Wloma 5 - Ku̍o̍ Delee 1999

Kǎ nyɔ̍-a nu̍ ka i̍ slɛ̌-nyɔ̍ nu̍-ɛ

¹ Nɛ̀ɛ̍, ka à wlùh gbaɛ blě-ɛ nu̍-a ɛ̍ iě Nyɔsoa slè-ea àɔ̀ i̍ slɛ̌-nyɔ̍-ɛ, nɛ̀ à ke Nyɔsoa-a wɔ̌ɛn wlu̍ i̍ dě à Joi Jusu Klai ja̍a̍.

² Dě ɔ̍ ja̍a̍ bo à jii iě à jě Nyɔsoa-a blɛ à nɛ-a ka dě di̍i̍-ɛ ɛ̍ gbɛ̍n la̍. Nyɔsoa-a tìh-a i̍ bɛ̌-ɛ à mu̍-a kwa̍a̍ i̍ klɛ̀ɛ̀n-ɛ, ɛ̍ bo à kɔ̍ wlùh i̍ wɛ̀ à nmɔ.

³ Ɛ̍ se̍-o siee, nɛ̀ à nmɔ-ɛ dě à jua̍i̍ sàɛ̀ di̍i̍ ke, dɛ̍nu̍ɛ, à juo ɛ̍-ɛ jua̍i̍ sàɛ̀-a ku̍ i̍ à dě klì i̍.

⁴ Nɛ̀ à dě klì i̍ ku̍-ɛ nu̍ ɛ̍ wɛ̀ Nyɔsoa po̍ à chèɛ̀ ja̍i̍. Nɛ̀ ɔ̍ à chèɛ̀ ja̍i̍ po̍-ɛ kɔ̍-ɛ à dɛ̍ wlùh i̍.

⁵ Nɛ̀ wlùh i̍ kɔ̍ dɛ̍ se̍ à si̍h wɔ̍n po̍ mu̍, dɛ̍nu̍ɛ, Nyɔsoa-a Sùù ɛ̀ ɔ̍ nyǐ-a àɔ̀-ɛ, ɛ̍ nu̍ ɛ̍ iě Nyɔsoa jbɛɛ àɔ̀ kaa̍.

⁶ Ti̍ à se̍-a à chɛ̀ we̍ gbǎ-a bɛ̌ɛ-ɛ, wɛ̀ Klai mɛ̌ àɔ̀ gblɛ̍n sɔ̀ɛ̀n nyɔ̍-a tìh dǒ ti̍ Nyɔsoa tba̍-aɛ di̍i̍.

⁷ Ɛ̍ kma i̍ nyɔ̍ iě mɛ̌ i̍ slɛ̌-nyɔ̍-a tìh, jɛ pò ɛ̍ tù nyɔ̍ chɛ̀-a tìh-ɛ, nyɔ̍-se̍-juo nɛ̀ nyɔ̍-a mu̍ wɔ̌n ɔ̍ iě mɛ̌ nyɔ̍ chɛ̀ nyɔ̍-a tìh.

⁸ Jɛ Nyɔsoa to ɛ̍-ɛ ka ɔ̍ jbɛɛ-a àɔ̀-ɛ. Ti̍ à nɛ-a dě gblɛ̍n sɔ̀ɛ̀n di̍i̍-ɛ, wɛ̀ Klai mɛ̌ à tìh.

⁹ Nyɔsoa to ɔ̍-ɛ ɔ̍ iě slaǎ sà-ɛɛ, wɛ̀ à iě i̍ slɛ̌-nyɔ̍ nu̍. Jɛ nɛ̀ Nyɔsoa-a jlu̍h bo ɔ̍ se̍ à wɔ̍i̍n sèìe mu̍ ae?

¹⁰ À nu̍ Nyɔsoa nyɛ̌-nyɔ̍ de, jɛ ɔ̍ Jǔ-a mɛ̌-ɛ bo ɛ̀ gbe̍ɛ̍ɛn ɔ̍ ke à kɛ̍n i̍ dode̍. Ka ɔ̍ gbe̍ɛ̍ɛn-a à kɛ̍n i̍ wɛ̀ dode̍-ɛ, jɛ nɛ̀ ɔ̍ kmɔ̌ i̍ tè naɛ bo ɛ̀ se̍ à pǔh-i mu̍ ae?

¹¹ Jɛ ɛ̍ se̍ ɛ̍ nɛ due, Nyɔsoa nu̍ ɛ̍ iě à nmɔ dě à Joi Jusu Klai ja̍a̍, ɔ̀ nu̍-a ɛ̍ iě à ke Nyɔsoa gbe̍ɛ̍ɛn-a kɛ̍n i̍-ɛ.

Adaun ja mɛ̌ɛ iě Klai ja kmɔ̌ sie feɛ

¹² Adaun nu̍ gblɛ̍n sɔ̀ɛ̀n, iě ɔ̍ gblɛ̍n sɔ̀ɛ̀n laa̍ ɛ̍ ja mɛ̌ɛ nɔ̌ kmɔ̌ we̍. Sɔ mɛ̌ɛ wɔ̀ nyɔ̍ kli̍hgbɛ̍ dlǔ, dɛ̍nu̍ɛ, nyɔ̍ kli̍hgbɛ̍ nu̍ gblɛ̍n sɔ̀ɛ̀n nyɔ̍.

