Wlɛfeleseɔn 22 - Ku̍o̍ Delee 1999

¹ Wɛ̀ ǐnchɔ̀ toe ǐn nǐ klaa ɛ̀ nyǐ-a nyɔ̍ feɛ-ɛ, nɛ̀ ɛ̍ sɔ-ɛɛ dě Nyɔsoa ke Blawɛ̌ Jǔ-a nynɛ̌ gbalǎ we̍. Ɛ̍ nɛ wlihwlǐh ka klàsi̍-ɛ.

² Ɛ̍ jii dǒ wìè nɛ-a dǒ wlɔ̀-ɛ ɛ̍ wèa̍. Nǐ klaa-a chɛ̀ ɛ̍ fɔ̌ jɛ-ɛ nɛ̀ tu̍ ɛ̀ nyǐ-a nyɔ̍ feɛ-ɛ nyna doǒ i̍. I̍h-a nu̍ tlo-ɛa pùè jɔ̌ sɔɔ̌n dǒ sɔ̀n di̍i̍. I̍h-a nu̍ tlo-ɛa due dǒ chǔh di̍i̍. I̍h-a wlɔ̍nᵻ kɔn dǒ bloa̍ kli̍hgbɛ̍ pǔh-iɛ we̍.

³ Dɛ̍ ɛ̀ Nyɔsoa po̍-a wlu̍we̍i̍-ɛ, ɛ̍ se̍ dǒ wlɔ̀ laa̍ di̍i̍ nɛ mu̍. Nyɔsoa ke Blawɛ̌ Jǔ-a nynɛ̌ gbalǎ bo ɛ̀ mu̍ dǒ wlɔ̀ laa̍ di̍i̍ nɛ, wɛ̀ ɔ̍ pòi̍nynuu̍ iě ɔ̍ wɛɛ sà.

⁴ U̍h-a mu̍ ɔ̍ jua̍a̍ jě, wɛ̀ ɔ̍ nynɛ̌ iě chlǐh-ɛ dǒ u̍h jua̍i̍.

⁵ Wlù se̍-e wɔ̀-ɛ mu̍ dɛ. U̍h se̍ chlǎn nape̍ àe̍e̍ jlǔh i̍ pɔ̀n mu̍, dɛ̍nu̍ɛ, Joi Nyɔsoa-a mu̍ u̍h-a sɔ̀npli nu̍, wɛ̀ u̍h iě nyɔ̍-a wlu̍ kwa̍ blě nɔ̌ kmɔ̌-a kmɔ̌.

Jusu-a mu̍ de̍ ji̍ suei̍

⁶ Wɛ̀ ǐnchɔ̀ la̍a̍ dě ǐn we̍, “Wlu̍ la i̍h nu̍ gblangbai̍ ke wlì tè dɛ̍. Joi Nyɔsoa ɔ̀ nyǐ-a ɔ̍ tu̍owli po̍ nyɔ̍ ɔ̍ Sùù-ɛ, ɔ̍ bo ɔ̀ dbo̍ ɔ̍ ǐnchɔ̀ ɛ̍ iě ɔ̍ pòi̍nynuu̍ dɛ̍ ɛ̀ mu̍-a nɛ suei̍-ɛ toe.”

⁷ Jusu la̍a̍, “Nɛ̀ɛ̍, ǎn mu̍ ji̍ suei̍. Chlǐh-dɛ̍ la dɛ̍ ɛ̍ sà-a ìh-a nɛ-a ke jih-a mu̍-a nɛ dě nya̍-ɛ, nyɔ̍ ùh gbɛ̍n-a ɛ̍ i̍-ɛ, nɛ̀ u̍h nmɔ i̍.”

