Wloma 4 - Ku̍o̍ Delee 1999

Eblaɛɛn gbaɛ Nyɔsoa wlùh

¹ Eblaɛɛn ɔ̀ nu̍-a à baaᵻá baa-ɛ, ka à mu̍ dǎ dǒ ɔ̍ dɛ we̍ ɛ? Ka ɔ̍ tìh nɛ ɛ?

² Pò ɛ̍ tù Eblaɛɛn-a nu̍-dɛ̍ᵻá tìh wɛ̀ Nyɔsoa iě ɔ̍ i̍ slɛ̌-nyɔ̍ slè-e de-ɛ, nɛ̀ ɔ̍ blě dɛ̍ ɔ̍ iě i̍ blɔ̌-ɛ, jɛ nɛ̀ ɛ̍ se̍ dǒ Nyɔsoa jǔ.

³ Dɛ̍nu̍ɛ, Nyɔsoa-a wlu̍ la̍a̍, “Eblaɛɛn gbaɛ Nyɔsoa wlùh, ɛ̍ kɔn Nyɔsoa slè-e ɔ̍ i̍ slɛ̌-nyɔ̍.”

⁴ Nɛ̀ɛ̍, pò nyɔ̍ nu̍ dbo̍ wɛ̀ u̍h iě ɔ̍ pɛ̌ɛ-ɛ, nɛ̀ ɛ̍ mɛ̌-ɛ dǒ ɔ̍ we̍. Jɛ nɛ̀ u̍h se̍ ɔ̍ wlùh kɛ̍n i̍ nmɔ-ɛ.

⁵ Nɛ̀ nyɔ̍ ɔ̀ se̍-a ɔ̍ chɛ̀-a nu̍-dɛ̍ᵻ wlì tè wɛ̀ ɔ̍ iě Nyɔsoa ɔ̀ slɛ̌-a gblɛ̍n sɔ̀ɛ̀n nyɔ̍ i̍-ɛ wlùh gbaɛ-ɛ, nɛ̀ ɔ̍ wlùh gbaɛ bo ɛ̀ mu̍ ɛ̍ nu̍ wɛ̀ Nyɔsoa iě ɔ̍ i̍ slɛ̌-nyɔ̍ slè-e.

⁶ Ɛ̍ kɔn taǐn bo Depe bla̍ ke, ka nyɔ̍ ɔ̀ Nyɔsoa slè-a i̍ slɛ̌-nyɔ̍ iě ɛ̍ se̍-a ɔ̍ nu̍-dɛ̍ᵻá tìh-ɛ, nɛ̀ ɔ̍ nmɔ-a i̍-ɛ. Depe la̍a̍,

⁷ “Nyɔ̍ ùh kɔn dɛ̍ᵻ sɔ̀nᵻá tìh tǎli-a i̍-ɛ, iě u̍h-a gblɛ̍n sɔ̀ɛ̀n-a tìh sìì-a kɛ̍n i̍-ɛ, nɛ̀ u̍h nmɔ i̍.

⁸ Nyɔ̍ ɔ̀ kɔn gblɛ̍n sɔ̀ɛ̀n Joi se̍-a slè dɛ-ɛ, nɛ̀ ɔ̍ nmɔ i̍.”

⁹ Nɛ̀ i̍ nmɔ-ɔ tìh Depe sà-aɛ, ɛ̍ kɔn dǒ plɔ̀n gbǎ nyɔ̍ nɛ due we̍ ɛɛ, àe̍e̍, ɛ̍ kɔn dǒ se̍ plɔ̀n gbǎ nyɔ̍ we̍ ke ae? I̍i̍n, kǎ ɛ̍ mu̍ nɛ, dɛ̍nu̍ɛ, Nyɔsoa-a wlu̍ la̍a̍, “Eblaɛɛn gbaɛ Nyɔsoa wlùh, ɛ̍ kɔn Nyɔsoa slè-e ɔ̍ i̍ slɛ̌-nyɔ̍.”

