Wlɛfeleseɔn 19 - Ku̍o̍ Delee 1999

¹ Ɛ̀ la ɛ̍ wɔ̀-a nɛ-ɛɛ, iě ǐn wɔ̌n slɛ̀ dɔu ka nyɔ̍ tlùgbei̍-a wlu̍ dě ja̍i̍wlɔ̀-ɛ. Slɛ̀-a chɛ̀ la̍a̍, “Mɔ̀ po̍ Nyɔsoa tìhwe̍. Nyɔ̍ sèìe-ɛ ke tìh-a i̍ bɛ̌-ɛ ke gbǐh kɔn dǒ à Nyɔsoa we̍.

² Ɔ̍ nyɔ̍ kàn gbɛ̍n-ɛ slɛ̌ i̍ iě ɛ̍ nu̍ tìh-a taǐn. Kàìà nynɔ̌ klaa ɔ̀ nyni-a bloa̍ jii̍ dǒ ɔ̍ gbǎn nu̍-ɛ we̍-ɛ, ɔ̍ sà ɔ̍ kɛ̀n wɛ̀. Nyɔsoa gbɛ̍n ɔ̍ kàn wɛ̀, dɛ̍nu̍ɛ, ɔ̍ dbǎ ɔ̍ pòi̍nynuu̍.”

³ Wɛ̀ u̍h sà slɛ̀ wɔ̍n dɛ, u̍h la̍a̍, “Po̍ Nyɔsoa tìhwe̍. Nɛ̍ ɛ̀ fɔ̍n-a wlɔ̀ klaa laa̍-ɛ, ɛ̍ daluh-a mu̍ ja̍i̍ mu̍ nɔ̌ kmɔ̌-a kmɔ̌.”

⁴ Iě nyɔ̍ klaaᵻá kwela sɔɔ̌n jɔ̌ nyìɛ̍ ke kmɔ̌ nɛ dɛ̍ᵻ nyìɛ̍ laa̍ kèàɛ i̍ dǒ Nyɔsoa ɔ̀ tè-a i̍ dǒ ɔ̍ nynɛ̌ gbalǎ kɛ̍n-ɛ jǔ, iě u̍h sà ɔ̍ wɛɛ. U̍h la̍a̍, “Kǎ ɛ̍-ɛ nɛ, mɔ̀ po̍ Nyɔsoa tìhwe̍.”

Blawɛ̌ Jǔ-a nynɔ̌ jla̍ ja peě la

⁵ Wɛ̀ wlu̍ sɔ dě nynɛ̌ gbalǎ kɛ̍n, ɛ̍ la̍a̍, “Plìh ke klaaᵻ, mɔ̀ɔ̍ ùh nu̍-a à Nyɔsoa-a pòi̍nynuu̍ ùh-a tè-a ɔ̍ ja̍-ɛ, mɔ̀ po̍ ɔ̍ tìhwe̍.”

⁶ Wɛ̀ ǐn wɔ̌n slɛ̀ ka nyɔ̍ tlùgbei̍-a wlu̍-ɛ. Slɛ̀-a chɛ̀ ke nǐ-a klu̍h-ɛ ke tɛ̀n-a plǎn-a mu̍i we̍. Slɛ̀-a chɛ̀ la̍a̍, “Mɔ̀ po̍ Nyɔsoa tìhwe̍, à Joi Nyɔsoa Ɔ̀ Blě-a Gbǐh Kli̍hgbɛ̍-ɛ, ɔ̍ nu̍ Blǔh Baa.

⁷ Mɔ̀ à nmɔ à iě ja̍ de̍le. Mɔ̀ à bɛ̌-ɛ ɔ̍ nynɛ̌ i̍, dɛ̍nu̍ɛ, Blawɛ̌ Jǔ-a nynɔ̌ jla̍ ja ti̍ nyni̍ wɛ̀. Ɔ̍ nynɔ̌ delee-a chɛ̀ gbàɛ̀ wɛ̀ ke dǒ ɔ̍ we̍.

