Wlɛfeleseɔn 20 - Ku̍o̍ Delee 1999

Kǔ gbɛ̍n-ɛ dǒ sɔ̀nᵻá wlǔ due di̍i̍

¹ Wɛ̀ ǐn jě ǐnchɔ̀ nɛ̀ ɛ̍ sɔ dě ja̍i̍wlɔ̀ ɛ̍ ji̍ nɔ̌ sɔ̀n. Iě ɛ̍ blě jeědih-a kàn biě-a kɔɛ̍n kwa̍, ɛ̍ ke jɔɔdbǔ ɛ̀ ku̍-a wɔ̍n-ɛ ke.

² Iě ɛ̍ gbɛ̍n dɔ̍sɛ ɛ̀ nu̍-a tɛin tɛin sɛ̍-ɛ. Ɛ̍-ɛ due laa̍ bo ɛ̀ nu̍ Kǔ ke Setɔn. Wɛ̀ ɛ̍ sa̍n Kǔ laa̍ tàǎntàǎn dǒ sɔ̀nᵻá wlǔ due (1,000) di̍i̍.

³ Wɛ̀ ɛ̍ po̍ ɛ̍ dě biě di̍i̍, iě ɛ̍ ka̍n-o, ɛ̍ po̍ ɛ̍ slu̍ wɔ̍i̍n. Wɛ̀ Kǔ-u je̍e bloa̍ kli̍hgbɛ̍ i̍ boe dɛ kleǐnklein iě sɔ̀nᵻá wlǔ due laa̍ i̍h iě chlà. Pò sɔ̀nᵻá wlǔ due laa̍ i̍h chlà-ɛ, nɛ̀ Kǔ kɔn ɛ̍ iě pɔ̀ni-ɛ dǒ ti̍ gbɔ̍ di̍i̍.

⁴ Wɛ̀ ǐn jě nynɛ̌ gbalǎᵻ, nɛ̀ nyɔ̍ ùh tè-a dǒ i̍h kɛ̍n i̍-ɛ, u̍h tùi-ɛ tùn kwa̍a̍ wɛ̀ u̍h iě taɔ nu̍. Nyɔ̍ ùh chɛ̍n-ɛa dlǔ i̍ u̍h-a Jusu-a tìh bla̍ tìh ke Nyɔsoa-a wlu̍ gba̍ tìh-ɛ, u̍h-a sùù bo. U̍h se̍ nmi̍ɛ̍ ke ɛ̍ mɛ̍-dɛ̍ wɛɛ sà, iě u̍h se̍ ɛ̍ juola dǒ jua̍i̍ ke u̍h sɔ̍n i̍ tù. U̍h wlǔh-e, iě u̍h ke Klai blě nyɔ̍-a wlu̍ kwa̍ dǒ sɔ̀nᵻá wlǔ due di̍i̍.

⁵ Ɛ̀ laa̍ bo ɛ̀ nu̍-e wlǔh-ɛa sàǐtòò naɛ. Mɛ̌-nyɔ̍ juh sie-a dǒ de̍-ɛ, u̍h se̍-e wlǔh te̍e̍ wɛ̀ sɔ̀nᵻá wlǔ due laa̍ chlà.

⁶ Nyɔ̍ ùh nɛ-a dě-e wlǔh-ɛa sàǐtòò naɛ di̍i̍-ɛ, nɛ̀ u̍h nmɔ i̍ iě u̍h tè-ɛ pɔ̌. Nɛ̀ mɛ̌ɛ-a sɔɔ̌n naɛ se̍ u̍h dɛ̍i̍ jě mu̍ dɛ. Jɛ nɛ̀ u̍h-a mu̍ la̍ Nyɔsoa ke Klai-a slaǎ sà nyɔ̍ nu̍. Wɛ̀ u̍h ke Klai iě bloa̍ kli̍hgbɛ̍ wlu̍ i̍ kɔn dǒ sɔ̀nᵻá wlǔ due di̍i̍.

Setɔn sà-ɛ klà

⁷ Pò sɔ̀nᵻá wlǔ due laa̍ i̍h chlà-ɛ, nɛ̀ Setɔn-a mu̍ pɔ̀ni-ɛ ɛ̍ iě dě kasoo sɔ.

