EFESIŊ 4 - JAA TƏMARWAŊ

Áŋ tapə la wəra məna kusrə Yeesu

¹ Bədoona ta, ten bə minti a daŋgaya gud joŋre kə Barkaŋaŋ, ten bə jəŋ kamkama minti: ɗe dəŋ jəə la bə tapə-tepe də mante bə minti Pepeŋ mantənaŋ da duuruŋ ha'aŋ ana gəm.

² Aŋ a golde he bə cə bə apəya ba, aŋ jəə la sããya sar kumsəŋa, aŋ jəə la bə mi ku kela, beleŋ jəə la ku tarməyaŋa bə hale kumsuŋa aduubə dəŋa.

³ Aŋ ayə kusrəŋ la də səɓaki, kir minti tepe bə minti Tiiru Cetcetaŋ bə təpaŋ cəərəŋa də kəkaɓiŋ a ɓalke wəra ba.

⁴ Kusrə Kristu haa ɗaaməna, Tiiru Cetcetaŋ haa ɗaaməna gəm, damdi karman bə minti Pepeŋ waatənaŋ minti aŋ malə ɗiki dəŋ la cuuruŋ ana a ko bə minti wə mantənaŋ wəra minti aŋ jəə la kə tó, karman toŋ wə ɗaaməna faɗi gəm.

⁵ Barkaŋ wə ɗaaməna faɗi, deŋ ɗaaməna, batem ɗaaməna gəm.

⁶ Pepeŋ wə ɗaaməna, wə Bar kaŋ keɗe, wə kumna kə kaŋ keɗe, wə ji joŋre də kaŋ keɗe, daana wə də kaŋ keɗe'i.

⁷ Səma, Kristu ayaŋ hel a kaŋ anə hayaŋ faɗi; mindi mindi mo gud áŋa fəlaŋ nuutuŋ ne wəra.

⁸ Kefter kə Pepeŋ waataŋ wəra minti: «Bə minti wə kooroŋ apəy naŋ, wə humuŋ kaa kəəsu na daŋgay, wə ayaŋ kar wəra boobo a kaa gə adawraŋ.»

⁹ Ana haa taŋ, kel gə minti waate minti «wə luŋ apəy naŋ» guudiŋ haa minti harmə mo? Teŋ haa minti wə ɗeŋ warda gud koŋ da adawra da gəm bə mo?

¹⁰ Ãhãã, hulum bə minti ɗeŋ adawra daŋ ha'aŋ, wə haa tó bə məna bə minti raawaŋ cəərə ko bə apəyaŋ warna keɗe, kir minti kar kə jəə-jiŋ doo kuy la wəraŋ.

¹¹ Kar gə minti wə əynəy a kaŋ booboŋ, haa bə minti wə əstəŋ sərdə kaŋ *kaa kə vaa-ve nuutu, sirdiŋ *kaa kə jogte ku mini kə Pepeŋ, sirdiŋ kaa gə minti bə ɗe wəra də *Kel pəsaŋ kəmarwaŋ, sirdiŋ kə paster, sirdiŋ kaa kə hate kaŋ.

¹² Wə ayaŋ kaa teŋ haa minti yə ɗampə kaa kə Pepeŋ la, kir minti yə jəə la wəra gə nakə-neke bə ji joŋre neeteŋ. Kəya kusrə Kristu si yaŋ ajewa faɗi.

¹³ Bədoona ana ta, áŋ neke yaŋ keɗe bə ji tapi dər de náŋa daana dər ase náŋa cəərə Kormə Pepeŋa. Áŋ kole yaŋ wəra kaa kə jeŋə-jeŋe daana kaa gə minti si yaŋ hãã bə ɗe a de ku áŋ wəra, damdi ku Kristu wəra bə doo-de ana gəm.

¹⁴ Bədoona kəya tə bə moŋ, áŋ bə ji paapa damdi kəmar koncoŋ kəman gə minti bə halye dər gidiirə hate hãy-hãyiŋa ana pəda. Gud maa mo yə damdi kətartawaŋ gə minti bə halye dər kan gə acceŋa minti kaŋkaw bə təkəyaŋ ana. Aye hate toŋ haa kaa gə minti ji kaŋ də tiwki bə ɗe a vay wəra dər kel kə ləŋəya.

¹⁵ Səma áŋ jəəne bə waate gəəziŋa də beleŋ guudu ɗaw, áŋ si yaŋ wəra agal də kara keɗe bə Kristu tó bə minti cəərə áŋ ana.

¹⁶ Ji áŋ keɗe minti áŋ tapə la wəra ŋərŋər kusrə hulum bə məna haa tó. Kəsar gə dər kusuki bə məna toŋ əntəŋ áŋ wəra pisi sar kumsə áŋa haa té gəm. Haa bədoona ta, jəəne minti kar də kusuki məntəŋ məntəŋ mo bə ji joŋre neeteŋa wəra a kuɗuŋa də beleŋ guuduŋ, wə si kusru, bə ne kusru gəm.