⁸ Ɔ̍ nyǐ-ɛ flɛmɛ̍ wlihwlǐh ɛ̀ fa̍n-aɛ wɛ̀ ɔ̍ iě-e pa̍.” Dɛ̍nu̍ɛ, flɛmɛ̍ bo ɛ̀ nu̍ Nyɔsoa nyɔ̍-a nu̍-dɛ̍ᵻ ìh slɛ̌-a i̍-ɛ.

⁹ Wɛ̀ ǐnchɔ̀ la̍a̍ dě ǐn we̍, “Chlǐh ɛ̀ la. Nyɔ̍ ùh dǎ-ɛa dǒ Blawɛ̌ Jǔ-a nynɔ̌ peě kɛ̍n-ɛ, nɛ̀ u̍h nmɔ i̍.” Iě ɛ̍ la̍a̍ dɛ, “Ìh la̍ Nyɔsoa-a tìh-a taǐn tu̍owli bo.”

¹⁰ Wɛ̀ ǐn kà i̍ dǒ ɛ̍ bu̍hᵻ kɛ̍n iě ɛ̍ wɛɛ sà. Jɛ ɛ̍ la̍a̍ dě ǐn we̍, “Bɔ̌ laǎn nu̍-ɛ. Mɔ̍ pòi̍ju ke ka ìn ke ìn de̍di̍i̍ᵻ nu̍-a pòi̍nynuu̍ iě mɔ̀ nu̍-a sàànsi̍i̍h dǒ dɛ̍ Jusu sà-a we̍-ɛɛ, kǎ ǐn nɛ ke. Nyɔsoa bo ìè wɛɛ sà.” Dɛ̍nu̍ɛ, Jusu we̍ tìh i̍ sà-a bo ɛ̀ nu̍ Nyɔsoa-a tu̍owli po̍-ɛ.

Soo̍bli kɛ̍n naɛ nyɔ̍ nɛ dǒ soo̍bli plǔ kɛ̍n

¹¹ Wɛ̀ ǐn jě ja̍i̍wlɔ̀ ɛ̍ pɔ̀ni wɔ̍n, iě soo̍bli plǔ nɛ deě. Ɔ̀ tè-a dǒ ɛ̍ kɛ̍n i̍-ɛ, ɔ̍ nynɛ̌ nu̍ Wlùh Gbaɛ ke Gblangbai̍ Nyɔ̍. Ɔ̍ nyɔ̍ kɛ̀n sà-a ke ɔ̍ tu̍h fɔ̀n-ɛ slɛ̌ i̍.

¹² Ɔ̍ jlǐh wɔ̀ nɛ̍ gbà iě ɔ̍ tèè blawɛ̌ᵻ dɔu. Ɔ̍ blě nynɛ̌ ɛ̍ chlǐh-ɛ dǒ ɔ̍ pùn. Jɛ nyɔ̍ dɔɔ se̍ ɛ̍ juo, ɔ̍ nɛ due bo ɔ̀ juo ɛ̍.

¹³ Dɛ̍wlo̍o̍ ɔ̍ pa̍-aɛ, ɛ̍ nu̍ nymɔ̍-a sǔh. Ɔ̍ nynɛ̌ bo Nyɔsoa-a Wlu̍.

¹⁴ Wɛ̀ ja̍i̍wlɔ̀-a fledlǔ dɔu wɔ̀ dǒ ɔ̍ de̍e̍. U̍h pa̍ flɛmɛ̍ plǔᵻ wlihwlǐh-i, nɛ̀ u̍h-a naɛ soo̍bliᵻ plǔᵻ kɛ̍n.

