Wlɛfeleseɔn 5 - Ku̍o̍ Delee 1999

Blawɛ̌ Jǔ dǔ Nyɔsoa chlǐh-dɛ̍-a gbo̍lo̍

¹ Wɛ̀ ǐn jě chlǐh-dɛ̍-a gbo̍lo̍ dě ɔ̀ tè-a i̍ dǒ nynɛ̌ gbalǎ kɛ̍n-ɛ ɔ̍ di̍na̍ kwa̍a̍. Nɛ̀ ɛ̍ fɔ̌ᵻ kli̍hgbɛ̍ chlǐh-ɛ kɛ̍n i̍, iě ɛ̍ nu̍ slu̍ wɔ̍i̍n poe-ɛ gbɔ̍ᵻ mɛ̀sɔɔ̌n.

² Wɛ̀ ǐn jě Nyɔsoa-a kmu-u ǐnchɔ̀, nɛ̀ ɛ̍ we̍le-e. Ɛ̍ la̍a̍, “Nyɔ̍ bo ɔ̀ nɛ slu̍ la wa̍ ka ɔ̀ iě chlǐh-dɛ̍-a gbo̍lo̍ la pɔ̀ni ɛ?”

³ Jɛ ɛ̍ we̍ nyɔ̍ se̍ dě ja̍i̍wlɔ̀ ke, nɔ̌ kmɔ̌ ke, dě blǔh sɔ̀n nɛ ɔ̍ iě chlǐh-dɛ̍ laa̍ wɔ̍i̍n pɔ̀ni wɛ̀ ɔ̍ iě dě ɛ̍ di̍i̍ gbɛ̀n.

⁴ Wɛ̀ ǐn fìn dɛ̍blɔ, dɛ̍nu̍ɛ, nyɔ̍ ɔ̀ nɛ-a ɛ̍ ka̍ ɔ̀ iě-a chlǐh-dɛ̍-a gbo̍lo̍ la wɔ̍i̍n pɔ̀ni wɛ̀ ɔ̍ iě-a dě ɛ̍ di̍i̍ gbɛ̀n-ɛ, ɔ̍ se̍ nɛ.

⁵ Wɛ̀ nyɔ̍ klaa due la̍a̍ dě ǐn we̍, “Bɔ̌ fìn-ɛ. Gbɛ̀n-e, gbòlò sɔ-a dě Juuda-a chɛǐ-ɛ, ɔ̀ nu̍-a Depe-a tloemlai-a klaa-ɛ, ɔ̍ du̍ tu̍h wɛ̀. Ɔ̍ bɛ̌ɛ chlǐh-dɛ̍-a gbo̍lo̍ laa̍ ɛ̍ slu̍ mɛ̀sɔɔ̌n laa̍ wa̍-a ɔ̍ iě ɛ̍ wɔ̍i̍n pɔ̀ni.”

⁶ Wɛ̀ ǐn jě Blawɛ̌ Jǔ nɛ̀ ɔ̍ nyna i̍ dǒ nynɛ̌ gbalǎ-a wèa̍. Iě kmɔ̌ nɛ dɛ̍ᵻ nyìɛ̍ ke nyɔ̍ klaaᵻ dlɛ̌ ɔ̍. Nɛ̀ ka nyɔ̍ dbǎ dɛ̍-ɛ, nɛ̀ kǎ ɔ̍ nɛ. Ɔ̍ blě gbɔ̀nᵻ mɛ̀sɔɔ̌n ke jlǐh mɛ̀sɔɔ̌n. Jlǐh mɛ̀sɔɔ̌n laa̍ bo ìh nu̍-a sùù mɛ̀sɔɔ̌n ìh-a dbee-a Nyɔsoa jǔ ìh dbo̍-ea kmɔ̌ kli̍hgbɛ̍ kɛ̍n i̍-ɛ.

⁷ Wɛ̀ Blawɛ̌ Jǔ mu̍, iě ɔ̍ dǔ chlǐh-dɛ̍-a gbo̍lo̍-o dě ɔ̀ tè-a i̍ dǒ nynɛ̌ gbalǎ kɛ̍n-ɛ di̍na̍ kwa̍a̍.

