Wloma 3 - Ku̍o̍ Delee 1999

¹ Nɛ̀ɛ̍, dɛ̍ ɛ̍ mu̍-o nyɔ̍ po̍ ɔ̍ Juu jǔ nu̍ tìh ɛ̀ sìì ùh se̍-a Juu nyɔ̍ ɛ? Nɛ̀ plɔ̀n gbǎ-a chɛ̀ dɛ̍ ɛ̍ gbǎ kɛ̍n ɛ?

² Ɛ̍ gbǎ dɛ̍kɛ̍n kaa̍ dǒ dɛ̍ᵻ kli̍hgbɛ̍ we̍. Sàǐtòò dɛ̍-ɛ, dě Juu nyɔ̍ ja̍a̍ bo Nyɔsoa-a tu̍owli jii.

³ Nɛ̀ pò u̍h-a nyɔ̍ duuh ja u̍h-a wlu̍ kɛ̍n gblìh-ɛ, nɛ̀ dɛ̍ ɛ̍ mu̍ nu̍ ɛ? Ɛ̍ bo ɛ̀ mu̍ ɛ̍ nu̍ wɛ̀ Nyɔsoa iě ɔ̍ naɛ wlu̍ kɛ̍n gblìh ke ae?

⁴ Iěe tììh, pò nyɔ̍ kli̍hgbɛ̍-a jɛ ja si̍h tmɔ̌-ɛ, Nyɔsoa nɔ̀ɔ̍ ɔ̍ kɔn ɔ̍ iě tìh-a taǐn nyɔ̍ nu̍ kleǐn. Ɛ̍ kɔn ɛ̍ chlǐh-ɛ dě ɔ̍ wlu̍ di̍i̍, ɛ̍ la̍a̍, “Àn wlu̍ kɔn ɛ̍ iě ɛ̍ to ka ìn slɛ̌-a i̍-ɛ, wɛ̀ ìè kɛ̀n gba̍ dǒ sàwi̍h sì la̍.”

⁵ Jɛ pò à kà gblɛ̍n sà Nyɔsoa-a i̍ slɛ̌-ɛ tà te̍gbe̍i̍n-ɛ, nɛ̀ ka à mu̍ dǎ ɛ? Jlu̍h Nyɔsoa gbǎ-ɛa àɔ̀-ɛ, ɛ̍ se̍ i̍ slɛ̌ ae? (Ǎn wlu-i kmɔ̌ nyɔ̍-a flɔ̍nwlùh-u.)

⁶ Iěe tììh, pò Nyɔsoa se̍ i̍ slɛ̌ de-ɛ, nɛ̀ ka ɔ̍ mu̍ kmɔ̌ la ɛ̍ sàwi̍h sì-ɛ nu̍ ɛ?

⁷ Jɛ nyɔ̍-a mu̍ ka dǎ, “Ǎn wlu̍ kɛ̍n gblìh-ɛ bo ɛ̀ to ɛ̍ ka Nyɔsoa nu̍-a tìh-a taǐn wɛ̀ ɔ̍ tìh-a i̍ bɛ̌-ɛ dǔ-a kɛ̍n gbǎ-aɛ. Nɛ̀ dɛ̍ bo ɛ̀ mu̍ ǐn kɛ̀n sà ke̍ dǒ ǎn gblɛ̍n sɔ̀ɛ̀n we̍ ɛ?

⁸ Nɛ̀ dɛ̍nu̍ à-a nu̍ dɛ̍ sɔ̀n wɛ̀ dɛ̍ chɛ̀ iě ji̍ ɛ?” Nyɔ̍ ùh-a tè-a à tìh dlǔ i̍ ùh-a kɔ̌-ɛa à nynɛ̌-ɛ, u̍h la̍ kǎ à dǎ. U̍h nɔ̀ɔ̍ ɛ̍ slɛ̌ i̍ u̍h iě kɛ̀n sà-ɛɛ.

I̍-i slɛ̌-nyɔ̍ se̍ nɛ

⁹ Nɛ̀ kaka la̍, àɔ̀ Juu nyɔ̍ à gbǎ dɛ̍kɛ̍n à sìì ùh se̍-a Juu nyɔ̍-ɛ ae? Iěe tììh, ɛ̍ nɔ̀ɔ̍ à chɛ̍n ɛ̍ i̍ wɛ̀ se̍e̍. À la̍ Juu nyɔ̍ ke nyɔ̍ ùh se̍-a Juu nyɔ̍-ɛ gblɛ̍n sɔ̀ɛ̀n kɔn u̍h wlu̍ i̍.

