Wloma 15 - Ku̍o̍ Delee 1999

Nyɔsoa-a pɔ̀n ɔ̍ nyɔ̍ iě wlùh due blě

¹ Àɔ̀ juh kɔn wlùh gbaɛ ku̍-a i̍-ɛ, àɔ̀ bo à iě juh kɔn naɛ se̍-a i̍ ku̍-ɛ we̍ gbǎ wɛ̀ ɛ̍ iě u̍h-a gbǔh ja̍i̍ dǔ. Ɛ̍ se̍ à chɛ̀-a wlùh i̍ tè-e kai.

² À jɔ-ɛ, nɛ̀ ɔ̍ tè-e ɔ̍ pònyɔ̍-a wlùh i̍ ɛ̍ iě ɔ̍ wlùh gbaɛ-ɛ i̍ kui.

³ Klai se̍ ɔ̍ chɛ̀-a wlùh i̍ tè-e. Nyɔsoa-a chlǐh-wlu̍ la̍ we̍ chɛ̀ wlu̍ nyɔ̍gbei po̍-a Nyɔsoa pùn i̍-ɛ, i̍h bo ìh wlǎ dǒ Klai dlǔ.

⁴ Dɛ̍ᵻ kli̍hgbɛ̍ ìh chlǐh-a tɛin dě Nyɔsoa-a wlu̍ di̍i̍-ɛ, i̍h chlǐh i̍-ɛ i̍h iě à nǎ po̍, wɛ̀ à iě wlùh i̍ kɔ̍ dɛ̍ blě. Dɛ̍nu̍ɛ, Nyɔsoa-a wlu̍ fùka à wlùh iě ɛ̍ ku̍ i̍ àɔ̀ dě klì i̍.

⁵ Nyɔsoa ɔ̀ fùka-a nyɔ̍-a wlùh-ɛ ke ɔ̀ ku̍ i̍-a nyɔ̍ dě klì i̍-ɛ, ǎn sà nǐ wɔ̍n ɔ̍ iě mɔ̀ wlùh-a due nɛ-ɛ nyǐ dǒ mɔ̀-a Jusu Klai de̍e̍ gbǎ-a we̍.

⁶ Wɛ̀ mɔ̀ iě gbǔh bla̍, mɔ̀ iě wlu̍ due po̍, iě Nyɔsoa ɔ̀ nu̍-a à Joi Jusu Klai Baa-ɛ, mɔ̀ iě ɔ̍ nynɛ̌ i̍ bɛ̌-ɛ.

Pɔ̀n chɛ̀ kɔn dǒ ùh se̍-a Juu nyɔ̍-ɛ we̍ ke

⁷ Ɛ̍ tìh-ɛ, ka Klai nu̍-a mɔ̀-a tìh i̍ gbɛ̍n-ɛɛ, kǎ mɔ̀ iě nu̍ ke dě mɔ̀-a chɛ̀ nynɛ̌ wɛ̀ Nyɔsoa-a nynɛ̌ iě i̍ bɛ̌.

⁸ Ǎn sèàɛ̍ mɔ̀ wlùh, Klai nu̍ Juu nyɔ̍-a pòi̍ju wɛ̀ ɛ̍ iě ɛ̍ to ka Nyɔsoa-a gblìh-a wlu̍ kɛ̍n-ɛ. Iě wlu̍ ɔ̍ po̍-a tɔ̀ma̍a̍ tɛin dě Juu nyɔ̍ baaᵻ we̍-ɛ, i̍h iě chɛ̀-ɛ gbǎ.

⁹ Wɛ̀ ùh se̍-a Juu nyɔ̍-ɛ u̍h iě Nyɔsoa-a nynɛ̌ i̍ bɛ̌-ɛ ɔ̍ wɔɛ kɔn tìh. Ɛ̍ kɔn Nyɔsoa-a wlu̍ la̍a̍, “Ɛ̍ tìh-ɛ, ǎn mu̍ àn nynɛ̌ i̍ bɛ̌-ɛ dě ùh se̍-a Juu nyɔ̍-ɛ nynɛ̌, nɛ̀ ǎn mu̍ ìn we̍ i̍ ble̍-e.”

¹⁰ Nyɔsoa-a wlu̍ la̍a̍ dɛ-ɛ, “Mɔ̀ɔ̍ ùh se̍-a Juu nyɔ̍-ɛ, mɔ̀ gbǎ Nyɔsoa-a nyɔ̍ we̍ mɔ̀ iě nmɔ.”

¹¹ Ɔ̍ wlu̍ la̍a̍ dɛ-ɛ, “Mɔ̀ɔ̍ kli̍hgbɛ̍ ùh se̍-a Juu nyɔ̍-ɛ, mɔ̀ bɛ̌-ɛ Joi-a nynɛ̌ i̍. Nyɔ̍ kli̍hgbɛ̍ bɛ̌-ɛ ɔ̍ nynɛ̌ i̍.”

