Nu̍-dɛ̍ᵻ 9 - Ku̍o̍ Delee 1999

Sɔɔ-a Nyɔsoa dɛ-ɛ gbǎ-a

¹ Dǒ ti̍ laa̍ di̍i̍-ɛ, nɛ̀ Sɔɔ-a chɛ̍n Joi-a kòà sìì we̍ i̍ ɔ̍ iě u̍h gbe̍ja̍a̍ poe. Ɛ̍ bo ɛ̀ gba̍ ɔ̍ dě Nyɔsoa-a slaǎ sà nyɔ̍ klaa we̍.

² Wɛ̀ ɔ̍ sèàɛ̍ ɔ̍ wlùh ɔ̍ iě ɔ̍ chlǐh-dɛ̍ᵻ nyǐ, i̍h iě dě wɛɛ sà gbòᵻ nɛ-a dǒ Damaɛkɔ wlɔ̀-ɛ di̍i̍ i̍ mu̍. Wɛ̀ pò ɔ̍ jě nynɔ̌gbaɔᵻ ke jɔ̍gbauᵻ u̍h ja Joi Jusu-a Wìè gba̍-ɛ, ɔ̍ iě u̍h gbɛ̍n-nyɔ̍ we̍i̍ nu̍ ɔ̍ iě u̍h dǒ Juluslɛn gba̍.

³ Wɛ̀ ɔ̍ gbǎ wìè kɛ̍n. Ɔ̍ kɔǎɛn Damaɛkɔ i̍ wɛ̀ sǔh, ɔ̍ iě-a kèle-ɛ nɛ̀ fààn nape̍ sɔ dě ja̍u̍n we̍ ɛ̍ wa̍n sààn ɔ̍ de̍e̍ i̍.

⁴ Iě ɔ̍ kà i̍ dǒ bloɔ̍. Dǒ ɔ̍ wɔ̌n-ɛ wlu̍ ɛ̍ la̍a̍ dě ɔ̍ we̍, “Sɔɔ, Sɔɔ, dɛ̍ kɔn mɔ̍ àn jě-e klě ɛ?”

⁵ Iě ɔ̍ la̍a̍, “Nyɔ̍ bo ɛ?” Wɛ̀ ɔ̍ la̍a̍, “Mɔ̍ Jusu, ɔ̀ àn jě-ea klě-ɛ.

⁶ Jɛ sɔ bloɔ̍ ìè dǒ tùgbàwlɔ̀ di̍i̍ mu̍. Dɛ̍ ìn kɔn ìè-a nu̍-ɛ, dě-e bo nyɔ̍ nɛ ɔ̍ iě ɛ̍ ìn wlùh sèàɛ̍.”

⁷ Nyɔ̍ ùh ke Sɔɔ na-ɛa wìè-iɛ, u̍h wɔ̌n wlu̍ laa̍ jɛ u̍h se̍ nyɔ̍ jě. U̍h nyna i̍, iě u̍h se̍ wɔ̍n-a fuɛn nu̍.

⁸ Sɔɔ sɔ-a dǒ bloɔ̍-ɛ iě ɔ̍ pɔ̀ni jlǐh, jɛ nɛ̀ ɔ̍-ɔ jě i̍. Wɛ̀ u̍h gbɛ̍n ɔ̍ sɔ̍n i̍, iě u̍h gba̍ ɔ̍ dǒ Damaɛkɔ wlɔ̀ di̍i̍.

⁹ Wɛ̀ dě ɔ̍ jlǐh gbe-e dǒ wǐh ta̍a̍n di̍i̍, ɔ̍ se̍ niɛ̍ nǎ.

¹⁰ Nɛ̀ Jusu-a kòà due nɛ dǒ Damaɛkɔ, ɔ̍ nynɛ̌ bo Ɛlenaea. Wɛ̀ Joi dǎ ɔ̍ dě se̍ mɔ̌ ja̍ di̍i̍, ɔ̍ la̍a̍, “Ɛlenaea.” Iě Ɛlenaea la̍a̍, “Mɔ̍ la o Joi.”

¹¹ Wɛ̀ Joi la̍a̍ dě ɔ̍ we̍, “Sɔ-ɔ, mu̍ dě wìè ɛ̀ Kɔn nynɛ̌ nu̍-a Slɛ̌ i̍-ɛ kɛ̍n dě Juda blǐ gbò. Sɔɔ ɔ̀ sɔ-a dǒ Tasɔ-ɛ, dě ɔ̍ nɛ ɔ̍ ba̍le, nɛ̀ ìn tèle ɔ̍ tìh i̍.

¹² Mɔ̀ bo ɔ̍ jě dě ɔ̍ se̍ mɔ̌ ja̍ di̍i̍, nɛ̀ ìn ji̍ i̍ wɛ̀ ìn tè ɔ̍ sɔ̀n dlǔ ɔ̍ iě i̍ jě dode̍.”

