Wloma 2 - Ku̍o̍ Delee 1999

Nyɔsoa-a mu̍ nyɔ̍-a sàwi̍h sì

¹ Mɔ̀ɔ̍ la ùh-a sà-a mɔ̀ ba̍ᵻ kɛ̀n-ɛ, ka jɛ mɔ̀ nɛ-ɛ chɛ̀-ɛ, mɔ̀ se̍-o gblìh la kɔn dɛ. Mɔ̀ sà mɔ̀-a chɛ̀ kɛ̀n wɛ̀. Dɛ̍nu̍ɛ, dɛ̍ᵻ kɔn tìh mɔ̀-a sà-a mɔ̀ ba̍ᵻ kɛ̀n-ɛ, i̍h kɔn taǐn bo mɔ̀-a nu̍.

² À juo ɛ̍-ɛ Nyɔsoa nɔ̀ɔ̍, pò ɔ̍ sà nyɔ̍ ùh-a nu̍-a ìh la-a kɛ̀n-ɛ, nɛ̀ ɛ̍ slɛ̌ i̍.

³ Mɔ̀ɔ̍ la ùh wɔ̀ mɔ̀ ba̍ᵻ kɛ̀n sà-a, wɛ̀ mɔ̀-a nu̍-a dɛ̍-a taǐn-a chɛ̀ ke-ɛ, nɛ̀ mɔ̀ jajeɛ̍ Nyɔsoa se̍ mɔ̀ kàn gbɛ̍n mu̍ de ae?

⁴ Mɔ̀-a chɛ̀ la lee̍, ka Nyɔsoa nmɔ-a gblɛ̍n kaa̍ wɛ̀ ɔ̍ gbɛ̍n-a wlùh i̍ iě ɔ̍ po̍-a mɔ̀ blɛ we̍ i̍-ɛ, mɔ̀ mǎle-e ae? Mɔ̀ juo ɛ̍-ɛ te̍kle̍e̍, Nyɔsoa-a pɔ̀n mɔ̀ iě mɔ̀-a gblɛ̍n sɔ̀ɛ̀n kɛ̍n i̍ poe, ɛ̍ kɔn ɔ̍ nmɔ gblɛ̍n-ɛ dǒ mɔ̀ we̍.

⁵ Jɛ mɔ̀-a dlǔ ku̍-ɛ ke jla̍-a nɛ-ɛ bo ìh nu̍ ɛ̍ wɛ̀ weɛ̍ Nyɔsoa-a jlu̍h ke i̍ slɛ̌-ɛ sàwi̍h-a mu̍-a tà wlǔh-ɛ wɛ̀ mɔ̀-a chɛ̀-a kàn gbɛ̍n-ɛ iě wɔ̍n ku̍.

⁶ Dɛ̍nu̍ɛ, ka nyɔ̍-a nu̍-dɛ̍ᵻ nɛ-aa, kǎ Nyɔsoa-a mu̍ ɔ̍ pɛ̌ɛ nu̍.

⁷ Nyɔ̍ duuh-a pɔ̀n Nyɔsoa iě u̍h tìh-a i̍ bɛ̌-ɛ ke, ja̍ tè-ɛ ke nɛ̀ mɛ̌ feɛ nyǐ, ɛ̍ kɔn u̍h-a gba̍ dɛ̍ chɛ̀ nu̍-ɛ dluwe̍ i̍. U̍h bo Nyɔsoa-a mu̍ kmɔ̌ sie feɛ nyǐ.

⁸ Jɛ nyɔ̍ duuh-a sì u̍h-a chɛ̀ tìh, wɛ̀ u̍h-a blaɛ-a tìh-a taǐn wɔ̍n, iě u̍h wɔ̀ dǒ kà kɔn-ɛ de̍e̍. U̍h nɔ̀ɔ̍, Nyɔsoa-a mu̍ u̍h jlu̍h-u gbǎ-ɛ ɔ̍ iě u̍h kàn gbɛ̍n.

⁹ Nyɔ̍ kli̍hgbɛ̍ ùh nu̍-a dɛ̍ sɔ̀n nu̍ nyɔ̍-ɛ, u̍h-a mu̍ jua̍i̍ sàɛ̀ wɛ̀ u̍h iě tìh jě. Juu nyɔ̍ bo ɛ̍ mu̍ pùn nɛ sàǐtòò, wɛ̀ ɛ̍ iě juh se̍-a Juu nyɔ̍-ɛ jɛɛ-ɛ dǔ ke.

