Nu̍-dɛ̍ᵻ 8 - Ku̍o̍ Delee 1999

¹ Sɔɔ bo ɔ̀ wɔ̌ɛn Slifɛn-a mɛ̌ɛ dɛ kɛ̍n i̍. Sɔ dǒ weɛ̍ laa̍ di̍i̍-ɛ, nɛ̀ chɔchi̍h nɛ-a dǒ Juluslɛn-ɛ, ɛ̍ klě jě-ɛ sìì-o dɛ̍ i̍ wɛ̀. Jusu-a gba̍tòà kɔn tɛ̀ ǐn sà-o. Jɛ wlùh gbaɛ blě nyɔ̍ kli̍hgbɛ̍ juh sie-a dode̍-ɛ, u̍h gbà ja̍i̍. Duuh mu̍ Judia fɔɔ, iě duuh mu̍ Sɛmewlea.

Sɔɔ jě-e chɔchi̍h klě

² Nyɔsoa nyɔ̍ duuh bo ùh tè Slifɛn i̍, iě u̍h fìn ɔ̍ dɛ̍blɔ.

³ Sɔ Sɔɔ tè chɔchi̍h jii̍ nyni-ɛ gbɔ̀ wɛ̀ kleǐn. Nɛ̀ ɔ̍ sà nynɔ̌gbaɔᵻ ke jɔ̍gbauᵻ gbòᵻ i̍, wɛ̀ ɔ̍ blě u̍h i̍ klǎ-a ɔ̍ po̍ u̍h kasoo.

Felɔ bla̍ pɔ̀n chɛ̀ dě Sɛmewlea

⁴ Nyɔ̍ ùh gbà-a ja̍i̍-ɛ, ìh u̍h mu̍-a i̍-ɛ, nɛ̀ kǎ u̍h-a bla̍ Nyɔsoa-a tìh ke sǔh.

⁵ Felɔ mu̍-a dě Sɛmewlea nyɔ̍-a tùgbàwlɔ̀ di̍i̍-ɛ, wɛ̀ ɔ̍ bla̍ Nyɔsoa-a Chèɛ̀ Tba̍ju-a tìh dě nyɔ̍ nɛ-a deě-ɛ we̍.

⁶ Ti̍ nyɔ̍ tlùgbei̍ wɔ̌n-a Felɔ-a wlu̍ wɛ̀ u̍h jě-a jbaɛdih ìh poe-a dě ɔ̍ ja̍a̍-ɛ, sɔ dě ɔ̍ we̍ bo u̍h-a dounᵻ kli̍hgbɛ̍ nɛ wɛ̀ kleǐn.

⁷ Nɛ̀ nyɔ̍ dɔu blě jeědih dǒ u̍h de̍e̍. Nɛ̀ i̍h-a wǐi i̍ wɛ̀ i̍h-a sɔ u̍h de̍e̍ i̍. Wɛ̀ klɔ-nyɔ̍ ke i̍ kɔ̌-nyɔ̍ sùɛ̀ pǔh.

⁸ Sɔ ɛ̍ mɔna̍ nɛ-a dǒ tùgbàwlɔ̀ laa̍ di̍i̍-ɛ ɛ̍ sìì-o dɛ̍ i̍.

⁹ Ɛ̍ ti̍ laa̍ nɛ̀ jɔ̍gbau due nɛ-a dǒ u̍h-a wlɔ̀-a chɛ̀ di̍i̍-ɛ, ɔ̍ nynɛ̌ bo Samo. Wòjù kaɛn ɔ̍ nu̍-a te̍e̍-ɛ, ɛ̍ wlǔh i̍ Sɛmewlea nyɔ̍ kli̍hgbɛ̍ de̍e̍. Ɛ̍ kɔn wɔ̍n bo ɔ̍ po̍ i̍, ɔ̍ la̍ ɔ̍ ku̍ wɔ̍n.

¹⁰ Sɔ plǒai nyɔ̍ ke dɛ̍kɛ̍n gbǎ nyɔ̍ kli̍hgbɛ̍ dě ɔ̍ we̍ bo u̍h-a dounᵻ nɛ wɛ̀ sǔh. Wɛ̀ u̍h la̍a̍, “Nyɔsoa-a gbǐh ìh ku̍-a wɔ̍n à dǎ-aɛ, i̍h bo jɔ̍gbau la ɔ̍ blě.”