¹⁰ Ti̍we̍ bo ɛ̍ nɛ ɛ? Ɔ̍ gbǎ plɔ̀n sasǎ ae? Iěe, Nyɔsoa slè-e ɔ̍ i̍ slɛ̌-nyɔ̍ sasǎ iě ɔ̍ dǔ plɔ̀n gbǎ-a.

¹¹ Eblaɛɛn slè-ɛ i̍ slɛ̌-nyɔ̍ ti̍ ɔ̍ se̍-a plɔ̀n gbǎ-ɛ. Dɛ̍nu̍ɛ, ɔ̍ blě wlùh gbaɛ. Ɔ̍ plɔ̀n gbǎ-a bo ɛ̀ nu̍ ɛ̍ juola ka ɔ̍ slɛ̌-a i̍-ɛ. Ɛ̍ nɛ-ɛ, wɛ̀ nyɔ̍ kli̍hgbɛ̍ ùh se̍-a plɔ̀n gbǎ iě u̍h gbaɛ-a Klai wlùh-ɛ, ɔ̍ iě u̍h baa nu̍. U̍h bo Nyɔsoa slè-e i̍ slɛ̌-nyɔ̍.

¹² Nyɔ̍ ùh gbǎ-a plɔ̀n ùh blě-a wlùh gbaɛ-ɛ, u̍h baa bo ke, dɛ̍nu̍ɛ, u̍h se̍ plɔ̀n gbǎ sǔh. Jɛ wlùh gbaɛ à baa Eblaɛɛn blě-a wɛ̀ ɔ̍ iě-a plɔ̀n gbǎ-a dǔ-ɛ, ɔ̍ wɔ̀ɔ̀ bo u̍h-a sà la̍-e i̍.

Nyɔsoa-a tɔ̀ma̍a̍ wlu̍ kɔn dǒ wlùh gbaɛ blě nyɔ̍ we̍

¹³ Eblaɛɛn slè-ɛ i̍ slɛ̌-nyɔ̍ dě ɔ̍ wlùh gbaɛ blě-ɛ di̍i̍. Ɛ̍ kɔn Nyɔsoa po̍ wlu̍ tɔ̀ma̍a̍ dǒ ɔ̍ ke ɔ̍ tloemlai we̍ u̍h iě kmɔ̌ la wlu̍ i̍ kɔn. Jɛ ɛ̍ se̍ ɔ̍ Nyɔsoa-a telě dɛ̍ɛ̍ jě tìh.

¹⁴ Pò dɛ̍ ɛ̀ kɔn wlu̍ Nyɔsoa po̍-a tɔ̀ma̍a̍-a ɛ̍ nyǐ-ɛ telě dɛ̍ɛ̍ jě nyɔ̍ de-ɛ, nɛ̀ wlùh gbaɛ se̍ dɛ̍kɛ̍n gbǎ, iě Nyɔsoa-a tɔ̀ma̍a̍ wlu̍ se̍ dɛ̍ i̍ blaɛ ke.

¹⁵ Dɛ̍nu̍ɛ, telě wa̍-a ja Nyɔsoa-a jlu̍h dǒ tà. Jɛ pò telě se̍ dǒ tà nɛ-ɛ, nɛ̀ dɛ̍ nyɔ̍ iě-a wa̍-a se̍ nɛ.

¹⁶ Nɛ̀ɛ̍, tɔ̀ma̍a̍ wlu̍ la ɛ̍ tba̍ dǒ wlùh gbaɛ kɛ̍n i̍, wɛ̀ ɛ̍ iě dě Nyɔsoa-a blɛ nɛ-ɛ di̍i̍ jii. Tɔ̀ma̍a̍ wlu̍ la ɛ̍ kɔn dǒ Eblaɛɛn-a tloemlai kli̍hgbɛ̍ we̍. Ɛ̍ se̍ dǒ telě dɛ̍ɛ̍ jě nyɔ̍ nɛ due we̍ ɛ̍ se̍ kɔn, jɛ nyɔ̍ ùh gbaɛ-ɛa Klai wlùh ka Eblaɛɛn-ɛ, ɛ̍ kɔn dǒ u̍h we̍ ke. Dɛ̍nu̍ɛ, ɔ̍ bo ɔ̀ nu̍ àɔ̀ kli̍hgbɛ̍ à baa.

