Wlɛfeleseɔn 17 - Ku̍o̍ Delee 1999

Ǐnchɔ̀ sèàɛ̍ kàìà nynɔ̌-a tìh we̍ i̍

¹ Wɛ̀ Nyɔsoa-a ǐnchɔ̀ mɛ̀sɔɔ̌n ìh blě-a boo̍ᵻ mɛ̀sɔɔ̌n kwa̍-ɛ i̍h-a due ji̍ nɔ̌ ǐn we̍. Ɛ̍ la̍a̍, “Ji̍, ka kàìà nynɔ̌ klaa-a mu̍-a kàn gbɛ̍n-ɛ nu̍-ɛ iě ɛ̍ ìn toe. Ɔ̍ nu̍ tùgbàwlɔ̀ klaa ɛ̀ po̍-ea dǒ nǐᵻ klaaᵻ wɔ̍i̍n-ɛ.

² Ɔ̍ ke kmɔ̌-a blǔh baaᵻ nu̍ gbǎn. Wɛ̀ ɛ̍ nu̍ ɛ̍ iě kmɔ̌ nyɔ̍ kli̍hgbɛ̍ nɛ sɔ̀ìà-a dǒ ɔ̍ pùn ka nmɔ̍-a nu̍ nyɔ̍-ɛ.”

³ Nyɔsoa-a Sùù jǐi ǐn i̍ wɛ̀ ǐnchɔ̀ gba̍ ǐn dě kwlǎslò we̍. Dě-e bo ǐn jě-e nynɔ̌ due, nɛ̀ ɔ̍ tè i̍ dǒ nmi̍ɛ̍ sàɛ̀n kɛ̍n. Nyɔsoa wɔ̍n blaɛ nynɛ̌ wɔ̀ ɛ̍ ku̍ dlǔ. Wɛ̀ ɛ̍ blě dlǔᵻ mɛ̀sɔɔ̌n ke gbɔ̀nᵻ pùè.

⁴ Nynɔ̌-a chɛ̀ ɔ̍ pa̍ jlii̍ sàɛ̀n ke nǐnmɛ ìh gbǎ-a dɛ̍kɛ̍n-ɛ. Iě ɔ̍ pa̍ jii̍ nmɔ pɛ̀ɛ̀ dɛ̍ᵻ i̍, ìh nui-a kòo̍ ke, sɔɔ̌ᵻ maloo ke wli̍h-ɛ. Wɛ̀ ɔ̍ blě kòo̍-a kàu̍n kwa̍. Nɛ̀ dě ɔ̍ sììjii̍ ke se̍i̍kɔɛn gbǎn nu̍-ɛ jǐ.

⁵ Iě nynɛ̌ ɛ̀ kɔn gbɔ̀ sìle-aɛ ɛ̍ chlǐh-ɛ dǒ ɔ̍ jua̍i̍. Ɛ̍ la̍a̍, “Wɔ̍n ku̍ Babeloun wlɔ̀, mɔ̀ bo ɔ̀ nu̍ kàìà nynɔ̌gbaɔᵻ kli̍hgbɛ̍ de̍, ɛ̍ ke kmɔ̌-a sììjii̍ ke.”

⁶ Nyɔsoa nyɔ̍ ùh dbǎ-ɛa Jusu-a tìh i̍ sà tìh-ɛ, ǐn jě nynɔ̌-a chɛ̀, nɛ̀ ɔ̍ nǎ u̍h-a nymɔ̍, iě ɛ̍ sìèè ɔ̍ wlì. Ǐn jě-a ɔ̍-ɛ, sɔ ɛ̍ flɔn-ɛ ǐn wɔ̍n kaa̍.

⁷ Wɛ̀ ǐnchɔ̀ la̍a̍ dě ǐn we̍, “Dɛ̍nu̍ ɛ̍ flɔn-ɛ ìn wɔ̍n ɛ? Ǎn mu̍ ìn nynɔ̌ la ɔ̍ sìle dɛ̍-a gbɔ̀ wlùh sèàɛ̍, ɛ̍ ke nmi̍ɛ̍ ɛ̀ blě-a dlǔᵻ mɛ̀sɔɔ̌n ke gbɔ̀nᵻ pùè ɛ̀ kɔn kɛ̍n ɔ̍ tè-a i̍-ɛ ke.

⁸ Nmi̍ɛ̍ ìn jě-aɛ, ɛ̍ nɛ kmɔ̌ de, jɛ ɛ̍ se̍ kmɔ̌ nɛ dɛ fu̍u̍. Jɛ ɛ̍ ji̍ la̍ dě kàn biě di̍i̍ sɔ la̍, wɛ̀ ɛ̍ iě-e gbɔ̀lɔ-ɛ. Kmɔ̌ nyɔ̍ juh kɔn nynɛ̌ se̍-a chlǐh-ɛ dě feɛ chlǐh-dɛ̍ di̍i̍ wɛ̀ kmɔ̌ iě-a nui-ɛ dǔ-ɛ, pò u̍h jě nmi̍ɛ̍ la-ɛ, nɛ̀ ɛ̍ mu̍ u̍h wɔ̍n flɔn-ɛ. Dɛ̍nu̍ɛ, ɛ̍ nɛ kmɔ̌ de, wɛ̀ ɛ̍ se̍ ka kmɔ̌ nɛ dɛ, iě ɛ̍ mu̍ la̍ ji̍ dode̍.

