Taitɔ 3 - Ku̍o̍ Delee 1999

Nyɔsoa nyɔ̍-a nu̍-dɛ̍ᵻ la

¹ Sǐ-i àn nyɔ̍ laa̍ tìh wlì i̍ u̍h iě u̍h-a chɛ̀ wlù ja dǒ u̍h-a wlu̍ kwa̍ blě nyɔ̍ ke tùn blě nyɔ̍ we̍, u̍h iě u̍h-a wlu̍ nu̍, u̍h iě dɛ̍ chɛ̀ nu̍ tìh gbàɛ̀ tà kli̍hgbɛ̍.

² U̍h bɔ̌ nyɔ̍-o-nyɔ̍-a wlu̍ wɔ̍i̍n nyni-ɛ, u̍h bɔ̌ wɔ̍ɔ̍n i̍ sà-a, u̍h iě jbɛɛ-ɛ blě, nɛ̀ u̍h gbɛ̍n tìh i̍ dǒ nyɔ̍ kli̍hgbɛ̍ we̍.

³ Sàì laa̍ nɛ̀ à bo we̍i̍ ke, nɛ̀ à-a nu̍ nyɔ̍-a wlu̍, iě à sìì wìè. Nɛ̀ à nu̍ gbale̍e̍ gbǎ-a ke wlùh dɛ̍ᵻ kaɛn kaɛn-a kèi̍. Nɛ̀ gblɛ̍n-ɛ nyni-ɛ ke wlɛ̀n kɔn-ɛ bo à ja-ɛ ja̍-a. Nɛ̀ nyɔ̍ɔ faɛn àɔ̀, iě à faɛn nyɔ̍ɔ.

⁴ Jɛ Nyɔsoa ɔ̀ nu̍-a à Sèìe Nyɔ̍-ɛ, ti̍ ɔ̍ gblɛ̍n-ɛ nmɔ-ɛ ke nyɔ̍-ɔ jbɛɛ-ɛ wlǔh-a tà-ɛ,

⁵ iě ɔ̍ sèìe àɔ̀. Ɛ̍ se̍ à nu̍-dɛ̍ᵻá i̍ slɛ̌ tìh ɔ̍ se̍ àɔ̀ sèìe. Jɛ ɔ̍ wɔɛ kɔn-ɛ bo ɛ̀ nu̍ ɛ̍ iě ɔ̍ pǔh-i àɔ̀ dě ɔ̍ Sùù di̍i̍. Ɔ̍ Sùù dle àɔ̀ i̍ ɛ̍ kɔn à wlǔh-ɛ ke à kmɔ̌ gbǎ delee i̍.

⁶ Sùù laa̍ bo ɔ̍ jaɛ dě à Sèìe Nyɔ̍ Jusu Klai ja̍a̍, iě ɔ̍ chɛ̌li ɛ̍ dɔu dǒ àɔ̀ kɛ̍n.

⁷ Ɔ̍ nɛ blɛ dǒ àɔ̀ we̍ ɛ̍ iě à i̍ slɛ̌-nyɔ̍ we̍i̍ nu̍, wɛ̀ kmɔ̌ sie feɛ à kɔ̍-a wlùh i̍-ɛ, à iě ɛ̍ kɔn.

⁸ Wlu̍ la tìh-a taǐn bo. Ìh la̍ bo ǎn pɔ̀n ìè kɛ̍ɛ̍n nɛ̌. Nyɔ̍ ùh gbaɛ-a Nyɔsoa wlùh-ɛ, nɛ̀ u̍h nu̍ nɛnɛ̌ u̍h iě dɛ̍ chɛ̀ nu̍-ɛ we̍ fòè. Ìh la̍ bo ìh nmɔ jii̍ wɛ̀ i̍h-a po̍-o nyɔ̍ kli̍hgbɛ̍ dɛ̍.

⁹ Jɛ bo-o tòlo-ɛ ke, baaᵻá baaᵻ slè-ɛ ke, dlǔ gbǎnᵻ i̍ bla̍-a ke, telě tìh i̍ chɛ̀-ɛ laa̍, mɔ̀ sà i̍h sɔ̍n di̍i̍. Dɛ̍nu̍ɛ, pɔ̀ɔ̍pìe̍ dɛ̍ᵻ bo, i̍h-i po̍-o nyɔ̍ dɛ̍.

¹⁰ Nyɔ̍ ɔ̀ gblè-ae dɛ̍-ɛ i̍-ɛ, tù ɔ̍ slɛ̌n ìè gbɔ̍ᵻ sɔɔ̌n nu̍. Pò ɔ̍ se̍ àn wlu̍ i̍ wɔ̌n-ɛ, nɛ̀ mɔ̀ sà ɔ̍ sɔ̍nᵻ i̍.

¹¹ Dɛ̍ ìè-a juo-ɛ, nyɔ̍ kaɛn laa̍ nɛ̀ ɔ̍ blě wlùh sɔ̀n, iě ɔ̍ nu̍ gblɛ̍n sɔ̀ɛ̀n. Nɛ̀ ɔ̍ sà ɔ̍ chɛ̀ kɛ̀n wɛ̀.

Wlu̍ Pɔɔ bɔ̌ɛ-a doǒ-ɛ la

¹² Ti̍ ǎn mu̍-a Atema, àe̍e̍ Tekikɔ-a nyɔ̍ dě ìn we̍ dbo̍-ɛ, nɛ̀ ìn fɔ̀n ìè dě ǐn we̍ Nɛkapole wlɔ̀ di̍i̍ ji̍. Dɛ̍nu̍ɛ, ǐn po̍ ɛ̍ gbɔ̀ wɛ̀ iě-e wìla̍ wlè-e.

¹³ Sina ɔ̀ juo-a telě-ɛ, wìèlè ɔ̍ ke Apolo-a mu̍-a mu̍-ɛ, fɔ̀n dɛ̍ we̍, ìè ɛ̍ we̍ jě, u̍h iě dɛ̍ᵻ kli̍hgbɛ̍ u̍h nɛ-a blě ka̍-a blě.

¹⁴ Nɛ̀ ìn nu̍ ɛ̍ à nyɔ̍ laa̍ u̍h iě dɛ̍ chɛ̀ nu̍-ɛ we̍ fòè-ɛ cheǎn, wɛ̀ u̍h iě dɛ̍ᵻ kli̍hgbɛ̍ u̍h nɛ-a blě ka̍-a blě. Jɛ u̍h bɔ̌ dě pɔ̀ɔ̍pìe̍ kmɔ̌ di̍i̍ nɛ-ɛ.

¹⁵ Ùh kli̍hgbɛ̍ nɛ-a nɔ̌ ǐn we̍-ɛ, u̍h la̍ u̍h sà ìn nyinɔ̍ i̍. À ba̍ᵻ ke à nɛ-a dě wlùh gbaɛ-ɛ di̍i̍-ɛ, àɔ̀ sà u̍h nyinɔ̍ i̍ ke. Ǎn sà nǐ wɔ̍n Nyɔsoa-a blɛ iě dǒ mɔ̀ kli̍hgbɛ̍ we̍ nɛ.