Wlɛfeleseɔn 9 - Ku̍o̍ Delee 1999

Nyɔsoa-a ǐnchɔ̀-a m̀m̌ naɛ bla̍ ɛ̍ dɔ̍gbɛ̍

¹ Wɛ̀ ǐnchɔ̀-a m̀m̌ naɛ bla̍ ɛ̍ dɔ̍gbɛ̍, iě ǐn jě chǔhtlɛ̀n ɛ̍ blu̍ dě ja̍i̍, wɛ̀ ɛ̍ kà i̍ dǒ bloɔ̍. Iě ɛ̍ nyǐ-ɛ kàn biě-a kɔɛ̍n.

² Wɛ̀ ɛ̍ pɔ̀ni kàn biě laa̍ wɔ̍i̍n, iě daluh dɔu sɔ dě ɛ̍ di̍i̍ ka nɛ̍ gbà klaa-a daluh-ɛ. Wɛ̀ daluh ɛ̀ sɔ-a dě kàn biě laa̍ di̍i̍-ɛ, iě ɛ̍ nu̍ jlǔh ke dě ja̍i̍-a plìplì.

³ Iě gbaunᵻ sɔ dě daluh laa̍ di̍i̍ i̍h ji̍ nɔ̌ bloɔ̍, wɛ̀ i̍h nyǐ-ɛ gbǐh kɔn ba̍ kèǎnkèàn blě-a nɔ̌ bloɔ̍-ɛ.

⁴ Wɛ̀ i̍h sèàɛ̍-ɛ wlùh i̍h-i je̍e pei ke, tu̍ᵻ ke tù-dɛ̍ᵻ dɛ̍ nui. Jɛ nyɔ̍ ùh se̍-a Nyɔsoa-a juola blě dǒ u̍h jua̍i̍-ɛ, u̍h nɛ due bo i̍h iě dɛ̍ nui.

⁵ Gbaunᵻ se̍ wlu̍ kɛ̍n sà-ɛ i̍h iě u̍h dbǎ. Jɛ i̍h sà-ɛ wlu̍ kɛ̍n i̍h iě u̍h kà i̍ nu̍ dǒ chǔhᵻ m̀m̌ di̍i̍. Ka kèǎnkèàn-a su̍n-u nyɔ̍-a nu̍-a jua̍i̍ sàɛ̀-ɛ, kǎ u̍h iě jua̍i̍ sàɛ̀ nu̍.

⁶ Dǒ chǔhᵻ m̀m̌ laa̍ di̍i̍-ɛ, nyɔ̍ɔ-a mu̍ mɛ̌ɛ i̍ pɔ̀n. Jɛ u̍h se̍ ɛ̍ jě mu̍. Mɛ̌ɛ tɔ̌n-a mu̍ u̍h nu̍. Jɛ nɛ̀ ɛ̍ mu̍ u̍h we̍ i̍ ti̍ɛ̍ɛn.

⁷ Gbaunᵻá chɛ̀ i̍h ke soo̍bliᵻ ìh jě-a ti̍ wɛ̀ dǒ tu̍h fɔ̀n-ɛ we̍-ɛ wɔ̀ɛ. Ɛ̀ i̍h tèè-aɛ, ɛ̍ ke kòo̍ blawɛ̌ mu̍i we̍, iě i̍h-a jua̍a̍ᵻ ke wlɔ̀ nyi̍ɔ̍-a jua̍a̍ mu̍i we̍.

⁸ I̍h-a mǐ ke nynɔ̌gbaɔ-a mǐ mu̍i we̍, iě i̍h-a nynɛ̌ ke gbòlò-a nynɛ̌ mu̍i we̍.

⁹ Ìh ka̍n-ɛa dǒ i̍h wlì-ɛ, i̍h ke nɛ̍ne̍ɛ̍ wola̍ mu̍i we̍. Pò ìn wɔ̌n i̍h-a gbawaᵻá slɛ̀-ɛ, nɛ̀ ka nyɔ̍ jě soo̍bliᵻ dɔu blě kɛ̍n naɛdɛ̍ᵻ dǒ i̍h gbɔ̀ i̍ wɛ̀ i̍h-a gba̍ ple̍-ɛ tu̍h we̍-ɛ.

¹⁰ I̍h blě nyɔ̍ su̍n wɔ̀nᵻ ka kèǎnkèàn-a wɔ̀n-ɛ. I̍h-a wɔ̀nᵻ blě gbǐh i̍h iě nyɔ̍ i̍ poa dǒ chǔhᵻ m̀m̌ di̍i̍.

¹¹ I̍h blě blǔh baa ɛ̀ nɛ-a dǒ i̍h dlǔ-ɛ, ɛ̀ nu̍-a ǐnchɔ̀ ɛ̀ kɔn-a kàn biě wlu̍ i̍-ɛ. Ɛ̍ Iblu nynɛ̌ nu̍ Abadɔn iě ɛ̍ Klii nynɛ̌ nu̍ Apoleɔn.

