Wloma 12 - Ku̍o̍ Delee 1999

Nyɔsoa-a nyɔ̍ kɔn u̍h iě ɔ̍ jǔ dbee

¹ Ɛ̍ tìh-ɛ, ǐn de̍di̍i̍ᵻ, ǐn chɛ̍n mɔ̀-a gbɛ̀n, ka Nyɔsoa jě-a àɔ̀ wɔɛ-ɛ, mɔ̀ sà mɔ̀-a chɛ̀ kwlǎ dǒ ɔ̍ we̍ wɛ̀ mɔ̀ iě slaǎ sà-ɛ dɛ̍ jɛ tè-a kmɔ̌ i̍-ɛ wɔ̀. Nɛ̀ mɔ̀ tè-eɛ pɔ̌ dǒ ɔ̍ we̍, mɔ̀-a tìh iě ɔ̍ gbǐh po̍, ɛ̍ bo ɛ̀ nu̍ mɔ̀-a wɛɛ sà-aa gblangbai̍.

² Mɔ̀ bɔ̌ kmɔ̌ la ɛ̍ we̍ dɛ̍ᵻ nu̍-ɛ dɛ, jɛ nɛ̀ wlùh-a delee i̍ gbǎ-a Nyɔsoa nyǐ-a mɔ̀-ɛ bo mɔ̀ iě dě di̍i̍ nɛ la̍ sǔh. Nɛ̀ mɔ̀-a mu̍ Nyɔsoa-a wlùh juo-ɛ bɛ̌ɛ. I̍h bo ìh nu̍-a dɛ̍ chɛ̀ ke, ɔ̍ gbǐh po̍ dɛ̍ ke gblɛ̍ja̍i̍ wɛ̀-ɛ.

³ Blɛ Nyɔsoa nɛ-a dǒ ǐn we̍-ɛ, dǒ ǐn tba̍ bu̍h i̍ iě ǎn sèàɛ̍ ka mɔ̀ kli̍hgbɛ̍ wlùh. Mɔ̀ bɔ̌ mɔ̀-a chɛ̀ dɛ̍kɛ̍n gbǎ nyɔ̍ slè-eɛ wɛ̀ mɔ̀ bɔ̌-o i̍ sì-ɛ. Jɛ mɔ̀ kɔn gblɛ̍n mɔ̀ iě mɔ̀-a chɛ̀ tɔ̀ɔ̀n tù dǒ wlùh gbaɛ Nyɔsoa nyǐ-a mɔ̀-ɛ we̍.

⁴ Nyi̍ɔ̍tu blě fɔ̌ᵻ dɔu, wɛ̀ i̍h-a nu̍-dɛ̍ᵻ se̍ due nɛ.

⁵ Ɛ̍ kɔn ba̍ bo ke, à tìè i̍ sǔh jɛ à ke Klai-a due nɛ-ɛ nu̍ ɛ̍ iě à nu̍ nyi̍ɔ̍tu due. Sɔ nɛ̀ jɔ-ɛ, nɛ̀ ɔ̍ ke àɔ̀ juh sie-a dǒ de̍-ɛ, à tùi i̍ iě à nu̍ nyi̍ɔ̍tu due.

⁶ Àɔ̀ kli̍hgbɛ̍ la Nyɔsoa-a blɛ nɛ tìh wɛ̀ ɔ̍ nyǐ àɔ̀ nyǐ-dɛ̍ᵻ kaɛn kaɛn. Mɔ̀ à nui i̍h dbo̍. Nɛ̀ pò jɔ naɛ nu̍ Nyɔsoa-a tu̍owli po̍-ɛɛ, nɛ̀ ɔ̍ nu̍ ɛ̍ dǒ ɔ̍ wlùh gbaɛ blě-ɛ we̍.

⁷ Pò ɛ̍ tù nyɔ̍ jǔ dbee-ɛɛ, nɛ̀ ɔ̍ nu̍ ɛ̍. Pò ɛ̍ tù nǎ po̍-ɛɛ, nɛ̀ ɔ̍ po̍ nyɔ̍ nǎ.

⁸ Pò ɛ̍ tù nyɔ̍-a wlùh fùka-aɛ, nɛ̀ ɔ̍ nu̍ ɛ̍. Pò ɛ̍ tù nyɔ̍ dɛ̍ nyǐ-ɛ, nɛ̀ ɔ̍ wlǎ-e wlɔ̀ i̍ ɔ̍ iě ɛ̍ nu̍. Pò ɛ̍ tù nyɔ̍ kwa̍ blě-ɛɛ, nɛ̀ ɔ̍ po̍-e gbǐh ɔ̍ iě ɛ̍ nu̍. Iě pò ɛ̍ tù gblɛ̍n-ɛ nmɔ-ɛɛ, nɛ̀ ɔ̍ nui ɛ̍ mɔna̍.

