Wlɛfeleseɔn 11 - Ku̍o̍ Delee 1999

Nyɔsoa dbo̍ ɔ̍ sàànsi̍i̍h sɔɔ̌n

¹ Wɛ̀ ǐn nyǐ-ɛ kɔu̍ ɛ̀ ke dɛ̍ dbee tu̍ wɔ̀ɛ-aɛ. Iě nyɔ̍ la̍a̍ dě ǐn we̍, “Mu̍ ìè Nyɔsoa-a slaǎ sà gbò ke gblǒ dbee. Nɛ̀ ìn slè ùh-a sà-ɛa wɛɛ dě ɛ̍ di̍i̍-ɛ.

² Jɛ bɔ̌ slaǎ sà gbò-a gbaɛ̍we̍ nɛ-a nɔ̌ sɔ̀n ka-a dbee-ɛ. Tǎli ɛ̍ i̍, dɛ̍nu̍ɛ, ɛ̍ sà-ɛ kwlǎ wɛ̀ dě nyɔ̍ ùh se̍-a ǐn juo-ɛ we̍. U̍h-a mu̍ tùgbàwlɔ̀ ɛ̀ kɔn-a dǒ Nyɔsoa we̍-ɛ kɛ̍n i̍ na dǒ chǔhᵻá kwela nyìɛ̍ jɔ̌ sɔɔ̌n (42) di̍i̍.

³ Ǎn mu̍ ǎn sàànsi̍i̍h sɔɔ̌n ùh pa̍-a sùàɛ̀n pa̍ jlii̍-ɛ gbǐh nyǐ, wɛ̀ u̍h iě Nyɔsoa-a tu̍owli po̍ dǒ wǐh-a wlǔ due kmɛ sɔɔ̌n kwela mɛ̀o̍ (1,260) laa̍ di̍i̍.”

⁴ Sàànsi̍i̍h sɔɔ̌n laa̍ bo ùh nu̍-a ɔle-tu̍ᵻ sɔɔ̌n ke chlǎn nape̍-a kɛ̍n tè dɛ̍ᵻ sɔɔ̌n ìh nyna-a i̍ dǒ bloa̍ Joi jǔ.

⁵ Pò u̍h-a nyɛ̌-nyɔ̍-a nyɔ̍-o-nyɔ̍ fɔ̀n dɛ̍ we̍ ɔ̍ iě u̍h dɛ̍ sɔ̀n pùn nu̍-ɛ, nɛ̀ nɛ̍-a mu̍ dě u̍h wɔ̍ɔ̍n sɔ ɛ̍ iě ɔ̍-ɔ gbɔ̀lɔ. Nɛ̀ nyɔ̍-o-nyɔ̍ ɔ̀ fɔ̀n-a u̍h-a dɛ̍ sɔ̀n pùn nu̍ dɛ we̍-ɛ, nɛ̀ kǎ ɔ̍ kɔn ɔ̍ iě ka dbǎ-aɛ nu̍.

⁶ U̍h blě gbǐh u̍h iě nǐ gbɛ̍n, wɛ̀ ɛ̍-ɛ je̍e dba̍ dě u̍h-a Nyɔsoa-a tu̍owli po̍ nɔɔ di̍i̍. U̍h blě gbǐh ke u̍h iě ɛ̍ nu̍ nǐ iě nymɔ̍ sàɛ̀. U̍h ja pɔ̀n u̍h iě bloa̍ dlǐ dɛ̍ᵻ kaɛn kaɛn kli̍hgbɛ̍ pùn nu̍ chɛ̍chɛ̍-ɛ, u̍h blě gbǐh u̍h iě ɛ̍ nu̍.

⁷ Pò u̍h wɔ̀ u̍h-a tu̍owli po̍-ɛɛ, nɛ̀ nmi̍ɛ̍ ɛ̀ sɔ-a dě kàn biě laa̍ di̍i̍-ɛ, ɛ̍ mu̍ u̍h tu̍h we̍ pa̍-ɛ. Nɛ̀ ɛ̍ mu̍ u̍h klà sà, ɛ̍ iě u̍h dbǎ.

⁸ Wɛ̀ u̍h-a kǔᵻ iě gbaɛ̍we̍ i̍ pɛ̌n-ɛ dǒ tùgbàwlɔ̀ di̍i̍, tà u̍h-a Joi kɔ̍-ɛa dǒ gbàɛ̍ kɛ̍n i̍ tu̍ wlì-ɛ. Tùgbàwlɔ̀-a chɛ̀ ɛ̍ i̍ blaɛ nynɛ̌ nu̍ Sɔdɔm wlɔ̀ ke Iche bloa̍.

⁹ Nyɔ̍ ùh sɔ-a bloa̍ ke chɛ̌tu ke dakɔ̍ kli̍hgbɛ̍ kɛ̍n i̍-ɛ, u̍h-a mu̍ u̍h-a kǔᵻ i̍ jě dǒ wǐh ta̍a̍n gbɔ̀ tile di̍i̍. U̍h se̍ wɔ̌n mu̍ nyɔ̍ iě u̍h i̍ nma̍le.

¹⁰ Nɛ̀ blǔh nyɔ̍-a mu̍ mɔna̍-a gbǎ ùh sɔɔ̌n la u̍h-a mɛ̌ɛ tìh. U̍h-a mu̍ ɛ̍ peě nu̍, wɛ̀ u̍h iě dɛ̍ we̍ nyǐ-iɛ. Dɛ̍nu̍ɛ, tu̍owli po̍ nyɔ̍ sɔɔ̌n la u̍h dǔ wlɔ̀ nyi̍ɔ̍ jua̍i̍ sàɛ̀-ɛ se̍e̍.

