Wlɛfeleseɔn 6 - Ku̍o̍ Delee 1999

Blawɛ̌ Jǔ wa̍ slu̍ mɛ̀o̍

¹ Wɛ̀ ǐn jě Blawɛ̌ Jǔ iě ɔ̍ wa̍ slu̍ mɛ̀sɔɔ̌n laa̍ i̍h-a sàǐtòò naɛ dǒ chlǐh-dɛ̍-a gbo̍lo̍ laa̍ wɔ̍i̍n. Iě ǐn wɔ̌n kmɔ̌ nɛ dɛ̍ᵻ nyìɛ̍ laa̍ i̍h-a due-a wlu̍ ka tɛ̀n plǎn-ɛ. Ɛ̍ la̍a̍, “Ji̍.”

² Ǐn gbɛ̀n-a deě-ɛ, wɛ̀ ǐn jě soo̍bli plǔ. Nɛ̀ ɔ̀ naɛ-a dǒ ɛ̍ kɛ̍n-ɛ ɔ̍ blě plu̍h kwa̍. Wɛ̀ ɔ̍ tèè-ɛ blawɛ̌. Ɔ̍ nu̍ tu̍h du̍ nyɔ̍ iě ɔ̍ mu̍ ɔ̍ iě tu̍h du̍.

³ Wɛ̀ Blawɛ̌ Jǔ laa̍ ɔ̍ wa̍ slu̍-a sɔɔ̌n naɛ. Iě ǐn wɔ̌n kmɔ̌ nɛ dɛ̍ᵻá sɔɔ̌n naɛ-a wlu̍. Ɛ̍ la̍a̍, “Ji̍.”

⁴ Wɛ̀ soo̍bli dɛɛ ji̍. Soo̍bli-a chɛ̀ ɛ̍ sàni-i. Ɔ̀ naɛ-a dǒ ɛ̍ kɛ̍n-ɛ, iě ɔ̍ sà-ɛ wlu̍ kɛ̍n ɔ̍ iě kmɔ̌ i̍ gbe̍ɛ̍ɛn-ɛ nɔ̌ kmɔ̌ we̍ sà. Wɛ̀ nyɔ̍ɔ iě we̍ dbǎ-ɛ. Iě plàn chlɛ̀n klaa tù-iɛ dě ɔ̍ kwa̍a̍.

⁵ Wɛ̀ Blawɛ̌ Jǔ wa̍ slu̍-a ta̍a̍n naɛ. Iě ǐn wɔ̌n kmɔ̌ nɛ dɛ̍ᵻá ta̍a̍n naɛ-a wlu̍. Ɛ̍ la̍a̍, “Ji̍.” Ǐn gbɛ̀n-a deě-ɛ, wɛ̀ ǐn jě soo̍bli gbeu. Ɔ̀ naɛ-a dǒ ɛ̍ kɛ̍n-ɛ, ɔ̍ blě dbee-dɛ̍ kwa̍.

⁶ Wɛ̀ ǐn wɔ̌n dɛ̍-a wlu̍ ka nyi̍ɔ̍-a wlu̍ dě kmɔ̌ nɛ dɛ̍ᵻ nyìɛ̍ laa̍ nynɛ̌-ɛ. Ɛ̍ la̍a̍, “Kɛnɛ̌ bɔlɔ-a gbo̍ juwɛ due dǒ weɛ̍ gbàǐ-a pɛ̌ɛ la we̍. Nɛ̀ baale bɔlɔᵻá gbo̍ᵻ plìh ta̍a̍n dǒ weɛ̍ gbàǐ-a pɛ̌ɛ la we̍. Jɛ bɔ̌ ɔle-tu̍ᵻá chlǎn ke nmɔ̍ jii̍ nyni-ɛ.”

⁷ Wɛ̀ Blawɛ̌ Jǔ wa̍ slu̍-a nyìɛ̍ naɛ. Iě ǐn wɔ̌n kmɔ̌ nɛ dɛ̍ᵻá nyìɛ̍ naɛ-a wlu̍. Ɛ̍ la̍a̍, “Ji̍.”

⁸ Ǐn gbɛ̀n-a deě-ɛ, iě ǐn jě soo̍bli ɛ̀ blě-a dɔgbɔ ku̍-ɛ. Ɛ̀ naɛ-a dǒ ɛ̍ kɛ̍n-ɛ, ɛ̍ nynɛ̌ nu̍ Mɛ̌ɛ, iě ɛ̀ Kɔn-a Mɛ̌-nyɔ̍ Wlu̍ I̍-ɛ tè i̍ dǒ ɛ̍ de̍e̍. Wɛ̀ i̍h nyǐ-ɛ tùn i̍h iě bloa̍-a fɔ̌ᵻ nɛ-a nyìɛ̍-ɛ, i̍h-a due wlu̍ i̍ kɔn. Wɛ̀ i̍h iě nyɔ̍ plàn chlɛ̀n ke, mɔ̌ ke, wɛ̌ᵻ ke, kwlǎ nmi̍i̍ i̍ dbǎ-ɛ.