¹² Dode̍-ɛ, Asaia la̍a̍, “Jɛse-a tloemlai-a mu̍ ji̍, nɛ̀ ɔ̍ mu̍ ja̍i̍ dǔ-iɛ ɔ̍ iě ùh se̍-a Juu nyɔ̍-ɛ u̍h-a wlu̍ kwa̍ blě. U̍h-a mu̍ ɔ̍ wlùh i̍ tba̍.”

¹³ Nyɔsoa ɔ̀ nu̍-a wlùh i̍ kɔ̍ nyɔ̍-ɛ, ǎn sà nǐ wɔ̍n ɔ̍ iě mɔ̀ nmɔ-ɛ kli̍hgbɛ̍ ke wlùh-a i̍ tè-ɛ i̍ jǐi ka mɔ̀ gbaɛ-a ɔ̍ wlùh-ɛ. Wɛ̀ ɔ̍ Sùù iě ɛ̍ nu̍ mɔ̀-a wlùh i̍ kɔ̍ dɛ̍ iě i̍ ku̍.

Pɔɔ sà ɔ̍ dbo̍ nu̍ tìh i̍

¹⁴ Ǐn de̍di̍i̍ᵻ, jɛwɛ̀ ǎn pɔluh pɛ̌n i̍ dǒ mɔ̀ we̍ ka mɔ̀ blě-a gblɛ̍n chɛ̀ ke tɔɔ kli̍hgbɛ̍-ɛ, iě mɔ̀ bɛ̌ɛ-a slɛ̌n we̍ tù i̍-ɛ wɛ̀-ɛ.

¹⁵ Chlǐh-dɛ̍ la ǎn chlǐh-a mɔ̀ we̍-ɛ, ǎn wlu gbài̍gbài̍ dě ɛ̍ di̍i̍ dǒ dɛ̍ᵻ diih ǎn sǐ-ia ka dǒ mɔ̀ wlì i̍-ɛ we̍. Dɛ̍nu̍ɛ, Nyɔsoa nɛ blɛ dǒ ǐn we̍

¹⁶ iě Jusu Klai-a pòi̍ju nu̍ dǒ ùh se̍-a Juu nyɔ̍-ɛ we̍. Ǐn wɔ̀ slaǎ sà nyɔ̍ ɔ̀ bla̍-a Nyɔsoa-a pɔ̀n chɛ̀-ɛ. Wɛ̀ ùh se̍-a Juu nyɔ̍-ɛ u̍h iě nyǐ-dɛ̍ ɛ̀ nmɔ-a dě Nyɔsoa jlǐh i̍ iě ɔ̍ Sùù tè-a ɛ̍ pɔ̌ dǒ ɔ̍ we̍-ɛ wɔ̀.

¹⁷ Ǐn ke Jusu Klai-a due nɛ-ɛ bo ɛ̀ nu̍ ɛ̍ iě ǎn blɔ̌ dǒ ǎn Nyɔsoa jǔ dbee dɛ we̍.

¹⁸ Dɛ̍ ɛ̀ Klai nu̍-a dě ǐn ja̍a̍-ɛ, ɛ̍ nu̍ ùh se̍-a Juu nyɔ̍-ɛ u̍h iě Nyɔsoa-a wlu̍ nu̍. Ɛ̍ nɛ due bo ǎn mu̍ bla̍ gbài̍gbài̍. Ɔ̍ nu̍ ɛ̍-ɛ dǒ ǎn wlu̍ ke ǎn nu̍-dɛ̍ᵻ we̍.

¹⁹ Ɔ̍ nu̍ ɛ̍ dǒ jbaɛdih ke, nyɔ̍ wɔ̍n flɔn-ɛ dɛ̍ᵻ nu̍-ɛa gbǐh ke Nyɔsoa-a Sùù-a gbǐh we̍. Wɛ̀ sɔ dǒ Juluslɛn wlɔ̀ di̍i̍ ìè Ilewlekɔn fɔɔ nyni̍-ɛ, iě ǐn bla̍-e Klai-a pɔ̀n chɛ̀ we̍i̍ wɛ̀ kli̍hgbɛ̍.

²⁰ Ǎn wlùh gbɛ̍n dɛ̍ nu̍ tà nyɔ̍-ɔ se̍-a Klai-a nynɛ̌ wɔ̌n-ɛ fu̍u̍-ɛ, iě-e pɔ̀n chɛ̀-a tìh bla̍-ɛ, wɛ̀ nɛ̌ je̍e nyɔ̍ dɔɔ-a dbo̍ ɔ̍ tè-a gbɔ̀-ɛ kɛ̍n i̍ gbǎ-ɛ.

²¹ Kǎ ɛ̍ nu̍ ka chlǐh-ɛ, Nyɔsoa-a wlu̍ la̍a̍, “Nyɔ̍ ùh-u se̍a ɔ̍ tìh wlùh sèàɛ̍-ɛ, u̍h-a mu̍ ɔ̍ jě. Nyɔ̍ ùh-u se̍a ɔ̍ nynɛ̌ wɔ̌n-ɛ, u̍h-a mu̍ ɔ̍ dɛ-ɛ i̍ wɔ̌n.”

