1 TESALONIKIŊ 5 - JAA TƏMARWAŊ

Aŋ əsə la wəra gə gunə-guni

¹ Kəsaanə areŋ, kar teŋ ji yaŋ kotnə mo, naanaanə mo, aŋ paapa də caadə minti are jeereŋ kefter la jeere ciiri pəda,

² gud bə minti aŋ də kusrəŋ, aŋ wəra gə asə-ase kaŋkaŋ minti hi bə minti Barkaŋ hare duru daŋ bi haa anə yəlaŋ damdi hulum bə dəgaaya bi duugŋ ana.

³ Də ko bə minti kaŋ əsəŋ ne bə waate minti: «Koŋ kəkaɓi, kel paapa» ŋaanaanə moŋ, də ko toŋ derra faɗi, gəəli humuy diri yaŋ gurusi damdi gəəli bə weŋ bi cəərə həlgə də məənəŋa ana. Yə seere wəra ku kel teŋa pəda.

⁴ Səma, kəsaanə areŋ, aŋ teŋ paapa kaa gə dər tilməŋa minti hi toŋ fəlaŋ yəlaŋ damdi hulum bə dəgaayaŋa ana ba.

⁵ Gud maa mo aŋ keɗe, aŋ haa kəmar gə dər pəɗakiŋ, aŋ kaa kə ko bə daaway. Áŋ paapa kə ko bə duugŋ ba, kə tilməŋ bə gəm.

⁶ Bədoona ana, áŋ a ve kin akas kaayaŋa ana ba. Áŋ əsə la wəra gə gunə-guni daana áŋ doo kusrə áŋ la ku baymeleŋa.

⁷ Kaa gə minti awe kin, yə əwəy haa duugŋ; kaa gə minti marketeŋ, yə marke haa duugŋ gəm.

⁸ Səma áŋ gə minti kə ko bə daaway, áŋ doo kusrə áŋ la ku baymeleŋa. De náŋ bə gud Pepeŋ də bele náŋ jəə la sar áŋa akas koroŋ ana. Mele bə ɗiki də áŋ cəərə seereŋa jəə la akas kaŋkəlaŋ gə duuri ana gəm.

⁹ Gud maa mo Pepeŋ ŋəmaŋ áŋ paapa bə ve áŋ dər waŋ də kəəti nuutuŋa ba, wə ŋəmaŋ áŋ haa minti áŋ falə seere la gud Yeesu Kristu Barkaŋ náŋa.

¹⁰ Kristu meŋ wəra gud áŋa minti áŋ jəə la duuru akaceŋa bə minti wə hare daŋ. Jəəne nuutu minti áŋ wəra gə mee-me, áŋ bay me, áŋ ji yaŋ saksaki duuru.

¹¹ Gud teŋa ta, aŋ teŋə dər kumsəŋ la daana aŋ kayə kumsəŋ la adəwaldə kumsəŋa bə si a kel kə Pepeŋa damdi aŋ bə ji hebkəna ana ɗaw.

Kel gə adoroŋ daana mirki bə tewe kefter

¹² Kəsaanə areŋ, are bə waataŋa minti aŋ humə kosoŋ la cəərə kaa gə minti bə ji joŋreŋa aduubə dəŋa, gə minti Barkaŋ əynəy kəəsi haa minti yə amaŋ cəərəŋ la daana yə kaŋ kosnoŋ la ada gəm.

¹³ Aŋ hay ciiri la apəya daana aŋ jəə beleŋ la siri gud joŋre bə minti yə bə jəwaŋ. Aŋ jəə la kəkaaɓa aduubə də kumsəŋa gəm.

¹⁴ Kəsaanə areŋ, are waataŋ pa minti: aŋ kaa kosnə kaa kə koslom la, aŋ teŋə dər kaa gə walka la, aŋ kayə kaa kə nalnal la, aŋ doo giidiŋ la sar kaŋa keɗe'i.

¹⁵ Aŋ amə kusrəŋ la pisi, kir minti mindi mo guudəŋa a werke baymeleŋ də kumsu baymeleŋ ba, səma aŋ goldə la haa saksaki ji bə pisiŋ aduubə də kumsəŋa daana sar kaŋa keɗeŋ gəm.

¹⁶ Aŋ jəə la də waale saksaki,

¹⁷ aŋ toosə la saksaki,

¹⁸ aŋ jəə suuse la a Pepeŋ a kara keɗe. Haa karman bə minti giidə Pepeŋ bəlu kasi aŋ kaa gə tapə-tepe də Yeesu Kristuŋ.

¹⁹ Aŋ a he ku joŋre kə Tiirə Cetcetaŋ wəra giidiŋa ba.

²⁰ Aŋ a beye kel kə kaa gə minti jogte ku mini kə Pepeŋ wəraŋ bə gəm.

²¹ Səma aŋ golə dər kar la keɗe, aŋ doo pəsaŋ di la.

²² Aŋ amə kusrəŋ la ku gidiirə baymeleŋa keɗe.

²³ Pepeŋ də kusru bə minti aye kəkaɓiŋ, koloŋ la wəra keɗe *cetceti. Wə amaŋ la neŋneŋ keɗe ku baymeleŋa, kusrəŋ, ɗiki dəŋ, daana dədərgə deŋ bə mi hi bə minti Barkaŋ náŋ Yeesu Kristu hare duru daŋ.

²⁴ Pep bə minti bə mantəŋa de ku kel teŋ yaŋ wəra, gud bə minti wə ɓeti a kel nuutuŋa.

²⁵ Kəsaanə areŋ, aŋ toosə Pepeŋ la cəərə are gəm.

²⁶ Aŋ mirkə kəsaanə áŋ la keɗe də mirki kə kaa kə doo-deŋ.

²⁷ Ten waataŋ də sam Barkaŋ minti aŋ aŋkə kefter toŋ la wəra a kəsaanə áŋ keɗe'i.

²⁸ Pisi kə Barkaŋ náŋ Yeesu Kristu jəə la dəərəŋ keɗe.