Wloma 14 - Ku̍o̍ Delee 1999

Bɔ̌ ìn ba̍ tìh pùn tù-ɛ

¹ Nyɔ̍ ɔ̀ kɔn wlùh gbaɛ se̍-a i̍ ku̍ dě mɔ̀ nynɛ̌-ɛ, mɔ̀ gbà ɔ̍ wlì. Jɛ nɛ̀ mɔ̀ bɔ̌ ɔ̍ we̍ chɛ̀-ɛ ɔ̍ flɔ̍nwlùh-a tìh.

² Nyɔ̍ blě wlùh gbaɛ-ɛ, nɛ̀ ɛ̍ nu̍ ɛ̍ iě ɔ̍ di̍ dɛ̍-o-dɛ̍. Jɛ jɔ kɔn wlùh gbaɛ se̍-a i̍ ku̍-ɛ, nɛ̀ tlo-dɛ̍ᵻ nɛ due gbài̍ bo ɔ̍ di̍.

³ Nɛ̀ ɔ̀ di̍-a dɛ̍-o-dɛ̍-ɛ, ɔ̍ bɔ̌ jɔ se̍-a ɛ̍ nu̍-ɛ pàwe̍i̍ po̍-ɛ. Jɔ ɔ̀-ɔ di̍-a dɛ̍-o-dɛ̍-ɛ, ɔ̍ bɔ̌ jɔ di̍-a dɛ̍-o-dɛ̍-ɛ tìh pùn tù-ɛ. Dɛ̍nu̍ɛ, Nyɔsoa gbɛ̍n ɔ̍ tìh i̍ wɛ̀.

⁴ Mɔ̀ nyɔ̍we̍ iě àn tù nyɔ̍ dɔɔ-a pòi̍ju tìh pùn ɛ? Ɔ̍ chɛ̀-a dlǔtu bo ɔ̀ iě ɔ̍ pòi̍ju chɛ̀ àe̍e̍ pòi̍ju sɔ̀n dǎɛ. Ɔ̍ mu̍ pòi̍ju chɛ̀ nu̍, dɛ̍nu̍ɛ, Joi Nyɔsoa bɛ̌ɛ ɔ̍ pòi̍ju chɛ̀ we̍i̍ nu̍-ɛ.

⁵ Nyɔ̍ due la̍ weɛ̍ due nɛ dě wǐh nynɛ̌ ɛ̍ gbǎ dɛ̍kɛ̍n ɛ̍ sìì ɛ̍ ba̍ᵻ. Wɛ̀ dɔɔ la̍ wǐh kli̍hgbɛ̍ beɛ̍ɛ. Jɔ-ɛ nɛ̀ ɔ̍ naɛ kɔn ɛ̍ iě dě ɔ̍ di̍i̍ i̍ sǐi.

⁶ Pò nyɔ̍ jě weɛ̍ chɛ̀ ka dě wǐh nynɛ̌-ɛ, nɛ̀ ɔ̍ nu̍ ɛ̍ dǒ Joi ja̍ tè-ɛ we̍. Pò nyɔ̍ di̍ dɛ̍-o-dɛ̍-ɛ, nɛ̀ ɔ̍ nu̍ ɛ̍ ke dǒ Joi ja̍ tè-ɛ we̍, dɛ̍nu̍ɛ, ɔ̍ po̍ Nyɔsoa tlɔ̌ dǒ di̍-dɛ̍ laa̍ we̍. Pò nyɔ̍-ɔ di̍ dɛ̍-o-dɛ̍-ɛ, nɛ̀ ɔ̍ nu̍ ɛ̍ dǒ Joi ja̍ tè-ɛ we̍, dɛ̍nu̍ɛ, ɔ̍ po̍ Nyɔsoa tlɔ̌ dǒ dɛ̍ ɔ̍ di̍-a we̍.

