Wlɛfeleseɔn 15 - Ku̍o̍ Delee 1999

Ǐnchɔ̀ ja dlǐ dɛ̍ᵻá bɔ̌ɛ-o naɛ

¹ Wɛ̀ ǐn jě nyɔ̍ wɔ̍n flɔn-ɛ dɛ̍ klaa dɛɛ dě ja̍i̍wlɔ̀. Ɛ̍ nu̍ Nyɔsoa-a ǐnchɔ̀ mɛ̀sɔɔ̌n, iě i̍h blě dlǐ dɛ̍ᵻ mɛ̀sɔɔ̌n-a bɔ̌ɛ-o naɛ i̍h-a ja, dɛ̍nu̍ɛ, i̍h bo ìh sà Nyɔsoa jlu̍h wɔ̍n.

² Wɛ̀ ǐn jě dɛ̍ ɛ̀ wɔ̀-a jbǒ ɛ̀ nui-a klàsi̍-ɛ, nɛ̀ ɛ̍ sìàɛ̍n nɛ̍-ɛ. Iě ǐn jě nyɔ̍ ùh du̍-a nmi̍ɛ̍ ke ɛ̍ mɛ̍-dɛ̍-ɛ, ɛ̍ ke ɛ̍ nynɛ̌-a namà ke. Nɛ̀ u̍h nynaɛ jbǒ ɛ̀ wɔ̀-a klàsi̍ laa̍ wɔ̍n iě u̍h blě kain kwa̍, ìh Nyɔsoa nyǐ-a u̍h-ɛ.

³ Wɛ̀ u̍h ble̍ Mose ɔ̀ nu̍-a Nyɔsoa-a pòi̍ju-ɛ ɔ̍ duǐh, ɛ̍ ke Blawɛ̌ Jǔ-a duǐh ke. U̍h la̍a̍, “Joi Nyɔsoa mɔ̀ Blě-a Gbǐh Kli̍hgbɛ̍-ɛ, àn nu̍-dɛ̍ᵻ ku̍ wɔ̍n, iě i̍h-a flɔn-ɛ nyɔ̍ wɔ̍n. Àn wìèᵻ slɛ̌ i̍, iě i̍h nu̍ tìh-a taǐn. Mɔ̀ Blǔh Baa nɔ̌ kmɔ̌-a kmɔ̌.

⁴ Joi, nyɔ̍ kli̍hgbɛ̍-a mu̍ ìn ja̍ tè, u̍h iě àn nynɛ̌ i̍ bɛ̌-ɛ. Dɛ̍nu̍ɛ, ìn nɛ due bo ɔ̀ wɛ̀ nɛi̍. Bloa̍ kli̍hgbɛ̍-a mu̍ ji̍, wɛ̀ u̍h iě ìn wɛɛ sà. Dɛ̍nu̍ɛ, nyɔ̍ kli̍hgbɛ̍ jě ɛ̍ wɛ̀ ka àn nu̍-dɛ̍ᵻ slɛ̌-a i̍-ɛ.”

⁵ Ɛ̀ la ɛ̍ wɔ̀-a nɛ-ɛ, wɛ̀ ǐn jě slaǎ sà gbò nɛ-a dě ja̍i̍wlɔ̀-ɛ, ɛ̀ nu̍-a Wɛ̀ɛ̀ Sɔ̍n Wlù tà Nyɔsoa nɛ-aɛ, nɛ̀ ɛ̍ flɔn wɔ̍n.

⁶ Wɛ̀ ǐnchɔ̀ mɛ̀sɔɔ̌n ìh blě-a dlǐ dɛ̍ᵻ mɛ̀sɔɔ̌n-ɛ, i̍h sɔ dě slaǎ sà gbò laa̍ di̍i̍ i̍h sǐ sɔ̀n. Nɛ̀ i̍h pa̍ flɛmɛ̍ plǔ wlihwlǐh. Iě i̍h wlǎ kòo̍ wola̍ᵻ wlì i̍.

⁷ Wɛ̀ kmɔ̌ nɛ dɛ̍ᵻ nyìɛ̍ laa̍ i̍h-a due nyǐ ǐnchɔ̀ mɛ̀sɔɔ̌n laa̍ kòo̍ boo̍ᵻ mɛ̀sɔɔ̌n, nɛ̀ i̍h jǐ-i dǒ Nyɔsoa ɔ̀ se̍-a mɛ̌ la̍ kɔn-ɛ ɔ̍ jlu̍h we̍.

⁸ Wɛ̀ dě slaǎ sà gbò-a chɛ̀ di̍i̍ jǐ dǒ daluh ɛ̀ sɔ-a dě Nyɔsoa-a tìh-a i̍ bɛ̌-ɛ ke ɔ̍ gbǐh di̍i̍-ɛ we̍. Iě nyɔ̍ se̍ dě slaǎ sà gbò laa̍ di̍i̍ pa̍-a bɛ̌ɛ te̍e̍ wɛ̀ dlǐ dɛ̍ᵻá gbɔ̍ᵻ mɛ̀sɔɔ̌n ǐnchɔ̀ mɛ̀sɔɔ̌n ja-aɛ, i̍h chlà dlǔ i̍.