⁹ Wɛ̀ Blawɛ̌ Jǔ wa̍ slu̍-a m̀m̌ naɛ. Iě ǐn jě nyɔ̍ɔ-a sùù dǒ slaǎ sà-ɛ gblǒ sɔ̀n, ùh u̍h tù-a Nyɔsoa-a wlu̍ ke ɛ̍ sàànsi̍i̍h nu̍ tìh u̍h dbǎ-aɛ.

¹⁰ Wɛ̀ u̍h we̍le, u̍h la̍a̍, “Gbǐh Kɔn Joi mɔ̀ wɛ̀-a nɛi̍ wɛ̀ ìn nu̍-a gblangbai̍ nyɔ̍-ɛ, ti̍we̍ àn mu̍ nyɔ̍ nɛ-a dě kmɔ̌ we̍-ɛ kɛ̀n sà wɛ̀ ìè u̍h kàn gbɛ̍n à dbǎ-a tìh ɛ?”

¹¹ Nɛ̀ jɔ-ɛ ɔ̍ nyǐ-ɛ plɛ̀i̍ plǔ. Iě u̍h sèàɛ̍-ɛ wlùh u̍h iě fɔ ke̍ te̍e̍, wɛ̀ ka u̍h nu̍-a dbǎ-ɛɛ iě u̍h ba̍ᵻ pòi̍nynuu̍ ke de̍di̍i̍ᵻ ùh-a mu̍-a dbǎ-ɛ ke-ɛ, wɛ̀ u̍h-a tìɛ̀n iě tba̍.

¹² Wɛ̀ Blawɛ̌ Jǔ wa̍ slu̍-a mɛ̀o̍ naɛ. Ǐn gbɛ̀n-a deě-ɛ, nɛ̀ wlù poɔ ɛ̀ ku̍-a wɔ̍n-ɛ, ɛ̍ ji̍-i. Iě jlǔh gbe jlu̍jlu̍ ka puo-ɛ, wɛ̀ chǔh sàni ka nymɔ̍-ɛ.

¹³ Wɛ̀ chǔhtlɛ̀n kèàɛ i̍ dǒ bloɔ̍ ka tìlèè poɔ-a ji̍ wɛ̀ de̍ bɔ̌ɛ tu̍ᵻá blu̍ buǒᵻ ja̍ i̍-ɛ.

¹⁴ Iě ja̍u̍n mǎ-ɛ dě ja̍i̍ i̍ ka nyɔ̍ feǎ chlǐh-dɛ̍ gbo̍lo̍-ɛ. Wɛ̀ tlu̍hᵻ ke tbǒᵻ kli̍hgbɛ̍-a wlǔh tèla̍-a.

¹⁵ Iě blǔh baaᵻ ke, dlǔtuᵻ ke, fledlǔ-a nyɔ̍ klaaᵻ ke, pàn-nyɔ̍ ke, kmu-nyɔ̍ ke, kèi̍ᵻ ke, de̍e̍ i̍ flɔn nyɔ̍ ke nyɔ̍ kli̍hgbɛ̍ sìle u̍h-a chɛ̀ wɔ̍ᵻ di̍i̍ i̍ ke tlu̍h-a sɔɔ̌ᵻ sɔ̀n i̍.

¹⁶ Iě u̍h-a we̍le tlu̍hᵻ ke sɔɔ̌ᵻ, u̍h la̍a̍, “Mɔ̀ gbǎ à kɛ̍n, wɛ̀ mɔ̀ iě àɔ̀ ɔ̀ tè-a i̍ dǒ nynɛ̌ gbalǎ kɛ̍n-ɛ jii̍ sìle, ɛ̍ ke Blawɛ̌ Jǔ-a nyɔ̍ kàn gbɛ̍n-ɛ ke.

¹⁷ Dɛ̍nu̍ɛ, u̍h-a jlu̍h-a wɔ̍n ku̍ weɛ̍ ɛ̀ nu̍-a u̍h-a nyɔ̍ kàn gbɛ̍n weɛ̍-ɛ nyni̍-o wɛ̀. Nɛ̀ nyɔ̍ se̍-o tàn-a bɛ̌ɛ dɛ.”