Wlɛfeleseɔn 16 - Ku̍o̍ Delee 1999

Nyɔsoa-a ǐnchɔ̀ mɛ̀sɔɔ̌n chɛ̌li boo̍ᵻ

¹ Wɛ̀ ǐn wɔ̌n we̍le wlu̍ ɛ̍ sɔ dě slaǎ sà gbò di̍i̍. Iě ɛ̍ sèàɛ̍ ǐnchɔ̀ mɛ̀sɔɔ̌n laa̍ wlùh, ɛ̍ la̍a̍, “Mɔ̀ mu̍ mɔ̀ iě boo̍ᵻ mɛ̀sɔɔ̌n ìh jǐ-a dǒ Nyɔsoa-a jlu̍h we̍-ɛ chɛ̌li dǒ bloa̍ kɛ̍n.”

² Wɛ̀ sàǐtòò ǐnchɔ̀ mu̍ iě ɛ̍ chɛ̌li ɛ̍ naɛ boo̍ dǒ bloa̍ kɛ̍n. Iě nyɔ̍ ùh blě-a nmi̍ɛ̍-a juola iě ùh-a sà-a ɛ̍ mɛ̍-dɛ̍ wɛɛ-ɛ, wɛ̀ chɛn-chìèᵻ ke wɔ̍n kma chìèᵻ gbǎ dǒ u̍h pùn.

³ Wɛ̀ ǐnchɔ̀-a sɔɔ̌n naɛ chɛ̌li ɛ̍ boo̍ dǒ jbǒ kɛ̍n. Iě nǐ-a chɛ̀ ke mɛ̌-nyɔ̍-a nymɔ̍ wɔ̀ɛ. Wɛ̀ kmɔ̌ nɛ dɛ̍ᵻ kli̍hgbɛ̍ nɛ-a dě jbǒ kɛ̍n-ɛ, i̍h mɛ̌.

⁴ Iě ǐnchɔ̀-a ta̍a̍n naɛ chɛ̌li ɛ̍ boo̍ dǒ nǐᵻ klaaᵻ ke kao̍dluᵻ kɛ̍n, wɛ̀ i̍h sàɛ̀ nymɔ̍.

⁵ Wɛ̀ ǐn wɔ̌n nǐ wlu̍ i̍ kɔn ǐnchɔ̀-a wlu̍. Ɛ̍ la̍a̍, “Nɛi̍ Wɛ̀ Nyɔ̍, mɔ̀ ɔ̀ nɛ-a wɛ̀ ɔ̀ nɛ-a kmɔ̌ se̍e̍-ɛ, kàn gbɛ̍n-ɛ ìn dbo̍-aɛ, ɛ̍ slɛ̌ i̍.

⁶ U̍h wlǎ àn nyɔ̍ ke àn tu̍owli po̍ nyɔ̍-a nymɔ̍ i̍. Ɛ̍ kɔn ìn nyǐ u̍h nymɔ̍ u̍h iě nǎ. Dɛ̍ ɛ̀ blaɛ-a i̍ ɛ̀ iě-a u̍h pùn nɛ-ɛ, ɛ̍ nɛ u̍h jii̍ wɛ̀.”

⁷ Iě ǐn wɔ̌n wlu̍ dɛɛ ɛ̍ sɔ dǒ slaǎ sà gblǒ kɛ̍n. Ɛ̍ la̍a̍, “Joi Nyɔsoa, mɔ̀ Ɔ̀ Blě-a Gbǐh Kli̍hgbɛ̍-ɛ, àn nyɔ̍ kàn gbɛ̍n-ɛ slɛ̌ i̍, iě ɛ̍ nu̍ tìh-a taǐn.”

⁸ Wɛ̀ ǐnchɔ̀-a nyìɛ̍ naɛ chɛ̌li ɛ̍ boo̍ dǒ jlǔh kɛ̍n. Iě ɛ̍ fɔ̍n nyɔ̍gbei dǒ ɛ̍ nɛ̍ we̍.

⁹ Nyɔ̍ɔ si̍n-i dǒ ɛ̍ fuun jlo̍jlo̍ we̍. Wɛ̀ Nyɔsoa ɔ̀ blě-a gbǐh dǒ dlǐ dɛ̍ᵻ laa̍ we̍-ɛ, iě u̍h po̍ ɔ̍ nynɛ̌ wlu̍we̍i̍. Wɛ̀ u̍h se̍ u̍h-a gblɛ̍n sɔ̀ɛ̀n kɛ̍n i̍ poe, u̍h iě Nyɔsoa-a nynɛ̌ i̍ bɛ̌-ɛ.

¹⁰ Iě ǐnchɔ̀-a m̀m̌ naɛ chɛ̌li ɛ̍ boo̍ dǒ nmi̍ɛ̍-a nynɛ̌ gbalǎ kɛ̍n. Wɛ̀ ɛ̍ kmɔ̌ wlu̍ i̍ kɔn-ɛ gbǎ dě kwile di̍i̍, iě nyɔ̍gbei-a di̍ nynɛ̌ dǒ jua̍i̍ sàɛ̀ we̍.