¹¹ Sɔ dǒ ɔ̍ de̍e̍ bo u̍h wɔ̀ wɛ̀ sǔh, dɛ̍nu̍ɛ, ɔ̍ wlè wòjù nu̍ gbai wɛ̀. Ɛ̍ kɔn ɛ̍ sàɛ̀-e u̍h-a wlùh i̍.

¹² Jɛ ti̍ Felɔ bla̍-a pɔ̀n chɛ̀ ɛ̀ kɔ̍-a dǒ Nyɔsoa-a kmɔ̌ wlu̍ i̍ kɔn-ɛ ke Jusu Klai pùn i̍-ɛ, iě u̍h po̍ ɔ̍ wlu̍ laa̍ tìh chɛ̀. Wɛ̀ nynɔ̌gbaɔᵻ ke jɔ̍gbauᵻ po̍ nǐ dlǔ.

¹³ Wɛ̀ Samo-a chɛ̀ po̍ i̍h tìh chɛ̀ ke, iě ɔ̍ po̍ nǐ dlǔ. Wɛ̀ ɔ̍ gbǎ dǒ Felɔ de̍e̍, dɛ̍nu̍ɛ nɛ̀ nyɔ̍ wɔ̍n flɔn-ɛ dɛ̍ᵻ ke jbaɛdih ìh-a poe-a ɔ̍ tba̍-a jlǐhɛ̍-ɛ, i̍h wlǔh i̍ ɔ̍ de̍e̍ kaa̍.

¹⁴ Jusu-a gba̍tòà nɛ-a dǒ Juluslɛn-ɛ, u̍h wɔ̌n-a pɔ̀n ka Sɛmewlea nyɔ̍ gbɛ̍n-a Nyɔsoa-a wlu̍ i̍-ɛ, wɛ̀ u̍h dbo̍ Pitɛ ke Chɔɔn dě u̍h we̍.

¹⁵ U̍h nyni̍-aɛ, wɛ̀ u̍h ba̍le dǒ u̍h-a tàà u̍h iě Nyɔsoa-a Sùù jě.

¹⁶ Dɛ̍nu̍ɛ, Nyɔsoa-a Sùù se̍a u̍h-a nyɔ̍-o-nyɔ̍ kɛ̍n sǐ. Jɛ dǒ Joi Jusu nɛ due-a nynɛ̌ kɛ̍n bo u̍h poe nǐ dlǔ wɛ̀ sǔh.

¹⁷ Wɛ̀ Pitɛ ke Chɔɔn tè u̍h sɔ̍n dlǔ, iě u̍h dǔ Nyɔsoa-a Sùù jě-ɛ.

¹⁸ Ka u̍h-a nyɔ̍ sɔ̍n dlǔ tè-ɛ bo ɛ̀ jě-ea nyɔ̍ Nyɔsoa-a Sùù-ɛ, ɛ̍ bo Samo jě, iě ɔ̍ nyǐ u̍h wlǐ.

¹⁹ Ɔ̍ la̍a̍, “Gbǐh la mɔ̀ nyǐ i̍h m ke wɛ̀ pò ǐn tè nyɔ̍-o-nyɔ̍ sɔ̍n dlǔ-ɛ, ɔ̍ iě Nyɔsoa-a Sùù jě ke lě.”

²⁰ Wɛ̀ Pitɛ la̍a̍ dě ɔ̍ we̍, “Ka àn pɔ̀n-a ìè-a Nyɔsoa-a nyǐ-dɛ̍ wlǐ-i tɛ̀n-ɛ i̍-ɛ, ìn ke àn wlǐ-a chɛ̀ ke mɔ̀-a mu̍ fukǎ gbǎ.

²¹ Ìn se̍ dɛ̍ kɔn nɔ̌ à dbo̍ la di̍i̍, iě mɔ̀ɔ̍ ìn se̍ nɔ̌ dɛ̍ jě-e mu̍ ke. Dɛ̍nu̍ɛ, pɔluh ìn blě-aɛ, ɛ̍ se̍ dě Nyɔsoa jlǐh-i nmɔ.

²² Ɛ̍ tìh-ɛ, bǐi i̍ ìè àn kà kɔn gblɛ̍n la i̍ tǎli. Nɛ̀ ìn ba̍le Joi, pò ɛ̍ nɛ-ɛ ka̍-a, nɛ̀ ìh kaɛn la àn naɛ-a wlùh i̍-ɛ, nɛ̀ ɔ̍ mu̍ i̍h-a tìh i̍ tǎli.

