EFESIŊ 2 - JAA TƏMARWAŊ

Pepeŋ aye dədərgə təmarwaŋ a kaŋ

¹ Aŋ ha'aŋ tə bə moŋ, aŋ a jəŋ wəra dayday tiinə Pepeŋa haa damdi kaa kə mee-me ana gud laŋte nəətiŋa daana jəəti bə baymeleŋ.

² Aŋ a jəŋ ateŋa toŋ ha'aŋ, ɗe dəŋ a haa anə derra damdi kə kaa gə cəərə seŋkaŋ ana faɗi. Aŋ a jəŋ bə ɗe haa gud kumna kə kəwala. Tiiru taŋ ha'aŋ, ji joŋreŋ hebkəna giidə kaa gə minti paapa bə de ku Pepeŋa baŋ haa tá.

³ Áŋ keɗe, áŋ a jəŋ haa bə kaa teŋ ana gəm. Áŋ a bə ɗe haa gud kel gə minti kusrə áŋ bə hatə-hate də baymeleŋ a bə bələyaŋ. Kar məntə məntə mo keɗe minti kusukiŋ daana ɗiki dəŋ bələy, áŋ jiitiniy anə faɗ-faɗi. Bədoona ana, gud kusrə áŋ toŋa ta, áŋ a wəra gə sokə-soke haa minti kəəti kə Pepeŋ sə a humi áŋ damdi kaa kaayaŋ teŋ ana gəm.

⁴ Səma Pepeŋ ha'aŋ, giidu wəra pəsaŋ ablaw hasi cəərə kaŋa. Bədoona ana, gud bele nuutu boblo bə minti wə bəlaŋ áŋ duuruŋ tə bə moŋ,

⁵ bə minti áŋ a kəm nuutu damdi kaa kə mee-me tiinu gud baymele náŋaŋ, wə haraŋ áŋ wəra zugi dədərgə gud tepe náŋa də Kristu (aŋ fəlaŋ seereŋ ha'aŋ, kas minti Pepeŋ jəŋ giidu pəsaŋ cəərəŋaŋ).

⁶ Gud tepe náŋa də Kristu Yeesu tə bə moŋ, Pepeŋ haraŋ áŋ wəra dədərgə adordə meŋa duuru daana wə əsəŋ áŋ duuru apəya a kumna nuutuŋa.

⁷ Wə jəŋ teŋ bədoona haa bə ge dər kaa gə dər ko bə adoroŋ naŋ, minti tó jəŋ pisi kə toŋ ablaw wəra hasi sar kaŋa ŋaanaanə mo. Wə gaŋ dər áŋ cəərə kel teŋa a kəkəy bə minti wə jəŋ pisiŋ sar áŋa gud tepe náŋa də Kristuŋ.

⁸ Gud maa mo, aŋ fəlaŋ seereŋ ha'aŋ, kas minti Pepeŋ jəŋ pisiŋ sarəŋa gud bə minti aŋ doŋ gud karman bə minti Yeesu juunu. Aŋ fəlu haa paapa də səɓaki dəŋ ba, wə haa karman bə minti Pepeŋ aynaŋ dəŋ wəra boobo.

⁹ Aŋ neke bə fəlu haa paapa gud karman bə minti aŋ a juunu ba, kir minti hulum anə məna a neke bə he cəərə kusru apəya də kel teŋ ba.

¹⁰ Gud maa mo, hel də minti Pepeŋ jəənə gilaŋ keɗeŋ, cəərə awaŋ haa áŋ: gud tepe náŋa də Yeesu Kristu, wə jəŋ áŋ kir minti áŋ jəə la haa joŋre pisi bə minti wə a ɗəmpunu warda hãã ajew da minti áŋ daw ku la wəraŋ.

Áŋ keɗe wəra gə tapə-tepe gud Kristu

¹¹ Gud teŋa ta, aŋ gə minti a paapa gə Ziwifi baŋ, aŋ a jəŋ dayday naanaanə mo, aŋ harə la kəm bə ɗiki kel teŋa. Kaanə Ziwifiŋ a jəŋ bə mantəŋa minti: «kaa kə *tantəraŋ də bay ceme». Yə mante kusri minti té teŋ kaa gə tanta də camə-ceme gud tarwa tá də minti yə kaara a kusuki diŋ.