⁹ Mɔ̀-a jbɛɛ bɔ̌ kǐh i̍ nɛ-ɛ. Mɔ̀ faɛn dɛ̍ sɔ̀n-ɔ, mɔ̀ iě dɛ̍ chɛ̀ sɔ̍nᵻ sɔɔ̌n i̍ gbɛ̍n-ɛ.

¹⁰ Mɔ̀ tbà mɔ̀-a we̍ jbɛɛ nɛ̍ i̍ ka mɔ̀ nu̍-a de̍di̍i̍ᵻɛ́. Mɔ̀ tù-e gbǐh mɔ̀ iě we̍ ja̍ tìèe̍.

¹¹ Mɔ̀-a gbǐh bɔ̌ mɛ̌-ɛ, nɛ̀ mɔ̀ dbee Joi jǔ dǒ mɔ̀-a wlùh kli̍hgbɛ̍ we̍.

¹² Ka mɔ̀ kɔ̍-a Klai wlùh i̍-ɛ, nɛ̀ mɔ̀ nmɔ. Wě ji̍-ɛ, gbɛ̍n wlùh i̍ sǔh. Mɔ̀ bɔ̌ ba̍le-ɛ se̍a̍-a.

¹³ Dɛ̍ Nyɔsoa-a nyɔ̍ nɛ-a blě ka̍-ɛ wɛ̀ mɔ̀ iě ɛ̍ blě-ɛ, nɛ̀ mɔ̀ nyǐ ɛ̍ u̍h. Mɔ̀ gba̍ nyɔ̍ gbò we̍.

¹⁴ Nyɔ̍ ùh-a jě-ea mɔ̀ klě-ɛ, mɔ̀ sà-ɛ u̍h nǐ wɔ̍n. Sà-ɛ u̍h nǐ wɔ̍n jɛ bɔ̌ u̍h pǎ poe-ɛ.

¹⁵ Nyɔ̍ ùh nmɔ-aɛ, mɔ̀ gbǎ u̍h we̍ mɔ̀ iě nmɔ. Nyɔ̍ ùh pa̍-a sùàɛ̀n-ɛ, mɔ̀ gbǎ u̍h we̍ mɔ̀ iě sùàɛ̀n pa̍.

¹⁶ Mɔ̀ kli̍hgbɛ̍ mɔ̀ blě wlùh due. Mɔ̀ bɔ̌ blɔ̌-ɛ, jɛ nyɔ̍ ùh nyɔ̍gbei se̍-a jbɛɛ-ɛ u̍h bo mɔ̀ iě-e jbɛɛ. Mɔ̀ nɛ due-a flɔ̍nwlùh bɔ̌ flɔ̍nwlùh nu̍-ɛ.

¹⁷ Pò nyɔ̍ nu̍ mɔ̀ dɛ̍ sɔ̀n pùn-ɛ, mɔ̀ bɔ̌ ɛ̍ dɛ̍ sɔ̀n gba̍a̍ sà-ɛ. Mɔ̀ fɔ̀n dɛ̍ we̍ mɔ̀ iě dɛ̍ ɛ̀ nmɔ-a dě nyɔ̍ kli̍hgbɛ̍ jlǐh i̍-ɛ nu̍.

¹⁸ Mɔ̀ fɔ̀n dɛ̍ we̍ mɔ̀ ke nyɔ̍ kli̍hgbɛ̍-a kmɔ̌ iě i̍ gbe̍ɛ̍ɛn.

¹⁹ Ǎn tìh kma nyɔ̍, mɔ̀ bɔ̌ nyɔ̍ gba̍a̍ sà-ɛ, jɛ Nyɔsoa bo ɔ̀ iě u̍h jlu̍h po̍-e. Dɛ̍nu̍ɛ, Joi Nyɔsoa-a wlu̍ la̍a̍, “Ǎn mu̍ dɛ̍ sɔ̀n nu̍ nyɔ̍ gba̍a̍ sà-ɛ, ǎn mu̍ u̍h de̍ pɛ̌ɛ.”

²⁰ Nyɔsoa-a wlu̍ la̍a̍ dɛ-ɛ, “Pò mɔ̌ ja àn nyɛ̌-nyɔ̍ nu̍-ɛ, nyǐ ɔ̍ di̍-dɛ̍. Pò dǒ ɔ̍ wlì ja bǔ-ɛ, nɛ̀ ìn nyǐ ɔ̍ nǐ. Pò ìn ja laan nu̍-ɛ, nɛ̀ slùgbɛ̀ bo ìn po̍ dǒ ɔ̍ klě i̍ wɛ̀.”

²¹ Mɔ̀ bɔ̌ wɔ̌n-ɛ dɛ̍ sɔ̀n bɔ̌ mɔ̀ klà sà-a, jɛ dɛ̍ chɛ̀ bo mɔ̀ iě dɛ̍ sɔ̀n klà sà-ɛ.