EFESIŊ 5 - JAA TƏMARWAŊ

¹ Aŋ wəra kəmar gə minti giidə Pepeŋ bəlaŋ ablaw tə bə moŋ, aŋ ayə kusrəŋ la bə ɗe akas tó ana.

² Ɗe dəŋ haa la gud beleŋa tew-tew, damdi ɗe də Kristu a haŋ guuduŋ ana gəm. Gud maa mo, wə bəlaŋ áŋ ablaw daana wə ayaŋ kusru wəra a Pepeŋ gud áŋa damdi karman bə ayə-aye daana keere bə minti siisi duŋ siisunu warna fərəy-fərəy ana.

³ Aŋ haa kaa kə Pepeŋ tə bə moŋ, gidiirə kel kə bayməlaŋ daana gə zeɓə-zeɓeŋ keɗe, koo kel kə həryəm-həryəm, a kele wəra ku huluma bə anə ceki faɗi a ko bə nele nəətiŋa də kumsəŋ.

⁴ Anə kel kə kes-keseŋ, kel kə gul-gulaŋ, kel kə tere cəərə kaŋ, paapa pəsaŋ a nəənəŋ gə ji bə gəm. Səma nəətiŋ ɗaw ha'aŋ, aŋ jəə la haa suuse a Pepeŋ.

⁵ Aŋ asə la wəra pisi cəərəŋa kaŋkaŋ minti: kaa gə minti jəəti booboŋ, kel kə zeɓə-zeɓeŋ, də kel kə həryəm-həryəm (həryəm haa ke bə awalna a kar gə minti kaŋ guluy pepe neeteŋ toki), hulum gud kaa teŋa anə məna neke bə fele ko a *kumna bə minti Kristu də Pepeŋ bə həmu yaŋ ba.

Ɗe bə dər pəɗakiŋ

⁶ Aŋ a yaake hulum bə ləŋaŋa wəra də kel gə bay bəlam di kəman ba anə ceki. Gud maa mo, waŋ kə Pepeŋ awte cəərə kaa gə minti paapa bə humi kosoŋa cuuru baŋ, haa gud kumsə kel teŋa kəya faɗi.

⁷ Aŋ a tepe guudəŋ wəra diiri a kel gə minti yə bə jiyaŋ ba.

⁸ A dayday, ko bə tilməŋ a jəŋ haa aŋ faɗi. Səma bə hebkənaŋ ha'aŋ, gud tepe nəətiŋa də Barkaŋ, ko bə pəɗakiŋ máŋ haa aŋ faɗi gəm. Gud teŋa ta, ɗe dəŋ jəə la haa kə kaa kə ko bə pəɗakiŋ.

⁹ Gud maa mo, karman bə minti hulum fəlu gud ɗe bə dər pəɗakiŋa ha'aŋ, haa bə minti wə kole wəra hulum pisi, ɗekeri, daana bə gəəzə-gəəzi.

¹⁰ Aŋ ayə kusrəŋ la bə vere dər kela bə ase kaayaŋ gə minti de dər Barkaŋ.

¹¹ Kar kə ko tó bə tilməŋ ha'aŋ, aŋ fele karman guudi ba. Gud teŋa ta, aŋ a tepe bə ji teŋa diiri ba, aŋ kayə guudi la wəra haa ke ɗaw.

¹² Gud maa mo, kel gə minti kaa teŋ jəy dəgaaya-dəgaaya ha'aŋ, koo a kəkəy bə waate diŋa anəkay təwa, kese doŋ faɗi.

¹³ Səma gud kel teŋ gaŋ ne wəra dər pəɗakiŋaŋ, yə naanaanə moŋ, aŋ əsəy wəra anə kaŋkaŋ faɗi.

¹⁴ Gud maa mo, karman naanaanə moŋ, gaw guudu wəra haa pəɗakiŋ. Gud teŋa ta, yə waate minti bəŋa: «Tam bə minti a kinaŋ, gunə la wəra; tam bə minti adəwaldə kaa kə mee-meŋaŋ, faa la wəra, kəya Kristu wəlam yaŋ wəra də pəɗaki nuutuŋ.»

¹⁵ Bədoona ta, aŋ amə ɗe dəŋ la pisi. Aŋ a ji kusrəŋ damdi kaa gənam-gənami ana ba, səma aŋ jəə la haa kaa kə zuuri kel.