¹² Də ko toŋ ateŋa ha'aŋ, adəwaldəŋ a wəra də jamə-jeme də Kristu, kəkəy a paapa cəərəŋa minti yə aŋkaŋ adəwaldə kaanə *Israyela ba. *Jaa də minti Pepeŋ a topna də kaŋ gud kel gə minti wə a wəətənəy wəraŋ, a paapa də dərəŋ bə gəm. Aŋ a nuutu lam cəərə seŋkaŋaŋ, səma aŋ a paapa gə nakə-neke bə mele ɗiki dəŋ cəərə karmana ba, Pepeŋ a paapa də dərəŋ bə gəm.

¹³ Səma, bə hebkənaŋ, gud tepe nəətiŋa də Kristu Yeesu, aŋ gə minti a dayday wəra tooto sar Pepeŋaŋ, aŋ koloŋ ne máŋ hebkəna suru maŋ gud keere bə minti Kristu kiirunu wəra də kusruŋ.

¹⁴ Gud maa mo, áyaŋ kəkaɓiŋ aduubə də áŋa haa Kristu də kusru. Wə təpaŋ kaanə Ziwifiŋ wəra də kaa gə minti teŋ paapa gə Ziwifiŋ baŋ giidə kusul bə məna. A kəkəy bə minti wə ayaŋ kusru wəra a meŋ, wə caŋ goŋ bə minti a jəmnəy diri wəraŋ, bə minti a kulnuy wəra acukur də kumsiŋ,

¹⁵ daana wə arsaŋ *ku gili kə *Moyisiŋ wəra də təbay duŋ daana kel du gə minti a wəra də gədəəgi di bəy-bəy. Wə jəŋ teŋ bədoona haa minti kaanə Ziwifiŋ, də kaa gə minti paapa gə Ziwifiŋ baŋ, tapə la wəra məna'i giidə kusul kimirwi bə minti təpnəy wəra duuruŋ daana bə əyəy kəkaɓiŋ aduubə diŋ.

¹⁶ Gud me nuutuŋa a kəbaŋ gə largaŋaŋ, wə təpnəy wəra kusrə hulum bə məna daana wə təpnəy adəwaldi wəra də Pepeŋ gəm. Bədoona ta, wə təwaŋ acukur də minti a jəŋ adəwaldiŋ wəra; wə awna wəra.

¹⁷ Bədoona ana, wə bəŋ a waate *Kel pəsaŋ kəmarwaŋ wəra minti: Pepeŋ aye kəkaɓiŋ a aŋ gə minti a jəŋ wəra suru tootoŋ, a kaayaŋ té gə minti a jəŋ suru maŋ gəm.

¹⁸ Gud maa mo, gud Kristu ha'aŋ, áŋ ɓasi keɗe, də keye kə Tiiru Cetcetaŋ tá məna'aŋ, áŋ máŋ gə nakə-neke bə ze sar Bar áŋ Pepeŋa.

¹⁹ Gud teŋa ta, aŋ paapa kə irku kumundu ba kaa kə aŋay pəda, aŋ máŋ doloy gəga də kaa kə doo-deŋ, aŋ máŋ gə ger kaa kə Pepeŋ gəm.

²⁰ Aŋ wəra hebkəna aduubə də kar gə minti Pepeŋ bə hərsi kuliŋa diiriŋ. *Kaa kə vaa-veŋ də *kaa kə jogte ku mini nuutuŋ, haa ge bə gud kuli toŋ. Yeesu Kristu də kusru haa pərki pisi bə de kuliŋ ŋəŋ.

²¹ Gud tepe náŋa duuru, kuliŋ bə si daana kar kə hursuŋ wəra gə taptə-tapte dər kumsi anə kaŋkaŋ, bə kole wəra kuli dəra'i a Barkaŋ.

²² Gud tepe nəətiŋa duuruŋ, aŋ wəra gə tarə-tere dər kumsəŋa bə kole wəra kuli bə minti Pepeŋ isi giidu haa də Tiiru Cetcetaŋ faɗi.