1 TESALONIKIŊ 1 - JAA TƏMARWAŊMirkiŋ 1 Jeere kefter toŋ haa kənaŋ are anə Pol, Silasi, də Timote. Are jiiru haa a aŋ kaa kə Tapiŋ gə giidə vil də Tesalonikiŋ, aŋ gə minti Pep Bar áŋ daana Barkaŋ Yeesu Kristu kolnoŋ wəra kaa neeteŋ. Pisiŋ də kəkaɓiŋ jəə la cəərəŋa! Pol ji suuse a Pepeŋ cəərə kaa kə doo-de gə Tesalonikiŋ 2 Are bə ji suuse a Pepeŋ saksaki gud kel deŋa keɗe, bə kaŋ səmaŋa saksaki dər toose naareŋaŋ gəm. 3 Bədoona ana, a tooseŋa tiinə Pep Bar áŋaŋ, are bə ɗiki cəərə joŋre bə minti aŋ bə jəwa gud de nəəti bə gud Yeesu Kristuŋ, cəərə bele nəəti bə minti ji joŋre, daana cəərə mele bə ɗiki bə minti aŋ məlnu wəra anə kaŋkaŋ bə mi Barkaŋ náŋ Yeesu Kristuŋ. 4 Kəsaanə areŋ gə minti Pepeŋ bəlaŋ, are gə asə-ase minti wə ŋamnaŋ minti aŋ kolə la kə tó. 5 Gud maa mo, are waatənaŋ *Kel pəsaŋ kəmarwaŋ kə Yeesu Kristu paapa də kel kə waate təwa ba, are waatənaŋ dəŋ də səɓaki daana keye kə Tiiru Cetcetaŋ. Aŋ asaŋ minti are gə doo-de guudi anə kaŋkaŋ gəm. Kel teŋ də dərəŋ gud bə minti ɗe də are jəŋ aduubə deŋa bə kəyaŋ naanaanə moŋ, aŋ wəra gə asə-ase duuru. 6 Aŋ də kusrəŋ, aŋ əsəŋ bə ji akas are daana akas Barkaŋa ana gəm. Dər lasi də ablawa nuutu gila keɗe, aŋ doŋ kel kə Pepeŋ də waale kə Tiiru Cetcetaŋ. 7 Bədoona anaŋ, aŋ koloŋ kaa gə minti kaa kaayaŋ gə doo-deŋ keɗe gə seŋka də Masedəwan daana də Akay koloŋ bə ji kusri bə aŋ ha'aŋ ana gəm. 8 Kel kə Barkaŋ gə minti duusuŋ warda gerdeŋ daŋ bəsaŋ haa paapa giidə seŋka də Masedəwana daana Akay təwa ba. Kel gə cəərə de nəəti bə gud Pepeŋ duusuŋ warna giidə koŋ na lam naŋ keɗe, paapa kir minti are wəətu səmu la me'i pəda. 9 Kaŋ keɗe bə waataŋ səmaŋa minti aŋ doŋ irku də are pis-pisi a ko bə minti are jəŋ gerdeŋ daŋ. Yə tope bəlam də kel gə minti aŋ koloŋ dərəŋ cəərə Pepeŋa bə kole kerkeŋ a kar gə minti kaŋ guluy pepe neeteŋ, bə ji joŋre a Pep bə dədərgəŋ daana bə gəəzə-gəəziŋ, 10 daana bə mi kurmuy Yeesu bə minti bi yaŋ da apəy daŋ, kurmuy tó bə minti wə hərnu wəra dədərgə adordə meŋaŋ. Wə haa hulum bə minti bə de áŋ wəra ku waŋ də kəəti kə Pep də minti bə biŋ. |
Texte de la Bible: Kera © Alliance Biblique du Tchad, 2004.
Bible Society of Chad