Wlɛfeleseɔn 13 - Ku̍o̍ Delee 1999

Chɔɔn jě nmi̍i̍ sɔɔ̌n

¹ Wɛ̀ ǐn jě nmi̍ɛ̍ nɛ̀ ɛ̍ sɔ dě jbǒ wlù. Ɛ̍ blě gbɔ̀nᵻ pùè ke dlǔᵻ mɛ̀sɔɔ̌n. Ɛ̍ gbɔ̀n jɛ-ɛ, nɛ̀ ɛ̍ tèè blawɛ̌. Ɛ̍ dlǔ jɛ-ɛ, nɛ̀ Nyɔsoa wɔ̍n blaɛ nynɛ̌ chlǐh-ɛ dǒ ɛ̍ pùn.

² Nmi̍ɛ̍ ǐn jě-aɛ, ɛ̍ ke chì mu̍i we̍, wɛ̀ ɛ̍ blě gbɛ̌-a bu̍hᵻ. Ɛ̍ wɔ̍n ke gbòlò-a wɔ̍n mu̍i we̍. Wɛ̀ dɔ̍sɛ-a gbǐh ɛ̍ blě-a iě ɛ̍ nyǐ i̍h nmi̍ɛ̍, ɛ̍ ke ɛ̍ nynɛ̌ gbalǎ ke tùn ɛ̀ ku̍-a wɔ̍n-ɛ ke.

³ Nmi̍ɛ̍-a chɛ̀, chìè nɛ-a dǒ ɛ̍ dlǔ due pùn-ɛ, ɛ̍ wɔ̀ tba̍-a dɛ̍ ɛ̀ gba̍-a nyɔ̍ dbǎ-a tai-ɛ, jɛ ɛ̍ bɔ̌ wɛ̀. Sɔ ɛ̍ flɔn-ɛ bloa̍ kli̍hgbɛ̍ wɔ̍n iě u̍h gbǎ dǒ nmi̍ɛ̍ laa̍ de̍e̍.

⁴ Nyɔ̍ kli̍hgbɛ̍ sà dɔ̍sɛ wɛɛ, dɛ̍nu̍ɛ, ɛ̍ nyǐ ɛ̍ tùn nmi̍ɛ̍ laa̍. U̍h sà nmi̍ɛ̍ laa̍ wɛɛ ke, iě u̍h la̍a̍, “Nyɔ̍ bo ɔ̀ wɔ̀ nmi̍ɛ̍ la ɛ? Nyɔ̍ bo ɔ̀ bɛ̌ɛ ɛ̍ we̍ fɔ̀n-ɛ ɛ?”

⁵ Wɛ̀ nmi̍ɛ̍ laa̍ ɛ̍ sà-ɛ wlu̍ kɛ̍n ɛ̍ iě blɔ̌, ɛ̍ iě Nyɔsoa wɔ̍n blaɛ. Wɛ̀ ɛ̍ sà-ɛ wlu̍ kɛ̍n ɛ̍ iě ɛ̍ chɛ̀-a wlùh nu̍ dǒ chǔhᵻá kwela nyìɛ̍ jɔ̌ sɔɔ̌n (42) di̍i̍.

⁶ Wɛ̀ ɛ̍ blaɛ Nyɔsoa wɔ̍n, ɛ̍ ke ɔ̍ nynɛ̌ ke, ɔ̍ tèla̍ ke nyɔ̍ ùh ke ɔ̍ tǐn-a dě ja̍i̍wlɔ̀-ɛ ke.

⁷ Ɛ̍ sà-ɛ wlu̍ kɛ̍n dɛ ke ɛ̍ iě Nyɔsoa-a nyɔ̍ we̍ fɔ̀n wɛ̀ ɛ̍ iě u̍h du̍. Wɛ̀ ɛ̍ nyǐ-ɛ tùn ɛ̍ iě chɛ̌tu ke, dakɔ̍ ke bloa̍ kli̍hgbɛ̍ wlu̍ i̍ kɔn.

⁸ Nyɔ̍ kli̍hgbɛ̍ ùh tǐn-a nɔ̌ bloɔ̍-ɛ, u̍h-a mu̍ ɛ̍ wɛɛ sà. Ɛ̍-ɛ bo ɛ̀ nu̍-a nyɔ̍ ùh kɔn nynɛ̌ se̍-a chlǐh-ɛ dě Blawɛ̌ Jǔ-a feɛ chlǐh-dɛ̍ di̍i̍ wɛ̀ kmɔ̌ iě-a nui-ɛ dǔ. Blawɛ̌ Jǔ ɔ̀ dbǎ-aɛ, ɔ̍ bo ǎn dǎ.

⁹ Ǎn sèàɛ̍ mɔ̀ wlùh, “Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.