⁸ Ɔ̍ wɔ̀-a chlǐh-dɛ̍-a gbo̍lo̍ laa̍ dǔ-ɛ, iě kmɔ̌ nɛ dɛ̍ᵻ nyìɛ̍ ke nyɔ̍ klaaᵻá kwela sɔɔ̌n jɔ̌ nyìɛ̍ laa̍ kèàɛ i̍ dǒ Blawɛ̌ Jǔ-a chɛ̀ jǔ. Jɔ-ɛ nɛ̀ ɔ̍ blě kain kwa̍, iě u̍h blě kòo̍ boo̍ᵻ kwa̍ i̍ ìh fɔ̍n-ɔ nɔ̌-dɛ̍ᵻ jǐ-a dě di̍i̍-ɛ. Nɔ̌-dɛ̍ᵻ laa̍ bo ìh nu̍ Nyɔsoa nyɔ̍-a ba̍le wlu̍.

⁹ Wɛ̀ u̍h ble̍ duǐh delee, u̍h la̍a̍, “Ìn nɛ ɛ̍ ka̍ ìè chlǐh-dɛ̍-a gbo̍lo̍ laa̍ dǔ, wɛ̀ ìè ɛ̍ slu̍ wa̍ ìè ɛ̍ wɔ̍i̍n pɔ̀ni. Dɛ̍nu̍ɛ, ìn dbǎ-ɛɛ wɛ̀ àn nymɔ̍ tɛ̀n nyɔ̍ ùh sɔ-a chɛ̌tu ke, bloa̍ ke dakɔ̍ kli̍hgbɛ̍ kɛ̍n i̍-ɛ, u̍h iě Nyɔsoa-a nyɔ̍ nu̍.

¹⁰ Ìn nu̍ u̍h kmɔ̌ wlu̍ i̍ kɔn nyɔ̍ ke à Nyɔsoa-a slaǎ sà nyɔ̍ we̍i̍. Wɛ̀ u̍h iě nyɔ̍-a wlu̍ kwa̍ blě nɔ̌ bloɔ̍.”

¹¹ Wɛ̀ ǐn gbɛ̀n-e dɛ, iě ǐn wɔ̌n Nyɔsoa-a ǐnchɔ̀-a wlu̍. I̍h bɛ̌ɛ i̍h iě wlǔ-a wlǔ-a poa nu̍. I̍h dlɛ̌ nynɛ̌ gbalǎ ke, kmɔ̌ nɛ dɛ̍ᵻ nyìɛ̍ ke nyɔ̍ klaaᵻ laa̍.

¹² Wɛ̀ i̍h-a wǐi i̍ i̍h-a ble̍. I̍h la̍a̍, “Blawɛ̌ Jǔ ɔ̀ dbǎ-aɛ, ɔ̍ nɛ tìhwe̍ po̍ ka̍. Ɔ̍ gbǐh nɛ-ɛ ke, pàn-a ke, flɔ̍nwlùh ke, kmu-ɛ ke, ja̍ tè-ɛ ke tìh-a i̍ bɛ̌-ɛ nɛ tìhwe̍ po̍ ka̍.”

¹³ Wɛ̀ kmɔ̌ nɛ dɛ̍ᵻ kli̍hgbɛ̍ nɛ-a dě ja̍i̍wlɔ̀ ke, nɔ̌ bloɔ̍ ke, dě blǔh sɔ̀n ke dě jbǒ kɛ̍n-ɛ, ɛ̍ ke kmɔ̌ nɛ dɛ̍ᵻ diih kli̍hgbɛ̍ ke dǒ ǐn wɔ̌n-ɛ i̍h-a ble̍-e wlu̍. I̍h la̍a̍, “Nyɔ̍ ɔ̀ tè-a dǒ nynɛ̌ gbalǎ kɛ̍n i̍-ɛ, ɔ̍ ke Blawɛ̌ Jǔ ke, tìhwe̍ po̍-ɛ ke, ja̍ tè-ɛ ke, tìh-a i̍ bɛ̌-ɛ ke kmu-ɛ kɔn dǒ u̍h we̍ nɔ̌ kmɔ̌-a kmɔ̌.”

¹⁴ Wɛ̀ kmɔ̌ nɛ dɛ̍ᵻ nyìɛ̍ laa̍ i̍h la̍a̍, “Kǎ ɛ̍-ɛ nɛ.” Wɛ̀ nyɔ̍ klaaᵻ laa̍ u̍h kèàɛ i̍ iě u̍h sà Nyɔsoa wɛɛ.