¹¹ Wɛ̀ u̍h se̍ u̍h-a gblɛ̍n sɔ̀ɛ̀n kɛ̍n i̍ poe. Iě u̍h po̍ Nyɔsoa ɔ̀ nɛ-a dě ja̍i̍wlɔ̀-ɛ wlu̍we̍i̍ dǒ u̍h-a jua̍i̍ sàɛ̀ ke u̍h-a chìèᵻ we̍.

¹² Wɛ̀ ǐnchɔ̀-a mɛ̀o̍ naɛ chɛ̌li ɛ̍ boo̍ dǒ nǐ klaa nu̍-a Iufleti-ɛ kɛ̍n. Iě nǐ-a chɛ̀ ma̍ kli̍hgbɛ̍ ɛ̍ iě blǔh baaᵻá sɔ-a dě tà jlǔh-a wlǔh-ia kwlǎ-a u̍h-a wìè gba̍a̍ po̍.

¹³ Wɛ̀ ǐn jě jeědih ta̍a̍n ka pɔ̀lùhᵻɛ́. Nɛ̀ i̍h-a sɔ dě dɔ̍sɛ ke nmi̍ɛ̍ ke tu̍owli po̍ nyɔ̍-a si̍h naɛ wɔ̍ɔ̍n.

¹⁴ Jeědih ìh-a po̍-a jbaɛdih-ɛ bo. I̍h ple̍ blǔh baaᵻ kli̍hgbɛ̍ nɛ-a nɔ̌ kmɔ̌-ɛ we̍ i̍, i̍h iě u̍h tàdùè po̍. Wɛ̀ u̍h iě Nyɔsoa Ɔ̀ Blě-a Gbǐh Kli̍hgbɛ̍-ɛ we̍ fɔ̀n dǒ ɔ̍ wɔ̍n ku̍ weɛ̍ di̍i̍.

¹⁵ Klai la̍a̍, “Ǎn ji̍-ɛa mu̍ nyɔ̍ kɛ̍n kèè ka jlǐ-nyɔ̍-ɛ. Jɛ nyɔ̍ ɔ̀ mu̍-a nyinɔ̍ jlǐh i̍ ku̍ wɛ̀ ɔ̍ iě-a ɔ̍ pa̍-dɛ̍ jlǐhɛ̍ tù-ɛ, nɛ̀ ɔ̍ se̍ gbaǎn chɛn mu̍ tɛ̀n iě ɔ̍ nu̍, nɛ̀ ɔ̍ nmɔ i̍.”

¹⁶ Wɛ̀ jeědih laa̍ i̍h po̍ blǔh baaᵻ laa̍ tàdùè dǒ tà kɔn nynɛ̌ nu̍-a Amakedan dě Iblu wlu̍ di̍i̍-ɛ.

¹⁷ Wɛ̀ ǐnchɔ̀-a mɛ̀sɔɔ̌n naɛ chɛ̌li ɛ̍ boo̍ dě ja̍i̍. Iě we̍le wlu̍ sɔ dě nynɛ̌ gbalǎ we̍ dě slaǎ sà gbò sɔ̀n. Ɛ̍ la̍a̍, “Ɛ̍ wɛ̀ i̍ wɛ̀.”

¹⁸ Iě nǐ-a chlɛ jlǐh, slɛ̀-a wlu, tɛ̀n-a plǎn-ɛ i̍, iě wlù poɔ ɛ̀ ku̍-a wɔ̍n-ɛ ji̍. Nyɔ̍ gbǎ-a nɔ̌ kmɔ̌-ɛ, wlù poɔ la ɛ̍ ba̍-a se̍-a ji̍ sàì. Wlù poɔ-a slènai naɛ bo.

¹⁹ Wɛ̀ Babeloun ɛ̀ nu̍-a tùgbàwlɔ̀-ɛ, iě ɛ̍ sà fɔ̌ᵻ ta̍a̍n, iě bloa̍ kli̍hgbɛ̍-a wlɔ̀ᵻ gbàɛ̀ wlǎ. Babeloun wlɔ̀ ɛ̀ ku̍-a wɔ̍n-ɛ, ɛ̍ tìh sǐ dǒ Nyɔsoa wlì i̍ iě ɔ̍ nu̍ ɛ̍ wɛ̀ ɛ̍ nǎ-ɛ ɔ̍ nmɔ̍ kàu̍n ɛ̀ jǐ-a ɔ̍ jlu̍h di̍i̍-ɛ.

²⁰ Wɛ̀ tbǒᵻ ke tlu̍hᵻ kli̍hgbɛ̍ mǎ.

²¹ Iě seɔn gbo̍ᵻ klaaᵻ ìh ke kɔɔ bɔlɔ-a kwa̍ ku̍-ɛ beɛ̍ɛ-a, wɛ̀ i̍h blu̍ dě ja̍i̍. Wɛ̀ i̍h gbǎ nyɔ̍ɔ kɛ̍n, iě u̍h-a po̍ Nyɔsoa wlu̍we̍i̍ ɔ̍ dlǐ seɔn gbo̍ᵻ dbo̍ tìh. Dɛ̍nu̍ɛ, ɛ̍ nu̍ dlǐ dɛ̍-a kanɛa naɛ.