Wloma 10 - Ku̍o̍ Delee 1999

¹ Ǐn de̍di̍i̍ᵻ, dɛ̍ ǎn pɔ̀n-a ɛ̀ iě-a nɛ-ɛ, ɛ̍ nu̍ ǎn chɛ̀-a Eslɔɛ nyɔ̍ iě pǔh, ɛ̍ kɔn Nyɔsoa bo ǎn ba̍le.

² Ǐn bɛ̌ɛ iě u̍h-a sàànsi̍i̍h nu̍ ka u̍h fòè-a Nyɔsoa dɛ we̍-ɛ. Jɛ u̍h-a ɔ̍ we̍ fòè-ɛa chɛ̀ bo ɛ̀ se̍ dǒ tìh-a taǐn kɛ̍n i̍ tba̍.

³ Ka Nyɔsoa-a nu̍-a nyɔ̍ i̍ slɛ̌-ɛ, u̍h se̍ ɛ̍ dɛ-ɛ i̍ wɔ̌n. U̍h-a fɔ̀n dɛ̍ we̍ u̍h iě u̍h-a chɛ̀ naɛ gbɔ̀ tè. U̍h se̍ u̍h-a chɛ̀ wlù ja dǒ ka Nyɔsoa-a nu̍-a nyɔ̍ i̍ slɛ̌-ɛ we̍.

⁴ Klai bo ɔ̀ wɔ̀ telě i̍, wɛ̀ nyɔ̍ mu̍-a wlùh gbaɛ blě-ɛ, ɔ̍ iě i̍ slɛ̌-ɛ dě Nyɔsoa jlǐh.

Wlùh gbaɛ-ɛ pǔh-i nyɔ̍

⁵ Mose wɔ̌an chlǐh-i tìh-ɛ, ɔ̍ la̍a̍, “Pò nyɔ̍ nu̍ i̍ slɛ̌-ɛ dɛ̍ ɛ̀ telě la̍ nyɔ̍ iě-a nu̍-ɛ, nɛ̀ nyɔ̍ laa̍ bo ɔ̀ mu̍ kmɔ̌ nɛ.”

⁶ Nyɔsoa-a wlu̍ bla̍ ɛ̀ la dǒ nyɔ̍ ùh slɛ̌-a i̍ dě wlùh gbaɛ blě-ɛ di̍i̍-ɛ we̍, ɛ̍ la̍a̍, “Nyɔ̍ bɔ̌ ka dǎ-a dě ɔ̍ chɛ̀-a wlùh di̍i̍, nyɔ̍ bo ɔ̀ mu̍ dě ja̍i̍wlɔ̀ nɔ̀ɔ̍ mu̍ ɛ?” (wɛ̀ ɔ̀ iě Klai tlìh-iɛ).

⁷ “Àe̍e̍, nyɔ̍ bo ɔ̀ mu̍ dě wlù nɔ̀ɔ̍ mu̍ ɛ?” (wɛ̀ ɔ̀ iě-e Klai sà-ɛ).

⁸ Kǎ Nyɔsoa-a wlu̍ dǎ ka, ɛ̍ la̍a̍, “Nyɔsoa-a tu̍owli kɔǎɛn ìn we̍ i̍. Ɛ̍ nɛ dǒ ìn wɔ̍i̍n ke dǒ ìn wlùh kɛ̍n.” Tu̍owli-a chɛ̀ bo ɛ̀ nu̍-a wlùh gbaɛ blě tìh à bla̍-a.

⁹ Pò ìn wɔ̌ɛn-ɛ wɛ̀ ìè ka nu̍, “Jusu bo ɔ̀ nu̍ Joi,” wɛ̀ ìè ɛ̍ tìh chɛ̀ po̍ ka Nyɔsoa sà-a ɔ̍-eɛ dǒ ìn wlùh kɛ̍n-ɛ, nɛ̀ àn mu̍ pǔh.

¹⁰ Pò nyɔ̍ gbaɛ Klai wlùh-ɛ, wɛ̀ ɔ̍ slɛ̌ i̍ dě Nyɔsoa jlǐh. Nyɔ̍ wɔ̌ɛn ɔ̍ tìh i̍ dǒ gbaɛ̍we̍-ɛ iě nyɔ̍-a pǔh.

¹¹ Nyɔsoa-a wlu̍ la̍a̍, “Nyɔ̍ jɔ gbaɛ-a ɔ̍ wlùh-ɛ, nɛ̀ ɔ̍ se̍ tɛ̀n-ɛ i̍ gbǎ mu̍.”

¹² Nyɔsoa se̍-e Juu nyɔ̍ ke juh se̍-a Juu nyɔ̍-ɛ i̍ chlɛ̌. Dɛ̍nu̍ɛ, ɔ̍ due laa̍ bo ɔ̀ nu̍ Joi dǒ nyɔ̍ kli̍hgbɛ̍ we̍. Nɛ̀ nyɔ̍ kli̍hgbɛ̍ ùh-a dǎ-a ɔ̍ nynɛ̌ i̍-ɛ, u̍h bo ɔ̍ nyǐ nya̍ pàn-ɛ pɔ̀ìě.