¹³ Iě Ɛlenaea la̍a̍, “Joi, jɔ̍gbau la ǐn dǔ ɔ̍ pɔ̀n wɔ̌n-ɛ se̍e̍ dě nyɔ̍ dɔu wɔ̍ɔ̍n. U̍h la̍ ɔ̍ nu̍ dɛ̍ᵻ gbàìn gbàìn dǒ àn nyɔ̍ nɛ-a dě Juluslɛn-ɛ pùn.

¹⁴ Ɛ̍ kɔn tìh bo slaǎ sà nyɔ̍ klaaᵻ nyǐ ɔ̍ tùn wɛ̀ ɔ̍ ji̍ nɔ̍ɔ̀ ɔ̍ iě nyɔ̍ ɔ̀ mu̍-a àn nynɛ̌ i̍ dǎ-a gbɛ̍n.”

¹⁵ Jɛ Joi la̍a̍ dě ɔ̍ we̍, “Mu̍, dɛ̍nu̍ɛ, ǐn tba̍ ɔ̍ chèɛ̀ wɛ̀ ɔ̍ iě ǐn jǔ dbee, wɛ̀ ɔ̍ iě ǎn nynɛ̌ dě ùh se̍-a Juu nyɔ̍-ɛ ke blǔh baaᵻ we̍ gba̍, ɛ̍ ke dě Eslɔɛ nyɔ̍ we̍ ke.

¹⁶ Nɛ̀ ǎn mu̍ ɛ̍ ɔ̍ i̍ to ka ɔ̍ mu̍-a jua̍i̍ sàɛ̀-ɛ nu̍ dɛ̍blɔ dǒ ǎn nynɛ̌-a tìh we̍-ɛ.”

¹⁷ Wɛ̀ Ɛlenaea mu̍ iě ɔ̍ pa̍ dě Sɔɔ we̍ gbò, wɛ̀ ɔ̍ tè ɔ̍ sɔ̍n dlǔ. Ɔ̍ la̍a̍, “De̍di̍i̍ Sɔɔ, ti̍ àn ji̍-a nɔ̍ɔ̀-ɛ, Joi Jusu ɔ̀ wlùh-ia ìn i̍ dǒ wìè-iɛ, ɔ̍ bo ɔ̀ dbo̍ m̍ nɔ̌ ìn we̍ ìè i̍ jě dode̍, Nyɔsoa-a Sùù iě ìn i̍ jǐi.”

¹⁸ Dǒ tàdùè laa̍ dɛ̍ ɛ̀ sɔ-a dě ɔ̍ jlǐh-ɛ, ka dɛ̍-a kɔ̌n-ɛ. Sɔ ɔ̍ jě la̍ i̍ dode̍ sǔh. Wɛ̀ ɔ̍ sɔ bloɔ̍, iě ɔ̍ poe-ɛ nǐ dlǔ.

¹⁹ Iě ɔ̍ di̍ dɛ̍, wɛ̀ ɔ̍ dǔ gbǐh jě-ɛ dode̍. Sɔɔ sì wǐh gbɔ̍ dě Jusu-a kòà nɛ-a dǒ Damaɛkɔ-ɛ we̍.

Sɔɔ dɛ wlǔh i̍ nyɔ̍gbei de̍e̍

²⁰ Dǒ ɔ̍ nyna iě ɔ̍ mu̍ dě wɛɛ sà gbòᵻ sɔ̀n i̍ wɛ̀ ɔ̍ bla̍ tìh, ɔ̍ la̍a̍, “Jusu nu̍ Nyɔsoa-a Jǔ.”

²¹ Nyɔ̍ kli̍hgbɛ̍ ùh wɔ̌n-a ɔ̍ wlu̍-ɛ, sɔ ɛ̍ wlǔh i̍ u̍h de̍e̍, wɛ̀ u̍h-a tèle-e we̍ i̍. U̍h la̍a̍, “Pò nyɔ̍ dǎ nynɛ̌ la-ɛ, jɔ̍gbau ɔ̀ gbɔ̀lɔ-a nyɔ̍-ɔ dě Juluslɛn-ɛ, ɛ̍ se̍ ɔ̍ mɔ ae? Ɛ̍ se̍ ɔ̍ iě u̍h gbɛ̍n wɛ̀ ɔ̍ iě u̍h slaǎ sà nyɔ̍ klaaᵻ we̍ gba̍ tìh ɔ̍ se̍ nɔ̍ɔ̀ ji̍ ae?”

²² Jɛ gbǐh-a gbǎ dě Sɔɔ ku̍u̍ te̍e̍ kleǐn, iě ɔ̍ flɔn-ɛ ɛ̍ we̍i̍ te̍gbe̍i̍n ka Jusu bo ɔ̀ nu̍-a Nyɔsoa-a Chèɛ̀ Tba̍ju-ɛ. Sɔ ɛ̍ se̍ Juu nyɔ̍ nɛ-a dǒ Damaɛkɔ-ɛ wlu̍ wɔ̍n nyǐ.

