EFESIŊ 3 - JAA TƏMARWAŊ

Joŋre bə minti Pepeŋ əynu kasi Polaŋ

¹ Gud teŋa ta, ten Pol, ten toose nin haa Pepeŋ. Ten a daŋgaya gud joŋre kə Yeesu Kristuŋa gud aŋ gə minti paapa gə Ziwifi baŋ.

² Aŋ wəra gə əskə-əski sam joŋre bə minti Pepeŋ, gud pisi nuutuŋaŋ, wə aynan dən kaasəna minti ten jəw la gud kel dəŋa.

³ Hel nuutu də minti a jəŋ wəra də metə-meteŋ, a wəra hebkəna də dərən gud bə minti wə vaɗənan dən wəra. Ten a jeereŋ də ne weseka ajew da kanda cəərə da.

⁴ A kəkəy bə aŋke kel teŋa, aŋ ase yaŋ ada minti, hel də metə-mete tá də minti waate cəərə Kristu, Hulum bə minti Pepeŋ ŋəmnuŋ, a wəra də dərən kaŋkaŋ.

⁵ Pepeŋ a gaana guudə warda a kaa kə dayday damdi wə gaana guudə wəra hebkəna də Tiiruŋ a *kaa cetceti gə vaa-veŋ daana gə jogte ku mini nuutuŋ ana ba.

⁶ Hel də metə-mete taŋ haa minti bəŋa: kaa gə minti teŋ paapa gə Ziwifi baŋ, gud tepe neeteŋa də Yeesu Kristuŋ, yə fele pisi bə minti Pepeŋ əyu a áŋ kaanə Ziwifiŋ gəm. Gud *Kel pəsaŋ kəmarwaŋa, yə təpaŋ wəra də áŋ kusrə hulum bə məna'i daana kar gə minti Pepeŋ a waataŋ wəra minti tó əyəy a kaa kə toŋ, yə fələy gəm.

⁷ Ten koloŋ hulum bə minti joŋre nin haa waate bə Kel pəsaŋ kəmarwaŋ ha'aŋ, gud bə minti Pepeŋ jəŋ pisiŋ nuutu sarəna bə minti wə jəŋ joŋre giidəna də səɓaki nuutuŋ.

⁸ Adəwaldə kaa kə Pepeŋa keɗe, a bə kerpə-kerpeŋ aduubə di haa ten. Də teŋ keɗeŋ, Pepeŋ jəŋ pisi sarəna a kəkəy bə minti wə aynan nin haa waate bə kel a kaa gə minti teŋ paapa gə Ziwifi baŋ cəərə pisi boblo bə minti áŋ fəlu gud Kristuŋ. Pisi boblo toŋ, guudu əski kas huluma ba.

⁹ Hel də minti Pepeŋ doŋ ku karman bə minti wə a ɗəkəŋ bə jəw dəərəŋ, ten kir vaɗa wəra a kaŋ keɗe. Pep tó bə minti jəŋ kar keɗeŋ, wə a metna a ɗiki du da warda hãã,

¹⁰ kir minti bə hebkənaŋ, kəkamnaŋ daana kaa kə səɓak-səɓakiŋ gə apəyaŋ, asə gidiirə ablaw də ase kə Pepeŋ la wəra gud kaa kə Tapiŋa.

¹¹ Kel teŋ gila keɗe təpaŋ də karman bə minti Pepeŋ a ŋəɓnu warda hãã daana bə minti wə duunu ku wəra hebkəna də Yeesu Kristu Barkaŋ náŋ.

¹² Gud tepe náŋa də Kristu daana gud de náŋ bə guuduŋa, kəkəy cəərə áŋa bə ɗe tiinə Pepeŋa gəəzə-gəəzi bay walka.

¹³ Gud teŋa ta, ten waataŋ minti aŋ a dere hor kas lasi də minti ten bə saara guudəŋaŋ ba. Gud maa mo, aŋ bə fele aŋkeŋ haa gud lasi taŋa ɗaw.

Kaanə Efesiŋ asə bele kə Pepeŋ la

¹⁴ Gud teŋa ta, ten ve də gəgəərən bə toose tiinə Aba bobloŋa.

¹⁵ Kaŋ gə camə-ceme gud kəmni ta'-ta'i apəy na daana adawra kəna, yə haŋ kel teŋ haa kəəsu; mindi mindi mo də buru.

¹⁶ Ten bə mante kəəsu minti, gud boblo bə pisi nuutuŋa, wə jeŋeŋ la də Tiiru Cetcetaŋ gal giidiŋa də səɓaki

¹⁷ daana minti Kristu əsə la ku tarməyaŋa gud de nəətiŋa. Dədərgə dəŋ jəə la də vaa-ve kəsar də daana də əsə-isi ŋəŋ-ŋəŋ wəra haa dər beleŋa.

¹⁸ A ko toŋa kəya taŋ, aŋ, də kaa kə Pepeŋ keɗe, aŋ neke yaŋ bə əski gud kel cəərə bele kə Kristuŋa minti wə wəra vəɗə-vəɗi, wə kimpili, wə wəra nemnem apəya daana nemnem adawra ŋaanaanə mo.

¹⁹ Bədoona gəəzi, bele tó bə minti kel du deŋe kaayaŋ gə minti kaŋ neke bə əsəy cuuruŋ, wə bə ji yaŋ də dərəŋ, kir minti Pep bə minti wəra bə doo-de kuŋ ɗosoŋ la wəra damdi tó ana gəm.

²⁰ Tokɗeŋ jəə la a Pep bə minti, də səɓaki də minti bə ji joŋre giidə áŋaŋ, wə bə nakə-neke bə ji kar ablaw gə daŋə-deŋe cəərə kaayaŋ gə minti áŋ bə məntəya kəəsuŋ kumundu ba áŋ bə ɗikiyaŋ.

²¹ Tokɗe toŋ jəə la nuutu adəwaldə kaa kə Tapiŋa gud tepe neeteŋa də Yeesu Kristuŋ, daana dər laate bə ajew na anə keɗe bə faɗnə-faɗnaŋ gəm. Amen.