Pɔɔ-a chɛ̍n di̍i̍chì ɔ̍ iě Wlom i̍ nala mu̍

²² Ǎn wlùh gbɛ̍n dɛ̍ la bo ɛ̀ sà ǐn wìè-i chɛ̍chɛ̍ wɛ̀ nɛ̌ ji̍ dě mɔ̀ we̍ i̍ nala.

²³ Dě mɔ̀ we̍ ji̍ tɔ̌n nu̍ m dǒ sɔ̀nᵻ dɔu la di̍i̍. Kaka la̍ ǐn wɔ̀ ǎn dbo̍ i̍ wɛ̀ nɔ̌ blǔh-a fɔ̌ᵻ jih la we̍.

²⁴ Nɛ̀ ǐn tè ɛ̍ wlì iě mɔ̀ jě dǒ ǎn Simii bloa̍ kɛ̍n mu̍ la̍. Nɛ̀ pò mɔ̀ ke ǐn ke à wɔ̀-ɔ nu̍i-ɛ dǒ ti̍ gbɔ̍ di̍i̍-ɛ, nɛ̀ ǎn pɔ̀n mɔ̀ iě ǐn sɔ̍n we̍ po̍ dǒ ǎn Simii mu̍-ɛ we̍.

²⁵ Jɛ kaka la̍ ǎn mu̍ dǒ Juluslɛn wlɔ̀ di̍i̍ iě Nyɔsoa nyɔ̍ nɛ-a doǒ-ɛ sɔ̍n-ɔ sà.

²⁶ Dɛ̍nu̍ɛ, Nyɔsoa nyɔ̍ ùh nɛ-a dě Mɛsedonia ke Akaia fɔɔ-ɛ, ɛ̍ tè-e u̍h-a wlùh i̍ u̍h iě nyɔ̍gbà nyɔ̍ nɛ-a dě Nyɔsoa nyɔ̍ nynɛ̌ dě Juluslɛn-ɛ, u̍h iě u̍h nyǐ-dɛ̍ we̍ dbo̍.

²⁷ U̍h-a wlùh tè i̍ u̍h iě ɛ̍ nu̍. Jɛ nɛ̀ u̍h nɛ ɛ̍ ka̍ dǒ u̍h ba̍ᵻ Nyɔsoa nyɔ̍ we̍. Dɛ̍nu̍ɛ, pò ùh se̍-a Juu nyɔ̍-ɛ u̍h ja la̍ pɔ̀ìě ɛ̀ Nyɔsoa nyǐ-a Juu nyɔ̍-ɛ kwa̍a̍ i̍ klɛ̀ɛ̀n-ɛ, nɛ̀ u̍h-a kɔn-dɛ̍ᵻ u̍h blě-aɛ, u̍h nɛ i̍h Juu nyɔ̍ we̍ gbǎ-ɛ ka̍.

²⁸ Pò ǐn wɔ̀ dbo̍ la i̍ wɛ̀ iě nyǐ-dɛ̍ la kwlǎ sà-a wɔ̀-ɛ, nɛ̀ ǎn mu̍ dě mɔ̀ we̍ jii wɛ̀ iě Simii mu̍-ɛ dǔ.

²⁹ Nɛ̀ ǐn juo ɛ̍-ɛ ti̍ ǎn mu̍-a dě mɔ̀ we̍ ji̍-ɛ, ǎn mu̍ mɔ̀ pɔ̀ìě klaa ɛ̀ Klai blě-a dǒ mɔ̀ we̍-ɛ ja.

³⁰ Ǐn de̍di̍i̍ᵻ, ǐn gbɛ̍n mɔ̀-a bu̍hᵻ i̍, mɔ̀ gbǎ ǐn we̍ mɔ̀ iě ǎn Nyɔsoa ba̍le ka à gbaɛ-a à Joi Jusu Klai wlùh iě jbɛɛ sɔ-a dě ɔ̍ Sùù we̍-ɛ.

³¹ Wɛ̀ se̍ Nyɔsoa juo nyɔ̍ nɛ-a dě Judia fɔɔ-ɛ, u̍h je̍e ǐn dɛ̍ nui. Wɛ̀ dɛ̍ kɔn tìh ǎn mu̍-a we̍ dě Juluslɛn-ɛ, Nyɔsoa nyɔ̍ nɛ-a deě-ɛ u̍h iě ɛ̍ i̍ gbɛ̍n.

³² Nɛ̀ɛ̍, pò ɛ̍ nu̍ Nyɔsoa-a wlùh dɛ̍-ɛ, nɛ̀ ǎn mu̍ nmɔ-ɛ blě iě dě mɔ̀ we̍ ji̍. Wɛ̀ iě dɛ̍wɛ fɔ dě mɔ̀ nynɛ̌.

³³ Nyɔsoa ɔ̀ nyǐ-a nyɔ̍ wlùh-a i̍ tè-ɛ, ǎn sà nǐ wɔ̍n ɔ̍ iě dǒ mɔ̀ kli̍hgbɛ̍ we̍ nɛ o. Kǎ ɛ̍-ɛ nɛ.