Wlɛfeleseɔn 1 - Ku̍o̍ Delee 1999

¹ Chlǐh-dɛ̍ la bo ɛ̀ sà dɛ̍ᵻ ìh kɔn ìh iě-a nɛ suei̍-ɛ i̍h-a tìh i̍. I̍h bo Nyɔsoa sà tà dě Jusu Klai we̍ ɔ̍ iě i̍h ɔ̍ pòi̍nynuu̍ i̍ to. Klai dbo̍ ɔ̍ ǐnchɔ̀ dě ɔ̍ pòi̍ju Chɔɔn we̍, iě ɛ̍ sèàɛ̍ ɔ̍ wlùh.

² Chɔɔn bo ɔ̀ nu̍ sàànsi̍i̍h dǒ Nyɔsoa-a tu̍owli ke gblangbai̍ Jusu Klai sà-ɛ we̍, ɛ̍ ke jih kli̍hgbɛ̍-a chɛ̀ ɔ̍ jě-aɛ ke.

³ Nyɔ̍ ùh-a slè-a dɛ̍ ɛ̀ chlǐh-dɛ̍ la ɛ̍ sà-a ìh-a nɛ-a ke jih-a mu̍-a nɛ dě nya̍-ɛ, nɛ̀ u̍h nmɔ i̍. Nɛ̀ dɛ̍ᵻ ìh nɛ-a dě ɛ̍ di̍i̍ pò nyɔ̍ wɔ̌n i̍h, wɛ̀ u̍h iě i̍h i̍ gbɛ̍n-ɛ, nɛ̀ u̍h nmɔ i̍. Dɛ̍nu̍ɛ, ti̍ ìh la i̍h-a mu̍-a nɛ-ɛ, ɛ̍ kɔǎn we̍ wɛ̀.

Chɔɔn sà chɔchi̍h nyɔ̍ nɛ-a wlɔ̀ᵻ mɛ̀sɔɔ̌n di̍i̍ i̍-ɛ nyinɔ̍ i̍

⁴ Mɔ̍ Chɔɔn, mɔ̍ sà chɔchi̍h nyɔ̍ nɛ-a wlɔ̀ᵻ mɛ̀sɔɔ̌n nɛ-a dě Esea bloa̍ kɛ̍n-ɛ nyinɔ̍ i̍. Ǎn sà nǐ wɔ̍n blɛ ke wlùh-a i̍ tè-ɛ iě dǒ mɔ̀ we̍ nɛ. Nyinɔ̍ i̍ sà wlu̍ la ɛ̍ sɔ dě Nyɔsoa we̍, ɔ̀ nɛ-a, ɔ̀ nɛ-a kmɔ̌ se̍e̍ wɛ̀ ɔ̀ mu̍-a ji̍-ɛ. Ɛ̍ sɔ dě sùù mɛ̀sɔɔ̌n ìh-a dbee-a ɔ̍ jǔ ìh nɛ-a dǒ ɔ̍ nynɛ̌ gbalǎ jǔ-ɛ we̍ ke.

⁵ Ɛ̍ sɔ dě sàànsi̍i̍h Jusu Klai ɔ̀-ɔ gblìh-a wlu̍ kɛ̍n-ɛ we̍ ke. Ɔ̍ bo ɔ̀ nu̍ sàǐtòò Jǔ ɔ̀ wlǔh-e, iě ɔ̍ blě blǔh baaᵻ nɛ-a nɔ̌ kmɔ̌ we̍-ɛ u̍h-a wlu̍ kwa̍. Jusu Klai jbɛɛ àɔ̀ iě ɔ̍ sèìe àɔ̀ dě à gblɛ̍n sɔ̀ɛ̀n di̍i̍ dǒ ɔ̍ nymɔ̍ we̍.

⁶ Wɛ̀ ɔ̍ nu̍ à kmɔ̌ wlu̍ i̍ kɔn nyɔ̍ ke slaǎ sà nyɔ̍ we̍i̍ à iě ɔ̍ Baa Nyɔsoa jǔ dbee. Tìh-a i̍ bɛ̌-ɛ ke gbǐh kɔn dǒ Jusu Klai we̍ nɔ̌ kmɔ̌-a kmɔ̌. Kǎ ɛ̍-ɛ nɛ.

⁷ Mɔ̀ tù ɛ̍ jlǐhɛ̍ ɔ̍ mu̍ dě nǐgbanᵻ kɛ̍n naɛ blě ɔ̍ iě ji̍. Wɛ̀ nyɔ̍ kli̍hgbɛ̍ iě ɔ̍ jě, ɛ̍ ke juh dbǎ ɔ̍-ɛ ke. Nɛ̀ nyɔ̍ kli̍hgbɛ̍ nɛ-a nɔ̌ kmɔ̌-ɛ, u̍h-a mu̍ sùàɛ̀n pa̍ ɔ̍ tìh. Kǎ ɛ̍-ɛ nɛ.

⁸ Joi Nyɔsoa Ɔ̀ Blě-a Gbǐh Kli̍hgbɛ̍, ɔ̀ nɛ-a, ɔ̀ nɛ-a kmɔ̌ se̍e̍ wɛ̀ ɔ̀ mu̍-a ji̍-ɛ, ɔ̍ la̍a̍, “Mɔ̍ bo ɔ̀ nu̍ dɛ̍ᵻ kli̍hgbɛ̍-a Gbɔ̀ Tè-ɛ ke i̍h-a Dlǔ I̍ Chlà-a.”