⁷ À nyɔ̍ ɔ̀ iě-a kmɔ̌ nɛ dǒ ɔ̍ chɛ̀ we̍-ɛ, ɔ̍ se̍ nɛ. À nyɔ̍ ɔ̀ iě-a mɛ̌ ke dǒ ɔ̍ chɛ̀ we̍-ɛ, ɔ̍ se̍ nɛ.

⁸ Pò à nɛ kmɔ̌-ɛ, nɛ̀ à nɛ kmɔ̌ dǒ Joi we̍. Iě po̍ à mɛ̌-ɛ, nɛ̀ à mɛ̌-ɛ dǒ Joi we̍. Nɛ̀ɛ̍, pò à nɛ kmɔ̌ àe̍e̍ à mɛ̌-ɛ, à kɔn dǒ Joi we̍.

⁹ Ɛ̍ kɔn tìh bo Klai mɛ̌ iě ɔ̍ wlǔh-e, wɛ̀ ɔ̍ iě kmɔ̌ nɛ nyɔ̍ ke mɛ̌-nyɔ̍-a Joi nu̍.

¹⁰ Mɔ̀-a nyɔ̍ se̍ kɔn ɔ̍ iě ɔ̍ de̍di̍i̍ tìh pùn tù, àe̍e̍ ɔ̍ iě ɔ̍ pàwe̍i̍ po̍. Dɛ̍nu̍ɛ, à kli̍hgbɛ̍ à mu̍ i̍ nyna dǒ Nyɔsoa-a sàwi̍h sì gbalǎ jǔ.

¹¹ Nyɔsoa-a wlu̍ la̍a̍, “Joi la̍a̍, ‘Ǐn slɛ̀ɛ̀n dǒ ǎn chɛ̀ we̍, nyɔ̍ kli̍hgbɛ̍-a mu̍ i̍ chlìi dǒ ǐn jǔ. Nyɔ̍ kli̍hgbɛ̍-a mu̍ ǎn tìh i̍ wɔ̌ɛn dǒ gbaɛ̍we̍.’ ”

¹² Ɛ̍ tìh-ɛ, à jɔ-ɛ ɔ̍ mu̍ ɔ̍ chɛ̀-a tìh we̍ i̍ sèàɛ̍ dǒ Nyɔsoa we̍.

Nyɔsoa-a kmɔ̌ wlu̍ i̍ kɔn-ɛ se̍ di̍-dɛ̍ i̍ bǎ

¹³ Nɛ̀ɛ̍, mɔ̀ à kǎ à ba̍ᵻ tìh pùn tù-ɛ nɛ. Jɛ dɛ̍ à iě-a nu̍-ɛ, mɔ̀ à po̍ slɛ̌ wɛ̀ à-a je̍e à de̍di̍i̍ tàmlain poe, àe̍e̍ à-a je̍e ɛ̍ nu̍ ɔ̍-ɔ je̍e gblɛ̍n sɔ̀ɛ̀n nu̍.

¹⁴ Ǎn dě Joi Jusu ja̍a̍ nɛ-ɛ nu̍ ɛ̍ iě ǐn juo ɛ̍ ka di̍-dɛ̍-ɛ nyni-a dě Nyɔsoa jlǐh i̍-ɛ. Jɛ pò nyɔ̍ la̍ ɛ̍ nyni dě Nyɔsoa jlǐh i̍ dǒ ɔ̍ we̍-ɛ, nɛ̀ kǎ ɛ̍ nɛ dǒ nyɔ̍ laa̍ we̍.

¹⁵ Pò dɛ̍ ìn di̍-aɛ ɛ̍ poe ìn de̍di̍i̍ tàmlain-ɛ, nɛ̀ ɛ̍ se̍ jbɛɛ wìè ìn se̍ gba̍ dɛ. Dɛ̍ àn di̍-aɛ, bɔ̌ wɔ̌n-ɛ wɛ̀ ɛ̍ bɔ̌ ìn de̍di̍i̍ gbɔ̀lɔ-ɛ ɔ̀ kɔn tìh Klai mɛ̌-aɛ.