¹⁷ Ɛ̍ kɔn Nyɔsoa-a wlu̍ la̍a̍, “Ǐn nu̍ ìn bloa̍ dɔu baa we̍i̍.” Eblaɛɛn nu̍ à baa dǒ Nyɔsoa ɔ̍ gbaɛ-a wlùh-ɛ jlǐhwai. Nyɔsoa-a nyǐ mɛ̌-nyɔ̍ feɛ, iě ɔ̍ wlu̍-a nu̍ ɛ̍ dɛ̍ ɛ̀ se̍-a nɛ de-ɛ, iě ɛ̍ nɛ.

¹⁸ Ti̍ wlùh i̍ tba̍ dɛ̍ se̍-a nɛ-ɛ, dǒ Eblaɛɛn tba̍-ɛ dɛ̍ wlùh i̍, iě ɔ̍ blě wlùh gbaɛ. Ɛ̍ bo ɛ̀ nu̍ ɔ̍ bloa̍ dɔu baa we̍i̍. Ɛ̍-ɛ bo Nyɔsoa-a wlu̍ sà-a, ɛ̍ la̍a̍, “Ka chǔhtlɛ̀n nu̍-a i̍ tìè-ɛ, kǎ àn nynuu̍-a mu̍ i̍ tìè-ɛ nu̍.”

¹⁹ Eblaɛɛn gbɛ̀n-a ɔ̍ chɛ̀-a sɔ̀nᵻ ja̍-ɛ, nɛ̀ i̍h wɛ̀ kmɛ nu̍-ɛ wɛ̀. Ɔ̍ ku̍ nɔ̀ɔ̍ nɛ̀ ɛ̍ mɛ̌ wɛ̀ muɔ, nɛ̀ Selɔ wɔ̍ sì dǒ gbàɔ̀n sà la̍ wɛ̀ ke. Jɛ ɛ̍ se̍ Eblaɛɛn-a wlùh gbaɛ wɔ̍n wɔ̀.

²⁰ Ɔ̍ wlùh gbaɛ se̍ kǎ, iě ɔ̍ wlùh wɔ̍ se̍ i̍ ple̍ ke dǒ Nyɔsoa-a tɔ̀ma̍a̍ wlu̍ we̍. Jɛ ɔ̍ wlùh gbaɛ po̍ ɔ̍ gbǐh ku̍u̍, iě ɔ̍ bɛ̌-ɛ Nyɔsoa-a nynɛ̌ i̍.

²¹ Ɔ̍ juo ɛ̍ kleǐn Nyɔsoa se̍ ɔ̍ tɔ̀ma̍a̍ wlu̍ kɛ̍n gblìh-ɛ bɛ̌ɛ.

²² Ɛ̍ kɔn ɔ̍ wlùh gbaɛ nu̍ ɛ̍ iě Nyɔsoa slè-e ɔ̍ i̍ slɛ̌-nyɔ̍.

²³ Wlu̍ la ɛ̀ la̍a̍, “Nyɔsoa slè-e ɔ̍ i̍ slɛ̌-nyɔ̍-ɛ,” ɛ̍ se̍ dǒ ɔ̍ nɛ due we̍ kɔn.

²⁴ Jɛ ɛ̍ kɔn dǒ àɔ̀ we̍ ke. Nyɔ̍ ɔ̀ sà-e à Joi Jusu-ɛ, àɔ̀ ùh gbaɛ ɔ̍ wlùh-ɛ, ɔ̍ mu̍ à i̍ slɛ̌-nyɔ̍ slè-e ke.

²⁵ Jusu sà-ɛɛ kwlǎ ɔ̍ iě mɛ̌ dǒ à gblɛ̍n sɔ̀ɛ̀n-a tìh we̍, iě ɔ̍ sà-ɛe wɛ̀ ɔ̍ iě à i̍ slɛ̌-nyɔ̍ we̍i̍ nu̍ dě Nyɔsoa jlǐh.