²³ Dɛ̍nu̍ɛ, ǎn gbɛ̀n-a ìn ja̍-ɛ, wlɛ̀n plǔ bo ìn kɔn, iě ìn nu̍ gblɛ̍n sɔ̀ɛ̀n-a kèi̍.”

²⁴ Wɛ̀ Samo la̍a̍ dě Pitɛ ke Chɔɔn we̍, “Mɔ̀ dbǎkà, mɔ̀ iě Joi ba̍le dǒ ǎn tàà, wɛ̀ ìh la mɔ̀-a bla̍-aɛ, i̍h-a dɛ̍-ɛ jěe ǐn pùn nɛ.”

²⁵ U̍h wɔ̀-a tìh we̍ i̍ sèàɛ̍ ke Joi-a wlu̍ bla̍ dɛ nu̍-ɛ, wɛ̀ u̍h blě pɔ̀n chɛ̀-a tìh we̍i̍ bla̍-a Sɛmewlea nyɔ̍-a wlɔ̀ᵻ dɔu di̍i̍ i̍ u̍h-a mu̍ de̍ Juluslɛn.

Felɔ po̍ Itiopea nyɔ̍-a kwǐ klaa nǐ dlǔ

²⁶ Dǒ Joi-a ǐnchɔ̀ sèàɛ̍ Felɔ wlùh, ɛ̍ la̍a̍, “Sɔ bloɔ̍, pòɛ̍ɛ̍ kɛ̍n wìè ɛ̀ sɔ-a dǒ Juluslɛn ɛ̀ mu̍-a kwe̍na̍ we̍ dǒ Kesa wlɔ̀ di̍i̍-ɛ, ìè ɛ̍ gba̍.”

²⁷ Wɛ̀ ɔ̍ gba̍ wìè laa̍, dǒ ɔ̍ jɛɛ kɔlu̍-a poa-nyɔ̍ due kɛ̍n dǒ wìè-i. Kwǐ klaa bo dě Itiopea bloa̍ kɛ̍n. Nynɔ̌ ɔ̀ blě-a Itiopea nyɔ̍-a wlu̍ kwa̍-a, jɔ̍gbau laa̍ bo ɔ̀ nu̍ dǒ ɔ̍ kɔn-dɛ̍ᵻ we̍ i̍ gbɛ̀n nyɔ̍. Nɛ̀ ɔ̍ sɔ Nyɔsoa wɛɛ sà la̍ dě Juluslɛn.

²⁸ Nɛ̀ ɔ̍ tè i̍ dě ɔ̍ kɛ̍n naɛdɛ̍ di̍i̍ wɛ̀ ɔ̍ mu̍. Nɛ̀ kǎ ɔ̍ slè chlǐh-dɛ̍ ɛ̀ Nyɔsoa-a tu̍owli po̍ nyɔ̍ Asaia chlǐh-aɛ.

²⁹ Wɛ̀ Nyɔsoa-a Sùù la̍a̍ dě Felɔ we̍, “Mu̍ iě kɛ̍n naɛdɛ̍ laa̍ i̍ kɔǎɛn.”

³⁰ Wɛ̀ Felɔ gba̍ ɛ̍ ple̍-ɛ wlì, dǒ ɔ̍ wɔ̌n-ɛ jɔ̍gbau laa̍ ɔ̍ wlu̍ nɛ̀ ɔ̍ slè Nyɔsoa-a tu̍owli po̍ nyɔ̍ Asaia-a chlǐh-dɛ̍. Wɛ̀ Felɔ la̍a̍, “Dɛ̍ àn slè-aɛ, àn wɔ̌n ɛ̍-ɛ i̍ ae?”

³¹ Iě ɔ̍ la̍a̍, “Ǐn se̍-a nyɔ̍ blě ɔ̍ iě-a ɛ̍ we̍ i̍ sèàɛ̍-ɛ, nɛ̀ ka ǎn mu̍ ɛ̍-ɛ i̍ wɔ̌n-ɛ nu̍ ɛ?” Wɛ̀ ɔ̍ dǎ Felɔ ɔ̍ iě ɔ̍ pùn tè la̍ ji̍ dě ɔ̍ we̍ kɛ̍n naɛdɛ̍ di̍i̍.