¹⁵ Nmǎ-a plàn chlɛ̀n sɔ-a dě ɔ̍ wɔ̍ɔ̍n-ɛ, ɛ̍ bo ɔ̍ mu̍ bloa̍ klà sà-ɛ. Wɛ̀ ɔ̍ iě u̍h wlu̍ i̍ kɔn dǒ nɛ̍ne̍ɛ̍ bliku we̍. Wɛ̀ ɔ̍ iě tlo-dɛ̍ᵻ kɛ̍n i̍ na dě i̍h-a plǐn-biě ɛ̀ jǐ-a Nyɔsoa Ɔ̀ Blě-a Gbǐh Kli̍hgbɛ̍-ɛ ɔ̍ jlu̍h di̍i̍-ɛ.

¹⁶ Dǒ ɔ̍ dɛ̍wlo̍o̍ ke ɔ̍ dalǔh pùn bo nynɛ̌ la ɛ̍ chlǐh-ɛ. Ɛ̍ la̍a̍, “Blǔh baaᵻá Blǔh Baa, joi kli̍hgbɛ̍-a Joi.”

¹⁷ Wɛ̀ ǐn jě ǐnchɔ̀ ɛ̍ nyna i̍ dě jlǔh di̍i̍, iě ɛ̍ we̍le na̍wɛ̍ᵻ ìh-a wa̍n-a dě ja̍i̍-ɛ. Ɛ̍ la̍a̍, “Mɔ̀ ji̍ mɔ̀ iě tàdùè gbǎ dǒ Nyɔsoa-a peě klaa ɔ̍ mu̍-a tù-ɛ we̍

¹⁸ mɔ̀ iě blǔh baaᵻ ke, chapeᵻ ke, kmu-nyɔ̍ ke, soo̍bliᵻ ke i̍h-a kɛ̍n naɛ nyɔ̍-a plǎᵻ di̍. Mɔ̀ ji̍ mɔ̀ iě nyɔ̍ kli̍hgbɛ̍-a plǎᵻ di̍, ùh nu̍-a de̍e̍ i̍ flɔn nyɔ̍ ke, kèi̍ᵻ ke, plìh ke klaaᵻɛ́.”

¹⁹ Wɛ̀ ǐn jě nmi̍ɛ̍ ke kmɔ̌ la ɛ̍ blǔh baaᵻ ke u̍h-a fledlǔ. Nɛ̀ u̍h gbǎ tàdùè u̍h iě ɔ̀ tè-a i̍ dǒ soo̍bli kɛ̍n-ɛ ke ɔ̍ fledlǔ tu̍h we̍ pa̍-ɛ.

²⁰ Wɛ̀ tu̍h gbɛ̍n nmi̍ɛ̍-a chɛ̀ ke ɛ̍ tu̍owli po̍ nyɔ̍-a si̍h naɛ ɔ̀ po̍-a jbaɛdih dǒ ɔ̍ jǔ-ɛ. Nyɔ̍ ùh blě-a ka nmi̍ɛ̍-a juola ùh-a sà-a ɛ̍ mɛ̍-dɛ̍ wɛɛ-ɛ, jbaɛdih laa̍ bo ɔ̍ nu̍ iě ɔ̍ boe u̍h i̍. Nmi̍ɛ̍ ke tu̍owli po̍ nyɔ̍-a si̍h naɛ-a chɛ̀ poe-ɛ dě pɔ̀nɔ̌ nɛ̍-a pàìbǒ di̍i̍ wɛ̀.

²¹ Wɛ̀ plàn chlɛ̀n ɛ̀ sɔ-a dě ɔ̀ tè-a i̍ dǒ soo̍bli kɛ̍n-ɛ wɔ̍ɔ̍n-ɛ, ɛ̍ dbǎ fledlǔ juh sie-a doǒ-ɛ. Wɛ̀ na̍wɛ̍ᵻ kli̍hgbɛ̍ sì-i i̍h-a chɛ̀ kwlǐ gbɔ̀i̍ dǒ u̍h-a plǎᵻ we̍.