¹⁰ Jɛ nyɔ̍ kli̍hgbɛ̍ ùh nu̍-a dɛ̍ chɛ̀-ɛ, u̍h bo ùh-a mu̍ tìh-a i̍ bɛ̌-ɛ ke ja̍ tè-ɛ ke wlùh-a i̍ tè-ɛ blě. Juu nyɔ̍ bo ɛ̍ mu̍ pùn nɛ sàǐtòò, wɛ̀ ɛ̍ iě juh se̍-a Juu nyɔ̍-ɛ jɛɛ-ɛ dǔ ke.

¹¹ Dɛ̍nu̍ɛ, Nyɔsoa-a sà wìè fɔ̌ due.

¹² Nyɔ̍ kli̍hgbɛ̍ ùh se̍-a Nyɔsoa-a telě juo wɛ̀ u̍h nu̍-a gblɛ̍n sɔ̀ɛ̀n-ɛ, u̍h se̍ telě juo gbɛɛ, jɛ u̍h-a mu̍ mɛ̌. Jɛ nyɔ̍ ùh juo-a telě laa̍ wɛ̀ u̍h nu̍-a gblɛ̍n sɔ̀ɛ̀n-ɛ, nɛ̀ u̍h-a sàwi̍h-a mu̍ sì-ɛ dě telě di̍i̍.

¹³ Dɛ̍nu̍ɛ, telě-e wɔ̌n nyɔ̍ se̍ i̍ slɛ̌ mu̍ dě Nyɔsoa jlǐh, jɛ nyɔ̍ ùh-a nu̍-a dɛ̍ telě dǎ-aɛ, u̍h bo ùh-a mu̍ i̍ slɛ̌ dě ɔ̍ jlǐh.

¹⁴ Nyɔ̍ juh se̍-a Juu nyɔ̍ ùh se̍-a telě juo-ɛ, u̍h-a chɛ̀-a wlùh nu̍ ɛ̍ iě u̍h nu̍ dɛ̍ telě dǎ-aɛ. Kǎ ɛ̍ nɛ gbɛɛ u̍h se̍ telě juo, jɛ dě u̍h di̍i̍ bo u̍h-a chɛ̀-a telě nɛ.

¹⁵ U̍h-a nu̍-dɛ̍ᵻ bo ìh to ɛ̍ ka dɛ̍ telě-a pɔ̀n-aɛ, ɛ̍ chlǐh-a dǒ u̍h wlùh kɛ̍n-ɛ. U̍h-a wlùh bo ɛ̀ nu̍ u̍h-a sàànsi̍i̍h ke. Sɔ̀ngbɛ̀jɛ̀-ɛ, nɛ̀ u̍h-a wlùh i̍ naɛ bo ɛ̀ sèàɛ̍ u̍h dɛ̍ sɔ̀n ke dɛ̍ chɛ̀ u̍h nu̍-aɛ wlùh.

¹⁶ Weɛ̍ Nyɔsoa-a mu̍-a Jusu Klai-i jii-ɛ, dǒ ɛ̍ di̍i̍ bo ɔ̍ mu̍ nyi̍ɔ̍-a sìle dɛ̍ᵻá sàwi̍h sì-i. Kǎ pɔ̀n chɛ̀ ǎn bla̍-a dǎ.

Juu nyɔ̍ se̍ telě wlì tè-ɛ bɛ̌ɛ

¹⁷ Mɔ̀ ɔ̀ nu̍-a Juu jǔ-ɛ, Nyɔsoa-a telě bo ìn tè wlì iě àn po̍ àn Nyɔsoa dɛ-a wɔ̍i̍n.

¹⁸ Ìn juo Nyɔsoa-a wlùh dɛ. Ìn wɔ̌ɛn dɛ̍ ɛ̀ slɛ̌-a i̍-ɛ tìh i̍, dɛ̍nu̍ɛ, ìn poe-ɛ slɛ̌ chèɛ̀ i̍ dě telě di̍i̍.

¹⁹ Ìn juo ɛ̍-ɛ gblagblǎ, mɔ̀ bo ɔ̀ nu̍ dɔ̌-nyɔ̍ wìè-e po̍ nyɔ̍. Nyɔ̍ ùh nɛ-a dě kwile-ɛ, mɔ̀ bo ɔ̀ nu̍ u̍h-a sɔ̀npli,

²⁰ iě ìn nu̍ bo-nyɔ̍ slɛ̌ chèɛ̀ i̍ po̍ nyɔ̍, wɛ̀ àn po̍ nynuu̍plìh nǎ. Dɛ̍nu̍ɛ, ìn juo telě ɛ̀ blě-a tɔɔ kli̍hgbɛ̍ ke tìh-a taǐn-ɛ.