¹⁶ Dərəŋ fəlaŋ ne nuutu a ko anə weseka bə zuuri kel, aŋ jəy la faɗi, gud maa mo ko bə minti áŋ hebkəna duruŋ, baymeleŋ kəlaŋ ada ablaw.

¹⁷ Gud teŋa ta, aŋ a ji damdi kaa kə bay ɗikiŋ ana ba. Ana ɗaw ha'aŋ, aŋ bandə la bande bə əski gud kel gə minti giidə Pepeŋ bele minti aŋ jəy la.

¹⁸ Aŋ a markete wəra də kumuy ba, gud bə minti wə ɗe a koloŋ bə ji hayam-hayama. Səma aŋ yaakə kusrəŋ la a Tiiru Cetcetaŋ bə ɗosoŋ ku tarməyaŋ wəra.

¹⁹ Aŋ teŋə dər kumsəŋ la də gudul bə tokɗe Pepeŋ, də gudul bə waate sam kel kə Pepeŋ, daana də gudul bə minti aŋ cəmnu də səɓaki kə Tiiru Cetcetaŋ. Aŋ gaa gudul la ta, aŋ tokɗə Barkaŋ la wəra də ku tarməyaŋ soki məna.

²⁰ Aŋ jəə suuse la a Pep Abaŋ dər koŋa keɗe, cəərə kara keɗe, də sam Yeesu Kristu Barkaŋ náŋ.

Kəram də kaa kaŋkar

²¹ Aŋ topə ku kumsu la aduubə də kumsəŋa gud bə minti aŋ bə ji kese də Kristuŋ.

²² Aŋ kəram, aŋ doo ku kaŋkar nəətiŋ la gud bə minti aŋ bə de ku Kristuŋ.

²³ Gud maa mo hulum koŋkor haa hulum bə ame cəərə muruŋ, damdi Kristu bə ame cəərə kaa kə Tapiŋa ana gəm. Kristu də kusru ha'aŋ, wə haa Hulum bə seere kə kaa kə Tapi gə minti koloŋ bə kusuki du anaŋ.

²⁴ Kəya kəram doo ku kaŋkar neeteŋ la cəərə kara keɗe, damdi kaa kə Tapiŋ bə de ku Kristuŋ ana gəm.

²⁵ Aŋ kaa kaŋkar, aŋ balə kəram nəətiŋ la damdi Kristu bəlaŋ kaa kə Tapiŋ ana. Wə bəlnəy hãã bə minti wə ayaŋ kusru wəra a meŋ guudi,

²⁶ kir minti tó kuluy wəra *cetceti də kan daana də kel kə Pepeŋ, minti yə nakə la bə kole wəra kə tó.

²⁷ Wə jəŋ bədoona haa minti tó aye Tapi taŋ a kusru tó toki, Tapi tá də minti welɗə-welɗe kas pəsaŋ, bay zodiŋ, bay rakweŋ, bay kumsə kar teŋ kəya saraŋ. Wə a bəlaŋ minti a a ji də zeɓə-zeɓe ba daana hulum a fele ko bə mala kel sara bə gəm.

²⁸ Kaa kaŋkar jəə la bədoona gəm: yə balə kəram neeteŋ la damdi yə haa kusuki di ana. Bədoona ana ta, hulum bə minti bele muruŋ, wə bele haa kusru toki faɗi.

²⁹ Gud maa mo, hulum məlaŋ dər kusru wəra hõy ba anə ceki. Ana ɗaw ha'aŋ, wə guldu hameŋ, wə jəw guudu damdi Kristu bə ji gud áŋ kaa kə Tapiŋa ana gəm,

³⁰ gud bə minti áŋ haa kar də kusru.

³¹ «Gud teŋa ta, hulum koŋkor yaake buru warda də nuru bə ɗe a ve kuli neeteŋ warna də muruŋ. Kəya yə ɓasi keɗe, yə kole haa hulum bə məna.»

³² Kəna ta'i kənaŋ, kel kəmtəŋ gə metə-mete yaŋ ada. Ten waate haa kəna sam karman bə minti ten a wəətunu səmu kanda cəərə Kristu da də kaa kə Tapiŋ.

³³ Nəətiŋ haa taŋ, mindi mindi mo balə muruŋ la damdi wə bele kusru ha'aŋ ana'i, daana həlgə məntə məntə mo jəə kese də gedra la gəm.