Wloma 6 - Ku̍o̍ Delee 1999

À nɛ kmɔ̌ dě Klai ja̍a̍

¹ Nɛ̀ ka à iě ka dǎ ɛ? Nɛ̀ à gba̍ gblɛ̍n sɔ̀ɛ̀n nu̍-ɛ dluwe̍ la̍ sǔh wɛ̀ Nyɔsoa-a blɛ iě kɛ̍n gbǎ ae?

² Iěe tììh, à mɛ̌-a wɛ̀ dǒ gblɛ̍n sɔ̀ɛ̀n nɔ̀ɔ̍ we̍-ɛ, nɛ̀ ka à mu̍ i̍h nɔ̀ɔ̍ dluwe̍ gba̍-a nu̍ dɛ ɛ?

³ Mɔ̀ juo ɛ̍-ɛ ka à po̍-a nǐ dlǔ dě Jusu Klai ja̍a̍-ɛ, nɛ̀ à po̍ ɛ̍ dlǔ iě à mɛ̌ wɛ̀ bo ke ka ɔ̍ nu̍-a mɛ̌-ɛ.

⁴ Ti̍ à po̍-a nǐ dlǔ-ɛ, nɛ̀ à ke Klai mɛ̌-ɛ, wɛ̀ u̍h nma̍le ɔ̍ ke à tàdùè i̍. Wɛ̀ ka ɔ̍ nu̍-ae wlǔh-ɛ dě Baa Nyɔsoa-a tìh-a i̍ bɛ̌-ɛ di̍i̍-ɛ, wɛ̀ à iě feɛ delee blě ke.

⁵ Ka à mɛ̌-a ka ɔ̍ nu̍-a mɛ̌-ɛ iě ɛ̍ nu̍-a ɛ̍ à nɛ-a due-ɛ, nɛ̀ à mu̍-e wlǔh ka ɔ̍ nu̍-ae wlǔh-ɛ, wɛ̀ ɔ̍ ke à iě due nɛ.

⁶ À juo i̍h à tu̍ soa nɔ̀ɔ̍ ɛ̍ mɛ̌-ɛ Klai we̍ wɛ̀ dǒ gbàɛ̍ kɛ̍n i̍ tu̍ wlì. Wɛ̀ à gblɛ̍n sɔ̀ɛ̀n ku̍ la ɛ̍ iě-e gbɔ̀lɔ, wɛ̀ à-a je̍e gblɛ̍n sɔ̀ɛ̀n-a kèi̍ nu̍ dɛ dode̍.

⁷ Dɛ̍nu̍ɛ, nyɔ̍ ɔ̀ mɛ̌-aa, nɛ̀ gblɛ̍n sɔ̀ɛ̀n se̍ ɔ̍ wlu̍ i̍ kɔn dɛ.

⁸ Nɛ̀ pò à mɛ̌-ɛ Klai we̍ wɛ̀-ɛ, nɛ̀ à gbaɛ ɛ̍ wlùh ka à mu̍-a kmɔ̌ nɛ ke dǒ ɔ̍ we̍-ɛ.

⁹ Dɛ̍nu̍ɛ, à juo ɛ̍-ɛ ka Klai wlǔh-aeɛ, nɛ̀ ɔ̍ se̍ mɛ̌ mu̍ dɛ. Sɔ nɛ̀ mɛ̌ɛ se̍ gba̍ ɔ̍ wlu̍ i̍ kɔn.

¹⁰ Mɛ̌ɛ ɔ̍ mɛ̌-a ka-a, ɔ̍ mɛ̌ wɛ̀ dǒ gblɛ̍n sɔ̀ɛ̀n we̍ kleǐnklein. Nɛ̀ kmɔ̌ ɔ̍ nɛ-a ka-a, Nyɔsoa-a kmɔ̌ bo ɔ̍ nɛ-ɛ wɛ̀.

¹¹ Ɛ̍ tìh-ɛ, ka mɔ̀ ke Jusu Klai nɛ-a due-ɛ, nɛ̀ mɔ̀ kɔn mɔ̀ iě mɔ̀-a chɛ̀ mɛ̌-nyɔ̍ slè-e ke dǒ gblɛ̍n sɔ̀ɛ̀n we̍, wɛ̀ mɔ̀ iě kmɔ̌ nɛ dǒ Nyɔsoa we̍.

¹² Nɛ̀ɛ̍, mɔ̀ bɔ̌ wɔ̌n-ɛ gblɛ̍n sɔ̀ɛ̀n bɔ̌ mɔ̀-a ku̍ ɛ̀ mu̍-a mɛ̌-ɛ wlu̍ i̍ kɔn-ɛ wɛ̀ mɔ̀-ɔ je̍e ɛ̍ wlùh dɛ̍ᵻ dɛ̍ɛ̍ jě.

¹³ Mɔ̀ bɔ̌ mɔ̀-a ku̍-a dɛ̍-o-dɛ̍ gblɛ̍n sɔ̀ɛ̀n kwlǎ sà-ɛ dǒ kà gblɛ̍n nu̍-ɛ we̍. Jɛ mɔ̀ sà-ɛ mɔ̀-a chɛ̀ Nyɔsoa kwlǎ ka nyɔ̍ ùh wlǔh-ae wɛ̀ ùh nɛ-a kmɔ̌ dode̍-ɛ. Mɔ̀ sà-ɛ mɔ̀-a ku̍ kli̍hgbɛ̍ Nyɔsoa kwlǎ dǒ i̍ slɛ̌-ɛ dɛ̍ᵻ nu̍-ɛ we̍.