Dədərgə təmarwaŋ gud tepe náŋa də Kristuŋ

¹⁷ Bədoona ana, day ta'i kənaŋ haa karman bə minti ten jəŋ kamkam cuuru gud sam Barkaŋaŋ minti: aŋ a ji kusrəŋ damdi kaa gə minti Pepeŋ paapa də diri baŋ ana pəda. Ɗiki neete bə minti yə bə ɗe guuduŋ wəra haa ko bə boobo.

¹⁸ Ɗiki di wəra bə kerpə-kerpe daana yə wəra tooto sar dədərgə də minti bi kasi Pepeŋ daŋ, gud bə minti yə hẽŋeŋ ku tərməyi wəra a kel kə Pepeŋa, kəya kel nuutuŋ paapa də diri anə weseka ba.

¹⁹ Keseŋ paapa də diri pəda gəm: yə vaŋ máŋ neete bə ji gidiirə baymeleŋa, bə ji kar kə dawə-deweŋa anə hãy faɗi.

²⁰ Səma nəətiŋ ha'aŋ, kel gə minti aŋ a hətnəy cəərə Kristuŋ, yə paapa bədoona ba.

²¹ Bədoona ta, aŋ kaa kə doo-deŋ, aŋ wəra gə əskə-əski kel gə minti yə wəətənəy cuuruŋ gəəzi, daana yə hatnaŋ kel gə minti teŋ tepe də gəəzi kə Yeesuŋ.

²² Kel teŋ haa minti bəŋa, a kəkəy bə minti aŋ yaake ɗe dəŋ bə minti aŋ a jəŋ bə ɗe guuduŋ wəraŋ, aŋ pəə tiirəŋ də dayday də minti a bə kaŋa dər baymeleŋa la wəra. A bele naataŋ haa kel kə bayməlaŋ bə siitiŋ dərəŋ daana bə bəsaŋ wəra.

²³ Aŋ doŋ kir yaake kusrəŋ bə kole kimirwi a kəkəy bə minti aŋ kole bə ame ɗiki dəŋa.

²⁴ Aŋ darə tiirəŋ təmarwaŋ la cəərəŋa, tiirəŋ tá də minti Pepeŋ a jəənə bə tó ana'iŋ, kir minti ɗe dəŋ tapə la də kel kə gəəzə-gəəziŋ. Kel teŋ haa minti ɗe dəŋ jəə la wəra ɗeker daana *cetceti.

²⁵ Gud teŋa ta, aŋ yaakə ŋete bə kel la wəra. Mindi mindi mo aduubə dəŋa waatə gəəziŋ la a kumsuŋ, gud maa mo, áŋ keɗe haa kar də kusrə hulum məna'i.

²⁶ Aŋ koloŋ wáŋ neŋ, aŋ a yaake kusrəŋ bə ji baymele ba, wáŋ nəəti taŋ tawə la wəra ajew də minti cəwa dereŋ.

²⁷ Aŋ a yaake kəkəy a Nərtitiŋ minti a kolə la kumna cəərəŋa ba.

²⁸ Hulum bə minti a jəŋ ne bə jəəti dəgaayaŋaŋ, wə yaakə la wəra. Wə jəə la máŋ ɗaw haa joŋre ɗeketiŋ kir minti wə falə karman la bə keye kaa kə caacaŋ də kəəsu.

²⁹ Kel kə bayməlaŋ a kalte wəra kuŋa ba anə ceki faɗi. Aŋ waatə la haa kel pəsaŋ gə keye kaŋ daana gə tiŋiy diriŋ təwa; kel teŋ aye pisi yaŋ a kaa gə minti bə jiɓriyaŋ.

³⁰ Aŋ a jəəti kel kə aye laawe a Tiiru Cetcetaŋ kə Pepeŋ ba. Gud maa mo, Pepeŋ maltaŋ tarwa wəra sarəŋa dəərə bə ge dər minti, dər hi bə minti tó bidi kaŋ wəra duuru bə faɗnə-faɗna, aŋ wəra kaa kə tó gəəzə-gəəzi.

³¹ Giidiŋ gə ɗəmaŋ gə cəərə kumsəŋ, humti bə dər kumsəŋ, wáŋ, ji bə gəbaŋ də kumsəŋ pikpikiŋ, sarte bə kumsəŋ, aŋ yaakə teŋ la wəra keɗe aduubə də kumsəŋa. Bədoona ana gəm, gidiirə kel kə sərkə-sərkə məntəŋ mo, aŋ yəəkəy la wəra gəm.

³² Aŋ jəə la sar kumsəŋa sããya, aŋ asə caadə kumsu la, aŋ vəəgə giidiŋ la wəra cəərə kumsəŋa, damdi Pepeŋ vəəgi giidu wəra cəərəŋa gud tepe nəətiŋa də Kristuŋ ana gəm.