1 TESALONIKIŊ 4 - JAA TƏMARWAŊ

Pepeŋ mantaŋ áŋ minti áŋ jəə la cetceti

¹ Kəsaanə areŋ, aŋ kir ɗe naanə mo minti aŋ doo dər Pepeŋ laŋ, are hatnaŋ ne wəra cuuru. Áŋ goloŋ neŋ, aŋ bə ji bədoona ana ɗaw. Bə hebkənaŋ are bə waataŋa daana bə jəŋ kamkama minti gud tepe nəətiŋa də Barkaŋ Yeesuŋ, aŋ harə la bə ze guudəŋa bə ji bədoona ana ada kəm pisi ze pə ɗaw.

² Gud maa mo aŋ gə asə-ase hate bə minti Barkaŋ Yeesu əynu a are bə ayaŋ dəŋ.

³ Karman bə minti giidə Pepeŋ bəluŋ haa minti aŋ jəə la wəra *cetceti tiinu daana minti aŋ doo kusrəŋ la ku piwpiwa.

⁴ Mindi mo guudəŋa hate kusru la bə ji ɓeti daana cetceti sar muruŋa kir de dər Pepeŋ, dər kaŋ gəm.

⁵ Wə a yaake kusru bə he bəlam də ɗiki bə piwpiwa damdi kaa gə minti Pepeŋ paapa də diri baŋ həənu ana ba.

⁶ Hulum a ɓalke tarmə kumsu ɗalba jəə baymele la sar kumsu də kel teŋ kəya ba anə hasi faɗi. Are a waatənaŋ daana gaanaŋ kosnoŋ da ne warda kanda minti abal də kel teŋ kəyaŋ, Pepeŋ yaaka bay ge ba sar hulum bə jəə-ji gom də kel teŋa kəyaŋ.

⁷ Gud maa mo Pepeŋ mantaŋ áŋ da paapa bə bi a ji piwpiw ba, wə bele minti áŋ jəə la wəra cetceti ɗaw.

⁸ Gud teŋa ta, hulum bə minti ŋoryoŋ hate toŋ ne wəra kəyaŋ, wə ŋoryoŋ wəra haa paapa ku hulum ba, wə ŋoryoŋ wəra haa ku Pep bə minti aynaŋ Tiiru nuutu Cetcetaŋ.

⁹ Kəsaanə areŋ, cəərə bele bə adəwaldəŋa, aŋ paapa də caadə minti are jeereŋ kefter la cuuru me'i ba, gud bə minti aŋ də kusrəŋ, Pepeŋ hatnaŋ cəərə bele bə minti aŋ jəw la adəwaldə kumsəŋaŋ.

¹⁰ Gəəzi aŋ bə jəwa hebkəna sar kəsaanaŋ gə doo-de gə Masedəwana keɗe ɗaw. Səma, are kəm də kel saraŋa ada saksaki minti aŋ zew guudu la jiŋ ada pisi ze.

¹¹ Aŋ goldə la də səɓaki haa kəkəy bə kəkaɓiŋ, aŋ a juti kel ba, daana aŋ jəə joŋre la də kaasaŋ damdi are a waatənaŋ wəraŋ ana.

¹² Aŋ jəə la bədoona kir minti ɗe dəŋ falə aŋke la ku kaa gə minti bay de gud Yeesu Kristuŋ daana minti kel dəŋ a eele hulum baŋ.

Hi bə minti Yeesu hare daŋ

¹³ Kəsaanə areŋ, are bele minti aŋ əskə kel də kaa kə mee-meŋ la wəra gəm kir minti aŋ a ji dər laawe damdi kaayaŋ gə minti məlaŋ ɗiki di baŋ ana ba.

¹⁴ Aŋ golə la kəm, áŋ wəra gə doo-de haa minti Yeesu a meŋ wəra, wə haraŋ wəra dədərgə adordə meŋa. Bədoona ana, áŋ doo haa la gəm minti kaa gə minti meŋ gə doo-de a sam Yeesuŋ, Pepeŋ hərəy yaŋ wəra dədərgə duuru keɗe.

¹⁵ Haa kəna kel gə minti Barkaŋ hataŋ are diiriŋ, are waataŋ dəŋ gəm minti: áŋ kaa gə minti ji yaŋ kəm dədərgə akaceŋa bə minti wə hare daŋ, áŋ paapa gə daŋə-deŋe bə ɗe a tuli suru na ajew ba.

¹⁶ Gud maa mo kaŋ iski dordə karman yaŋ apəy da. A ko toŋa kəya, kumna kə *kaa kə digi kə Pepeŋ waate kel yaŋ da anə koloŋ, aŋ iski atoltom kə Pepeŋ yaŋ bə ufi gəm. Kəya Barkaŋ də kusru ve yaŋ warda tarmə Pepeŋ da. Ajew anə faɗiŋ, kaa gə minti a meŋ gə doo-de gud Kristuŋ hare yaŋ wəra dədərgə.

¹⁷ Kəya áŋ kaayaŋ gə minti a kəm bay meŋ də té gə minti haraŋ wəra dədərgəŋ, Pepeŋ humi áŋ diiri cəlam faɗi, dər kamra na bə ɗe a ŋefe də Barkaŋ apəy na. Kəya áŋ ji yaŋ suru saksaki.

¹⁸ Kəya aŋ teŋə dər kumsəŋ la aduubə də kumsəŋa də kel teŋ.