Chɔɔn jě Klai ɔ̀ wlǔh-aeɛ

⁹ Mɔ̍ Chɔɔn la, mɔ̀ ke ǐn ke à ji̍ de̍di̍i̍. Mɔ̀ ke ǐn ke à gbaɛ Jusu wlùh, ɛ̍ kɔn à sàɛ̀ jua̍i̍ iě à kɔn dǒ ɔ̍ kmɔ̌ wlu̍ i̍ kɔn-ɛ we̍. Wɛ̀ à gbɛ̍n wlùh i̍ à ku̍-e klì i̍. Ǎn bla̍ Nyɔsoa tìh ɛ̍ ke gblangbai̍ Jusu sà-ɛ ke. Ɛ̍ kɔn mɔ̍ bo u̍h po̍ nɔ̌ tbǒ la u̍h-a dǎɛ-a Pamɔ-ɛ kɛ̍n.

¹⁰ Nyɔsoa-a Sùù jǐi ǐn i̍ dǒ Joi-a fɔ-weɛ̍ di̍i̍ wɛ̀ ǐn wɔ̌n wǐi wlu̍ dǒ ǐn de̍e̍ ka dɔ̍gbɛ̍-a wlu̍-ɛ.

¹¹ Ɛ̍ la̍a̍, “Chlǐh dɛ̍ ìn jě-a dě chlǐh-dɛ̍-a gbo̍lo̍ di̍i̍-ɛ, nɛ̀ ìn dbo̍ ɛ̍ dě chɔchi̍h nyɔ̍ nɛ-a wlɔ̀ᵻ mɛ̀sɔɔ̌n la di̍i̍ i̍-ɛ we̍, Ɛfɛsɔ ke Smana ke Pɛkamɔ ke Taɛtawla ke Sade ke Feledɛɛfia ke Leodesia.”

¹² Wɛ̀ ǐn bǐi kwa̍ iě nyɔ̍ ɔ̀ wlu-a dě ǐn we̍-ɛ jě. Dǒ ǐn jě-e chlǎn nape̍-a kɛ̍n tè dɛ̍ᵻ mɛ̀sɔɔ̌n, nɛ̀ i̍h nu̍ kòo̍.

¹³ Wɛ̀ dɛ̍ nɛ dě i̍h nynɛ̌ ɛ̍ ke nyi̍ɔ̍-a jǔ wɔ̀ɛ. Ɔ̍ pa̍ plɛ̀i̍ tɔ̀ɔ̀n iě ɔ̍ wlǎ kòo̍ wola̍ wlì i̍.

¹⁴ Ɔ̍ mǐ plǔ-i ka kǒ-gbo̍-ɛ. Iě ɔ̍ jlǐh wɔ̀ nɛ̍-a pàìbǒ.

¹⁵ Ɔ̍ bu̍hᵻ wɔ̀ ka nyɔ̍ po̍ tìɛ̀n jlǐh-ɛ. Nɛ̀ ɔ̍ ja wlu-ɛ ka nǐ-a klu̍h-ɛ.

¹⁶ Nɛ̀ ɔ̍ blě chǔhtlɛ̀n mɛ̀sɔɔ̌n dě ɔ̍ di̍na̍ kwa̍a̍. Wɛ̀ nmǎ-a plàn chlɛ̀n sɔ dě ɔ̍ wɔ̍ɔ̍n, iě ɔ̍ jua̍a̍-a fa̍n ka sìi̍ jlǔh-ɛ.

¹⁷ Ǐn jě-a ɔ̍-ɛ, wɛ̀ ǐn kà i̍ dǒ ɔ̍ jǔ ka nyɔ̍ mɛ̌-ɛ. Jɛ ɔ̍ tè ɔ̍ di̍na̍ sɔ̍n dǒ ǐn dlǔ i̍, iě ɔ̍ la̍a̍, “Bɔ̌ faɔn ple̍-ɛ. Mɔ̍ bo ɔ̀ nu̍ sàǐtòò nyɔ̍ ke bɔ̌ɛ-o nyɔ̍.

¹⁸ Mɔ̍ bo ɔ̀ nu̍ Kmɔ̌ Nɛ Nyɔ̍. Ǐn mɛ̌-ɛ de, jɛ ǐn nɛ kmɔ̌ wɛ̀ dode̍ nɔ̌ kmɔ̌-a kmɔ̌. Ǐn blě mɛ̌ɛ ke mɛ̌-nyɔ̍-a kmɔ̌-a kɔɛ̍nᵻ.

¹⁹ Kaka la̍ dɛ̍ ìn jě-aɛ, chlǐh ɛ̍. Nɛ̀ ìn chlǐh dɛ̍ᵻ jih nɛ-aɛ ke jih-a mu̍-a nɛ dě nya̍-ɛ.

²⁰ Dɛ̍ᵻ ìh sìle-a ìh nu̍-a chǔhtlɛ̀n mɛ̀sɔɔ̌n ìn jě-a dě ǎn di̍na̍ kwa̍a̍-ɛ ke chlǎn nape̍ᵻá kɛ̍n tè dɛ̍ᵻ mɛ̀sɔɔ̌n laa̍ ìh nui-a kòo̍-ɛ, i̍h-a gbɔ̀ la. Chǔhtlɛ̀n mɛ̀sɔɔ̌n laa̍ bo ìh nu̍ Nyɔsoa-a ǐnchɔ̀ dǒ chɔchi̍h nyɔ̍ nɛ-a wlɔ̀ᵻ mɛ̀sɔɔ̌n di̍i̍-ɛ we̍. Wɛ̀ chlǎn nape̍ᵻá kɛ̍n tè dɛ̍ᵻ mɛ̀sɔɔ̌n nu̍ chɔchi̍h mɛ̀sɔɔ̌n-a chɛ̀.”