Wlɛfeleseɔn 7 - Ku̍o̍ Delee 1999

Nyɔsoa-a pòi̍nynuu̍ tùi-ɛ juola

¹ Ɛ̀ la ɛ̍ wɔ̀-a nɛ-ɛ, iě ǐn jě Nyɔsoa-a ǐnchɔ̀ nyìɛ̍, nɛ̀ i̍h nyna-ɛ bloa̍-a kɔ̍lu̍hᵻ nyìɛ̍ we̍ i̍. Nɛ̀ i̍h gbɛ̍n bloa̍-a poɔ nɛ-a nyìɛ̍-ɛ i̍, wɛ̀ poɔ je̍e ji̍ nɔ̌ bloa̍ kɛ̍n ɛ̍-ɛ je̍e jbǒ-a chɛ̀ ke tu̍-o-tu̍ ji̍-i.

² Wɛ̀ ǐn jě ǐnchɔ̀ dɛɛ ɛ̍ sɔ dě tà jlǔh-a wlǔh-ia kwlǎ-a. Nɛ̀ ɛ̍ blě dɛ̍ ɛ̀ tù-a nyɔ̍ kmɔ̌ nɛ Nyɔsoa-a juola pùn-ɛ kwa̍. Iě ɛ̍ wǐ ɛ̍ dǎ ǐnchɔ̀ nyìɛ̍ ìh Nyɔsoa nyǐ-a gbǐh ìh iě-a bloa̍ ke jbǒ kɔ̌ɛ-ɛ.

³ Ɛ̍ la̍a̍, “Mɔ̀ bɔ̌ bloa̍ ke, jbǒ ke tu̍ᵻ dɛ̍ nui-ɛ te̍e̍ wɛ̀ à iě à Nyɔsoa-a pòi̍nynuu̍-a jua̍a̍ᵻ juola tù-ɛ wɔ̀.”

⁴ Wɛ̀ nyɔ̍ tìèwe̍ ùh tùi-a Nyɔsoa-a juola pùn-ɛ, iě ǐn wɔ̌n ka u̍h tìè-aɛ. U̍h nu̍ wlǔ-a kmɛ due kwela nyìɛ̍ jɔ̌ nyìɛ̍ (144,000). U̍h kli̍hgbɛ̍ u̍h sɔ dě Eslɔɛ-a chɛ̌tu-a pùè jɔ̌ sɔɔ̌n i̍.

⁵ Wlǔ-a pùè jɔ̌ sɔɔ̌n (12,000) sɔ dě Juuda-a chɛǐ, iě u̍h tùi-ɛ juola. Wɛ̀ wlǔ-a pùè jɔ̌ sɔɔ̌n (12,000) sɔ dě Wlubɛn-a chɛǐ. Iě wlǔ-a pùè jɔ̌ sɔɔ̌n (12,000) sɔ dě Kaa-a chɛǐ.

⁶ Wɛ̀ wlǔ-a pùè jɔ̌ sɔɔ̌n (12,000) sɔ dě Asa-a chɛǐ, iě wlǔ-a pùè jɔ̌ sɔɔ̌n (12,000) sɔ dě Natali-a chɛǐ. Wɛ̀ wlǔ-a pùè jɔ̌ sɔɔ̌n (12,000) sɔ dě Manasɛ-a chɛǐ.

⁷ Iě wlǔ-a pùè jɔ̌ sɔɔ̌n (12,000) sɔ dě Simiɔ-a chɛǐ, wɛ̀ wlǔ-a pùè jɔ̌ sɔɔ̌n (12,000) sɔ dě Liifaɛ-a chɛǐ. Iě wlǔ-a pùè jɔ̌ sɔɔ̌n (12,000) sɔ dě Ɛseka-a chɛǐ.

⁸ Wɛ̀ wlǔ-a pùè jɔ̌ sɔɔ̌n (12,000) sɔ dě Sɛɛbeloun-a chɛǐ, iě wlǔ-a pùè jɔ̌ sɔɔ̌n (12,000) sɔ dě Josɛ-a chɛǐ. Wɛ̀ wlǔ-a pùè jɔ̌ sɔɔ̌n (12,000) sɔ dě Bɛnyima-a chɛǐ.