¹⁰ Ɛ̍ kɔn Nyɔsoa-a wlu̍ la̍a̍, “I̍ slɛ̌-nyɔ̍ se̍ nɛ, ɛ̍ se̍ nyɔ̍ due-a chɛ̀ kɔn.

¹¹ Dɛ̍ɛ̍ i̍ wɔ̌n nyɔ̍ se̍ nɛ. Nyɔsoa i̍ pɔ̀n nyɔ̍ se̍ nɛ.

¹² U̍h poe Nyɔsoa kɛ̍n i̍ kli̍hgbɛ̍, u̍h kli̍hgbɛ̍ sì dɛ̍ i̍. Dɛ̍ chɛ̀ nu̍ nyɔ̍ se̍ nɛ, ɛ̍ se̍ nyɔ̍ due-a chɛ̀ kɔn.

¹³ U̍h-a wɔ̍i̍n wlu̍ wɔ̀ gbà-a plu̍h. Nyɔ̍ i̍ boe-ɛ jǐ dǒ u̍h mɛɔ kɛ̍n. U̍h-a wɔ̍n blě chɛ̌n-nǐ ka sɛ̍-ɛ.

¹⁴ Nyɔ̍-ɔ nyɛ̌ wlu̍ ke nyɔ̍ wlu̍we̍i̍ po̍-ɛ jǐ dě u̍h wɔ̍ɔ̍n.

¹⁵ U̍h-a sɔ̍n fěle kwa̍ dǒ nymɔ̍ i̍ wlǎ-a we̍.

¹⁶ Dɛ̍-ɛ gbɔ̀lɔ-ɛ ke nyɔ̍ jua̍i̍ sàɛ̀ bo u̍h-a na-ɛ.

¹⁷ Dɛ̍ ɛ̀ ja-a kmɔ̌ i̍ gbe̍ɛ̍ɛn, u̍h se̍ ɛ̍ wìè juo.

¹⁸ U̍h-a jlǐh se̍-e Nyɔsoa-a faɔn ple̍ dɛ we̍ nɛ.”

¹⁹ Kaka la̍ à juo ɛ̍-ɛ, dɛ̍ ɛ̀ Nyɔsoa-a telě sà-aɛ, nɛ̀ ɛ̍ sà ɛ̍-ɛ dǒ nyɔ̍ ùh nɛ-a dǒ ɛ̍ sɔ̀n-ɛ we̍. Wɛ̀ ɛ̍ iě wɔ̍nᵻ kli̍hgbɛ̍ ka̍n, iě kmɔ̌ kli̍hgbɛ̍ iě sàwi̍h sì dǒ Nyɔsoa jǔ.

²⁰ Ɛ̍ tìh-ɛ, telě i̍ tè-ɛ se̍ nyɔ̍ i̍ slɛ̌-ɛ bɛ̌ɛ dě Nyɔsoa jlǐh. Dɛ̍nu̍ɛ, telě nɔ̀ɔ̍, ɛ̍ to-e àɔ̀ sǔh ka à nu̍-a gblɛ̍n sɔ̀ɛ̀n nyɔ̍-ɛ.

Nyɔ̍-a slɛ̌ i̍ dě wlùh gbaɛ blě-ɛ di̍i̍

²¹ Jɛ kaka la̍, i̍ slɛ̌-ɛ ɛ̀ sɔ-a dě Nyɔsoa we̍-ɛ, ɛ̍ wlǔh tà wɛ̀. Ɛ̍ nɛ dǒ ɛ̍ naɛ blǐ dǒ telě we̍. Telě ke Nyɔsoa-a tu̍owli po̍ nyɔ̍ nu̍ ɛ̍ sàànsi̍i̍h.

²² Nyɔsoa-a slè-e nyɔ̍ i̍ slɛ̌-nyɔ̍ dě nyɔ̍-a Jusu Klai wlùh gbaɛ di̍i̍. Ɔ̍ nu̍ ɛ̍-ɛ dǒ nyɔ̍ kli̍hgbɛ̍ ùh blě-a wlùh gbaɛ-ɛ we̍, ɔ̍-ɔ chlɛ̌-e nyɔ̍ i̍.