⁸ Mɔ̍ Chɔɔn, mɔ̍ bo ɔ̀ wɔ̌n ìh la iě ǐn jě i̍h. Ti̍ ǐn wɔ̌n-a i̍h iě ǐn jě-a i̍h-ɛ, wɛ̀ Nyɔsoa-a ǐnchɔ̀ ɛ̀ toe-a i̍h m-ɛ, iě ǐn kà i̍ dǒ ɛ̍ jǔ iě ɛ̍ wɛɛ sà.

⁹ Jɛ ɛ̍ la̍a̍ dě ǐn we̍, “Bɔ̌ laǎn nu̍-ɛ. Mɔ̍ pòi̍ju ke ka ìn ke ìn de̍di̍i̍ᵻ nu̍-a pòi̍nynuu̍ ke Nyɔsoa-a tu̍owli po̍ nyɔ̍ ke chlǐh-dɛ̍ la ɛ̍ wlu̍ i̍ gbɛ̍n nyɔ̍ nu̍-ɛɛ, kǎ ǐn nɛ ke. Nyɔsoa bo ìè wɛɛ sà.”

¹⁰ Wɛ̀ ɛ̍ la̍a̍ dě ǐn we̍, “Bɔ̌ dɛ̍ ɛ̀ chlǐh-dɛ̍ la ɛ̍ sà-a ìh-a nɛ-a ke jih-a mu̍-a nɛ dě nya̍-ɛ sìle-ɛ, dɛ̍nu̍ɛ, ti̍ kɔǎn we̍ wɛ̀.

¹¹ Bɔ̌ dɛ̍ᵻ sɔ̀nᵻ nu̍ nyɔ̍ gba̍ u̍h-a dɛ̍ᵻ sɔ̀nᵻ dluwe̍ i̍, iě sììjii̍ nu̍ nyɔ̍ iě u̍h-a sììjii̍ nu̍-ɛ dluwe̍ i̍ gba̍. Nɛ̀ i̍ slɛ̌-nyɔ̍ gba̍ u̍h-a i̍ slɛ̌-ɛ dɛ̍ᵻ dluwe̍ i̍, iě nɛi̍ wɛ̀ nyɔ̍ iě u̍h-a nɛi̍ wɛ̀-ɛ dluwe̍ i̍ gba̍.”

¹² Jusu la̍a̍, “Nɛ̀ɛ̍, ǎn mu̍ ji̍ suei̍. Nɛ̀ ǎn mu̍ pɛ̌ɛ la ja, wɛ̀ nyɔ̍ jɔ-ɛ, iě ɔ̍ pɛ̌ɛ dǒ dɛ̍ ɔ̍ nu̍-aɛ we̍.

¹³ Mɔ̍ bo ɔ̀ nu̍ dɛ̍ᵻ kli̍hgbɛ̍-a Gbɔ̀ Tè-ɛ ke i̍h-a Dlǔ I̍ Chlà-a. Mɔ̍ bo ɔ̀ nu̍ sàǐtòò nyɔ̍ ke bɔ̌ɛ-o nyɔ̍. Mɔ̍ bo ɔ̀ nu̍ de̍ ke nya̍.”

¹⁴ Nyɔ̍ ùh wɔ̍lɔ-a u̍h-a dɛ̍wlo̍o̍ᵻ pihpǐh-ɛ, nɛ̀ u̍h nmɔ i̍. U̍h-a mu̍ dǒ wlɔ̀ laa̍ di̍i̍ i̍ sǐ ka̍ nɛ dǒ saǎn-a pa̍la̍ wɔ̍nᵻ laa̍ di̍i̍ jii-ɛ we̍, wɛ̀ u̍h iě tu̍ ɛ̀ nyǐ-a nyɔ̍ feɛ-ɛ ɛ̍ buǒ di̍.

¹⁵ Sììjii̍ nu̍ nyɔ̍ ke, wù po̍ nyɔ̍ ke, gbǎn nu̍ nyɔ̍ ke, nyɔ̍ gbe̍ja̍a̍ poe nyɔ̍ ke, kwɛ̍i̍n gbo̍ᵻ wɛɛ sà nyɔ̍ ke nyɔ̍ kli̍hgbɛ̍ ùh jbɛɛ-a si̍h tmɔ̌ dɛɛ ma̍u̍-ɛ, u̍h bo ùh-a mu̍ sɔ̀n sie.

