «…kir minti tam jəə la də waale daana tam hətə la ablaw cəərə seŋkaŋa gəm.»

⁴ Aŋ kamnə kəmar koncoŋ, aŋ a kolte karməyaŋ waŋ ba. Səma aŋ hətəy la a kəkəy bə suya, aŋ giliy la də aŋar də kel gə minti giidə Barkaŋ bələy.

Kafkam də kəmnə diŋ

⁵ Aŋ kafkam, aŋ humə kosoŋ la cəərə kəmnə dəŋa kəna adawra də walka guudu ada, bə jəy kese di, daana də tarməyaŋ pəsaŋ, damdi aŋ ji joŋreŋ haa a Kristu ana faɗi.

⁶ Aŋ a ji joŋre nəətiŋ a ko bə minti yə bə goloŋ cəərəŋaŋ təwa'i də ɗiki minti aŋ jəə la diri pəsaŋ ŋaanaanə mo ba. Səma aŋ jəə joŋre la damdi kafkam kə Kristu gə minti ji kel gə de giidə Pepeŋ wəra də ku tərməyi anə soki məna ana.

⁷ Aŋ jəy joŋre la də ɗiki dəŋ pisiŋ. Aŋ a jəw damdi aŋ jəw haa a kaa kəsarkaŋ ana ba; aŋ jəw la damdi aŋ jəw a Barkaŋ ana'i.

⁸ Aŋ wəra gə asə-ase minti, jəəne nuutu kafkam, kumundu ba paapa kafkam ba, Barkaŋ ɗe a aye karman a mindi mindi mo cəərə pisi nuutu bə minti wə a juunuŋ kəna adawra anə derra faɗi.

⁹ Aŋ kəmnə də kafkam, aŋ jəə kusrəŋ la sar kafkam nəətiŋa haa bədoona dege'-dege'i gəm, aŋ a ləytəy ba. Gud maa mo aŋ wəra gə asə-ase minti aŋ də kafkam nəətiŋ, bərdəŋ yaŋ apəy da, wə cəərəŋa tapi keɗe, toŋ paapa bə gole kaŋa hal-hal ba.

Kar kə duuri gə minti Pepeŋ əyəy

¹⁰ Bə tewe cəərə kel, ten bele waataŋ minti: aŋ goldə səɓaki nəətiŋ la haa a tepe nəətiŋa də Barkaŋ daana sar səɓaki nuutu də minti wəra mooto hasiŋa.

¹¹ Kar kə duuri gə minti Pepeŋ əyəy keɗe, aŋ gənəy la saraŋa kir minti aŋ jəə la gə nakə-neke bə isi ŋəŋ ku tiwki kə Nərtitiŋa.

¹² Gud maa mo, duuri náŋ paapa də kaa kəsarkaŋ ba, duuri náŋ haa də kəkamna gə apəyaŋ, kar kə səɓakiŋ, kəmnə də ko bə tilməŋ daana kəwal gə minti dər ko bə apəyaŋaŋ keɗe.

¹³ Gud teŋa ta, kar kə duuri gə minti Pepeŋ əyəy, aŋ gənəy la saraŋa keɗe kir minti, hi bə baymeleŋ tuluŋ neŋ, adordə bə minti aŋ a jəŋ karman bə minti aŋ a gə nakə-neke bə jəw, aŋ nakə la bə gerge tiinə hulum bə acukura hãã a tewe də duuriŋa.

¹⁴ Aŋ əsə la wəra máŋ gə ganə-gene. Gəəziŋ jəə la tawraŋa damdi aŋ ge karkataawa tawraŋa ana. Ɗeker jəə la saraŋa damdi aŋ tere koroŋ saraŋa ana.

¹⁵ Aye bə kusrəŋ a waate bə *Kel pəsaŋ kəmarwaŋ gə aye kəkaɓiŋa jəə la damdi kalmasi gə kampəraŋ ana.

¹⁶ De nəətiŋ jəə la saksaki damdi tukur də kaasaŋ ana. Aŋ neke yaŋ bə nokte ku ɓooro kə Nər Sərkə bə do'e-do'eŋ haa dəərə.

¹⁷ Aŋ doo seereŋ la damdi kaŋkəlaŋ gə duuri ana, daana kel kə Pepeŋ damdi caafay də minti Tiiru Cetcetaŋ ayaŋ dəŋ ana gəm.

¹⁸ Dər koŋa keɗe, aŋ toosə Pepeŋ la də gidiirə tooseŋ, də manteŋ. Tiiru Cetcetaŋ kəyaŋ a tooseŋa haa tá. Aŋ əsə la wəra gə gunə-guni cəərə tooseŋa, aŋ a yəəku a kəkəya ba. Kaa kə Pepeŋ keɗe, aŋ toosə la ciiri gəm.

¹⁹ Aŋ toosə Pepeŋ la cəərəna gəm, minti ten ɗəlaŋ ne bə biŋi kuna wəra bə waate kelaŋ, Pepeŋ ayan di la kir minti kel kə metə-mete gə minti Kel pəsaŋ kəmarwaŋ vəɗəy wəra, ten gay guudi la wəra bay walka.

²⁰ Ten nuutu kəm hebkəna a daŋgaya, də teŋ keɗe ten haa hulum bə gaa-ge kə Kel pəsaŋ kəmarwaŋ teŋ. Bədoona ana ta, aŋ toosə la cəərəna kir minti ten wəətəy la wəra bay walka damdi ten sə a wəətəy ana.

Tewe də kel

²¹ Bə minti aŋ asə la wəra minti ten hebkəna naanaanə moŋ, daana ten bə ji maa toŋa moŋ, Tisiki, seenə áŋ bə minti áŋ bəluŋ, bə minti ɓeti a joŋre kə Barkaŋaŋ, ɗe yaŋ a waataŋ kel dən na a nəənəŋ haa tó.

²² Ten gaanaŋ dəŋ na anə derra haa minti wə ɗee la a topoŋ bəlam də kel naareŋ daana wə teŋeŋ dərəŋ la gəm.

²³ Doŋ kir minti Pep Abaŋ daana Barkaŋ Yeesu Kristu ayə kəkaɓiŋ la, də beleŋ, də deŋ, a kəsaanə áŋ neŋneŋ keɗe.

²⁴ Pisi kə Pepeŋ jəə la cəərə kaŋa keɗe gə minti bele Barkaŋ náŋ Yeesu Kristu də bele bə minti kole ba anə hasiŋ.