⁹ “Ɛ̀ la flɔ̍nwlùh ke dɛ̍ɛ̍ i̍ wɔ̌n-ɛ bo ɛ̍ jbǎ. Ɛ̍ dlǔᵻ mɛ̀sɔɔ̌n laa̍ tlu̍hᵻ mɛ̀sɔɔ̌n bo, i̍h kɔn kɛ̍n bo nynɔ̌ tè i̍. I̍h-i bo ìh nu̍ blǔh baaᵻ mɛ̀sɔɔ̌n ke.

¹⁰ U̍h-a m̀m̌ se̍ kmɔ̌ i̍ tè dɛ. Due nu̍ blǔh baa kaka, iě dɔɔ se̍ ji̍ ke̍. Pò ɔ̍ ji̍-ɛ, ɔ̍ kɔn ɔ̍ iě blǔh baa nu̍ dǒ ti̍ gbɔ̀ di̍i̍.

¹¹ Nmi̍ɛ̍ ɛ̀ nɛ-a kmɔ̌ de, iě ɛ̍ se̍-a ka kmɔ̌ nɛ dɛ fu̍u̍-ɛ, ɛ̍ bo ɛ̀ po̍ blǔh baaᵻ mɛ̀sɔɔ̌n laa̍ i̍h-a mɛ̀ta̍a̍n naɛ, iě ɛ̍ mu̍ la̍-a gbɔ̀lɔ.

¹² “Gbɔ̀nᵻ pùè ìn jě-aɛ, nyɔ̍ pùè ùh se̍-a blǔh baaᵻ nu̍ ke̍-ɛ bo. Jɛ i̍h-a mu̍ tùn nyǐ-ɛ, wɛ̀ i̍h iě blǔh baaᵻ nu̍ dǒ ti̍ tile di̍i̍, i̍h ke nmi̍ɛ̍ laa̍ ke.

¹³ I̍h nɛ-a pùè-ɛ i̍h blě wlùh due. I̍h-a mu̍ i̍h-a gbǐh ke i̍h-a tùn blě-ɛ nmi̍ɛ̍ laa̍ nyǐ.

¹⁴ I̍h-a mu̍ Blawɛ̌ Jǔ tu̍h we̍ pa̍-ɛ, wɛ̀ Blawɛ̌ Jǔ iě i̍h du̍. Dɛ̍nu̍ɛ, ɔ̍ nu̍ Joi dǒ joi kli̍hgbɛ̍ kɛ̍n, wɛ̀ ɔ̍ nu̍ Blǔh Baa dǒ blǔh baaᵻ kli̍hgbɛ̍ kɛ̍n. Nyɔ̍ ke ɔ̍ na-aɛ u̍h dǎ-ɛ, iě u̍h tba̍-ɛ chèɛ̀, wɛ̀ u̍h gbaɛ ɔ̍ wlùh.”

¹⁵ Wɛ̀ ǐnchɔ̀ la̍a̍ dě ǐn we̍, “Nǐᵻ klaaᵻ ìn jě-a, ìh kɔn wɔ̍i̍n kàìà nynɔ̌ tè-a i̍-ɛ, bloa̍ ke, nyɔ̍ tlùgbei̍ ke dakɔ̍ pàɔ̀n bo.

¹⁶ Gbɔ̀nᵻ pùè ìn jě-aɛ, i̍h ke nmi̍ɛ̍-a mu̍ kàìà nynɔ̌ laa̍ faɛn. I̍h-a mu̍ ɔ̍ kɔn-dɛ̍ᵻ kli̍hgbɛ̍ kwa̍a̍ i̍ sà, wɛ̀ i̍h iě ɔ̍ gbaǎn chɛn-ɛ. I̍h-a mu̍ ɔ̍ plǎᵻ di̍, wɛ̀ i̍h iě ɔ̍ jih sie-a dǒ de̍-ɛ gbɔ̀lɔ dě nɛ̍-ɛ.

¹⁷ Nyɔsoa po̍ ɛ̍ dě i̍h wlùh we̍ i̍h iě ɔ̍ wlùh dɛ̍ nu̍ dǒ i̍h-a wlùh-a due nɛ-ɛ we̍, wɛ̀ i̍h iě i̍h-a gbǐh nmi̍ɛ̍ nyǐ ɛ̍ iě nyɔ̍-a wlu̍ kwa̍ blě te̍e̍ wɛ̀ Nyɔsoa-a wlu̍ iě kɛ̀ǐn gbǎ.

¹⁸ “Nynɔ̌ ìn jě-aɛ, tùgbàwlɔ̀ klaa ɛ̀ blě-a blǔh baaᵻ nɛ-a nɔ̌ kmɔ̌-ɛ u̍h-a wlu̍ kwa̍-ɛ bo.”