¹⁶ “Mɔ̍ Jusu, mɔ̍ bo ɔ̀ dbo̍ ǎn ǐnchɔ̀ dě mɔ̀ we̍ ɛ̍ iě wlu̍ la bla̍ dě chɔchi̍h nyɔ̍ we̍. Mɔ̍ Depe-a jǔ, ǐn sɔ dě ɔ̍ chɛǐ, iě ǐn wɔ̀ chǔhtlɛ̀n ɛ̀ fa̍n-a chàa̍n klàɛ̍we̍-ɛ.”

¹⁷ Nyɔsoa-a Sùù ke Nynɔ̌ Delee la̍a̍ dě Jusu we̍, “Ji̍.” Nɛ̀ nyɔ̍ jɔ wɔ̌n-a ɛ̀ la-ɛ, nɛ̀ ɔ̍ la̍a̍ dě Jusu we̍ ke, “Ji̍.” Nyɔ̍ ɔ̀ nǐ nǎ tɔ̌n-a nu̍-aɛ, ɔ̍ ji̍. Nɛ̀ nyɔ̍ jɔ pɔ̀n-a nǐ ɛ̀ nyǐ-a nyɔ̍ feɛ-ɛ, ɔ̍ dǔ ɛ̍-ɛ bu̍ɛ̍i̍.

Bɔ̌ɛ-o slɛ̌n ke tɔ̀ma̍a̍ wlu̍ la

¹⁸ Mɔ̍ Chɔɔn, ǎn gbòɛ̀ɛ̀ nyɔ̍ kli̍hgbɛ̍ ùh wɔ̌n-a dɛ̍ ɛ̀ chlǐh-dɛ̍ la ɛ̍ sà-a ìh-a nɛ-a ke jih-a mu̍-a nɛ dě nya̍-ɛ. Pò nyɔ̍-o-nyɔ̍ po̍ i̍h dɛ̍ kɛ̍n-ɛ, nɛ̀ dlǐ dɛ̍ᵻ ìh kɔn tìh sà-ɛa nɔ̌ chlǐh-dɛ̍ la di̍i̍-ɛ, nɛ̀ i̍hɔ̍ɔ̍ bo Nyɔsoa-a mu̍ ɔ̍ kàn gbɛ̍n-ɛ.

¹⁹ Nɛ̀ pò nyɔ̍-o-nyɔ̍ sà dɛ̍ ɛ̀ chlǐh-dɛ̍ la ɛ̍ sà-a ìh-a nɛ-a ke jih-a mu̍-a nɛ dě nya̍-ɛ dɛ̍ kɛ̍n-ɛ, nɛ̀ ɔ̍ se̍ tu̍ ɛ̀ nyǐ-a nyɔ̍ feɛ-ɛ ɛ̍ buǒ di̍ ka̍ nɛ. Nɛ̀ ɔ̍ se̍ dǒ wlɔ̀ ɛ̀ kɔn-a dǒ Nyɔsoa we̍ ɛ̀ kɔn tìh chlǐh-dɛ̍ la ɛ̍ sà-ɛ di̍i̍ i̍ sǐ ka̍ nɛ ke.

²⁰ Jusu ɔ̀ bla̍-a ìh la-ɛ, ɔ̍ la̍a̍, “I̍i̍n, ǎn ji̍-i suei̍.” Kǎ ɛ̍-ɛ nɛ. Ji̍ Joi Jusu.

²¹ Ǎn sà nǐ wɔ̍n Joi Jusu-a blɛ iě dǒ mɔ̀ kli̍hgbɛ̍ we̍ nɛ. Kǎ ɛ̍-ɛ nɛ.