⁸ Nɛ̀ ɛ̍ mu̍ mu̍ ɛ̍ iě bloa̍ kli̍hgbɛ̍ nɛ-a nɔ̌ kmɔ̌ we̍-ɛ i̍ boe. Bloa̍ la i̍h-a nynɛ̌ nu̍ Kɔki ke Makɔ. I̍hɔ̍ɔ̍ bo Setɔn-a mu̍ tàdùè po̍ i̍h iě tu̍h fɔ̀n la̍ mu̍. Ka jbǒ penɔ̍ɔ̍ tìè-aɛ, kǎ i̍h-a nyɔ̍ bɛ̌ɛ u̍h iě tìè.

⁹ U̍h-a mu̍ kmɔ̌ kli̍hgbɛ̍ we̍ sɛ̍, wɛ̀ u̍h iě tùgbàwlɔ̀ ɛ̀ kɔn tìh Nyɔsoa kma-aɛ dlɛ̌, tà ɔ̍ nyɔ̍ tè-a i̍-ɛ. Jɛ nɛ̍-a mu̍ dě ja̍i̍wlɔ̀ sɔ ɛ̍ iě u̍h-u gbɔ̀lɔ.

¹⁰ Kǔ ɛ̀ boe-a u̍h i̍-ɛ, ɛ̍ mu̍ dě pɔ̀nɔ̌ nɛ̍-a pàìbǒ di̍i̍ poe-ɛ tà nmi̍ɛ̍ ke tu̍owli po̍ nyɔ̍-a si̍h naɛ nɛ-aɛ. Nɛ̀ dě-e bo u̍h-a mu̍ jua̍i̍ sàɛ̀ wlù ke sɔ̀n nɔ̌ kmɔ̌-a kmɔ̌.

Nyɔsoa nu̍ nyɔ̍ kli̍hgbɛ̍-a taɔ

¹¹ Wɛ̀ ǐn jě nynɛ̌ gbalǎ plǔ klaa, ɛ̍ ke ɔ̀ tè-a dǒ ɛ̍ kɛ̍n i̍-ɛ ke. Wɛ̀ blǔh ke ja̍u̍n ple̍ i̍h sɔ dǒ ɔ̍ jlǐhwai, wɛ̀ i̍h se̍ jě-ɛ dɛ kleǐnklein.

¹² Wɛ̀ ǐn jě mɛ̌-nyɔ̍ kli̍hgbɛ̍, nɛ̀ u̍h nynaɛ i̍ dǒ nynɛ̌ gbalǎ jǔ. Nɛ̀ feɛ chlǐh-dɛ̍ ke chlǐh-dɛ̍ᵻ diih pɔ̀ni-ɛ wɔ̍i̍n. Nyɔsoa pa̍ mɛ̌-nyɔ̍-a taɔ dǒ dɛ̍ᵻ u̍h nu̍-aɛ we̍, ka i̍h nu̍-a chlǐh-ɛ dě chlǐh-dɛ̍ᵻ laa̍ di̍i̍-ɛ.

¹³ Iě jbǒ sà mɛ̌-nyɔ̍ nɛ-a dě ɛ̍ di̍i̍-ɛ kwlǎ. Wɛ̀ mɛ̌ɛ ke mɛ̌-nyɔ̍-a wlɔ̀ sà mɛ̌-nyɔ̍ nɛ-a dě i̍h we̍-ɛ kwlǎ ke. Wɛ̀ u̍h kli̍hgbɛ̍-a taɔ pa̍-ɛ dǒ u̍h-a nu̍-dɛ̍ᵻ we̍.

¹⁴ Iě mɛ̌ɛ ke mɛ̌-nyɔ̍-a wlɔ̀ poe-ɛ dě pɔ̀nɔ̌ nɛ̍-a pàìbǒ di̍i̍. Pɔ̀nɔ̌ nɛ̍-a pàìbǒ laa̍ bo ɛ̀ nu̍ mɛ̌ɛ-a sɔɔ̌n naɛ.

¹⁵ Nyɔ̍-o-nyɔ̍ ɔ̀ kɔn nynɛ̌ se̍-a chlǐh-ɛ dě feɛ chlǐh-dɛ̍ di̍i̍-ɛ, nɛ̀ ɔ̍ poe-ɛ dě pɔ̀nɔ̌ nɛ̍-a pàìbǒ di̍i̍.