¹³ Ɛ̍ kɔn Nyɔsoa-a wlu̍ la̍a̍, “Nyɔ̍ kli̍hgbɛ̍ ùh-a dǎ-a Joi Nyɔsoa-a nynɛ̌ i̍-ɛ, nɛ̀ u̍h-a mu̍ pǔh.”

¹⁴ Jɛ nɛ̀ ɔ̀ u̍h se̍-a wlùh gbaɛ-ɛ, ka u̍h-a mu̍ ɔ̍ nynɛ̌ i̍ dǎ-a nu̍ ɛ? Nɛ̀ ɔ̀ kɔn nynɛ̌ u̍h se̍-a wɔ̌n-ɛ, ka u̍h-a mu̍ ɔ̍ wlùh gbaɛ nu̍ ɛ? Pò tìh bla̍ nyɔ̍ se̍ nɛ-ɛ, nɛ̀ ka u̍h-a mu̍ ɔ̍ nynɛ̌ wɔ̌n-ɛ nu̍ ɛ?

¹⁵ Nɛ̀ pò nyɔ̍ se̍ dbo̍-eɛɛ, nɛ̀ ka tìh-a chɛ̀-ɛ mu̍ bla̍-ɛ nu̍ ɛ? Ɛ̍ kɔn Nyɔsoa-a wlu̍ la̍a̍, “Nyɔ̍ ùh-a bla̍-a pɔ̀n chɛ̀ la-ɛ, ɛ̍ po̍ nyɔ̍gbei mɔna̍-a dǒ u̍h-a ji̍-ɛ we̍.”

¹⁶ Jɛ ɛ̍ se̍ nyɔ̍ kli̍hgbɛ̍ ùh se̍ pɔ̀n chɛ̀ la i̍ gbɛ̍n. Ɛ̍ kɔn Asaia la̍a̍, “Joi, tu̍owli à po̍-aɛ, nyɔ̍ bo ɔ̀ dǎɛ i̍h tìh ɛ?”

¹⁷ Nɛ̀ɛ̍, dě tu̍owli i̍ wɔ̌n-ɛ di̍i̍ bo wlùh gbaɛ blě-ɛa sɔ-ɔ. Nɛ̀ dě Klai-a tìh we̍i̍ bla̍-a di̍i̍ bo tu̍owli i̍ wɔ̌n-ɛa sɔ-ɔ.

¹⁸ Jɛ ǎn tèle tìh i̍ o. Eslɔɛ nyɔ̍ se̍ tu̍owli wɔ̌n ae? Iěe, u̍h wɔ̌n i̍h wɛ̀. Ɛ̍ kɔn Nyɔsoa-a wlu̍ la̍a̍, “U̍h-a wlu̍ nyni̍ blǔh kli̍hgbɛ̍ kɛ̍n i̍, iě u̍h-a wɔ̍i̍n wlu̍ wɔ̀ kmɔ̌ kli̍hgbɛ̍ la dlǔ.”

¹⁹ Ǎn tèle tìh i̍ dɛ. Na̍a̍, Eslɔɛ nyɔ̍ la u̍h se̍ dɛ̍ɛ̍ i̍ wɔ̌n ae? Iěe, u̍h wɔ̌n dɛ̍ɛ̍ i̍. Nyɔsoa la̍a̍ dě Mose ja̍a̍, “Bloa̍ ɛ̀ se̍-a nynɛ̌ kɔn-ɛ, ǎn mu̍ ɛ̍ nu̍ ɛ̍ wlɛ̀n iě ǎn nyɔ̍ nu̍. Nɛ̀ ǎn mu̍ ǎn nyɔ̍ jlu̍h di̍i̍ i̍ po̍ dǒ bloa̍ ùh bo-a we̍i̍-ɛ pùn.”

²⁰ Wɛ̀ Nyɔsoa wlu dě Asaia ja̍a̍ gbài̍gbài̍, ɔ̍ la̍a̍, “Nyɔ̍ ùh se̍-a ǐn i̍ pɔ̀n-ɛ, u̍h bo ùh jě m̌. Nyɔ̍ ùh se̍-a ǎn tìh i̍ tèle-ɛ, u̍h bo ǐn wlǔh-i kɛ̍n.”

²¹ Jɛ kǎ ɔ̍ dǎ ka dǒ Eslɔɛ nyɔ̍-a dɛ we̍, ɔ̍ la̍a̍, “Ka sɔ̀n-a sɛ̀n-aɛ, kǎ ǎn gbɛ̍n nyɔ̍ wɔ̍n gbàì blaɛ nyɔ̍ ke nyɔ̍ jla̍-a i̍ nu̍ nyɔ̍-a bu̍hᵻ i̍ u̍h iě ǐn we̍ ji̍ dode̍.”