¹¹ Wǐh ta̍a̍n gbɔ̀ tile laa̍ i̍h sì-aɛ, wɛ̀ nyɔ̍ kmɔ̌ i̍ tè-e feɛ sɔ dě Nyɔsoa we̍ ɛ̍ gbǎ dě u̍h ku̍u̍, iě u̍h nyna i̍. Nyɔ̍ kli̍hgbɛ̍ ùh jě-a u̍h-ɛ, ɛ̍ po̍ u̍h faɔn kaa̍.

¹² Wɛ̀ tu̍owli po̍ nyɔ̍ sɔɔ̌n laa̍ u̍h wɔ̌n we̍le wlu̍, ɛ̍ sɔ dě ja̍i̍wlɔ̀. Ɛ̍ la̍a̍, “Mɔ̀ ji̍ nɔ̌ ja̍i̍ nɔ̍ɔ̀.” Wɛ̀ u̍h-a nyɛ̌-nyɔ̍-a gbɛ̀n u̍h ja̍ u̍h-a mu̍ dě ja̍i̍wlɔ̀ dě nǐgban di̍i̍.

¹³ Dǒ ti̍-a taǐn laa̍ di̍i̍-ɛ, wɛ̀ wlù poɔ klaa ji̍. Iě tùgbàwlɔ̀ laa̍ ɛ̍ fɔ̌ᵻ pùè ɛ̍ blě-aɛ, wɛ̀ i̍h-a fɔ̌ due wlǎ. Wɛ̀ nyɔ̍-a wlǔ mɛ̀sɔɔ̌n (7,000) mɛ̌ dǒ wlù poɔ laa̍ we̍. Nyɔ̍ juh tàn-oɛ, u̍h gbǎ faɔn kaa̍ iě u̍h bɛ̌-ɛ Nyɔsoa-a nynɛ̌ i̍ ɔ̀ nɛ-a dě ja̍i̍wlɔ̀-ɛ.

¹⁴ Chlě-a sɔɔ̌n naɛ sì wɛ̀, jɛ ta̍a̍n naɛ-a mu̍ ji̍ suei̍.

Nyɔsoa-a ǐnchɔ̀-a mɛ̀sɔɔ̌n naɛ bla̍ ɛ̍ dɔ̍gbɛ̍

¹⁵ Wɛ̀ Nyɔsoa-a ǐnchɔ̀-a mɛ̀sɔɔ̌n naɛ bla̍ ɛ̍ dɔ̍gbɛ̍. Iě we̍le wlu̍ klaa sɔ dě ja̍i̍wlɔ̀, ɛ̍ la̍a̍, “Nyɔ̍-a wlu̍ kwa̍ blě-ɛ ɛ̀ nɛ-a nɔ̌ kmɔ̌ we̍-ɛ, ɛ̍ kɔn dǒ à Joi ke ɔ̍ Chèɛ̀ Tba̍ju we̍ wɛ̀. Ɔ̍ mu̍ nyɔ̍-a wlu̍ kwa̍ blě nɔ̌ kmɔ̌-a kmɔ̌.”

¹⁶ Wɛ̀ nyɔ̍ klaaᵻá kwela sɔɔ̌n jɔ̌ nyìɛ̍ ùh tè-a i̍ dǒ u̍h-a nynɛ̌ gbalǎᵻ kɛ̍n dǒ Nyɔsoa jǔ-ɛ, iě u̍h kèàɛ i̍ u̍h sà ɔ̍ wɛɛ.

¹⁷ U̍h la̍a̍, “À po̍ ìn tlɔ̌ Joi Nyɔsoa, mɔ̀ Ɔ̀ Blě-a Gbǐh Kli̍hgbɛ̍-ɛ, mɔ̀ ɔ̀ nɛ-a, ɔ̀ nɛ-a kmɔ̌ se̍e̍-ɛ. Ìn dǔ àn wɔ̍n ku̍ gbǐh i̍, wɛ̀ àn tè ka nyɔ̍-a wlu̍ kwa̍ blě-ɛ gbɔ̀.

¹⁸ Nyɔ̍ ùh se̍-a ìn juo-ɛ u̍h gbǎ jlu̍h-u wɛ̀, iě ɛ̍ nu̍ nàɛ̀ jlu̍h ti̍ wɛ̀, mɛ̌-nyɔ̍ iě sàwi̍h sì. Ti̍ nyni̍ wɛ̀ àn pòi̍nynuu̍ iě ìn dɛ̍ kwa̍a̍ jě, ùh nu̍-a tu̍owli po̍ nyɔ̍-ɛ, ɛ̍ ke àn nyɔ̍ plìh ke klaaᵻ kli̍hgbɛ̍ ùh-a tè-a ìn ja̍-ɛ ke. Ti̍ nyni̍ wɛ̀ ìè nyɔ̍ ùh-a gbɔ̀lɔ-a bloa̍-a gbɔ̀lɔ ke.”

¹⁹ Wɛ̀ Nyɔsoa-a slaǎ sà gbò nɛ-a dě ja̍i̍wlɔ̀-ɛ pɔ̀ni wɔ̍n, iě ɔ̍ Ku̍o̍ Gblòùn jě-eɛ dě ɛ̍ di̍i̍. Wɛ̀ nǐ-a chlɛ jlǐh, iě slɛ̀-a wlu, tɛ̀n-a plǎn-ɛ i̍, wlù poɔ-a ji̍, iě kwa̍ ku̍ seɔn gbo̍ᵻ wlǎ.