Wloma 13 - Ku̍o̍ Delee 1999

Pɔɔ sà tùn blě nyɔ̍-a dɛ̍ɛ̍ jě tìh i̍

¹ Nyɔ̍ kli̍hgbɛ̍ kɔn u̍h iě bloa̍-a tùn blě nyɔ̍ dɛ̍ɛ̍ jě. Dɛ̍nu̍ɛ, Nyɔsoa-a se̍ nyɔ̍-a tìh i̍ wɔ̌ɛn wɛ̀ ɔ̍-ɔ blě tùn. Nyɔ̍ ùh blě-a ka tùn-ɛ, Nyɔsoa-a chɛ̀ bo ɔ̀ po̍ u̍h-o.

² Ɛ̍ tìh-ɛ, nyɔ̍ ɔ̀ mu̍-a u̍h-a tùn blě-ɛ bu̍hᵻ i̍ tbaɛ-ɛ, nɛ̀ dɛ̍ Nyɔsoa nyna-ɛa i̍-ɛ bo ɔ̍ tbaɛ bu̍hᵻ i̍, nɛ̀ ɔ̍ gbɛ̍n-ɛ ɔ̍ chɛ̀ tìh.

³ Dɛ̍nu̍ɛ, dɛ̍ chɛ̀ nu̍ nyɔ̍-ɔ ple̍ tùn blě nyɔ̍-a faɔn. Dɛ̍ sɔ̀n nu̍ nyɔ̍ bo ùh-a ple̍ u̍h jǔ. Ìn se̍ pɔ̀n ìè tùn blě nyɔ̍ jǔ ple̍ ae? Nɛ̀ ìn nu̍ dɛ̍ chɛ̀, wɛ̀ ɔ̍ iě ìn tìhwe̍ po̍.

⁴ Ɔ̍ bo ɔ̀ nu̍ Nyɔsoa-a pòi̍ju ɔ̍ iě àn dɛ̍ chɛ̀ nu̍. Jɛ pò ìn nu̍ dɛ̍ sɔ̀n-ɛ, nɛ̀ ìn ple̍ ɔ̍ jǔ. Dɛ̍nu̍ɛ, ɔ̍ se̍ tùn laa̍ blě bu̍ɛ̍i̍. Ɔ̍ nu̍ Nyɔsoa-a pòi̍ju ɔ̍ iě dɛ̍ sɔ̀n nu̍ nyɔ̍ kàn gbɛ̍n.

⁵ Ɛ̍ tìh-ɛ, mɔ̀ kɔn mɔ̀ iě tùn blě nyɔ̍ dɛ̍ɛ̍ jě. Ɛ̍ se̍ Nyɔsoa-a je̍e mɔ̀ kàn gbɛ̍n nɛ due tìh, jɛ nu̍ ɛ̍ wɛ̀ mɔ̀-a wlùh iě waa nɛ.

⁶ Ɛ̍ kɔn tìh bo mɔ̀-a pɛ̌ɛ-a taa̍sìh. Dɛ̍nu̍ɛ, tùn blě nyɔ̍ bo ùh nu̍ Nyɔsoa-a pòi̍nynuu̍. Ɛ̍ kɔn u̍h-a nu̍ dbo̍ u̍h kɔn u̍h iě-a nu̍-ɛ ma̍u̍.

⁷ Dɛ̍ u̍h kɔn u̍h iě-a jě-ɛ, nɛ̀ mɔ̀ pɛ̌ɛ ɛ̍ u̍h. Pò ɛ̍ tù gbò-a taa̍sìh-ɛ, nɛ̀ mɔ̀ pɛ̌ɛ i̍h. Pò ɛ̍ tù kɔn-dɛ̍ᵻá taa̍sìh-ɛ, nɛ̀ mɔ̀ pɛ̌ɛ i̍h. Pò ɛ̍ tù nyɔ̍ dɛ̍ɛ̍ jě-ɛɛ, nɛ̀ mɔ̀ nu̍ ɛ̍. Iě pò ɛ̍ tù nyɔ̍ ja̍ tè-ɛɛ, nɛ̀ mɔ̀ tè u̍h ja̍.

