1 TESALONIKIŊ 2 - JAA TƏMARWAŊ

Joŋre bə minti Pol juunu giidə vil də Tesalonikiŋaŋ

¹ Kəsaanə areŋ, aŋ də kusrəŋ, aŋ wəra gə asə-ase minti gəryi bə minti are gəryunu gerdeŋ daŋ bəsaŋ wəra boobo ba.

² Aŋ wəra gə asə-ase pa minti, bə minti are a jəŋ giidə vil də Filipi daŋ, yə ləsaŋ daana sartaŋ are. Səma, Pepeŋ coŋoŋ gud are bə waataŋ *Kel pəsaŋ kəmarwaŋ nuutuŋa wəra, koo kaŋ jəəne nuutu gə jamə-jeme acukur də are naanaanə moŋ.

³ Aŋ goloŋ neŋ, kəsar də kel gə minti are wəətəy a kaŋ ha'aŋ, yə paapa tete ba, yə bəŋ paapa a ɗiki bə baymele da ba, are golde leŋe hulum diiri bə gəm.

⁴ Səma, Pepeŋ goloŋ koɗ are bə aye Kel nuutu pəsaŋ a areŋ. Bədoona ana, are waate kel a kaŋ ha'aŋ, paapa minti yə doy diri la me'i ba, səma yə doo la haa dər Pepeŋ gud bə minti gole koɗ ku tarmə are haa tó.

⁵ Aŋ gə asə-ase minti a waate bə kel naareŋa ha'aŋ, are waatənaŋ kel kə jəŋ tiniini dəŋ ba, are goldoŋ karman kaasəŋa bə gəm. Pepeŋ bə asə-ase kel teŋ gəm.

⁶ Are goldoŋ aŋke kasi huluma, kaasəŋa ɗalba kasi kaa gaalaŋa ba.

⁷ Are *kaa kə vaa-ve kə Kristuŋ tə pə moŋ, are gə nakə-neke bə waate minti are ji cəərəŋa bə kəkamna ana. Səma, are jəŋ bədoona ba, are a jəŋ aduubə dəŋa sããya zugi damdi nər kəmar koncoŋ jəy guudiy ana.

⁸ Are bəlaŋ ablaw səm moŋ, are waatənaŋ paapa Kel pəsaŋ kəmarwaŋ kə Pepeŋ təwa pəda; are a wəra máŋ bə aye kusrə are a meŋ guudəŋa ada pa, gud bə minti aŋ jəŋ wəra karman pis-pisi naare.

⁹ Kəsaanə areŋ, cəərən gaŋ joŋre bə gəəli-gəəliŋ daana geye naareŋ ba. Gud maa mo, bə minti are adəwaldəŋ da bə waataŋ Kel pəsaŋ kəmarwaŋ kə Pepeŋaŋ, are jəŋ joŋreŋ də kasi are daaway də duugŋ keɗe kir minti kel də are a eele hulum aduubə dəŋa anə məna ba.

¹⁰ Aŋ kaa kə doo-deŋ daana Pepeŋ, aŋ bərdə kəkəy minti are jəŋ aduubə dəŋa *cetceti, ɗeker, daana bay kel kə malə-meleŋ sar areŋ.

¹¹ Aŋ gə asə-ase gəm minti are jəənəŋ wəra məna-məna keɗe pisi damdi bar kəmar koncoŋ jəy pisi ana.

¹² Are aynaŋ səɓaki, are teŋneŋ dərəŋ, daana are jəənəŋ kamkam saksaki minti ɗe nəəti jəə la bə nakə-neke gud kə Pepeŋa, gud bə minti wə mantənaŋ bə isi duuru a kumna daana dər məyan nuutuŋa.

¹³ Are saksaki bə ji suuse a Pepeŋ pa gud bə minti, are waatənaŋ kel kə Pepeŋ ha'aŋ, aŋ duuniy bə kel kə hulum ana ba, aŋ duuniy damdi karman bə minti yə bədoona ana gəəzi, kel kə Pepeŋ faɗi. Yə bə ji joŋre giidiŋa, aŋ kaa kə doo-de.

¹⁴ Gəəzi kəsaanə areŋ, kel gə minti jəŋ sar kaa kə Tapi kə Pep gə giidə seŋka də Zude daŋ, kaa kə doo-de gud Yeesu Kristuŋ, yə jəŋ sarəŋa bədoona gəm. Aŋ golə la kəm, gə gerdeŋ lasnaŋ damdi kəsəəni gə Ziwifi gə Zudeŋ ləsnəy ha'aŋ ana faɗi.

¹⁵ Kaanə Ziwifiŋ awaŋ Yeesu Barkaŋ daana *kaa kə jogte ku mini kə Pepeŋ wəra. Ləsaŋ are haa té gəm. Yə paapa dər Pepeŋa pəsaŋ ba, yə jəmaŋ acukur wəra də kaŋ keɗe gəm.

¹⁶ Bə he ku are bay waate kel kə Pep gə seereŋ a kaa gə minti paapa gə Ziwifi baŋ, haa té pa. Yə máŋ bə ɗose baymele bə minti yə a bə jəwa saksakiŋ da anə hãã wəra haa də lasi də minti yə bə ji are dəərəŋ. Haa gud teŋa minti waŋ kə Pepeŋ bə doo-de diiriŋ.

Pol də tay də hare a helɗe kaanə Tesalonikiŋ

¹⁷ Kəsaanə areŋ, dər hiti tó makiŋa kəna minti are kooroŋ warda səraŋ daŋ, are asnaŋ dərəŋ kəm pəda, səma aŋ saksaki ku tarmə are. Tolka dəŋ də doo-de are səm moŋ, are jəŋ wəra anə keɗe-keɗe bə hare na a goloŋ.

¹⁸ Are jəŋ wəra haa də caadə hare gerdeŋ na. Ten Pol də kusrən goldoŋ kəkəy kampa ablaw faɗi, səma *Sataŋ təkaŋ ku are wəra bay hare na.

¹⁹ Are də tolka dəŋ, gud maa mo, bə minti Barkaŋ náŋ Yeesu hare daŋ, karman bə minti veɗe ɗiki də are bə malə-mele bə cəərə Pepeŋ wəra, waale naareŋ daana werke bə bulum bə minti are ufi ku are guuduŋ, haa aŋ faɗi.

²⁰ Gəəzi, are fele tokɗeŋ daana waaleŋ haa guudəŋa.