²³ Dɛ̍nu̍ɛ, nyɔ̍ kli̍hgbɛ̍ nu̍ gblɛ̍n sɔ̀ɛ̀n, iě u̍h ti̍ɛ̍ɛn Nyɔsoa-a tìh-a i̍ bɛ̌-ɛ we̍ i̍.

²⁴ Nyɔsoa-a bu̍ɛ̍i̍ blɛ ɔ̍ nu̍-a u̍h pùn-ɛ bo ɛ̀ slɛ̌-ɛ u̍h i̍ dě ɔ̍ jlǐh. Jusu Klai ɔ̀ sà-a u̍h dě kàn kwa̍a̍-a dě ɔ̍ ja̍a̍ bo ɛ̍ jii.

²⁵ Nyɔsoa to ɔ̍-ɛ ɔ̍ iě slaǎ sà-ɛɛ, wɛ̀ nyɔ̍ ɔ̀ mu̍-a Jusu wlùh gbaɛ-ɛ ɔ̍ gblɛ̍n sɔ̀ɛ̀n-a tìh iě i̍ tǎli-ɛ. Nyɔsoa to ɔ̍ ɛ̍ iě ɛ̍ to ka ɔ̍ slɛ̌-a i̍-ɛ. Dɛ̍nu̍ɛ, ɔ̍ gbɛ̍n wlùh i̍, ɛ̍ kɔn ɔ̍ se̍ nyɔ̍ɔ kàn gbɛ̍n tɛin dǒ gblɛ̍n sɔ̀ɛ̀n u̍h nu̍-a we̍.

²⁶ Nyɔsoa to Jusu wɛ̀ ɔ̍ iě ɛ̍ ti̍laa nyɔ̍ i̍ to ka ɔ̍ chɛ̀ slɛ̌-a i̍ iě nyɔ̍ ùh gbaɛ-a Jusu wlùh-ɛ, ɔ̍ slɛ̌-ɛa u̍h i̍-ɛ.

²⁷ Na̍a̍, nɛ̀ dɛ̍ kɔn wɔ̍n à mu̍ ka i̍ po̍ ɛ? Dɛ̍ kɔn tìh à iě-a wɔ̍i̍n po̍-ɛ, ɛ̍ se̍ nɛ. Iě nɛ̀ dɛ̍ kɔn tìh à-a po̍ wɔ̍i̍n ɛ? À tè-o telě i̍ dɛbo ae? Iěe tììh, à gbaɛ Klai wlùh dɛbo.

²⁸ Ɛ̍ kɔn à la̍ Nyɔsoa-a slè-e nyɔ̍ i̍ slɛ̌-nyɔ̍ dě nyɔ̍-a wlùh gbaɛ blě-ɛ di̍i̍, ɛ̍ se̍-o nyɔ̍-a telě i̍ tè tìh.

²⁹ Nɛ̀ Nyɔsoa-a chɛ̀ la lee̍, Juu nyɔ̍ nɛ due-a Nyɔsoa bo ae? Ɔ̍ se̍ ùh se̍-a Juu nyɔ̍-ɛ u̍h-a Nyɔsoa ke ae? Iěe, ùh se̍-a Juu nyɔ̍-ɛ u̍h-a Nyɔsoa bo ke.

³⁰ Nyɔsoa nɛ due gbài̍, ɔ̍-ɔ due laa̍ bo ɔ̀ mu̍ Juu nyɔ̍ i̍ slɛ̌-ɛ dě u̍h-a wlùh gbaɛ blě-ɛ di̍i̍. Ɔ̍ mu̍ ùh se̍-a Juu nyɔ̍-ɛ i̍ slɛ̌-ɛ ke dě u̍h-a wlùh gbaɛ blě-ɛ di̍i̍.

³¹ Nɛ̀ɛ̍, wlùh gbaɛ bo à iě nu̍ la̍ sǔh wɛ̀ à iě telě de̍ po̍ ae? Iěe tììh, wlùh gbaɛ bo à nu̍ wɛ̀ à gbɛ̍n telě i̍ klìmàtàìn.