²³ Ɛ̍ gba̍ wǐh dɔu wɛ̀ Juu nyɔ̍ gbòe i̍, iě u̍h sɔ̌ u̍h iě ɔ̍ dbǎ.

²⁴ Jɛ nyɔ̍ di̍ Sɔɔ-a doun ka u̍h-a fuo-a saǎn wɔ̍n wlù ke sɔ̀n u̍h iě-a ɔ̍ dbǎ-a.

²⁵ Wɛ̀ ɔ̍ kòà dǔ ɔ̍-ɔ maɔ̍, u̍h po̍ ɔ̍ dě tìa̍a̍n di̍i̍. Wɛ̀ u̍h jaɛ ɔ̍ dǒ saǎn-a fɛ̍nwɔn we̍, iě u̍h tlìh-i ɔ̍.

Sɔɔ mu̍ Juluslɛn i̍ nala

²⁶ Ti̍ Sɔɔ mu̍-a dǒ de̍ Juluslɛn-ɛ, sɔ ɔ̍ pɔ̀n Jusu-a kòà nɛ-a deě-ɛ nynɛ̌ gbǎ-a i̍, jɛ nɛ̀ u̍h-a ple̍ ɔ̍ jǔ. Dɛ̍nu̍ɛ, ka ɔ̍ iě-a Jusu-a kòà nu̍ wɛ̀-ɛ, u̍h se̍ ɛ̍ tìh chɛ̀ po̍.

²⁷ Jɛ Banaba dǔ ɔ̍, iě ɔ̍ gba̍ ɔ̍ dě gba̍tòà we̍. Wɛ̀ ɔ̍ sèàɛ̍ u̍h wlùh ka Sɔɔ jě-a Joi dǒ wìè-i iě Joi wlu-a dě ɔ̍ we̍-ɛ. Wɛ̀ ɔ̍ bla̍ Nyɔsoa-a tìh gbài̍gbài̍ dǒ Damaɛkɔ wlɔ̀ di̍i̍, dǒ Jusu-a nynɛ̌ kɛ̍n.

²⁸ Wɛ̀ Sɔɔ sie dǒ u̍h we̍, ɔ̍ ke u̍h-a nu̍ mu̍-ɔn ji̍-ɔn dǒ Juluslɛn. Wɛ̀ ɔ̍ bla̍ tìh gbài̍gbài̍ dǒ Joi-a nynɛ̌ kɛ̍n.

²⁹ Iě ɔ̍ wlu dě Juu nyɔ̍ ùh-a po̍-a Klii wlu̍-ɛ we̍, ɔ̍ ke u̍h-a sà wɔ̍ɔ̍n i̍. Sɔ u̍h-a pɔ̀n la̍ ɔ̍ dbǎ-a i̍ sǔh.

³⁰ Jɛ ti̍ de̍di̍i̍ᵻ juo-ao dɛ̍ i̍-ɛ, iě u̍h dǔ ɔ̍ wɛ̀ u̍h gba̍ ɔ̍ dǒ Sɛsewlia wlɔ̀ di̍i̍. Iě u̍h dbo̍ ɔ̍ dǒ Tasɔ wlɔ̀ di̍i̍.

³¹ Sɔ chɔchi̍h nyɔ̍ kli̍hgbɛ̍ nɛ-a dě Judia ke, Kaladii ke Sɛmewlea bloa̍ kɛ̍n i̍-ɛ, u̍h-a wlùh tè i̍, wɛ̀ u̍h-a gbǐh-a gbǎ-e. Nɛ̀ ka u̍h-a ple̍-a Joi-a faɔn-ɛ, nɛ̀ kǎ Nyɔsoa-a Sùù-a gbǎ u̍h we̍. Iě u̍h ku̍ dɛ̍blɔ.

Pitɛ nɛ Leda ke Jɔɔpa

³² Pitɛ na Nyɔsoa nyɔ̍ we̍ i̍ na na-a, wɛ̀ ɔ̍ mu̍ dě juh tǐn-a dǒ Leda wlɔ̀ di̍i̍-ɛ we̍ i̍ nala weɛ̍ due we̍.

³³ Dě ɔ̍ jɛɛ jɔ̍gbau due ɔ̍ nynɛ̌ bo Enia. Ɔ̍ klɔ-ɛ, tà ɔ̍ pɛ̌n-a i̍-ɛ, dǒ ɔ̍ nui dɛ̍ᵻ kli̍hgbɛ̍ dǒ sɔ̀nᵻ mɛ̀ta̍a̍n di̍i̍.