¹⁶ Mɔ̀ bɔ̌ wɛ̀ nyɔ̍ɔ je̍e mɔ̀-a dɛ̍ chɛ̀ dɛ̍ sɔ̀n dǎɛ.

¹⁷ Dɛ̍nu̍ɛ, Nyɔsoa-a kmɔ̌ wlu̍ i̍ kɔn-ɛ se̍ di̍-dɛ̍ ke nǎ-dɛ̍ i̍ bǎ. Jɛ i̍ slɛ̌-ɛ ke, wlùh-a i̍ tè-ɛ ke nmɔ-ɛ Nyɔsoa-a Sùù-a nyǐ-a nyɔ̍-ɛ bo ɛ̍ bǎ i̍.

¹⁸ Nɛ̀ɛ̍, nyɔ̍ ɔ̀ nu̍-a ka Klai jǔ dbee sɔɛn-ɛ, nɛ̀ Nyɔsoa wɔ̌ɛn ɔ̍ tìh i̍ iě wlɔ̀ nyɔ̍ po̍ ɔ̍ chèɛ̀ ja̍i̍.

¹⁹ Ka ɛ̍ nɛ-a ka-a, nɛ̀ dɛ̍ mu̍-a à kɛ̍n i̍ gbe̍ɛ̍ɛn-ɛ bo à iě we̍ fɔ̀n à iě nu̍. Mɔ̀ à nu̍ po̍ ìn ba̍ gbǐh ku̍u̍ ìn ba̍ po̍ ìn gbǐh ku̍u̍.

²⁰ Di̍-dɛ̍ àn di̍-aɛ, ɛ̍ bɔ̌ ɛ̍ nu̍-ɛ wɛ̀ Nyɔsoa-a nyɔ̍ bɔ̌-ɔ gbɔ̀lɔ-ɛ. Di̍-dɛ̍ᵻ kli̍hgbɛ̍ nmɔ dě Nyɔsoa jlǐh i̍, jɛ ɛ̍ se̍ i̍ blaɛ wɛ̀ dɛ̍ ìn di̍-aɛ, ɛ̍ iě ɛ̍ nu̍ wɛ̀ nyɔ̍ dɔɔ iě gblɛ̍n sɔ̀ɛ̀n nu̍.

²¹ Pò nmi̍i̍ di̍-ɛ ke nmɔ̍ nǎ-a àe̍e̍ dɛ̍-o-dɛ̍ nɛ dǒ de̍ ɛ̍ iě ìn de̍di̍i̍ tàmlain poe-ɛ, nɛ̀ ɛ̍ blaɛ i̍ ìè i̍h sɔ̍n we̍ sà.

²² Ka ìn nu̍-a wlùh gbaɛ blě-ɛ dǒ ìh la pùn-ɛ, nɛ̀ ìn si̍e̍ ɛ̍ dǒ ìn ke Nyɔsoa nynɛ̌. Dɛ̍ kɔn chèɛ̀ nyɔ̍ po̍-a ja̍i̍-ɛ, pò ɛ̍ nu̍-ɛ se̍ ɔ̍ wlùh-u kǎ-ɛ, nɛ̀ ɔ̍ nmɔ i̍.

²³ Jɛ pò dɛ̍ nyɔ̍ di̍-a ɛ̍ klǎ ɔ̍ wlùh i̍ wɛ̀ ɔ̍ iě ɛ̍ di̍ gbɔ̀gbɔ̀-ɛ, nɛ̀ kɛ̀n sɔ ɔ̍ kwa̍a̍ wɛ̀. Dɛ̍nu̍ɛ, ɔ̍ nu̍-dɛ̍ se̍ dǒ wlùh gbaɛ kɛ̍n i̍ tba̍. Pò nyɔ̍ nu̍ dɛ̍-o-dɛ̍ ɛ̍ se̍ dǒ wlùh gbaɛ kɛ̍n i̍ tba̍ɛ, nɛ̀ gblɛ̍n sɔ̀ɛ̀n bo.