¹³ Gblɛ̍n sɔ̀ɛ̀n nui-ɛ nɔ̌ kmɔ̌ we̍ sasǎ wɛ̀ Nyɔsoa dǔ Mose telě nyǐ-ɛ. Jɛ pò telě se̍ dǒ tà nɛ-ɛ, nɛ̀ gblɛ̍n sɔ̀ɛ̀n-ɛ jě-eɛ.

¹⁴ Jɛ sɔ dě Adaun-a ti̍ we̍ ìè Mose jɛɛ, mɛ̌ɛ kɔn nyɔ̍ kli̍hgbɛ̍ wlu̍ i̍. Nyɔ̍-a chɛ̀ ùh se̍-a gblɛ̍n sɔ̀ɛ̀n nu̍ ka Adaun ɔ̀ wa̍-a Nyɔsoa-a telě-ɛ, ɛ̍ kɔn u̍h wlu̍ i̍ ke. Adaun bo ɔ̀ nu̍ nyɔ̍ ɔ̀ ji̍-aa ɔ̍ blaiɛ̍.

¹⁵ Jɛ Nyɔsoa-a blɛ-a nyǐ-dɛ̍ ke Adaun-a gblɛ̍n sɔ̀ɛ̀n se̍ due nɛ. Nɛ̀ pò nyɔ̍ dɔu ja la̍ mɛ̌ Adaun-a gblɛ̍n sɔ̀ɛ̀n-a tìh-ɛ, nɛ̀ Nyɔsoa-a blɛ-a nyǐ-dɛ̍ ɛ̀ jii-a dě Jusu Klai ja̍a̍-ɛ, ɛ̍ blě gbǐh ɛ̍ sìì gblɛ̍n sɔ̀ɛ̀n. Ɛ̍ mu̍ nyɔ̍ dɔu dlǔ wɔ̀ ke.

¹⁶ Sɔ nɛ̀ Nyɔsoa-a nyǐ-dɛ̍ ke Adaun-a gblɛ̍n sɔ̀ɛ̀n se̍ due nɛ. Dɛ̍nu̍ɛ, nyɔ̍ due-a gblɛ̍n sɔ̀ɛ̀n nu̍-ɛ bo ɛ̀ sà nyɔ̍ kɛ̀n. Jɛ Nyɔsoa-a nyǐ-dɛ̍ bo ɛ̀ nu̍ ɛ̍ wɛ̀ nyɔ̍ ùh nu̍-a gblɛ̍n sɔ̀ɛ̀n dɔu-ɛ iě u̍h nu̍ i̍ slɛ̌-nyɔ̍ dě ɔ̍ jlǐh.

¹⁷ Nyɔ̍ due-a gblɛ̍n sɔ̀ɛ̀n-a tìh bo ɛ̀ nu̍ ɛ̍ wɛ̀ mɛ̌ɛ kɔn nyɔ̍ kli̍hgbɛ̍ wlu̍ i̍. Jɛ nyɔ̍ ùh gbɛ̍n-a Nyɔsoa-a blɛ dɔu ke ɔ̍ nyǐ-dɛ̍ ɛ̀ nu̍-a nyɔ̍ i̍ slɛ̌-ɛ, nɛ̀ u̍h-a mu̍ kmɔ̌ sie feɛ blě wɛ̀ u̍h iě kmɔ̌ wlu̍ i̍ kɔn dě nyɔ̍ due ɔ̀ nu̍-a Jusu Klai-ɛ ja̍a̍.

¹⁸ Nɛ̀ɛ̍, Adaun-a gblɛ̍n sɔ̀ɛ̀n-a tìh bo ɛ̀ sà nyɔ̍ kli̍hgbɛ̍ kɛ̀n. Ɛ̍ kɔn ba̍ bo ke, Klai-a i̍ slɛ̌-ɛ dɛ̍ nu̍-ɛ bo ɛ̀ slɛ̌-ɛ nyɔ̍ kli̍hgbɛ̍ i̍ dě Nyɔsoa jlǐh wɛ̀ ɛ̍ nyǐ u̍h feɛ.

¹⁹ Ka Adaun-a Nyɔsoa wɔ̍n blaɛ-ɛ nu̍-a nyɔ̍ kli̍hgbɛ̍ gblɛ̍n sɔ̀ɛ̀n nyɔ̍ we̍i̍-ɛ, kǎ Klai-a Nyɔsoa-a wlu̍ nu̍-ɛa mu̍ u̍h i̍ slɛ̌-ɛ nu̍ ke.

²⁰ Nyɔsoa po̍ telě wɛ̀ nyɔ̍-a gblɛ̍n sɔ̀ɛ̀n nu̍-ɛ iě kɛ̍n gbǎ. Jɛ tà gblɛ̍n sɔ̀ɛ̀n-a gbǎ-ɛa kɛ̍n-ɛ, dǒ Nyɔsoa-a blɛ-a gbǎ-ɛ kɛ̍n ke dɛ̍blɔ.

²¹ Nɛ̀ ka gblɛ̍n sɔ̀ɛ̀n kɔn-a nyɔ̍ wlu̍ i̍ dě mɛ̌ɛ di̍i̍-ɛ, kǎ Nyɔsoa-a blɛ-a mu̍ nyɔ̍ wlu̍ i̍ kɔn-ɛ nu̍ ke dě ɔ̍ nyɔ̍ i̍ slɛ̌-ɛ di̍i̍, wɛ̀ ɛ̍ iě nyɔ̍ kmɔ̌ sie feɛ nyǐ dě à Joi Jusu Klai ja̍a̍.