Nyɔ̍ tlùgbei̍ nɛ dě ja̍i̍wlɔ̀

⁹ Ɛ̀ la ɛ̍ wɔ̀-a nɛ-ɛ, ǐn gbɛ̀n-aeɛ, wɛ̀ ǐn jě nyɔ̍ tlùgbei̍ ùh nyɔ̍ se̍-a slè-ɛ bɛ̌ɛ-ɛ. U̍h sɔ dě dakɔ̍ kli̍hgbɛ̍ ke chɛ̌tu kli̍hgbɛ̍ ke bloa̍ kli̍hgbɛ̍ di̍i̍ i̍. Nɛ̀ u̍h nyna-ɛ i̍ dǒ nynɛ̌ gbalǎ ke Blawɛ̌ Jǔ jǔ. Nɛ̀ u̍h pa̍ plɛ̀i̍ plǔᵻ i̍, iě u̍h blě ju̍hᵻ wlɔ̍nᵻ kwa̍ i̍.

¹⁰ Wɛ̀ u̍h-a wǐi i̍, u̍h la̍a̍, “À Nyɔsoa ɔ̀ tè-a i̍ dǒ nynɛ̌ gbalǎ kɛ̍n-ɛ ke Blawɛ̌ Jǔ sèìe àɔ̀.”

¹¹ Iě Nyɔsoa-a ǐnchɔ̀ kli̍hgbɛ̍ dlɛ̌ nynɛ̌ gbalǎ ke, nyɔ̍ klaaᵻ ke kmɔ̌ nɛ dɛ̍ᵻ nyìɛ̍ laa̍. Wɛ̀ u̍h kèàɛ i̍ dǒ nynɛ̌ gbalǎ jǔ iě u̍h sà Nyɔsoa wɛɛ.

¹² U̍h la̍a̍, “Kǎ ɛ̍-ɛ nɛ. Tìhwe̍ po̍-ɛ ke, tìh-a i̍ bɛ̌-ɛ ke, flɔ̍nwlùh ke, tlɔ̌ po̍-ɛ ke, ja̍ tè-ɛ ke, gbǐh nɛ-ɛ ke kmu-ɛ kɔn dǒ à Nyɔsoa we̍ nɔ̌ kmɔ̌-a kmɔ̌. Kǎ ɛ̍-ɛ nɛ.”

¹³ Wɛ̀ nyɔ̍ klaa due tèle ǐn i̍. Ɔ̍ la̍a̍, “Nyɔ̍ la ùh pa̍-a plɛ̀i̍ plǔᵻɛ́, u̍h-a nynɛ̌-ɛ ɛ? Tàwe̍ u̍h sɔ-ɔ ɛ?”

¹⁴ Wɛ̀ na̍a̍, “Nyɔ̍ klaa, ǐn se̍ u̍h-a dɛ̍ i̍ juo. Mɔ̀ bo ɔ̀ juo u̍h.” Iě ɔ̍ la̍a̍ dě ǐn we̍, “Nyɔ̍ la ùh jii-a dě jua̍i̍ sàɛ̀ klaa di̍i̍-ɛ u̍hɔ̍ɔ̍ bo. U̍h wɔ̍lɔ u̍h-a plɛ̀i̍ᵻ wɛ̀, iě u̍h plǔ i̍ i̍h dǒ Blawɛ̌ Jǔ-a nymɔ̍ we̍.

¹⁵ Ɛ̍ kɔn u̍h nɛ dǒ Nyɔsoa-a nynɛ̌ gbalǎ jǔ, wɛ̀ u̍h-a dbee ɔ̍ jǔ wlù ke sɔ̀n dě ɔ̍ slaǎ sà gbò sɔ̀n. Ɔ̀ tè-a i̍ dǒ nynɛ̌ gbalǎ kɛ̍n-ɛ, ɔ̍ mu̍ u̍h we̍ nɛ wɛ̀ ɔ̍ iě u̍h kɛ̍n kaɛn.

¹⁶ Mɔ̌ ke nǐ nǎ tɔ̌n se̍ u̍h nu̍ mu̍ dɛ kleǐnklein. Nɛ̀ jlǔh ke fuun se̍ u̍h nu̍ mu̍ ke.

¹⁷ Dɛ̍nu̍ɛ, Blawɛ̌ Jǔ ɔ̀ nɛ-a dǒ nynɛ̌ gbalǎ-a wèa̍-ɛ, ɔ̍ bo ɔ̀ mu̍ u̍h jlǐhɛ̍ we̍ tù ka blawɛ̌ we̍ i̍ gbɛ̀n nyɔ̍-ɛ. Ɔ̍ mu̍ u̍h sɔ̍nᵻ we̍ i̍ naɛ, wɛ̀ ɔ̍ iě u̍h dě kao̍dlu ɛ̀ nyǐ-a nyɔ̍ feɛ-ɛ we̍ gba̍. Wɛ̀ Nyɔsoa iě u̍h mǐtɛɛn kli̍hgbɛ̍ jlǐh i̍ slǎn.”