EFESIŊ 1 - JAA TƏMARWAŊ

Mirkiŋ

¹ Jeere kefter toŋ haa ten Pol, ten bə minti Pepeŋ bəlaŋ minti ten kolə la *hulum bə gaa-ge kə Yeesu Kristuŋ. Ten gaw a kaa kə Pep gə minti giidə vil də Efesiŋaŋ, gə minti ɓeti a tepe neeteŋa də Yeesu Kristuŋ.

² Pisiŋ, də kəkaɓiŋ kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa!

Pisi bə minti áŋ fəlu gud tepe náŋa də Kristuŋ

³ Doŋ kir minti tokɗeŋ jəə la kə Pep Bar Barkaŋ náŋ Yeesu Kristuŋ. Wə jəŋ pisiŋ sar áŋa gud tepe náŋa də Kristu haa a kəkəy bə minti wə ayaŋ gidiirə kar pəsaŋ gə apəyaŋ gə minti a tiiruŋaŋ wəra a áŋ keɗe'iŋ.

⁴ Gud maa mo, ajew də minti Pepeŋ jəŋ seŋkaŋ, wə ŋamtaŋ áŋ minti áŋ jəə la wəra kaa kə tó gud Kristu, kir minti áŋ jəə la wəra dər tó cetceti daana bay kel sar áŋa.

⁵ Pepeŋ bəlaŋ áŋ səm moŋ, wə ɗampaŋ ɗiki du warda hãã ajew da minti tó bə kole áŋ wəra kərmuyu gud Yeesu Kristu. Haa karman bə minti wə a bəlaŋ minti wə jəə la bədoona gud giidu pəsaŋaŋ,

⁶ kir minti áŋ tokɗə boblo də pisi bə minti wə juunu sar áŋa la gud tepe náŋa də Kurmuyu bə minti wə bəlu ablaw.

⁷ Gud maa mo, gud kor də Kristu bə minti a gaŋ wəra tə bə moŋ, áŋ wəra gə bədə-bidi daana áŋ fəlaŋ vəəgi bə giidu ne wəra cəərə baymele náŋa. Bədoona ana ta, Pepeŋ gaŋ gud boblo bə pisi nuutuŋ wəra, daana wə juunu sar áŋa ablaw faɗi, haa a kəkəy bə minti wə ayaŋ

⁸ aseŋ daana neŋ wəra a áŋ anə kaŋkaŋ.

⁹ Wə gaŋ gud hel nuutu də metə-meteŋ wəra a áŋ. Gud bele nuutuŋa ha'aŋ, wə a ɗəkəŋ wəra ajewa hãã faɗi minti tó bə doora ku wəra haa də Kristu

¹⁰ daana tó ɗe a gaara cəərə wəra a tewe də laateŋa. Hel taŋ haa minti, kar gə minti apəyaŋ, də kaayaŋ gə adawraŋ keɗe, tó bə təpəy ciiri yaŋ kasi kumna məna'i: kumna toŋ haa Kristu.

¹¹ A tepe náŋa də Kristu, wə ŋamtaŋ áŋ warda minti áŋ jəə la kə tó gud hel də minti wə a ɗampəna warda hãã ajew daŋ. Wə haa hulum bə minti de ku kar wəra keɗe'i, damdi giidu bəlaŋ ana'iŋ.

¹² Bədoona ana, wə ŋamtaŋ áŋ warda hãã ajew kir minti áŋ tokɗə boblo kə tó la, áŋ kaayaŋ gə ajew gə minti məlaŋ ɗiki də áŋ cəərə Kristuŋ.

¹³ Aŋ gə minti əskəŋ kel kə gəəziŋ, *Kel pəsaŋ kəmarwaŋ gə minti aŋ fele seereŋ guudiŋ, aŋ wəra gə tapə-tepe də Kristu. Bədoona ana, aŋ doŋ gud Kristu gəm, kəya Pepeŋ aynaŋ Tiiru Cetcetaŋ də minti wə a waatənaŋ sam wəra a nəənəŋ. A gaŋ dərəŋ haa minti aŋ wəra kaa kə tó.

¹⁴ Tiiru Cetcetaŋ táŋ ha'aŋ, Pepeŋ deŋeŋ kar gə minti wə bə ɗukuy na a áŋ haa dəərə. Wə ayna a áŋ haa kaadəəməy bə mi hi bə minti kaa gə minti wə kulnuy wəra a kusru bə tokɗe boblo nuutuŋ, bədəŋ ne wəra bə faɗnə-faɗnaŋ. Bədoona ana, kar neŋeŋ keɗe ɗe a awe ciiri haa bə tokɗe boblo kə Pepeŋ.

Toose kə Pol

¹⁵ Gud teŋa kəya, ten gəm ha'aŋ, bə minti ten əskəŋ sam de nəətiŋ bə gud Barkaŋ Yeesuŋ, daana minti aŋ bele kaa kə Pepeŋ keɗe naanaanə moŋ,

¹⁶ ten bə ji suuse a Pepeŋ saksaki gud kel dəŋa a kəkəy bə minti ten bə kaŋ səmaŋa a nuunu dər toose ninaŋ.

¹⁷ Ten bə mante kasi Pep kə Barkaŋ náŋ Yeesu Kristuŋa, Aba bə minti bobloŋ nuutuŋ, minti də Tiiru Cetcetaŋ nuutuŋ, wə ayaŋ né bə minti vəɗu wəra a nəənəŋ la daana bə minti gaŋ dərəŋ la wəra cuuru kaŋkaŋ.

¹⁸ Ten mante kəəsu minti wə baadaŋ dər ɗiki dəŋ la wəra kir minti aŋ nakə la bə əski gud karman bə minti wə a mantənaŋ warda cuuruŋ, bə minti aŋ gə malə-mele ɗiki dəŋ wəra cuuruŋ gəm. Aŋ nakə la pa bə əski gud kel minti, kar pəsaŋ-pəsaŋ gə minti Pepeŋ a wəətənəy səməy wəra bə əyəy a kaa nuutuŋ, yə kəmtəŋ wəra hasi,

¹⁹ daana səɓaki də minti wə ji kar a áŋ kaa kə doo-deŋ dəərəŋ, a wəra mooto hasi faɗi gəm ŋaanaanə mo. Səɓaki taŋ ha'aŋ, wə gaana guudə wəra ji də səɓakiŋ

²⁰ haa a ko bə minti wə haraŋ Kristu warda dədərgə adordə meŋ da dəərə daana wə usnu warna a kəəsu kemer na apəy na.

²¹ A ko toŋa ta, Kristu wəra bə əsə-isi kumna cəərə kəkamnaŋa, cəərə kar kə səɓak-səɓakiŋa, cəərə kar kə abay-abaya, cəərə kar gə cəwa-cəwaŋa keɗe'i. Kar məntəŋ məntəŋ mo gə minti áŋ bə wəətəy səməya dər ko bə hebkənaŋa, ɗalba dər ko bə minti bə ɗe a ji ajew naŋ gəm, wə dəŋnəy wəra keɗe.

²² Pepeŋ ayaŋ səɓakiŋ wəra cəərə kara keɗe a Kristu daana wə əynu a kaa kə Tapiŋ damdi ciiri taŋtaŋ ana.

²³ Gud maa mo, Tapiŋ haa kusrə Kristu; wə doorə ku wəra haa tó, wə de ku kar gə jəə-jiŋ wəra keɗe haa tó gəm.