¹⁴ Nɛ̀ gblɛ̍n sɔ̀ɛ̀n se̍ mɔ̀ wlu̍ i̍ kɔn mu̍ dɛ, dɛ̍nu̍ɛ, mɔ̀ se̍ dǒ telě sɔ̀n nɛ dɛ, jɛ mɔ̀ nɛ dě Nyɔsoa-a blɛ di̍i̍ wɛ̀.

Mɔ̀ sèìe-ɛ wɛ̀ dě gblɛ̍n sɔ̀ɛ̀n di̍i̍

¹⁵ Ka à se̍-a dǒ telě sɔ̀n nɛ dɛ, wɛ̀ à nɛ-a dě Nyɔsoa-a blɛ di̍i̍ wɛ̀-ɛ, nɛ̀ ka à iě dǎ ɛ? Nɛ̀ à nu̍ gblɛ̍n sɔ̀ɛ̀n la̍ sǔh ae? Iěe tììh.

¹⁶ Mɔ̀ se̍ i̍h juo ka pò mɔ̀ sà-ɛ mɔ̀-a chɛ̀ dɛ̍-o-dɛ̍ kwlǎ wɛ̀ mɔ̀ iě ɛ̍ dɛ̍ɛ̍ jě ka kèi̍-ɛ, nɛ̀ mɔ̀ nu̍-a ɛ̍ kèi̍ wɛ̀-ɛ ae? Pò mɔ̀ nu̍ gblɛ̍n sɔ̀ɛ̀n-a kèi̍ᵻɛ́, nɛ̀ ɛ̍ mu̍ ɛ̍ nu̍ mɔ̀ iě mɛ̌. Jɛ pò mɔ̀ nu̍ Nyɔsoa wlu̍ ka kèi̍ᵻ, nɛ̀ ɔ̍ mu̍ mɔ̀ i̍ slɛ̌-nyɔ̍ we̍i̍ nu̍.

¹⁷ Mɔ̀ɔ̍ gblɛ̍n sɔ̀ɛ̀n-a kèi̍ᵻ de, jɛ à po̍ Nyɔsoa tlɔ̌ wɛ̀ mɔ̀-a nu̍ la̍ dɛ̍ à poe-a mɔ̀ nǎ-a dǒ mɔ̀-a wlùh kli̍hgbɛ̍ we̍.

¹⁸ Gblɛ̍n sɔ̀ɛ̀n se̍ mɔ̀ wlu̍ i̍ kɔn dɛ, jɛ mɔ̀ɔ̍ kèi̍ᵻ dǒ dɛ̍ ɛ̀ slɛ̌-a i̍-ɛ nu̍-ɛ we̍.

¹⁹ Kmɔ̌ nyɔ̍-a flɔ̍nwlùh bo ǎn wlu-i da̍a, dɛ̍nu̍ɛ, mɔ̀-a gbǐh-a mɛ̌-ɛ dǒ dɛ̍ɛ̍ i̍ wɔ̌n-ɛ we̍. Ka mɔ̀ nu̍-a mɔ̀-a ku̍ kli̍hgbɛ̍ kwlǎ sà-a de dǒ sììjii̍ nu̍-ɛ ke kà kɔn-ɛ ɛ̀ gbǎ-a kɛ̍n-ɛ we̍-ɛ, kǎ mɔ̀ iě i̍h kwlǎ sà-a nu̍ ke la̍ sǔh dǒ i̍ slɛ̌-ɛ we̍ wɛ̀ mɔ̀ iě dǒ Nyɔsoa we̍ kɔn.

²⁰ Ti̍ mɔ̀ nu̍-a gblɛ̍n sɔ̀ɛ̀n-a kèi̍ᵻɛ́, nɛ̀ dɛ̍ ɛ̀ slɛ̌-a i̍-ɛ se̍ mɔ̀ wlu̍ i̍ kɔn.

²¹ Ìh kɔn nu̍-ɛa po̍-a ka mɔ̀ tɛ̀n-ɛ ti̍laa-ɛ, ti̍ mɔ̀-a nu̍-a i̍h-ɛ, sɔ dɛ̍ mɔ̀ jě-o ɛ? I̍h naɛ dlǔ i̍ chlà la̍ nɔ̀ɔ̍ mɛ̌ɛ bo ɛ̀ nɛ-e sǔh.

²² Jɛ kaka la̍ gblɛ̍n sɔ̀ɛ̀n se̍ mɔ̀ wlu̍ i̍ kɔn dɛ, iě mɔ̀ nu̍ ka Nyɔsoa-a kèi̍ᵻ. Ɛ̍ nu̍ ɛ̍ iě mɔ̀ kɔn dǒ Nyɔsoa we̍, iě ɛ̍ nu̍ ɛ̍ wɛ̀ mɔ̀ blě kmɔ̌ sie feɛ.

²³ Nɛ̀ɛ̍, gblɛ̍n sɔ̀ɛ̀n-a pɛ̌ɛ la nu̍ mɛ̌ɛ, jɛ Nyɔsoa-a nyǐ-dɛ̍ nu̍ kmɔ̌ sie feɛ dě à Joi Jusu Klai ja̍a̍.