¹⁰ Nyɔ̍-o-nyɔ̍ ɔ̀ tu̍h nɛ-a gba̍ ka̍-ɛ, nɛ̀ tu̍h-a mu̍ ɔ̍ gba̍. Nyɔ̍-o-nyɔ̍ ɔ̀ nɛ-a plàn chlɛ̀n i̍ dbǎ-ɛ ka̍-ɛ, nɛ̀ ɔ̍ mu̍ plàn chlɛ̀n i̍ dbǎ-ɛ. Ka ɛ̍ nɛ-a ka-ɛ, nɛ̀ Nyɔsoa nyɔ̍ kɔn u̍h iě-e klì i̍ ku̍ u̍h iě wlùh gbaɛ blě.”

¹¹ Wɛ̀ ǐn jě nmi̍ɛ̍ dɛɛ, ɛ̍ sɔ dě wlù. Ɛ̍ blě gbɔ̀nᵻ sɔɔ̌n ka blawɛ̌ jǔ-ɛ. Iě ɛ̍ wlu ka dɔ̍sɛ-ɛ.

¹² Ɛ̍ nui sàǐtòò nmi̍ɛ̍-a gbǐh dbo̍ dǒ ɛ̍ jlǐhwai. Ɛ̍ nu̍ ɛ̍ bloa̍ ke ɛ̍ nyɔ̍ kli̍hgbɛ̍ sà sàǐtòò nmi̍ɛ̍ laa̍ wɛɛ, ɛ̀ kɔn dbǎ-a tai gba̍ chìè bɔ̌-aɛ.

¹³ Wɛ̀ nmi̍ɛ̍ sɔɔ̌n naɛ la, ɛ̍ po̍ jbaɛdih ìh ku̍-a wɔ̍n-ɛ. Ɛ̍ nu̍ ɛ̍-ɛ iě nɛ̍ sɔ dě ja̍i̍ bei ɛ̍ ji̍ nɔ̌ bloɔ̍ dǒ nyɔ̍ kli̍hgbɛ̍ jlǐhwai.

¹⁴ Wɛ̀ ɛ̍ boe kmɔ̌ nyɔ̍ kli̍hgbɛ̍ i̍ dǒ jbaɛdih ɛ̍ sà-ɛa wlu̍ kɛ̍n iě ɛ̍ po̍-a dǒ sàǐtòò nmi̍ɛ̍ jlǐhwai-ɛ we̍. Wɛ̀ ɛ̍ po̍ nyɔ̍ kli̍hgbɛ̍ slǔh u̍h iě dɛ̍ mɛ̍ dǒ sàǐtòò nmi̍ɛ̍ la we̍, ɛ̀ plàn chlɛ̀n tba̍-a de iě ɛ̍ nɛ-a kmɔ̌ ke̍-ɛ.

¹⁵ Iě ɛ̍ sà-ɛ wlu̍ kɛ̍n ɛ̍ iě sàǐtòò nmi̍ɛ̍-a mɛ̍-dɛ̍ laa̍ feɛ di̍i̍ po̍, wɛ̀ ɛ̍ iě wlu, ɛ̍ iě nyɔ̍ ùh se̍-a ɛ̍ wɛɛ sà mu̍-ɛ dbǎ.

¹⁶ Wɛ̀ nmi̍ɛ̍-a sɔɔ̌n naɛ se̍-o nyɔ̍ i̍ si̍e̍, nyɔ̍ plìh o, klaaᵻ o, pàn-nyɔ̍ o, nyɔ̍gbà nyɔ̍ o, kèi̍ᵻ o, de̍e̍ i̍ flɔn nyɔ̍ o ɛ̍ nu̍ u̍h-a kloǒ kli̍hgbɛ̍ u̍h iě juola tù-iɛ dǒ u̍h-a di̍na̍ sɔ̍nᵻ àe̍e̍ dǒ u̍h jua̍i̍.

¹⁷ Nyɔ̍ se̍ dɛ̍ tɛ̀n-ɛ àe̍e̍ dɛ̍ ple̍-ɛ bɛ̌ɛ mu̍ pò ɔ̍ se̍ sàǐtòò nmi̍ɛ̍-a juola la blě-ɛ. Juola la ɛ̍ nyna i̍ dǒ nmi̍ɛ̍ la ɛ̍ nynɛ̌ wɔ̀ɔ̀, ɛ̍ ke ɛ̍ nynɛ̌-a namà ke.

¹⁸ Ɛ̀ la flɔ̍nwlùh bo ɛ̍ jbǎ. Nyɔ̍ ɔ̀ flɔn-a di̍i̍-ɛ, ɔ̍ slè sàǐtòò nmi̍ɛ̍-a namà la, dɛ̍nu̍ɛ, ɛ̍ nu̍ nyi̍ɔ̍-a nynɛ̌. Ɛ̍ namà nu̍ kmɛ mɛ̀o̍ kwela mɛ̀o̍ jɔ̌ mɛ̀o̍ (666).