¹² Chlě-a sàǐtòò naɛ sì wɛ̀, jɛ ɛ̍ sie-o chlě-a gbɔ̍ᵻ sɔɔ̌n ke̍ ìh iě ji̍.

Nyɔsoa-a ǐnchɔ̀-a mɛ̀o̍ naɛ bla̍ ɛ̍ dɔ̍gbɛ̍

¹³ Wɛ̀ Nyɔsoa-a ǐnchɔ̀-a mɛ̀o̍ naɛ bla̍ ɛ̍ dɔ̍gbɛ̍, iě ǐn wɔ̌n wlu̍ ɛ̍ sɔ dǒ gblǒ u̍h nui-a kòo̍ dǒ Nyɔsoa jǔ-ɛ, ɛ̍ kɔ̍lu̍hᵻ nyìɛ̍ kɛ̍n.

¹⁴ Wlu̍-a chɛ̀ la̍a̍ dě ǐnchɔ̀-a mɛ̀o̍ naɛ la ɛ̀ blě-a dɔ̍gbɛ̍-ɛ we̍, “Nyɔsoa-a ǐnchɔ̀ nyìɛ̍ ìh sa̍n-ɛa dě nǐ klaa nu̍-a Iufleti-ɛ wɔ̍i̍n-ɛ, sà i̍h sɔ̍n kɛ̍n.”

¹⁵ Wɛ̀ ǐnchɔ̀ nyìɛ̍ laa̍ ìh poe-ɛ gba̍a̍ dǒ àba̍ ke, weɛ̍ ke, chǔh ke, sɔ̀n-a taǐn laa̍ di̍i̍ i̍h iě blǔh-a fɔ̌ᵻ nɛ-a ta̍a̍n-ɛ, i̍h-a fɔ̌ due-a nyɔ̍ dbǎ. Wɛ̀ i̍h sà-ɛ sɔ̀n kɛ̍n.

¹⁶ Wɛ̀ nyɔ̍ sèàɛ̍ ǐn wlùh ka fledlǔ ùh-a naɛ-a soo̍bliᵻ kɛ̍n-ɛ u̍h nu̍-a poa-a kmɛ sɔɔ̌n-ɛ (200,000,000).

¹⁷ Dě ǎn se̍ mɔ̌ ja̍ di̍i̍-ɛ, ǐn jě soo̍bliᵻ ke i̍h-a kɛ̍n naɛ nyɔ̍. Nɛ̀ u̍h pa̍ nɛ̍ne̍ɛ̍ wola̍ᵻ nyɔ̍-a wlǎ-a wlì i̍-ɛ, i̍h sàni ka nɛ̍-ɛ, i̍h gbe-e ka sɔɔ̌ gbeu-ɛ. I̍h blě sɔ̌n-a jlǐh ke. Soo̍bliᵻá chɛ̀ i̍h-a dlǔᵻ ke gbòlò-a dlǔ mu̍i we̍, iě nɛ̍ ke daluh ke pɔ̀nɔ̌ sɔ dě i̍h wɔ̍ɔ̍n.

¹⁸ Nɛ̍ ke, daluh ke pɔ̀nɔ̌ ìh-a sɔ-a dě soo̍bliᵻá wɔ̍ɔ̍n-ɛ, nyɔ̍-a gbɔ̍ᵻ nɛ-a ta̍a̍n-ɛ i̍h dbǎ u̍h-a gbɔ̍ due.

¹⁹ Soo̍bliᵻá chɛ̀ i̍h-a gbǐh nɛ dě i̍h wɔ̍ɔ̍n ke dě i̍h-a wɔ̀nᵻ di̍i̍. I̍h-a wɔ̀nᵻ ke sɛ̍ mu̍i we̍, iě i̍h blě dlǔᵻ. I̍h-i bo i̍h-a nu̍ wɛ̀ i̍h-a tba̍ nyɔ̍ dɛ̍.

²⁰ Nyɔ̍ kli̍hgbɛ̍ ùh dlǐ dɛ̍ᵻ la i̍h se̍-a dbǎ-ɛ, u̍h se̍-e i̍ bǐi dǒ u̍h-a chɛ̀-a nu̍-dɛ̍ᵻ we̍. U̍h se̍ jeědih wɛɛ sà-a i̍ tǎli, ɛ̍ ke kwɛ̍i̍n gbo̍ᵻ u̍h nui-a kòo̍ ke, sebla̍ ke, tìɛ̀n ke, sɔɔ̌ ke tu̍ᵻɛ́ ke. I̍h se̍ i̍ jě-ɛ ke, na-a ke i̍ wɔ̌n-ɛ bɛ̌ɛ.

²¹ Iě u̍h wɔ̍-ɔ bǐi i̍ ke dǒ u̍h-a nyɔ̍ gbe̍ja̍a̍ po̍-ɛ ke, wù po̍-ɛ ke, gbǎn nu̍-ɛ ke jlǐ-ɛ we̍.