Wlɛfeleseɔn 10 - Ku̍o̍ Delee 1999

Nyɔsoa-a ǐnchɔ̀ nyǐ Chɔɔn chlǐh-dɛ̍-a gbo̍lo̍ juwɛ

¹ Wɛ̀ ǐn jě Nyɔsoa-a kmu-u ǐnchɔ̀ dɛɛ, nɛ̀ ɛ̍ sɔ dě ja̍i̍wlɔ̀. Nɛ̀ ɛ̍ pa̍ nǐgban-a, iě nǐnmɛ nu̍ ɛ̍ tèè dɛ̍. Ɛ̍ jua̍a̍ ke jlǔh mu̍i we̍, iě ìn jě ɛ̍ bu̍hᵻɛ́ ka nɛ̍-a pàìbǒ-ɛ.

² Ɛ̍ blě chlǐh-dɛ̍-a gbo̍lo̍ juwɛ ɛ̍ pɔ̀ni wɔ̍i̍n dě ɛ̍ kwa̍a̍. Iě ɛ̍ tba̍ ɛ̍ di̍na̍ bu̍h dǒ jbǒ kɛ̍n i̍, wɛ̀ ɛ̍ kwe̍na̍ bu̍h nɛ dǒ blǔh kɛ̍n.

³ Iě ɛ̍ wǐ ka gbòlò-a klu̍h-ɛ. Ɛ̍ we̍le-aɛ, iě tɛ̀n mɛ̀sɔɔ̌n plǎn.

⁴ Tɛ̀n mɛ̀sɔɔ̌n wɔ̀-a plǎn-aɛ, ǎn ji̍ la̍ chlǐh la̍ de sǔh, wɛ̀ ǐn wɔ̌n wlu̍ ɛ̍ sɔ dě ja̍i̍wlɔ̀. Ɛ̍ la̍a̍, “Bɔ̌ tɛ̀n mɛ̀sɔɔ̌n-a wlu̍ laa̍ chlǐh-ɛ, tè i̍h tà i̍.”

⁵ Wɛ̀ ǐnchɔ̀ laa̍ ɛ̀ nyna-a dǒ jbǒ ke blǔh kɛ̍n i̍-ɛ, iě ɛ̍ to ɛ̍ di̍na̍ sɔ̍n dě ja̍i̍wlɔ̀.

⁶ Iě ɛ̍ slɛ̀ɛ̀n dǒ Nyɔsoa-a nynɛ̌ kɛ̍n, ɔ̀ se̍-a mɛ̌ la̍ kɔn ɔ̀ nu̍-a ja̍i̍wlɔ̀ ke, bloa̍ ke, jbǒ ke dɛ̍ᵻ kli̍hgbɛ̍ nɛ-a i̍h kɛ̍n i̍-ɛ. Ǐnchɔ̀ la̍a̍, “Tlɛ̀n-ɛ se̍ nɛ mu̍ dɛ.

⁷ Jɛ ti̍ ǐnchɔ̀-a mɛ̀sɔɔ̌n naɛ-a mu̍-a dɔ̍gbɛ̍ bla̍-ɛ, nɛ̀ Nyɔsoa-a sìle dɛ̍ kɔn dela̍ ɔ̍ po̍-a dě ɔ̍ tu̍owli po̍ nyɔ̍ ùh nu̍-a ɔ̍ pòi̍nynuu̍-ɛ we̍-ɛ, wɛ̀ i̍h iě chɛ̀-ɛ gbǎ.”

⁸ Wɛ̀ wlu̍ ǐn wɔ̌n-a ɛ̀ sɔ-a dě ja̍i̍wlɔ̀-ɛ, iě ɛ̍ wlu dě ǐn we̍ dɛ. Ɛ̍ la̍a̍, “Mu̍ dě ǐnchɔ̀ laa̍ ɛ̀ nyna-a dǒ jbǒ ke blǔh kɛ̍n i̍-ɛ we̍ ìè chlǐh-dɛ̍-a gbo̍lo̍ ɛ̀ pɔ̀ni-a wɔ̍n dě ɛ̍ kwa̍a̍ i̍ gbɛ̍n.”

⁹ Wɛ̀ ǐn mu̍ dě ǐnchɔ̀ we̍, iě ǐn jbǎ-ɛ ɛ̍ chlǐh-dɛ̍-a gbo̍lo̍ juwɛ laa̍. Ɛ̍ la̍a̍ dě ǐn we̍, “Dǔ ɛ̍-ɛ ìè ɛ̍ di̍. Ɛ̍ mu̍ nya̍ dě àn wùò di̍i̍. Jɛ ɛ̍ mu̍ tǐhlih dě ìn wɔ̍ɔ̍n ka du̍h-ɛ.”

¹⁰ Iě ǐn dǔ chlǐh-dɛ̍-a gbo̍lo̍ juwɛ laa̍ dě ɛ̍ kwa̍a̍ wɛ̀ ǐn di̍ ɛ̍. Wɛ̀ ɛ̍ tǐhlih dě ǐn wɔ̍ɔ̍n ka du̍h-ɛ. Jɛ ǐn mla̍-a ɛ̍-ɛ, iě ɛ̍ nya̍-ɛ dě ǎn wùò di̍i̍.

¹¹ Wɛ̀ nyɔ̍ la̍a̍ dě ǐn we̍, “Ìn kɔn iě Nyɔsoa-a tu̍owli ìh kɔ̍-a dǒ bloa̍ dɔu ke, dakɔ̍ pàɔ̀n ke blǔh baaᵻ pùn i̍-ɛ po̍ dɛ.”