Nyɔsoa nyɔ̍ kɔn u̍h iě we̍ jbɛɛ

⁸ Bɔ̌ nyɔ̍-o-nyɔ̍-a gba̍ gbɛ̍n-ɛ. We̍ jbɛɛ-ɛ tɛ̀ bo ǐn sà-o. Dɛ̍nu̍ɛ, nyɔ̍ ɔ̀ jbɛɛ-a ɔ̍ pònyɔ̍-ɛ, nɛ̀ ɔ̍ jě telě kli̍hgbɛ̍ dɛ̍ɛ̍ wɛ̀.

⁹ Telě-a chɛ̀ la̍a̍, “Bɔ̌ nynɛ̌à nu̍-ɛ, bɔ̌ nyɔ̍ gbe̍ja̍a̍ po̍-ɛ, bɔ̌ jlǐ-ɛ, bɔ̌ nyɔ̍ dɔɔ-a dɛ̍ wɛɛn i̍ nui-ɛ.” Telě jih la ke jih sie-a dode̍-ɛ, i̍h gbǎ dě telě due la di̍i̍. Ɛ̍ nu̍, “Jbɛɛ ìn pònyɔ̍-ɔ ka àn chɛ̀-ɛ.”

¹⁰ Nyɔ̍ ɔ̀ jbɛɛ-a ɔ̍ pònyɔ̍-ɛ, nɛ̀ ɔ̍ se̍ ɔ̍ dɛ̍ sɔ̀n pùn nu̍ mu̍. Sɔ nɛ̀ nyɔ̍ ɔ̀ blě-a jbɛɛ-ɛ, nɛ̀ ɔ̍ wɔ̀ telě kli̍hgbɛ̍ dɛ̍ɛ̍ jě-ɛ wɛ̀.

¹¹ Kǎ mɔ̀ iě nu̍, dɛ̍nu̍ɛ, mɔ̀ juo ti̍ à nɛ-a ka kɛ̍n-ɛ. Ti̍ nyni̍-o wɛ̀ mɔ̀ iě nyinɔ̍ jlǐh i̍ sà. Ti̍ Nyɔsoa-a mu̍-a à pǔh-iɛ, ɛ̍ kɔǎn we̍ wɛ̀ kaka ɛ̍ sìì ti̍ jɛ à iě-a wlùh gbaɛ-ɛ blě-ɛ i̍ sàɛ̀-ɛ.

¹² Wlù la ɛ̍ tɛn dlǔ wɛ̀, sɔ̀n-a ji̍ la̍ sɛ̀n la̍. Ɛ̍ tìh-ɛ, mɔ̀ à tǎli kwile-a dɛ̍ᵻ i̍, mɔ̀ à dǔ fɔ̀n-dɛ̍ᵻ i̍ à iě tu̍h fɔ̀n dě sɔ̀npli di̍i̍.

¹³ Mɔ̀ à po̍ à chɛ̀ wìè-e, ka dě sɔ̀npli di̍i̍ nɛ nyɔ̍-ɛ. Mɔ̀ bɔ̌ sììjii̍ nu̍-ɛ peě kɛ̍n i̍. Mɔ̀ bɔ̌ mɔ̀-a chɛ̀ nmɔ̍ wlì sìèè-ɛ. Mɔ̀ bɔ̌ gbǎn nu̍-ɛ. Mɔ̀ bɔ̌ se̍i̍kɔɛn nu̍-ɛ, nɛ̀ mɔ̀ bɔ̌ chɛ̀-ɛ, mɔ̀ bɔ̌ wlɛ̀n nu̍-ɛ.

¹⁴ Jɛ Joi Jusu Klai bo ɔ̀ iě jliɛ̍ nu̍ mɔ̀ iě-e pa̍, nɛ̀ mɔ̀ bɔ̌ mɔ̀-a gblɛ̍n sɔ̀ɛ̀n nu̍ ku̍-a wlùh-a i̍ pɔ̀n-ɔ dɛ̍ᵻ nu̍-ɛ dɛ.