²¹ Mɔ̀ ɔ̀ po̍-a nyɔ̍ duuh nǎ-ɛ, àn po̍ àn chɛ̀ nǎ ke nɔ̀ɔ̍ ae? Mɔ̀ ɔ̀ bla̍-a tìh nyɔ̍ bɔ̌-a jlǐ-ɛɛ, àn chɛ̀ nɛ̀ jlǐ ke nɔ̀ɔ̍ ae?

²² Nàa̍ nyɔ̍ bɔ̌ nynɛ̌à nu̍-ɛ, àn chɛ̀ nɛ̀ nu̍ nynɛ̌à ke nɔ̀ɔ̍ ae? Nàa̍ ìn faɛn kwɛ̍i̍n gbo̍ᵻ dɛ-ɛ, àn chɛ̀ nɛ̀ jlǐ dɛ̍ᵻ dě i̍h-a gbòᵻ di̍i̍ nɔ̀ɔ̍ ae?

²³ Mɔ̀ ɔ̀ po̍-a wɔ̍i̍n telě juo tìh-ɛ, àn chɛ̀-a telě wa̍-a bo ɛ̀ nui Nyɔsoa tɛ̀n.

²⁴ Ɛ̍ kɔn Nyɔsoa-a wlu̍ la̍a̍, “Mɔ̀ɔ̍ Juu nyɔ̍ mɔ̀-a tìh bo Nyɔsoa-a nynɛ̌-a nyni wɔ̍n dě ùh se̍-a Juu nyɔ̍-ɛ nynɛ̌.”

²⁵ Pò ìn ja telě dɛ̍ɛ̍ jě-ɛ, nɛ̀ àn plɔ̀n gbǎ-a gbǎ dɛ̍kɛ̍n. Jɛ pò ìn wa̍ telě-ɛ, nɛ̀ ìn wɔ̀ nyɔ̍ ùh se̍-a plɔ̀n gbǎ-ɛ.

²⁶ Nyɔ̍ ɔ̀ nu̍-a Juu jǔ ɔ̀ gbǎ-a plɔ̀n-ɛ, wɛ̀ ɔ̍ iě dɛ̍ telě dǎ-a nu̍-ɛ, nɛ̀ Nyɔsoa se̍ ɔ̍ se̍ plɔ̀n gbǎ nyɔ̍ slè-e mu̍.

²⁷ Ɛ̍ tìh-ɛ, nyɔ̍ ɔ̀ kɔn plɔ̀n gbǎ-a se̍-a dǒ ɔ̍ ku̍ pùn nɛ iě ɔ̍ tè-ao telě i̍-ɛ, ɔ̍ mu̍ mɔ̀ ɔ̀ gbǎ-a plɔ̀n-ɛ kɛ̀n sà. Dɛ̍nu̍ɛ, ìn juo telě ìh chlǐh-iaɛ, iě ìn gbǎ plɔ̀n, jɛ ìn nu̍ telě-a chɛ̀ wa̍ nyɔ̍.

²⁸ Nyɔ̍-a Juu jǔ nu̍-ɛ se̍ dɛ̍ ɛ̀ nyi̍ɔ̍-a jě-aɛ. Plɔ̀n gbǎ-a gblangbai̍ naɛ se̍ dɛ̍ ɛ̀ nyi̍ɔ̍-a jě-a ɛ̀ nɛ-a dǒ nyi̍ɔ̍-a ku̍ pùn-ɛ.

²⁹ Jɛ nyɔ̍-a Juu jǔ nu̍-ɛ nu̍ dɛ̍ ɛ̀ nyi̍ɔ̍ se̍-a jě-ɛ bɛ̌ɛ. Plɔ̀n gbǎ-a gblangbai̍ naɛ bo Nyɔsoa-a Sùù-a nu̍ dǒ nyɔ̍-a wlùh kɛ̍n. Plɔ̀n gbǎ-a la ɛ̍ se̍ nɛ dǒ telě ɛ̀ chlǐh-iaɛ we̍. Juu jǔ kaɛn laa̍, ɔ̍ tìhwe̍ po̍-ɛa mu̍ dě Nyɔsoa we̍ sɔ, ɛ̍ se̍ dě wlɔ̀ nyi̍ɔ̍ we̍ sɔ mu̍.