1 TESALONIKIŊ 3 - JAA TƏMARWAŊ

Timote ɗe Tesaloniki

¹ Bədoona kəya ta, are nəkaŋ bə mi pəda. Are ɗəkəŋ máŋ faɗi minti are kaayaŋ yaakaŋ nuutu Atena bay cəərə areŋ, marya.

² Kəya are gaanaŋ Timote haa naŋ. Wə haa seenə áŋ bə minti are bə ji joŋre kə Pepeŋa bə waate *Kel pəsaŋ kəmarwaŋ cəərə Kristu də kumsə areŋ. Are gəənu səraŋ na ha'aŋ, minti wə ɗee la a ayaŋ səɓaki daana teŋe bə dər minti aŋ doo la ŋəŋ gud Pepeŋa,

³ kir minti hulum guudəŋa anə məna a hare duru adoro kas lasi də minti áŋ bə saaraŋ ba. Gud maa mo aŋ wəra gə asə-ase minti áŋ haa kə kel teŋ.

⁴ Bə minti are a jəŋ səraŋ daŋ, are a waatənaŋ wəra ajewa minti áŋ se lasiŋ yaŋ me'i. Aŋ asə la wəra minti bəŋ haa kel teŋ ta.

⁵ Bədoona ana, ten nəkaŋ bə mi na anə hoŋ pəda. Kəya ten gaanaŋ Timote haa naŋ minti wə jeɓrə kel gə cəərə de nəətiŋ da. Walka də minti Nər ke ku kaŋ kəna kaanaŋ kuŋ ne wəra hãã kir minti joŋre naare bə adəwaldəŋ basə la wəra booboŋ, a jəənən faɗi.

⁶ Bə hebkənaŋ, Timote haraŋ da ne minti gerdeŋ. Ku mini bə minti wə hərnu a are cəərə de nəəti bə gud Yeesuŋa daana bele bə kumsəŋaŋ jəŋ haa kel pəsaŋ faɗi. Wə waataŋ are pa minti aŋ bə ɗiki cəərə are saksaki pisi daana aŋ də caadə ŋefe də are damdi are də caadə hare bə ŋefe dəərəŋ ha'aŋ ana gəm ŋaanaanə mo.

⁷ Bədoona ana kəsaanə areŋ, bə minti are nuutu dər gəəliŋ daana lasiŋaŋ, dər are teŋeŋ ne gud kel kə de nəətiŋa.

⁸ Are haraŋ ne wəra bə biiri gud bə minti aŋ gə əsə-isi pisi gə gargə-garge də Barkaŋ.

⁹ Are jəə suuse la a Pepeŋ máŋ naanaanə anə day pə mo gud kel dəŋa daana gud waale boblo bə minti are bə fəlu tiinu guudəŋaŋ?

¹⁰ Daaway də duugŋ keɗe, are bə toose Pepeŋa də səɓaki minti wə ayə kəkəy la a are bə asaŋ də dər are pa daana bə ɗe a de ku karman bə minti yaakaŋ wəra sarəŋa a de nəətiŋaŋ gəm.

¹¹ Doŋ kir minti Bar áŋ Pepeŋ də kusru, də Yeesu Barkaŋ náŋ, ayə kəkəy la a are bə ɗe a helɗeŋ!

¹² Barkaŋ zee gud bele nəətiŋ la ajewa pisi hayaŋ adəwaldə kumsəŋa daana sar kaa kaayaŋa keɗe, bə naare bə minti are bə jəw saraŋaŋ ana gəm!

¹³ Bədoona ana, wə ayaŋ səɓaki la ku tarməyaŋa minti aŋ jəə la *cetceti bay kel kə malə-meleŋ saraŋa tiinə Bar áŋ Pepeŋa dər hi bə minti Yeesu Barkaŋ náŋ hare da də kaa nuutuŋ keɗe'iŋ.