³² Nyɔsoa-a wlu̍-a chɛ̀ ɔ̍ slè-aɛ, kǎ ɛ̍ nu̍ ka nɛ-ɛ. “Blawɛ̌ ɛ̀ u̍h-a gba̍-a dbǎ la̍-aɛ, ɛ̍ bo ɔ̍ wɔ̀. Blawɛ̌ jǔ ɛ̀ kɔn mǐ u̍h ja chɛ̍n-ɛ wɛ̀ ɛ̍-ɛ wlu-aɛ, ɛ̍ bo ɔ̍ wɔ̀. Ɛ̍ kɔn ɔ̍ se̍ wɔ̍n-a fuɛn nu̍.

³³ U̍h bla̍-ɛ ɔ̍ plǔh, iě ɔ̍ se̍ we̍ tǐn nyɔ̍ kɔn. Ɔ̍ se̍ wɔ̀ɔ̀ kɔn nɔ̌ kmɔ̌ we̍. Dɛ̍nu̍ɛ, ɔ̍ wǐh nɛ-a da̍a kmɔ̌ la we̍-ɛ, i̍h chɛ̍n dlǔ i̍ wɛ̀.”

³⁴ Kwǐ laa̍ iě ɔ̍ tèle Felɔ i̍, ɔ̍ la̍a̍, “Dbǎkà, sèàɛ̍ ǐn wlùh, nyɔ̍ kɔn tìh bo tu̍owli po̍ nyɔ̍ la ɔ̍ sà-a nɔ̌ chlǐh-dɛ̍ la di̍i̍ ɛ? Ɔ̍ chɛ̀ bo ɔ̍ dǎ ɛɛ, àe̍e̍ nyɔ̍ dɔɔ bo ae?”

³⁵ Felɔ tè-a wlu-ɛ gbɔ̀-ɛ, dě Nyɔsoa-a wlu̍ laa̍ we̍ bo ɔ̍ dǔ-iɛ. Wɛ̀ ɔ̍ sèàɛ̍ kwǐ laa̍ wlùh dǒ pɔ̀n chɛ̀ ɛ̀ kɔ̍-a dǒ Jusu pùn i̍-ɛ we̍.

³⁶ U̍h klɛɛn-a dě wìè nya̍-a, wɛ̀ u̍h jɛɛ nǐ kɛ̍n. Iě kwǐ nyɔ̍ la̍a̍, “Ɛ̀ la nǐ bo wa. Ǐn se̍ nǐ dlǔ po̍ mu̍ da̍a duedɛ ae?” [

³⁷ Wɛ̀ Felɔ la̍a̍ dě ɔ̍ we̍, “Pò ɛ̍ tù ìn po̍ ɛ̍ tìh chɛ̀ dǒ ìn pɔluh kɛ̍n-ɛ, nɛ̀ àn mu̍ nǐ dlǔ po̍ wa.” Iě jɔ̍gbau la̍a̍, “Kǎ ɛ̍ nɛ, ǐn po̍ ɛ̍ tìh chɛ̀ ka Jusu Klai nu̍-a Nyɔsoa-a Jǔ-ɛ.”]

³⁸ Kwǐ laa̍ wɛ̀ ɔ̍ sèàɛ̍ ɔ̍ bli̍a nyɔ̍ wlùh ɔ̍ iě kɛ̍n naɛdɛ̍ laa̍ i̍ nyna-ɛ. Iě ɔ̍ ke Felɔ sǐ bloɔ̍, wɛ̀ u̍h mu̍ dě niɔ̍, iě Felɔ po̍ ɔ̍ nǐ dlǔ.

³⁹ U̍h sɔ-a dǒ niɔ̍-ɛ, wɛ̀ Joi Nyɔsoa-a Sùù gba̍ Felɔ. Sɔ jɔ̍gbau se̍ ɔ̍ jě dɛ. Jɛ mɔna̍ dɔu blě ɔ̍ nu̍-ɛ iě ɔ̍ mu̍ ɔ̍ blǐ.

⁴⁰ Felɔ iě-a ɔ̍ chɛ̀ jě-ɛ, nɛ̀ ɔ̍ nɛ dǒ Asotu wlɔ̀ di̍i̍ wɛ̀. Iě ɔ̍ na wlɔ̀ᵻ kli̍hgbɛ̍ we̍, wɛ̀ ɔ̍ bla̍ pɔ̀n chɛ̀-a tìh we̍i̍ te̍e̍ iě ɔ̍ nyni̍ dǒ Sɛsewlia wlɔ̀ di̍i̍.