³⁴ Wɛ̀ Pitɛ la̍a̍ dě ɔ̍ we̍, “Enia, Jusu Klai pǔh-i m̀ wɛ̀. Sɔ bloɔ̍ ìè àn bèe̍ nma̍le.” Dǒ ɔ̍ nyna iě ɔ̍ sɔ bloɔ̍.

³⁵ Nyɔ̍ kli̍hgbɛ̍ nɛ-a dǒ Leda ke Seɛwlɔn fɔɔ-ɛ, iě u̍h jě ɔ̍, wɛ̀ ɛ̍ fèàɛ̀ u̍h kli̍hgbɛ̍ dě Joi we̍.

³⁶ Nɛ̀ nynɔ̌ due nɛ dǒ Jɔɔpa wlɔ̀ di̍i̍ ɔ̍ nynɛ̌ bo Tabita (ɛ̍ Klii wlu̍ nu̍ Dɔɔka. Ɛ̍ gbɔ̀ nu̍ kwɛ̍). Ɔ̍ blě wlùh gbaɛ-ɛ. Ɔ̍ nu̍ dɛ̍ᵻ chɛ̀ ti̍ kli̍hgbɛ̍ we̍ iě ɔ̍ gbǎ nyɔ̍gbà nyɔ̍ we̍.

³⁷ Dǒ ti̍ laa̍ di̍i̍ bo ɔ̍ poa-ɛ iě ɔ̍ mɛ̌. Wɛ̀ u̍h dle ɔ̍ kǔ iě u̍h pɛ̌n-ɛ ɔ̍ i̍ dě ja̍i̍ gbòju di̍i̍.

³⁸ Jɛ Jɔɔpa ke Leda se̍ we̍ i̍ ti̍ɛ̍ɛn, wɛ̀ Jusu-a kòà nɛ-a Jɔɔpa-a iě u̍h wɔ̌n Pitɛ-a nynɛ̌ dǒ Leda. U̍h dbo̍-e jɔ̍gbauᵻ sɔɔ̌n, u̍h tù u̍h wlu̍ wɔ̍n u̍h iě Pitɛ dǎ. U̍h la̍a̍, “Dbǎkà, wa̍n bloɔ̍ ìè nɔ̌ àɔ̀ we̍ ji̍.”

³⁹ Wɛ̀ Pitɛ wa̍n bloɔ̍, ɔ̍ gbǎ dǒ u̍h de̍e̍ ɔ̍ ke u̍h mu̍. U̍h nyni̍-a wlɔ̀-ɛ, iě u̍h-a gba̍ Pitɛ dě ja̍i̍ gbòju di̍i̍ tà nynɔ̌-a kǔ pɛ̌n-a i̍-ɛ. Wɛ̀ tèwànynɔ̌gbaɔᵻ kli̍hgbɛ̍ nɛ-a dǒ wlɔ̀-a chɛ̀ di̍i̍-ɛ, iě u̍h dlɛ̌ Pitɛ u̍h-a fìn. Ti̍ Dɔɔka tè-a kmɔ̌ i̍-ɛ, plɛ̀i̍ᵻ ke wola̍ᵻ ɔ̍ tba̍-a dǒ u̍h we̍-ɛ, nɛ̀ kǎ u̍h-a to i̍h Pitɛ i̍.

⁴⁰ Jɛ Pitɛ po̍ u̍h kli̍hgbɛ̍ sɔ̀n i̍. Wɛ̀ ɔ̍ po̍ kɔlu̍ᵻ wlù iě ɔ̍ ba̍le. Iě ɔ̍ fèàɛ̀ dě nynɔ̌-a kǔ we̍, wɛ̀ ɔ̍ la̍a̍, “Tabita, sɔ bloɔ̍.” Wɛ̀ ɔ̍ pɔ̀ni jlǐh, ɔ̍ jě-a Pitɛ-ɛ, iě ɔ̍ sɔ bloɔ̍ ɔ̍ tè i̍.

⁴¹ Wɛ̀ Pitɛ dǔ ɔ̍ ja̍i̍ iě ɔ̍ nyna i̍. Iě Pitɛ dǎ wlùh gbaɛ-ɛ blě nyɔ̍ ke u̍h-a tèwànynɔ̌gbaɔᵻ, wɛ̀ ɔ̍ nɛ feɛ wɔ̍i̍n iě ɔ̍ sà ɔ̍ kwlǎ dě u̍h we̍.

⁴² Ɛ̍ pɔ̀n laa̍ bo ɛ̀ sɛ̍ i̍ dǒ Jɔɔpa, iě nyɔ̍ dɔu gbaɛ Joi wlùh.

⁴³ Wɛ̀ Pitɛ sì wǐh dɔu dǒ Jɔɔpa dǒ Samo ɔ̀ nu̍-a dɛ̍ᵻ ku̍ᵻɛ́ we̍.